日本中部之旅(七)高山夜祭【14/4 - Day 3】

浸完幾個溫泉之後, 成個人都滾滾地, 跟住我地又要拿拿聲趕路啦!! 因為今晚我地將要去參觀係高山一年兩次只係會係春秋兩季舉行既祭典 - 高山祭是也!! 所謂既高山祭就係日本人會將佢地既十二部祭台花車沿住已定路線黎巡遊!! 呢個高山祭會連續舉行兩日, 其實今日下午已經有正式開始左, 不過夜晚會仲有個夜祭!! 所以我頭就拿拿臨先揸車趕去民宿安頓好d行李先再出去!!

今晚我地4個人一間房!! (當然啦, 間房都幾大下!)
(呢d相都係由友伴提供)
好攪笑架, 佢地d花車, 原來全部都會收藏返係民居入面, 佢地會特別製造一個特別既地方安置部花車!!

由於巡遊路線附近既街道都會有封路措施, 所以我地都要係一d比較遠既地方泊車, 再行過去巡遊地點!! 行左一段路之後, 見到前面火光紅紅, 終於到達其中一段既巡遊路線, 一台台既祭台花車由7-8個人一邊拉住, 一邊推住向前行, 由於整條小巷都沒有任何街燈, 憑住我呢d低能DC影出黎既多數都係濛濛瀧瀧咁!! 幸好有Anna用佢部相機, 加上佢既攝影技術, 影到好多靚相!! 上網睇返d資料, 原來日本人對個d祭台花車好鬼重視架, 由於d花車全部都係由木製既, 只要個天有毛毛雨既話, 佢地都會取消個花車巡遊!! 係高山祭前一日, 其實個天都時不時都落住毛毛雨, 我地都幾驚佢會取消左個巡遊, 如果真係取消左, 我地就真係白行一趟啦!!

又見到飛驒牛!!
大家見到右上角紅色background個漢堡包呀, 係4層既漢堡包呀, 呢個就係我今晚既晚餐啦!!
4層漢堡包既真身!!

由於我地趕住去睇呢個夜祭, 我地全部都未食夜晚飯架!! 一做完個夜祭都已經大約10:00p.m左右, 大家係超級肚餓, 再加上街上既氣溫當時應該得返8-9度, 我地真正體會到咩叫饑寒交迫呀!! 大家都知基本上, 日本d舖頭好鬼早關門, 我地想搵間餐廳食都唔多見, 突然間我地係街邊聞到一檔香噴噴既串燒味, 大家好似餓鬼咁飛撲埋去!! 唔理幾多錢都一人整左一串先!! 總算有d野塞入肚!! 不過區區一串又點夠頂肚呀!! 於是我地就去左一間24小時營業既老麥, 由於我同Anna實在太肚餓, 所以我地就叫左個4層漢堡包黎食!! 唔食講笑, 食完之後, 又真係好飽下!!

正所謂"飽暖思床褥", 食飽飽之後, 又係時候返去民宿度執野訓覺!!

(待續)