特此通告

由於考試在即, 本人將要自閉一段日子, 故本blogger亦將會於12/12 /2005 - 23/12/2005 休市.....

特比通告

入伙酒 + 生日大典

琴日, 我地去左jackie新屋企恭喜佢新居入伙, 同時順便慶祝小貞貞生日。我地送左部有燒烤function的微波爐俾jackie當係佢新居入伙禮物, 話晒先前我新居入伙, 大家都送部DVD錄影機俾我, 總之, 有邊個新屋入伙, 我地都會送件電器俾佢。

我地的所謂入伙酒其實之不過係打邊爐, 其實, jackie佢之不過搬左入新居都係1個星期左右, d野都未拾好, 佢地只係將d野塞晒入個櫃度先, 再慢慢執, 所以琴日去到佢屋企, 第一眼望落去都幾乾淨, 點知一打開o個d櫃通, 成個第3次世界大戰咁, 亂到呀...!!!

可能jackie知道自己係屋企女主人的關係, 定係感激我地送部微波爐俾佢呢, 佢琴日係好難得咁自動自覺自己做家務, 琴日我地買完d火鍋料上到佢屋企之後, 佢就自己開始屈係廚房度洗菜, 切野呀!!! 我地個個都好驚訝, 平時叫佢做少少野都吱吱左左, or 平時佢一定唔會入廚房攪野, 好難得琴日我地幾個都可以坐係個廳度唔駛做。

到最後尾聲, 我就去廚房準備點臘燭拎個生日蛋糕出黎同小貞貞慶祝啦!!! 點知小狗, 佢唔知係唔係食飽塞住個腦, 冇拿拿同小貞貞講：『 不如, 我地食蛋糕羅』, 原本諗住俾個surprise俾小貞貞, 點知有人講左出黎, 都算啦, 我叫奶奶幫我手, 當我拎出去個時幫我熄左廳個d燈, 點知佢又傻下傻下, 熄左我個廚房d燈, 嚇得我呀!!! 不過, 都有人立即補飛, 熄到廳個d燈, 哈, 都算係幾o.k呀.....哈, 咁就大家一齊唱生日歌, 同食個birthday cake, 除左個cake之外, 仲有jackie煲左個超"杰"的腐竹糖水俾大家食, 成煲野好似我嘔出黎個d嘔吐物, 雖然賣相差d, 不過都幾好食(起碼食得落肚)。

大家臨走時, 個jackie就話多謝我地去佢屋企, 佢就一人送一樣野俾我地, 我一放上手就知係咩黎, 哈, 還記得早2,3年前, 佢生日, 我地夾份係"Lush"買左一舊有半個衴頭咁大的番皂俾佢當生日禮物, 佢到家陣都未用到, 琴日, 佢就係我地食緊生果個時, 就靜靜雞入toliet將個舊番皂鑿分左幾件俾我地, 呢就係呢件............>


琴日, 都總算好開心, 不過, 我都係開心埋今個星期, 就要開波溫書, 因為好快就exam....

期待的12月

前日, 我地曼谷自由行4小龍終於出黎聚一聚, 當晚, 我地去左『創興』打邊爐, 其實今次出黎最主要目的係想係出發前互相認識。唔知, 係阿恩男友仔冇咩野講, 定係我太多野講, 成晚好似我開show咁, 不斷講野, 真係水長流, 不過, 我諗係佢地唔係太熟姐, 所以, 都唔係有太多話題。希望到時, 去旅行o個時大家都有多d話題啦!!!阿dor隻腳都幾令人膽心, 佢家陣要用到止痛藥黎止痛, 到時去旅行時, 唔知佢捱唔捱到呢!!!希望佢冇事啦, 話晒後生世女, 應該唔會咁雞呀....仲有阿dor小姐, d地理常識比想像中差喎, 佢好似唔係好識分曼谷同布吉分別, 佢以為由曼谷去布吉, 起咁e搭個零鐘頭車程就去到, 真係攪笑!!!(實際, 應該要搭內陸機先可以由曼谷飛到去布吉), 開頭佢以為今次會係有陽光與海灘, 但當佢知道今次以shopping and spa為主, 佢個樣好似有少少失望, 我都覺得唔好意思, 好似達唔到佢期望摡目的, 不過, 佢好好咁話佢冇所謂。不過, 我都明, 佢都唔好意思, 依家先話唔去, 不過, 阿dor妳放心, 今次妳去得, 我包妳一定好玩, 如果, 唔好玩, 返黎香港我退返錢俾妳.....我話摡.....

家陣, 要開始plan我地去曼谷行程, 早兩日用$39蚊買左本去曼谷旅行書, 呢幾日要勁煲勁煲先得, 仲要上o下dweb-site search下有咩特別野玩(p.s 各位朋友, 如果去曼谷有咩特別野玩, 可以留言 or send e-mail話我知, 多謝!!!記住, 記住, 唔係叫你地留言叫我買手信, 但凡係呢d留言的話, 一概我都會delete左佢)

總之, 家陣, 快快手考完試, 就馬上就去飛啦......waahahhahah, 12月我黎啦......

p.s....各位朋友, 同大家講句先, 今年聖誕, 我唔係香港, 唔好問我今年聖誕有咩攪, 你地自己約啦, 今年我唔攪christmas party架啦!!!wahahha.....因為, 有個炎炎夏日的聖誕係曼谷等緊我呀!!!(咁大家個仔都係第一次, 唔係香港過聖誕, 覺得好型, 好威添!!!)

仲有emmy, 妳去korea旅行小心凍死妳呀, 我就唔同啦, 去曼谷過一個暖洋洋的聖誕........cool......

完啦...乜都完啦...終於完啦!!!

