兩個極速Farewell Dinner

今晚, 一連去左兩個Farewell Dinner。

首先, 放工之後先同同事食飯, 我地去左沙田市中心的『周記避風塘』食晚飯, 今日公司有3位同事相繼離職或調職, 根據以往不成文規定, 凡離職或調職之同事都會於last day請office的各同事食西餅, 由於今日有3位同事走人, 正因如此今日office就有3倍的西餅食, 各同事們今日位位都已經有3-4西餅食過落肚(由於我同佢地唔係同一個centre返工, 有幸未能感受該食西餅食到嘔的感覺), 所以就算到左晚餐時間佢地都未見肚餓, 一行11人之晚餐, 只好徐徐叫左幾款小菜食。講返呢間『周記避風塘』, d野食一般啦, 不過, 我想話如果真係想食豉椒抄蜆的話, 我都係建議大家去d大排檔or潮州打冷應該會好d, 個度d野食真係冇咩特別, 只不過係比大排檔多左冷氣同d賣相好d, 就係咁大把。唯一一讚呢度d waitress好鬼死cuite, 攪到我地成班麻甩仔, e嘩鬼叫, 叫佢介紹野食, 真係一句話:『好好食架!!!』, 就攪到成班友仔就暈晒, 不過, 話雖如此, 我地仲有理性的, 同waitress玩左一陣, 都係點左幾款野食, 呢次真係『低消費, 高娛樂』。 由於同事們一早定左食完飯就去食戲, 今次去睇『新紮師妹』, 所以食到7:30p.m就埋單走人。 由於我仲有一場要趕, 所以就冇去睇。

另一場, 就係同Karen食啦!!! 佢就巴閉啦, 佢遲d就會飛返美國過佢個少奶奶生活, 唔知佢"廋猛猛"身型, 會唔會因此而谷返漲??? Karen, 阿牛&堅, 佢地大約7:15p.m左右已經去尖咀間『火間土』坐低左, 而我就 大約8:00p.m先去到, 一見到Karen, 佢又瘦左, 成條柴咁~~~, 我地成晚都有講有笑, 不過, 最主力都係阿牛同Karen係度猛咁傾, plan緊如果阿牛去美國的話應該要點玩, 請幾多日假, 去邊樹玩, 行程應該係點.....見佢兩條就咁"齋"講已經係開心, 到時真係去玩的話, 應該係失晒理性。堅話到時會預埋我,其實只要係我攪掂晒份dissertation, 應該冇咩問題。

食飽飽之後, 我地就上堅屋企睇波, 可憐Karen就要返屋企繼續做佢的灰姑娘(唔知點解佢爸爸, 到左家Karen都20幾歲, 都仲要佢12點前返屋企!!! 令人廢解!!!)

p.s: 合指一算, 兩個飯局都係分別食左大約一個鐘左右, 我都係第一次同人食飯食得咁快手。But anyway, 唔知Karen會唔會睇到呢個blog, 但係希望佢返美國開開心心過佢個少奶奶生活, 起碼, 到時唔駛下下都12點前要返屋企。

脫晒腳

我地同Karen食完飯之後就分道揚鑣, 我地搭巴士去堅屋企。 原本牛約左好多人上去一齊睇波, 有jessica, 志勤, 傑佬等...我地10點左右就上到去堅屋企, 時間一分一秒咁過, 到10:30p.m突然收到jessica的電話, 佢話佢依家先係屋企食飯, 屋企冇人, 由於要留係屋企陪阿媽, 所以就唔出黎......再一次証明的就是jessica的心思往往令人意想不到, 今次明明係佢話30號睇波好唔好, 點知又.......。正所謂一波未停一波又到, 到左11:00p.m, 仲未見到志勤 & 傑佬等人, 牛就打俾志勤先啦!!! 點知志勤話佢今晚食完飯之後, 諗住"恰"一"恰"先睇波, 點知一"恰"就11:00p.m, 去到呢個時候都係唔出黎, 至於傑佬都因身有要事, 未能出席。到最後, 就得返我地3個人睇波。




