日本中部之旅(十)大膽.......車【16/4 - Day 5】

四周圍都冇車&人, 揸大膽車一流!!

由溫泉酒店出發我地第五日既行程, 今日就應該會輕鬆少少, 因為冇咩地方會去, 只係會途經一個溫泉, 之後, 就會進發去人地話"最美麗的第七天"取景既地方白川鄉去!!

我地先經過一個深山莊既地方浸一浸溫泉先, 由於友伴身體不適, 我當然要照顧佢啦, 所以就由得領隊Henry同Daisy佢地兩個浸, 咁岩見到溫泉旁有個停車場, 由於閒日關係冇車泊係度, 於是我就提議趁領隊浸溫泉個時, 就由技術麻麻既我充當駕車教練一陣, 教友伴揸下車!! cool, 友伴感覺相當興奮!! 話晒平時都係做乘客居多, 好少做司機, 難得可以落場練習下, 都不失為一個好機會!!

哈!! 一開始當然係咁e講解下基本原理先啦, 由於我地揸既係自動波既關係, 操作上比棍波簡單好多, 由於成個停車場都冇其他車&人, 可以由佢四圍舞!! 當然啦, 驚險場面就少不免, 但係一切都總算有驚無險, 玩左成粒鐘, 領隊Henry&Daisy終於都返黎!! 大膽車遊戲都要告一段落!!


之後就繼續我地既行程!! 我地先到新穗高附近既吊車站, 個度係可以坐到雙層吊車上到雪山, 再浸溫泉, 不過領隊Henry一早已經見過價錢, 佢話搭一搭呢架吊車都成兩舊水左右, 好似貴左少少, 所以我地只會係車站參觀下兼食Lunch, 呢度日本成日浸溫泉, 點解冇得食個d溫泉蛋, 哈, 咁岩係車站門口就有間小食店話有溫泉蛋賣兼可以俾你一邊享受足浴, 一邊食溫泉蛋, 不過, 我地食食下覺得, 個隻雞蛋似係佢自已用煲蒸出黎多過似用溫泉水整熟多!! 不過是但啦, 浸住腳食蛋又幾得意既!!


食完蛋蛋之後, 我地就再出發去我地下一個目的地 - 白川鄉是也, 揸車時, 途經一個遊樂場, 遊樂場本身冇咩特別, 不過, 遊樂場正正被一大群櫻花包圍住, 成個意境都好靚, 於是我地就落是係遊樂場附近行下影下相!!

(待續)