經過漫長功課高峰期, 今個sem d assignment終於交晒, 今個sem簡單d黎講可以話完啦!!! 家陣, 就係等exam, 12月12日就係考第一科, 23日就埋第2科。

雖然交晒d assignment, 不過, 呢兩日(sat & sun)都冇得休息, 俾阿媽捉左去做物流, 事緣-->本人的阿公, 早前去世, 他本身所住的公屋將要交還政府, 故此必須將其家居清理及還原, 而有關家俱就由各位舅父, 姨媽, 阿姨等分配, 琴日就將屋企入面d吊櫃, 冷氣機, 雪櫃......等拆卸及包好, 並分配好邊個要邊件。 今日, 我就同兩位舅父黎個新界一日行大運(因為, 我d親戚都係新界人--->沙田, 大埔, 上水等.....), 將各物資分配到各親戚成員屋企。

今日, 真係做足全日搬運工人, 朝9晚5, 我自己返工都冇咁早開工!!! 今日第一站就去左二舅母屋企, 嘩!!! 佢屋企就勁羅, 大家有冇睇個廣告, 個廣告話有個阿伯好鍾意執野返屋企, 屋企d垃圾堆積如山, 佢話自己合埋雙眼都行動自如, 點知黎手就『仆x』o個個廣告呢。 我二舅母屋企, 就同佢個屋企個情況差不多, d野多到, 唔好話佢屋企係得『單程路』, 搵條小路行下都幾辛苦, 我差d要學史泰龍係『第一滴血』的森林入面咁, 拎把『老牛』出黎開條生路先入到去佢屋企。d野多到...真係非筆墨能所形容。第二站就入左去大埔大舅父屋企, 佢屋企, 我對上黎個時應該係起碼有18年前的事，今日真係送野先會上佢屋企, 真係好難得, 下次再上佢屋企, 都唔知會係幾時的事。

今日攪下攪下, 真係成5:30先返到屋企, 立即沖返個靚涼, 爽晒!!!
黎緊個星期都係休息下先........之後, 就要開始prepare 個exam......

兩年冇見

琴晚係我地GV員工BBQ大日子, 係我讀緊polyu, 未畢業之前係做part-time戲院架, 即係個d拎住個爛鬼電筒指住"老練"咁遠個seat位話:『你坐o個邊, 自己行過去啦!!!』o個d戲院帶位員呢!大大話話都做左兩年。 其實做呢份part-time有好多好處, such as 可以唔駛錢食爆谷 & 飲汽水(由於, 當時食得太多的關係, 所以家陣去戲院見到爆谷 & 汽水, 有少少想嘔感覺, 開始對爆谷 & 汽水有少少反感), 當然啦, 可以免費睇戲都係一種福利啦!!!所以, 呢份part-time都幾好做架....

其實年年都係katherine攪年聚(即係一年一次BBQ, 真係得一年先得個一次, 唔會有多), 上年, 佢就miss左冇攪, 今年再攪返, 約返晒d人出黎, 真係個個都唔同晒。















其實, Total有成15個人, 不過, 有d就早走左, 冇大合照, 希望我地一年一聚, 下年再黎過啦....

專業

2005年11月7 日-9日, 呢幾日, 日以繼夜幫eddy手考牌,
等我講下咩叫做考牌先(因為, 呢幾日, 個個都係度問----->o下!!幫人考試, 咁都得架咩...???)
其實, 所謂考牌, 係我地"建築測量師"入面黎講, 可以叫做係專業試, 點解要搵人幫手呢,
每年學會(HKIS)都會有個practical task test, 呢個test, 就好似一份assignment, 但係就得個3日時間去做, 之後到第4日就要做個presentation。
平時d assignment都係有成2-3個月做, 家陣得個3日, 所以咪要搵helper羅!!!

好!!!講下個幾日d慘況先:

第一日, Eddy同Alan就走左去HKIS總部拎Question & Brief, eddy就走去左site inspection, Alan就返黎office的奮鬥房開始晝個building layout, 中間細節就唔多講, 總之第一晚我地就零晨3:00先係office走。

到第二日,由於我冇請假關係, 我就9:00返到office做野, Eddy, Alan & Flying(佢地都請左假)就11:00左右到奮鬥房, 繼續埋頭苦幹。 Eddy就做到零晨4:00左右返屋企小休一會, 呢晚就死啦, 我地3個做基本上都冇走到, , 我就因為第2日要出site就所以係朝早7:00返一返屋企沖個涼, 換件衫, 就又再返office, Alan & Flying就冇走過。

第三日, 我都還好起碼叫做返屋企沖過下涼, 換過件衫, Alan & Flying佢兩個由第2日的11:00開始到第3日足足有成36小時stay係 office, 冇返過屋企, 佢地應該已經變左做人乾。d board由原定下午起貨, 攪攪下拖到夜晚8:00先攪得掂…..總算攪掂, 呢晚, Eddy有3位阿sir幫佢, 聽佢pre-present 一次, 再俾comment, 攪攪下都成11:00, 之後, 其他人走晒, 得返, 我, alan, eddy, leo, 仲有connie, eddy話食埋個消夜先走, 於是就叫外賣啦!! 頂你呀, 個外賣成粒鐘先送到黎, 咁我地快快手, 食完就返屋企休息。

呢3日, 真係想死…..但係同時都學到好多野…

一週短評.....

今個星期都好似好唔想做野(可能上兩個星期趕project做到虛得濟), 冇咩心機做野, 成日個人都腎下腎下咁。

星期一
Kenix終於係澳洲返左黎, 佢買左好多野食返黎, 哈, 正!!!(不過, 就買唔到澳洲版百力滋, 因為先前, 我去北京旅行就買左盒北京填鴨味百力滋, anthory去日本就買左盒墨魚丸百力滋返黎)仲有我地ST2-C(2-5)都一人有一份禮物, 太好啦.....thx so much.