今晚頭場大戰係主辦國德國vs今屆單場入波最多的阿根庭, 一心諗住以阿根廷實力要贏應該問題不大, 點知最後俾德國追返一球之餘, 仲要互射12碼輸波, 唉, Macy咁都俾你講中左, 件阿根廷波衫真係著埋今次就收得埋。



到左3:00a.m, 意大利vs烏克蘭, 阿牛係剛才的下半場已經頂唔蒲返左房訓覺, 剩返我同堅兩條麻仔係度睇波, 不過, 我地都係睇左上半場之後都頂唔順, 就各自去左訓覺。

雷暴警告現正生效

今晚原定約左阿牛, 堅, 阿達, 牛爸 & 阿潔放工之後去泳池游水, 哎呀!!唔知點解琴日冇啦啦就掛左個1號風球, 不過, 睇過天文台個『熱帶氣旋位置及路徑圖』話應該都係打唔成。 好!!就信你(天文台)!!! 咁琴晚就執晒&塞晒d"架生"入個背囊度啦!!!

今朝出門口都好地地, 到左lunch就開始落雨, 仲要有埋個雷暴警告添!!! 不過, 我仲深信呢d都之不過係過雲雨姐, 冇咩樹架!! 而且我係lunch個時上網聽到收音機報天氣話個雷暴警告只係去到4:00p.m, 哈, 咁就掂晒啦, 我地游7:00p.m, 仲有3個鐘左右先到我地去游水的時間, 當堂放心晒。 到左4:00p.m左右, 我真係上天文台個web-site昅一昅, 真係咩警告都冇晒喎(1號風球就依然健在), 就滿心期待今晚可以去游水啦!!! 到左5:20p.m, 阿牛就打俾我話, 今晚仲游唔游水, 我當然話游啦, 死都游, 仲懶醒咁話佢知d什麼雷暴警告冇晒啦!!! 點知, 佢就話, 唔係喎, yahoo仲show緊雷暴警告生效中, 我就馬上上天文台個web-site睇, 妖....原來, 佢個雷暴警告係4:00p.m落左, 點知佢轉個頭4:30p.m就彈返出黎....咁即係冇得游啦.....

雖然, 冇得游但係都照上阿牛屋企食飯(原定計劃都係游完水上阿牛屋企食飯, 不過家陣少左游水個part姐), 7:00p.m自己貢左上去, 一入門口, 牛媽媽就同我講:『岩岩先買完送返黎, 今晚冇咁早食喎!!! 仲有個天文台話1號風球落左羅喎, 不如你地去游水先啦!!』, 我就急急腳打俾ivan, 睇下佢係邊樹, 點知佢話自己咩都冇帶, 唔去羅。咁就算啦!!! 收皮~~~

7:30p.m左右, 阿牛同堅都返到黎, 阿牛就急不及待捉我去佢間房睇相, 睇佢前陣子的annual dinner & 去斯里蘭卡的相片, 阿牛好興奮成個導遊咁, 遂張相講解俾我知入面佢地做緊d咩, 睇緊d咩... haha
到左9:00p.m終於開飯, 今晚豐富羅, 可以話係跟貼世界杯熱潮, 今晚係齊集各國美食, 先派出意大利代表蒜香蘑菇香腸意粉3大盤(因為我地都有成10人食飯架, 所以就煮咁多), 再有日本代表10件各式精美壽司, 今次仲有中國代表有鹵水雞腳&春卷, 當然有香港代表啦!!--->快餐式煎香腸, 仲有青菜兩碟, 成抬都係食送好豐富呀!!!

