日本中部之旅(九)九曲十三彎之旅館【15/4 - Day 4】

拎得好辛苦, 終於去到房啦!!

好彩, 我地由高山去到平湯溫泉呢邊都只係個零鐘頭就攪掂!! 話咁快我地就由高山去到我地今晚要訓既溫泉酒店(ひらゆの森), 呢間酒店都幾靚下, 不過由reception行到我地房個條路, 可以話係九曲十三彎, 又遠又多轉彎位, 再加上佢地全個地面都係舖晒地席, 而我同Anna都要搬個行李喼返房執下野, 即係個喼唔可以放落地下拖住行返去啦!! 唯有就靠我呢個苦力一口氣由門口reception一揪就拎起兩個喼直奔返房, 揪住兩個喼行個段路真係差不多想走!!


其實係日本基本上都好鬼早就食飯, 差不多6點我地安頓好晒d行李後, 換埋件浴袍就落去飯堂食飯, 我地落到飯堂已經有好多人食緊飯, 我地應該係最遲落黎食飯個一班人!! 今餐又係好多野食, 黎左幾日, 基本上餐餐都好豐富, 有時d餸太好味, 都不自覺地會添飯(平日我只係食一碗飯!!), 一如之前個兩日咁, 食飽飽休息一陣, 我地又出發去浸下溫泉, 話晒黎度呢間溫泉酒店, 只係訓一晚唔去浸既話就真係蝕抵晒!! 由於, 酒店四周都係冇咩野行, 所以我地都幾早訓覺!!


第二日的早餐, 又見到有麵豉小火爐, 佢地真係幾鍾意用麵豉撈飯食個喎!! 係酒店reception旁邊有個位置zone左出黎做賣手信, 大家好似著左魔咁, 起勢咁買, 連平日好似我一樣好少買野既領隊Henry都忍唔住要出手, 最後發覺Henry&Daisy買手信既總金額仲貴過佢地住酒店一晚, 佢地前後係呢間酒店買左大約12000円手信, 但係訓一晚溫泉酒店一個人都只係8000円(HKD$608)!! 好誇張下!!
我地呢幾日既戰利品+行李都已經塞滿晒個車尾箱~~

瘋狂購物完畢, 我地又再一次出發我地既行程啦!!

(待續)