星期二
由於星期三, eric生日, 佢份禮物又未買好, 所以, 放工打完籃球之後, 同simon去左又一城shopping買禮物。最後, 就買左件nike褸。

星期三
eric正日生日, Lunch去左新世紀6樓的金牛苑食, o.k快, d野食上得好快, 但都唔錯, 位位$75...

星期四
冇咩特別

星期五
老姐同我講, 佢話佢係smartone個d乜鬼VIP, 家陣有d零機價手機益佢, 佢就叫我老綀咁遠入去將軍澳 話俾部我, 最後, 選左部Nokia3230, 除左部手機之外, 仲有樣野附送就係3大包紙尿片, 俾佢點我拎袋紙尿片返屋企, 唔係睇在部電話份上, 我真係鬼彩你....
係我回家途中, 接到Jackie電話, 佢話想行EKIA, 咁我又岩岩搭緊MTR返屋企, 咁就係九龍灣落車join佢一齊行下, 行下行下都成9:30, 之後就走左去大排檔食野。

死亡之週x2

哈...又好耐冇寫個blogger....不過, 過埋下兩個星期, 就應該會好好多。

何解叫死亡之週, 因為黎緊個兩個星期, 真係忙到嘔。

Week 1
首先下星期一至星期三, 就幫eddy考牌, 連續3日不眠不休, 到星期四就到自己份maintenance project要 present, 星期五放工就要入將軍澳家姐個度食大甥女 &小甥女的生日+滿月(bb-->10月10日生日, 甥女 -->11月11日生日), 哈!!兩姐妹生日都幾好記....到星期六, 就約左舊時係青衣戲院做part-time個班舊同事BBQ。

Week 2
星期日仲未有得休息呀!!!因為, 先前星期四present個份assignement, 就係present完後o個1個week就要交埋份report, 仲不特止, 係同一個week的星期五仲要交另一份assignement(Profressional Studies III), 咁即係話, 星期一至四我就要一口氣攪晒兩份Assignment (不過, 好彩, 兩份都係group project, 希望唔駛咁辛苦啦!!!)


換句說話, 我即係兩個星期後的今天(星期六), 先可以有時間 & 精神再寫blogger。

秋風起

今日, 天氣跌到20度, 開始有少少涼////

琴日, 上阿達屋企, 進行左我地一年一度大閘蟹宴, jessica唔記得坐坐各位都係熱血方剛食肉獸代表, 佢就咁拎個4包10件裝灣仔碼頭黎, 邊樹夠食呀, 幸好, 我同阿牛一早估到係咁. 所以就岩岩經過一間麵舖, 買左2打雲吞, 都幾貴成$24一打, 不過, 最後食落又真係落足料, 大大粒, 成晚最搶手就係d雲吞。

琴晚就勁啦!!!d大閘蟹真係好掂, 有一手, $70一隻大蟹, 唔算好貴。


味道呢家野, 好難用文字表達, 不過, 就現場圖片所見, 各位, 都將隻大閘蟹分屍咁, 簡直係屍橫遍野。

講講下, 岩岩諗起, 秋冬起, 不如攪番個蛇宴都好喎////好下個主題活動就攪蛇宴///wahahha

星期五 & 星期六

原本岩岩個星期五晚, 約左阿恩食dinner傾下去曼谷旅行的事, 佢話8:00p.m之後先得, 好啦, 我留係office等佢, 到左7:30p.m左右, 諗住起程, 點知就收到佢電話, 佢話今日放左工頭痛返工屋企訓左陣, 點知一訓就訓到依家......唉, 吹脹, 好彩我冇係銅鑼灣得佢姐, 唔係就真係傻仔...之後, 仲要話唔出黎得唔得, 你都咁講, 唔通我仲要迫你出咩, anyway, 小心身子啦....

好景不常, 係第二日, 星期六, 約左jessica & 牛2:00 p.m, 諗住一齊食lunch, 之後, 走去拎大閘蟹啦!!好, 於是我又係office等佢地啦, 我到1:45左右, 正想諗住出發, 牛就打俾我, 話jessica仲訓緊(你老闆!!!), 牛又話唔餓(之後, 佢就陪ivan食lunch), 咁我就搵左eddy食lunch, 食到差唔多3:15, 牛佢地就話未得, 咁我就去個d漫畫cafe打發時間, 等下又等下, 我地最後, 都成5:30p.m先去到舖頭拎大閘蟹, 早知係咁, 我就一早返屋企先啦.......唔駛有成差唔多5個幾鐘係條街度, 無無聊聊...

頂....連續兩日都俾人發飛機......香港人d時間觀念真係越黎越差.....

抱打不平-->cheap友

好耐冇寫blogger, 因為琴晚岩岩先攪掂兩份assignment, 前個幾日,簡直生不如死, 連星期六 & 日, 都死返公司做assignment(因為, 屋企太大誘惑, 做唔到野; 望到張床, 就走去訓下, 見到個電視就走去開下, 真係唔係好掂當。 所以, 都係返公司靜靜地做野)

今日, 講d cheap野先, 話說, 隔離team有人轉組, 呢位人兄, 平時聽聞已經成日過去regist個邊, "痴"飲"痴"食, 好似早兩日之麻, 出面個Chief請出面班regist食野(有"痴"飯, 不過, 都唔明晨早流流食咩飯!!!仲有個Amy學人話自己好食得, 成舊"痴"飯食晒, 下午咪走左去sick leave, 雖然佢話同舊"痴"飯冇關係, 但係我覺得佢講大話!!!), 點知個條友仔, 又唔知邊樹收到風, 出面有野食, 佢又走埋出去痴, 仲唔止, 自己食之餘, 仲要叫埋自己個team人食, 攪到原本應該有得食的regist有部份人冇得食....你話cheap唔cheap......