咁大家一路食飯就一路睇電視啦, 到最後尾聲個個食到飽一飽都停晒手(當然係包括我在內啦!!!), 就係呢個時候, 牛爸爸就同我講::『e, 阿Gary, 好似仲有兩件壽司, 唔好浪費, 一人一件食埋佢!!』, 咁我見盛意拳拳, 咁我就照食啦!!! 再隔多2,3鐘, 牛爸爸又黎:『e, 阿Gary, 隻碟仲有兩隻雞翼, 一人一隻清埋佢, 唔好留啦!!!』就係咁我就再食多隻....cool, 今次真係飽飽.....到執抬個時, 阿文就同我講, haha, 今次仲唔輪到你, 之前我日日都係咁食, haha。 我今次真係飽晒.....

到最後, 阿潔仲拎埋個之前佢自己整好左的Tiramisu出黎分俾大家食, 雖然飽到上頂, 但難得牛二妹自己親手整的蛋糕, 我又點可以唔嘗面呢!!! 臨尾, 佢分晒俾大家之後, 仲有件大的, 就望住我:『e, Gary, 仲要唔要多件呀!!!』, 頭先, 牛媽媽話阿潔好俾心機去整, 要俾面&俾意見, 咁我就只好俾隻碟佢要多件啦!!!

就係咁, 今晚冇去做運動不特止, 仲將個脂肪飽和度增多左....

p.s: 阿潔係我臨走, 問我下要食咩cake, 當時未諗到。岩岩諗到啦, 我要食Blueberry Cheesecake...thx...我等你呀....

好朋友系列: 堅

堅又是我的中學同學, 中學時代花名呢個傢伙, 每個人都總會有一個傍身, 不知何故, 堅的花名總是給別人的多5-10倍, 不過由於太多多到記唔晒, 所以都不在此談。 中學時代, 係我身邊每一位同學仔都好叻好聰明, 堅更加係一個表表者, 他的成績永遠都係頭1,2,3,4名, 正所謂物以類聚, 我地呢d平凡人, 點解會同到呢d讀書人做到朋友呢, 我諗深一層一定係佢想追阿牛先同我地玩(講笑姐!!!), 由於, 讀書人思想比較正經, 一旦同我地呢班口多多人士玩起上黎, 真係有少少執輸, 亦因為如此, 當年概佢就成為我同余弟兄等人取笑對象, ....whahaha!!!! 不過, 經過我地多年黎訓練佢都略有所成啦, 再唔係我地取笑焦點。

於中學時代, 本人與他有一件事永遠令人難忘, 亦於朋友聚會中時不時都間中提起下, o個件事亦係我人生之中簡直係屈辱&污點。 話說本人於中學時代乃係一名運動健將, 有一次上體育課時, 老師將男生分派兩隊, 作足球比賽對壘, 當時本人就充當龍門。 敵方進攻時, 平日以我身手敏捷去救波, 簡直係冇難度, 點知, 最後我都係衰左係堅手上, 竟然俾佢係我手上入左一球, 黎到呢度大家請注意一點, 堅---佢係同我同一隊, 咁即係話呢一球係『Own Goal』, 其實實情係當時有敵方傳中, 堅就返黎後防幫手, 點知佢就用頭一頂, 就頂入左我個龍門入面, 呢件『Own Goal』事件可以話令我永世難忘。 當時我仲諗住自己林源三上身, 應該冇人入到我波架啦, 點知~~~唉, 人算不如天算, 你有冇睇過"足球小將"入面概林源三要救"own goal"架, 冇呀麻, 所以咪輸羅...