咁通常, 走個位人兄(上面個位cheap友)都好正路請office所有人食西餅, 呢個亦都係一個慣例, 雖然係隔離team, 不過, 平時都有兩, 三句(就係hi, bye & good morning), 如是, 琴日我地team都同佢食返餐farewell(其實, 都唔係咁想去)。今日, 佢差唔多走, 佢冇請食西餅, only係請d雞屎咁大件的日式紅豆餅(零食物語個d)(我平時呵個d都大舊個佢啦!!!!)俾人食...cheap到....仲有...佢請佢自己個team人食tea, 叫外賣, 頂你, 我地話晒琴日請你食左餐, 你都係咁易請我地食返tea or drink, 咁都冇....今次真係蝕......蝕晒.......

我聽日就會去食大閘蟹.....wahahah.....發達啦, 唔係因為有得食, 係終於有得玩下啦....!!!

我為人人, 人人為我

上個post提到件波衫, 今日就講下件野係俾邊個, 就係同組同事simon兄, 佢琴日21號正日生日, 我, eric, kenix & anthory, 就夾份送件波衫, 個件衫真係好大, 係2個加大(XXL)。呢排simon兄為左份dissertation好煩惱, 悶悶不樂, 前日仲攪到頭都唔gel, 成個生意失敗咁(死啦!半年後我份dissertation就開波, 唔知我係唔係都會咁), 琴日, 送件禮物俾佢時, 佢成個人醒晒咁, 生日都係開心d好...!!!哈....

再講下佢件波衫, 件野係eric兄係yahoo bid返黎, 佢就約左條友仔係7:00p.m上環MTR交收, 點知佢就唔得閒, 就叫我去拎, 我事後諗返, 我係俾錢o個個, 點解我仲要山長水遠俾錢人駛, 唔係應該佢過黎送貨我架咩...呢d服務態度唔得架啦, 不過, 今次唔係為左simon兄, 你真係慳d, 下次叫你送埋去我屋企。所以, 星期四o個日, 放左工都冇得走, 要留係公司呆多成粒幾鐘先走(我5:00p.m收工架), 原本諗住早d返屋企, 都冇得早返。













呢班就係我同team的同事, 大家都好好玩, 呢張相係好難得影到,因為, 我係公司都成年幾, 都唔試過同team齊人影相!!!今次難得齊人, 影返張全家福.....

無題

-----> 經過幾日的一路苦命搏鬥, 終於完成左第一個present, 總算功德無量!!! 算啦, 辛苦野, 都唔好係呢到講, 唔係遲d, 睇返自己睇返, 又諗返起d辛苦回憶。不過, 下星期有兩份assignment要交, 一波停完, 兩波又起.......

----->陳先生同牛小姐係塞班島返黎, 好想睇下佢地個d陽光與海灘d相....應該會好靚。

----->星期兩個晚, 留係公司做project, 留到11點幾先走, 係等巴士時, 竟然俾我撞到, 應該話係見到Katherine(我地都成年冇見)(當時情況, 我企係巴士站等車, 佢就係一間慢駛緊的巴士上, 傻下傻下), 間巴士當時係等紅綠燈, 所以慢駛, 大家你眼望我眼(大家隻眼都張到好, 跟住手指指, 好似個d聾啞人仕咁指指點點), 於是, 我就用最現代方法, 撥個輪同佢吹左兩咀。最後, 佢話得閒約出黎呀.....諗諗下, 呢句野咁鬼"行", 我諗都係得個講"字"。當然啦!!! Katherine, 我真係想你約下班友仔出黎玩架....希望你約到啦.....期待x10萬個n次方...

----->今日欣美係澳洲打電話返黎...真有心, 同佢吹左一陣水, 佢話佢d朋友仔全部都係講國語, 佢話死得, 我諗佢好似連中交都講到一舊舊, 仲要講普通話, 死硬!!!

----->呢件係正野---->唔係自己著, 有咩目的, 下個post再話你知

----->聽日, 好多人飛--1) jessica--->美國出差(唔知bd, 有冇機會出trip, 唔好要我成日都係坐架a.m car or contract car去中, 上, 西環區, 人地去美國, 我就去d咁地方)
2) kenix----澳洲深親, 一句講晒手信唔該....你d身後事, 我地幾個會幫你攪, 你去得安心d啦....!!!

我們都是這樣長大的

昨晚與朋友看林狗的talk show---林海峰是但o翁發花癲 。由電台時代的"老人院時間", 已開始認識『軟硬』, 應該是再早一些時段--->報導交通消息, 已有聽到他們的聲音。昨晚, 一開始, JAN就提到的, 在場的人仕都有一定年齡, 都曾經經歷過, 睡在床上聽他們的節目時, 也會情不自禁的笑起來, 是的, 環觀四周, 大都是25-30歲, 原來大家都有同樣的經歷。





簡單的一個台, 一張椅, 一支水, 造就Talk show的場面, 我們看的不是華麗的背景, 聽一把聲, 由細聽到大的聲音, 自香港有黃子華出現做talk show, 之後, 有張達明等等....... 都未曾令本人動心去買飛觀看, 但林海峰這名字卻有一種吸引力.......










p.s(1):jet是本人唯一會收藏的雜誌, 但由於搬新居的關係, 家中再沒有地方放置雜物, 於是本人將其中幾本心愛留下, 其他的都棄掉, 附圖所見是其中一本 (曾聽聞這期jet斷貨)

p.s(2):經本人推介, 同事eric & kenix已去購買陳綺貞新碟, camus & melody我有 sale人去買架....!!!

Hot-Hr(高溫瑜珈)

今晚, 同左jackie去左由黃佩霞開的Pure YOGA試玩(唔駛錢架!!!)。起初, 抱住好大期望去玩的, 因為諗住應該會有好多, 唔好話好多起碼有d靚女去玩, 點知.......唉!!!!!不過, 正所謂, 有得就必有失, 友人jackie深知這情況, 於是在booking的時候, 特別book Margreat(鍾麗淇 - 一位電視actress)所授課的堂, 最basic有一位靚女呀, 哈, 哈!!!原來, 真人近距離睇佢都幾靚架, 與jackie等候上堂之際, 閒談, 說道, 她好像是梁榮忠的girl-friend, 我大膽的提議, 不如, 入到classroom, 大聲唱一句:『全城盡興, 殘酷一叮』睇佢有咩反應。當然, 我地最後都冇咁做啦....容乜易, 俾人踢走, 唔俾我地上堂.....

今次, 我地所玩的是Hot-Hr(高溫瑜珈), 起初以為玩瑜珈會玩到個下巴掂到屎忽個隻, 不過, 可能, 我地都係beginner, d動作比預算中簡單, 都係單腳平衡個d啦!!!但係, 玩Hot-Hr都真係出好多汗(出到成身汗 我覺得好型, 所以, 我都冇咩點抹走d汗, 由佢流落黎, haha)。平時, 有做開運動的我(打籃球), 做完Hot-Hr(高溫瑜珈)冇咩特別感覺, 原先諗住做完之後, 成個人都會比較heavy辛苦, 又唔係喎.....係出多左汗羅!!!可能, 要玩Power(會勁好多, 可能, 真係下巴掂屎忽)個隻先得。

都有D興趣想join, 不過, 就太貴啦, $750 - 5 lcass/per month(仲有一簽就要簽一年), 我一個week已經要返兩晚學, 可能, 要交project添!!! 冇咩時間, 時間 & 金錢上暫時都唔容許我去join呢個activity。下次, 有機會再玩啦!!!

停不了

預計未來呢個月都應該會好忙, 黎緊下星期三, Construction Technology III 就要presentation, 但係家陣都未開波, 都有d驚。Present完之後一個week就要交份report, 係同一個week, Maintenance Technology 又要交Lab report。休息一個星期, 就要幫eddy兄考牌搏殺(11月7,8,9日),死, 之後o個個星期好似又要Maintenance Technology 要present, 再之後個星期就要交埋present份 report, 再次後個星期就應該係Profressional StudiesIII交assignment。呢鋪真係學海無"捱" .........


今日, 同d同事報左名參加2006年渣打馬拉松(十公里), 咁大個仔都係第一次玩馬拉松, 雖然係十公里, 但總算係一個好開始, 之前參加過『環島行』, 家陣, 再參加第2樣公開活動, 身心健康呀!!!! 不過, 今日報名先知, 除左$270蚊報名費, 仲要俾多$100蚊作計時晶片之按金用, 咁即係要成$370蚊, 當然, 按金會俾返我(如果, 我冇整爛的話)。唔知, 到時會唔會見到dodo姐一齊跑呢!!! 佢又會唔會一路跑, 一路叫:『答岩坐定, 答錯冇得X, yeah』.......

繁忙的一天

由於有友人告訴我, 我的blogger過於口語化, 這篇blooger, 本人將會以極書面文法, 包括:修詞, 造句等來表達我文學上修養是多麼, 多麼, 多麼的豐富。謝謝!!!

今天的早上, 是多麼的繁忙呀!!!簡直有點令人透不過氣來的感覺....本人, 嘗試將今天的時間歷程表告訴大家:

10月10日
5:30 - 起床, 梳洗,
6:30 - 離家(坐計程車出發往法國醫院去)
7:00 - 已到達醫院(比預期中的快)
7:30 - 與姐夫到醫院餐廳, 吃個早餐
7:45 - 於等候室, 靜待小BB的來臨(姐夫於等候其間, 說到一句:『為什麼會那麼久還未出來呢?』她的母親就回應一句：『你猜這是書包打開拉鍊取東西吧?什麼會那麼簡單的呢?快的, 快的, 不用急』
8:30 - 護士小姐將BB將產房推出來, 並叫道:『誰是吳嘉慧的親人呀?』於是, 我們一行三人, 就湧上前, 為著小BB歡迎, 本人為BB拍照, 姐夫則為BB拍錄像。 她的出現, 尢如明星到訪, 身邊有很多記者拍照, 訪問(當時, 本人就充當了記者)

<---- 你們看她那大大的嘴巴,還有那尚未打開的靈魂之窗, 噢!!!是多麼的令人明白到何之為"性本善"!!! 9:00 - 返回公司工作 9:30 - 於公司的Lotus notes收到mandy之電郵, 於今天下午lunch time將各組的project合併在一起才遞交。 10:00 - send sms給各好友有關晚上食飯事宜 10:30 - 梁sir與本人商討有關山頂的檔案 11:30 - 將組員send給本人的project print out並整理 12:10 - 到先前與同學們相約的集合再整理各project 12:30 - 原定與欣美及其他同事食Lunch(因欣美將離職), 但由於project尚未完成未能出席 13:00 - 與同學們一起食飯去 14:00 - 再次投入工作, 此時, 梁sir再一次與本人商討有關山頂的檔案 15:30 - 工作 19:00 - 正式離開公司 19:30 - 到達cow的公司 19:45 - 到達吃晚飯的地方(福滿樓), (價錢尚算合理, 環境不俗) (其實今晚的聚會的目的是thomas & molady birthday, 生日快樂呀!!!!) 22:30 - 各人, 各自回家 22:45 - 上車牌坐巴士回家 23:15 - 發覺自己坐錯巴士(應該坐102號巴士, 但好景不常坐了112號往蘇屋村的), 於是在長沙灣下車, 幸好有輛702號巴士經過, 於是立即登上。 23:45 - 到達家中 10月11日