堅亦都係我唯一位中學同學入面(熟個d呀!!!), 順順利利暢通無阻完成9年免費教育兼完成預科兼直上香港第一學府(香港大學)的第一人, 不過, 我就有少少遺憾的是, 當年堅畢業時影畢業相(當然係香港大學入面取景啦!!!), 各友人均有不同原因缺席刻次影相活動, 當日只得我, jessica 及牛出席。 難得有朋友於第一學府畢業, 並有藉口可以於香港大學影相沾少少光(起碼自己唔會冇啦啦走去HKU影風景相~~), 實在難得。

堅, 牛, jessica & 我, 呢4人組合, 可以話係一齊去過唔少地方旅行, 計一計有台灣, 韓國, 日本, 中山, 大陸(好多人甩底o個次, 包括jessica), 澳門, 我覺得每次旅行之後, 大家都一齊經歷一d事, 有開心有唔開心, 大家關係更因為了解會再進一步, 仲記得當年, 大家大學畢業, 我同jessica都係同一間U, 堅就係另一間, 佢o個間就好衰係全港U最遲考完Exam的一間, 同我o個間的exam period差不多有成一個月之差距。 由於我地一早定左畢業一齊去台灣旅行, 所以我同jessica就要等佢, 工都唔搵, 最後, 堅考完試第二日我地就馬上上機出發, 就係咁去左我地第一次(起碼係我自己第一次)的自由行之旅, o個次真係玩得好開心, 四條友第一次一齊搭飛機去旅行個種感覺真係好特別, 始終同平日大家約行街食飯係唔同。

自出黎社會做事, 我就覺得佢就越黎越多野諗有時仲有d走入左個"死胡同"入面, 其實佢中學個時都成日諗野(堅, 你仲乜成日諗野!!!)(講多樣野, 正因為咁佢中學已經有白頭髮), 當時伙當然係諗點樣考第1啦!!! 家陣就成日諗住點樣發達, 我諗佢最大關係都係因為佢概另一半, 佢想阿牛有個"唔休做境界", 所以某程度上佢都受到一定程度的壓力, 不過, 卻正正因為咁, 就更加突顯阿牛係佢生命中的另一重要, 牛牛的天性樂觀往往為堅帶出新一道的思維方向, 不再用轉牛角尖。仲有, 有一次上去阿牛屋企食飯(係呀!! 我又貢上去食飯啦~~wahahah!!!), 食完飯之後, 牛媽媽同我講左一句:『阿Gary, 志堅個人成日都好多野諗!!!』, o拿!!! 唔係我講架, 其他人都發覺到架, 唔好成日諗住點樣發達, 有時d野, 好講機遇, 唔係你話想就得, 有時俾自己太大壓力好辛苦架!!! 香港人relax~~~

最後, 老規矩, 堅上黎留言~~~~快.....

(下期預告: 余弟兄)

得個吉

話說友人之前俾左Agnes'b的satff sale的inivitation card我(有成30% off), 一心諗住發達冇死啦(去狂掃貨!!!), 亦本住有前冇後, 打後今個月有可能要捱麵包的心態(可能d錢用黎買晒野!!!)....點知, 希望越大失望越大~~~~

我張inivitation card係今日3:00p.m個場, 我約左阿恩 & ivan佢地, 先到先等啦!!! 我準時3:00p.m就去到會場(係會展隔離的華潤中心), 嘩, 睇到眼都突, d人多到呀!!! 我都差d搵唔到龍尾, 個條龍由華潤大廈橫跨到鷹君中心再穿過海洋中心, 排到去人地第二座大廈, 有冇誇張左d呀!!! 阿恩 & ivan都未到, 我見勢色唔對, 於是就自己排住隊先。 到左咁上下, ivan & 阿恩都相繼出現, 除左佢地之外, 仲有佢地d親戚, 大大話話都有7, 8個, 佢地唔覺唔覺咁樣攝左入黎(其實真係幾驚後面有人"噪", 咁我地係理虧, 就算俾人話都冇計, 不過好彩冇事發生~~)

條隊好係條蚯蚓(蚯蚓都快過佢!!)咁慢慢的向前推進, 佢地應該知會有好多人, 所以唔會一次過放晒d人入去, 就係咁我差不多成4:00p.m先入到會場, 原本諗住入去有一番大作為, 點知入去到, 滿目瘡痍, 我以為岩岩打完仗添, d野零零落落, 我諗因為之前個一個鐘, d人狂風掃落葉式拎得就拎, 之後, 就放係一兩邊先再慢慢睇下邊d岩邊d唔岩, 所以, 咩貨都冇晒, 仲等我一心諗住可以買返幾件Tee當替換下都好, 行晒成個場, 一件Tee都未見過....shit....轉左一個圈就同ivan & 阿恩佢地走左。