00:05 - 有人按門鈴, 於是應門, 原來是樓下21及22樓的住客, 因樓上有人棄置煙頭及煙灰, 弄污樓下各住戶之窗台, 故希望到樓上查個明白(事件, 之前已擾攘達3個多月, 投訴亦無人理會), 由於樓下已忍無可忍, 於是逐家逐戶查出問題戶, 並於詢問完各戶後, 再請該受影響之住戶一同再上一層, 再問, 大大話話, 到了30樓, 我們已浩浩蕩蕩集合成10多人了, 於30樓的住戶, 與該住戶傾談數句, 該住戶已表演不合作。所以暫時, 大家都懷疑是30樓那家做的好事。

01:15 - 大家決定到樓下管理處投訴, 經一番擾攘, 終於停止行動

01:45 - 安安靜靜, 休息....

養精蓄銳, 用在一時

屈指一算, 原定8月的遊船河大計, 終於在2個月後可以實現, 由於經過2次大改期關係, 由原本30人急趺只得14人出發, 同時由兩隻快艇變做一隻快艇。苜先, 講講今日的驚險事先, 原本, cow一早約本人早上7:45在旺角往西貢的小巴站集合, 但我竟然唔知醒, cow打俾我時就發生以下對話:

cow:喂!!!!(好興奮feeling)早晨呀!!!你係邊呀(尾音拉長)...
本人:早!!我咪係屋企羅。(眼尾望到個鐘己經係7:45, 心知不妙)
cow:o下!你仲係屋企呀!
本人:你....你.....你.....等我3個字, 好快, 我飛的出黎...你....你.....等我....
cow:3個字?咁呢3個字我做咩好呀?
本人:咁你入去西貢先羅!!
cow:好啦!!你快d啦!!!(收線)

於是本人用左有生以來最高速度刷牙+洗面+換衫+出門口, 就係呢個時候, 本人忽發奇想, 如果你話我係個d五星戰隊就幾好呢, 平時, 係咁"e", 棟高兩隻手, 大叫兩聲, 就可以變身, 起碼唔係除完屋企衫, 再換出街衫, 仲有唔駛梳頭 & 刷牙添, 因為有個頭盔隔住d口氣, 刷牙都可以慳返。

一落樓就即刻飛的出旺角, 本人只需短短一個鐘已經由荔枝角入到去西貢, 速度之高簡直令人嘆為觀止, cow都不禁講左一句:『嘩, 你咁快架!!!!』



平日, 遊船河都係食下薯片呀!飲下汽水呀! 但我地有兩位專業隊酒員(jessica + 阿達), 佢地竟然提議飲酒, 最終都買左1支黑牌+半打啤酒, 呢班酒民, 真係無酒不歡。不過, 講到今日最好玩的都是牛爸爸的出現(係親生個隻), 佢同我地一齊飲酒玩啤牌, 哈, 哈好開心呀, 爸爸佢仲要隊爆左"畢佬", 未到1點, "畢佬"已經貓左係塊甲板上面, 佢應該諗住攤係塊甲板上面揮發d酒精出黎。今日, 我又學識左一隻"妹", 個名叫"鐵勾船長, 芭蕉樹"好好玩 & 好攪笑(想學的話, 可直接搵我, 好難用文字表達)

當船河到達尾聲時, 惡童阿達, 學人撩船家擘酒, 佢地好似返左去古代, 記唔記得武松上山打老虎個時係用個碗黎飲酒, 佢地就係咁啦!!!成碗成碗隊, 唔係隊, 係灌先岩。於是意外就由此發生, 我都唔想多講.....我都話酒精害人, 總之佢d罪証係我度, wahahhaha

總結一句: 等待左兩個月船河終於完滿結束, 雖然係人少但係成班人都好好玩。

無聊的星期六下午

今日星期六係shortweek唔駛返工, 一早醒來收到家姐send俾我個sms message提醒我黎緊個星期一朝早去醫院幫手接生(映BB相), 要成7:30就去到醫院, 咁講咪要成6點幾起身,嘩.... 死, 聽日仲要去遊船河, 應該玩到死死下, 第二朝就要咁早起身....

打開電視機, 冇野好睇, 於是打開個VCD櫃睇下有咩睇, 因為, 我成日買左d VCD都未必會立即睇, 好多時都係買左之後, 放左係度又唔睇住, 等有mood個時先去睇, 今日睇左一隻兩,三年前買落VCD『藍色大門』, 當時係聽左d friend話好好睇, 所以先走去買呢隻碟, 點知擺下擺下到依家先拎黎睇

朋友們, 所言非虛, 電影本身雖非什麼飛機,大炮, 大場面, 劇力萬鈞電影, 只是一些愛情小品台灣電影, 就是當中漫漫浸出的小品味道, 在懶洋洋下午欣賞這些電影, 整個人都有種relax 感覺, feel so good, 同時, 開始明白, 點解jessica咁鍾意去台灣, 不過, 佢就真係誇張左d, 黎緊好似11月又去台灣旅行, 計埋今次好似係第6,7次去,講緊係2,3年內去6,7次個隻, 佢去傻左啦.....