之後, ivan就話帶我地食好野, 原來係去上環的"美輪街"的大排檔『勝香園』食Tea 仲有隔離檔的『九記牛腩』, 買唔到野都食下野都好, 不過, 對我黎講都唔係咩特別野, 最主要原因係我本身之前都係呢頭返工都有黎呢度食野!!! 最後我地選擇去左『勝香園』食野, 因為頭先企係度排隊成粒鐘, 個人都熱辣辣, 冇理由走去食咖哩牛腩架....一坐底, 就叫左支凍檸樂先, 再加多碗招牌餐蛋麵茄底(呢度出名係鮮茄汁湯底), 不過, 呢度o個塊餐肉夠厚, "正", 隻蛋都煎都幾好....又係"正"。 如果, 未黎過呢間食的朋友可以值得一試, 又其是隔離的"九記牛腩"更加係一絕, 佢最出名的就係"咖哩牛腩伊"。 食完之後, 就各自歸家......

-----------------------------

勝香園
地址： 中環美輪街2號排檔
電話： 2544 8368
菜式： 港式

九記牛腩
地址：中環歌賦街21號地下
電話： 2815 0123/2850 5967
菜式： 港式

My new office hour: 朝九晚十一

今晚開始返"秘撈", 於是一放工就"閃人", 首先落左office樓下的茶餐廳食少少野先, 唔係點捱放工(第二份工), 食完野, 先前同秘撈公司講會6:00p.m就上到去, 就拿拿臨搭地鐵去, 其實都只不過係兩, 三站之隔姐。 不過, suki個friend同我講間office係太古坊, 但係就唔記得座building叫咩名, 佢only話俾我知, 只要你過左條行人天橋, 望向右手邊就有個金色波波, 上埋去34/F, 見到係xxCompany, 就係應該岩架啦!!! (汗顏~~~)

於是一出地鐵站, 就照足suki個friend的提示去搵啦!!!(成個feel好似玩緊野外定向, 不過地點係太古坊之麻, haha), 好彩, 話咁快就搵到。 上到去岩岩好6:00p.m, 就打電話搵返個負責人話佢知我到左, 係門口等左一陣佢就出黎接我入office, 個位負責人叫Holy, 之後, 入到去, 佢就是但搵個位俾我坐住先, 因為, 我地呢d part-time做data entry, 要等返工個班人走左, 吉左部電腦出黎先有機用, 6:00p.m d人都未走, 所以我只好慢慢等, 等左差不多6:45p.m先有電腦吉到出黎俾我。

開始工作, Holy先教我有d咩要入, 示範左一, 二次, 其實都係入d資料, 冇咩特別, 冇咩難度, 岩晒, 唔駛用腦。 原來, 今晚得我一個人返, 冇其他人, 成個office空了了, 靜靜"勾勾", 原本我問Holy今晚要做到幾點, 佢話做到8:00p.m就o.k啦, 因為佢都想早d走。

到左8:00p.m, 佢就行左過黎到我講, 話今晚佢個邊有d野攪, 會夜d先走, 走個時先叫我, anyway, 冇咩所謂, 橫點都係賺錢姐, 於是就繼續做, 做到10:00p.m, Holy個同事就過左黎我間房話有野叫我幫手, 都好,3粒鐘對住個mon, 好鬼悶, 有其他野攪下都好!!! 其實, 我都係幫她對下野, 釘下野姐, 不過, 我見佢地好似仲有好多野攪, 我就自己做到10:45p.m左右就走人, Holy同佢另外個兩個同事就繼續做。由於每次都要填time sheet, Holy好好人咁幫我填左6:00-11:00p.m, 佢話齊頭易計d喎。

都好耐未試過, 咁晏先放工....haha/....同埋我真係幾幸福, 真係有人o.t, 做到咁夜.....

另一邊的比賽

當全世界的注意力集中晒係World Cup, 其實係另一邊箱都有一場大賽進行中, 就係NBA Final啦~~~


今日, 已經係打到第6場, 雖然冇得睇電視live直播(上年亞視都有得播, 不過, 今年亞視將d錢拎晒去買歐冠杯, 所以就冇錢買NBA播映權, too bad~~家陣得now先有得睇), 不過, 我就係office度靜靜雞(其實都唔係咩靜靜雞~~hehe)上NBA的web-site, 佢地個web-site有文字即場描述(當然係睇英文啦), 即係有人打d字出黎, 話俾你知, 邊個邊個入左一球, 阿邊個邊個搶到籃板球, 雖然係睇字, 但今年的戲碼十分吸引,雙方實力差不多, 互有攻守, 未到最後一刻都未知邊個贏。

今日好緊張咁望住個mon, 由頭追到尾。 最終, 今年由Mimia Heat奪得今年NBA Championship.

其實, 就我個人而言, 雖然我並不高大, 但係本人鍾意籃球多於足球, 起碼平時我打籃球多過走去踢波先呀...haha(打winning係冇關係架, 我係屋企都打NBA live架...)

欲罷不能

今日情況有些微好轉, 琴晚訓左個好覺。 一起身, 阿媽同我講, 抬面有方包可以當早餐, 當我梳洗完畢就走左食塊方包, 咬左兩啖, 覺得淡淡地(就係咁, 又賴野啦!!!), 於是就走左入廚房, 手起刀落, 就搽左塊牛油落塊麵包度, 食完都冇咩野(自己以為!!!), 點知, 一踏出門口, 就心知不妙, 個肚就黎料, 即刻轉返入屋, 入廁所將頭先岩岩食個d麵包一次過放返出黎。 清完條"跑道", 終於安心返公司。

返到office, 成朝都冇驚冇險都只係去左2,3次姐, 已經比琴日少左3倍, 已經算係成績不俗。 但一食完lunch(今日lunch只係敢食餐蛋米), 個肚又黎過, 可能係d藥過左時效, 於是拿拿臨落樓下"7仔", 買返樽喇叭牌, 好彩有d丸仔, 塞住個門口頂得住下, 安然渡過一個下午。

今晚, 係屋企上緊網的時候, 突然收到suki個friend的電話, 佢話"秘撈公司"話急趕要人用, 問我聽晚返唔返到工, 當然返啦!!! 錢喎!!!我家陣就係缺乏的一樣野....好!!!聽晚個肚要生生性性, 唔好再痾, 唔係一個唔覺意俾間公司塞我飲d咩健康水就死火啦!!!

"無極"續集 - 痾極~~~~~都有

琴晚, 食完師姐mandy個餐farewell dinner之後, 成個人都唔係咁舒服(其實食個時都唔係好得~~~), feel到自己有d暗湧作病, 周身骨痛兼成個人都"滾"滾"地, 返到屋企, 立即啪返兩粒"必理痛", 電視都冇睇, 就攤左落床訓, 簡直打破左我個人呢半年內"早訓"紀錄, 10:30p.m就訓左落床, 郁都唔想郁。 之後, 訓左一陣, 個人醒左望一望個鐘, 當時只不過係零晨1:00a.m(平時呢個時候, 我先訓覺!!!), 當時起身之後成個人都熱辣辣同周身"滾", 訓唔著, 就攤左係廳個梳化度, 唔覺唔覺又訓左一陣, 之後又"扎"醒左, 當時3:30a.m, 個人又轉黎轉去都訓唔著。 精彩的事, 永遠係最後先出現, 今朝6:00a.m開始, feel到自己個肚唔多舒服, 一去到廁所就狂, 勁, 激, 爆"瀉", 簡直係同我黎個大洗底, 痾到7:00a.m, 情況好左少少, 爬返上床回一回氣。