好, 聽日如冇意外, 應該去到游船河(終於去到啦), 家陣望出去個天都好清, 今日個太陽都好猛, 聽日都應該唔會差得去邊... 殺呀...大海你等我, 12個鐘之後, 我就同你搏個.......wahahahah

回憶往事

琴晚, 係我熟睡時候(當時係8:30左右) 牛小姐打電話俾我擾我清夢, 佢一黎就問我:『你係度做緊咩?』, 我答佢；『訓緊覺』, 佢再問：『你唔駛返學咩』, 我再答：『家陣咪就係上緊堂羅!!!』, 好啦黎到呢度都唔係main point, 佢又再問：『問你一個問題呀!!!我地中四學校秋季旅行去左邊樹???』死....俾佢咁問一問, 當堂成個人醒晒, 我攪盡腦汁起勢咁諗, 諗呀諗... 都係諗唔到, 究竟我地F.4個年, 我地去邊樹呢!!!於是, 我是開始打俾班智囊團(其實都係中學班同學仔), 點知個個都話冇咩印象,黎到呢度, 大家都會問點解會無啦啦會有咁架問題出現架!!!其實就咁架, 黎緊就係牛小姐同陳先生『行埋10周年記念』, 佢地話想回憶一下當年事(好似亞視個套"當年今日"咁)喎!!!

好!!家陣就等我做一做個summary先:
F.1--->大尾篤
F.2--->西貢(馬路邊燒烤爐)
F.3--->好似都係西貢
F.4--->??????
F.5--->赤柱
好啦, 各方好友如見以上文, 同時又知道答案, 可於留言板寫下答案, 一經証實....>>>>重酬<<<<<

閒事三單

家姐講開新baby個名時, 佢搵左好多個, 唔好話佢, 連我咁淵博都唔識的名字, 都唔知佢係邊度搵, 唔係講笑, 個d字讀唔識讀, 就算讀左俾你聽, 你都未必識寫。所以, 我都係提議佢搵個唔好咁複雜的名, 唔係到時, 佢個baby冇人識讀佢名就死啦!!!就係呢個時候, 媽媽講左個point出黎, 佢話駛唔駛夾埋個八字先改名, 家姐話baby個時辰八字(因為係booking開刀, 所以, 可以定到時辰), 無風無浪, 唔會點大起大跌。咁咪幾好, 大上大落, 個人頂得"浦"就話姐, 一個唔覺意好似"大長今"咁3日一件"小挫折", 5日一單"大煱野", 你知啦, 家陣d靚仔, 好鬼死"豪"架麻, 話跳樓就跳樓....都時都唔知點算.....

早兩日咪話中左$20雞六合彩, 今日放工去領獎(好似好誇張添), 我唔甘心啦, 於是就拎個$20蚊再搏過....岩岩對完六合彩, 又中左, shit, 又係$20雞, 有鬼用咩.......真失敗, 俾我中個二獎都好呀, 可解燃眉之急.....次次中$20蚊, 要中幾多次先交到學費.....(心算後)要成起碼中一千次先得(我要交2萬幾學費), 1年得個365日, 仲要唔係日日有六合彩開....等佢開飯就真係死得/////

夜晚, 食飯個時睇左無線7:00個『星期二檔案』講d後生仔, 女過度飲酒, 第一個反應就係想打俾菠菠, 叫佢睇下, 不過, 算啦, 呢個時候佢邊有咁早返到屋企, 我就一路睇就一路為菠菠佢膽心, 我諗佢再飲落去, 都係早死個批!!! 唔知佢鍾意『英年早逝』定『天妒英才』, 都係問定先, 你知啦, 話去就去, 到時買錯左就唔係幾好....個醫生話:『男性1日最多飲4罐, 女性就3罐, 超過左就係超標, 今日無事, 但日後就會後悔, 個人會冇記性, 手震, 成日嘔(食咩嘔咩), 酒同毒品一樣咁利害』<-----菠菠係時候收手啦!!!....想睇返個『星期二檔案』可以去now度睇......

煩.....煩.....煩

第1煩..)
呢幾日, 因為幫eddy手, 已經被困於始創中心15樓1530室有2日之多(由星期五放工起), 今日已經係第3日(依家係偷雞打dairy, 大家都做緊野架!!!) 呢兩日差不多零晨3,4點才於始創回家(第2日, 訓唔夠12個鐘又返始創再做過), 其實, 最辛苦唔係做野, 係個office冇冷氣, 好鬼焗)。原來, 考BS都幾辛苦, 平日, 老師俾功課, 通常都係有成2,3個月時間perpare, 家陣, 就得個3日時間,仲要present, 唔怪得之, 要helper幫手。我都要重新諗下去唔去考牌,不過, 呢d都係2年後的事, 都係到時先算!!!

第2煩....)
今日係星期日, 出面街好好太陽, 我諗下星期日, 我地遊船河應該去到啦掛, 再去唔到, 真係要游冬游, 到時個個著住件潛水衣落水, 都幾堅呀!!!岩岩同菠菠吹左兩咀, 佢話佢搵到兩件去遊船河, 死啦, 我跑唔到數呀!我一個都搵唔到添!!

第3煩......)
就快到交學費dead line, 家陣, 都未籌到旗添......早兩日, 仲等我去馬會買返個六合彩, 睇下o個4千幾萬, 有冇我份啦, 哈, 中就中左但係就少左好多個零頭, 中個$20蚊雞, 有屎用咩.....

新生命....

琴晚, 家姐同我講, 佢話『雙十節』個朝早開刀生BB, 見佢從容不迫個樣, 都幾佩服佢, 由一個唔多熟的人(醫生), 拿起把刀冇啦啦界開你個肚, 係你個肚度拎舊野走, 個種血淋淋情況都幾.........血腥...

佢係朝早7:45就開刀, 佢話半粒鐘就攪點, 佢要我晨早流流去醫院同佢拍movie。 o拿, o拿, o拿!!!唔好誤會,唔係拍佢開刀片段, 只係拍bb由位靚女護士抱出黎, 跟手o個位靚女護士就將個bb"性器"展露人前個一幕姐!!!! 7:45 a.m開刀, 咁我咪要"老練"咁早起身。算啦!!!鬼叫我係舅父咩....其實, 我家姐, 都幾支持曾特首架, 特首話生3件, 佢又真係走去三年抱兩, 係呀!呢件係第2件架啦!!!

講下今日先. 今日出site, 同梁sir行完一座大廈, 佢係大堂行返出條街個時, 竟然問我, 『e, 我地間車泊左係邊度架?』(佢個樣當時好迷茫), 我仲以為, 冇方向感, 只係女人專利, 哈, 原來男人都會....

夜晚, Eddy兄請我同alan食飯, 當係感謝我地拔刀相助幫佢考牌做helper, 不過, 見佢個樣都幾殘下, 都幾擔心佢, 仲有, 佢個人緊張到有少少失常, 早兩日之麻, 同佢一齊放工落樓, 明明冇落雨, 佢居然拎把傘出黎開, 我問佢咩事啦!!!佢話：『死啦!個人太過緊張, 有少少失常....』, 考mock已經係咁, 到時黎真都唔知佢會點.....

返到屋企, 收到阿Dor個電話, 同佢傾左一陣(吹吹下都成粒鐘), 佢apply養和失敗左, 聽佢把聲幾down下, 不過, 我諗家陣醫院咁人手不足, 應該好快又招募人材。

p.s.(附圖)~ 呢個就我個甥女啦!!! 朝朝早7:00叫醒我咪就係佢羅(佢返幼稚園)!!(平時, 我只需要係8:00起到身就得, 家陣早左成粒鐘起身, 想死, >~< )

未出發先興奮

今朝晨早流流, 收到阿恩個電話, 佢打黎想講下12月曼谷之旅的事, 佢話佢個agent已經幫佢book左2005年12月23-26日的酒店, 叫『Siam City Hotel』, 我立即上網睇下啦!都o.k喎, 個web-site話個location同個機場都係半個鐘車程, 不過, 就唔知間野係幾多星, 有d就話佢係3星, 有d 就話佢4星半, 都唔知邊個岩, anyway, 有得去玩, 仲要唔駛錢, 話知佢呀!

曼谷之旅:
目的地- 曼谷
日期- 2005年12月23-26日
行程- 待定
金額- 只需支付$機票 +$吃喝玩樂


今日都係冇咩心機做野, 對住成座file山, 拎起個file睇兩睇放返低, 再拎起第2本,望兩望又放返低, 如是者, 到最後都冇咩攪個d file, 大致上叫掂過下d file。算啦!聽日再努力過, 目標係清晒d file去......

今晚, 返到屋企, 食飽飯之後好忙呀!!!我差唔多將曉轉的電器(包括:風扇,抽氣扇, 抽油煙機個罩)拆晒落黎清潔, 我真係唔頂唔到頸, 個d一舊舊塵積係度, 好鬼礙眼, 我唔係有潔癖, 之不過, 忍唔住手。

黎緊會幫個同事考個mock, 唔知會係點, 都幾緊張, 應該話係有少少擔心多d。

膠一舊, 一舊膠

原本諗住唔駛去apple shop買個套(tubes)(成$250-5個), 仲有一買就要買晒一set, 所以, 就走去旺角個d電腦中心, 睇下有冇d假野平平地粗粗地用黎保護下我個虛榮(i-pod nano)啦!!!

膠, 一舊膠, 你估下幾多錢, 要成$68蚊, 有冇攪錯!仲貴過正貨, 你唔好唔記得, 你係假野黎架, 旺角人真係旺角人, 全部都冇讀marketing, 都唔知咩叫『市場定位』,點會set到個價咁貴架!!!$68蚊, 我唔好去買condom, $68蚊已經可以買到一盒『家庭裝』個隻添, 一盒12個o個隻呢!仲要有潤滑劑送添!!!駛鬼買你個舊假野。係我心心不忿情況下, 我決定唔買, 呢d咁架野,一定會跌價<---我深信!!!

IS ME!!!!

第1次...post, 第2次...改期......

其實, 之前有個friend(啟民弟兄)開始寫blogger, send左條link俾我睇, 當時已經手多多, 開左個account, 寫左一兩篇(未公開過架)之後, 又覺得自己唔會有咁恆心, 所以, 之後就將佢放左一二邊, 冇理到。
今日, 有個識左好耐小學同學仔(emmy)(其實, 係早排先相認返),問我有冇寫on-line diary, 俾佢講一講, 所以就走左黎再開多個新account再寫野。

前面, d序就講完, 講下今日d野先, 原本今日係去遊船河, 點知又撞到個3號風球, 又要再一次延期, 點解講係再一次呢!因為, 今日的船河已經係改過一次期架啦....上次, 就因為落大雨(係好大個隻), 所以就改到今日, 點知, d風風雨雨好似M到咁, 一cycle又再黎過...我地已經推遲左一個月黎避佢, 唉, 佢死都要跟住黎, 你話死唔死........ 我媽媽就好野呀!! 佢今日同d親戚上船去放生, 佢地就照原定計劃出發, 佢地真係有神靈保佑掛, 呢, 家陣, 岩岩冇穿冇爛入屋啦!!!真係冇face!!!

琴日終於完成左我個虛榮2步曲啦....wahahah, 我俾班魔鬼講下講下,就走左去買i-pod nano(係我的生日禮物架!!!佢地俾錢我自己去買自己的生日禮物, 是但啦, 識左十幾年冇計架, 不過, 都要多謝一班我識左十幾年中學同學).......

近排, 唔知點解個人成日都冇乜精神, 訓又訓唔好, 總之, 就身唔自在啦!!!琴日之麻, 約左個舊同事阿Dor食lunch, 佢都話我冇咩精神, 都唔知咩事.....可能, d天氣掛......今日講住咁多先....