到左今朝8:00a.m, 起身個時阿媽問我係唔係唔舒服, 仲叫我唔好返工留係屋企休息下, 不過, 我諗住今晚要返學做present, 唔返唔得, 而且個powerpoint要返office攪埋少少手尾(哈!!! 我又係office做自己野...), 所以都點都頂住返左office先。一返到office, 就feel到唔多妥, 原定今朝自己team有車出site, 所以一早就同大佬報定案話自己唔舒服出唔到site, 咁岩佢話今日冇地方去。原本諗住係office, 冇野攪可以安安靜靜咁坐下、 休養下啦, 唔掂, 成個朝早就不斷往來自己個位同洗手間之間起碼不少於10次 --->『狂瀉』, 瀉都不突止, 唔知係office個冷氣唔夠凍, 定係自己個body有問題, 成日係度標汗(係冷個隻喎)。 到左lunch終於頂唔浦, 向大佬請左半日sick leave返屋企休息下。

返到屋企, 食左大半碗即食通心粉(費事食咁多, 正所謂食得多就呵得多)就走左去訓覺, 由於今晚要返學校present, 訓到5:00p.m就起身, 沖個涼換件衫就返學校, 有驚冇險返到學校, 點解話有驚冇險, 其實之前"痾"得咁勁, 幾驚係搭車途中一個唔覺意頂唔浦, 到時真係英明盡x , 容乜易呢世都有陰影唔敢出街架。 返到學校, 未夠鐘上堂就落左舊can坐一陣, 突然收到阿妹Claria電話, 同佢傾左幾句, 原來佢一直全係我後面張抬, 可能自己痾到傻下傻下, 冇發覺原來佢坐係附近, 同佢傾左兩句計, 夠鐘上堂, 佢就返library溫書, 阿妹真係勤力, 佢黎緊會考APC(Building Surveyor的專業試), 對佢黎講應該唔係大問題。

返到課室, 上完頭一節的Lecture就present, 由於用中文present的關係, 而且吹水乃係本人的強項, 快快手就攪點左個present返屋企。 返到屋企食左少少野, 沖個涼, 電腦都冇開就訓左。

p.s: 岩岩得知Macy又係肚痾, 過多兩日就去上海旅行, 你就小心d啦, 對住個上海灘, 可以懷挽一下霑叔如何"浪奔浪流......."haha

又走一個

今晚同師姐mandy farewell(查實, mandy唔係真係我師姐, 不過, 當年入黎做個時, 個個都叫mandy做師姐, 自己都跟口叫埋一份), 連埋師姐, 黎緊應該係第5個人走啦!!! 呢個月, 唔知點解突然間走左咁多人, 數一數, mandy, kenix, 阿細, anthory, 阿基, 走得都走, 一係就轉職, 唉!!! 我仲要係度挨多一年!!(攪埋掂個dissertation, 我就一定走返出去做!!!)

我地放左工之後就去左又一城o個間Amaroni's Little Italy食, 6:30p.m左右去到, 當時餐廳都未有咁多人(其實主要d人未放工 & 餐廳冇world cup直播睇, 所以d人都唔多選擇去呢間食飯), 我地一行12人, 去到就點菜食, total都點左9樣野, 由於d碟頭夠大, 所以9樣野食都已經好足夠。成晚大家開開心心有講有笑, so nice.

太陽出來了- 一陣咁大巴

呢幾日終於出返d太陽, 所以預左今日無論如何, 點都要去曬太陽。

今朝起身, 睇到個天好猛太陽, very good!!! 終於可以去做返個『光合作用』, 下午, 去左屋企附近個泳池, 一去到一如所料, 都幾多人下, 當然啦!!! 上二, 三個禮拜都成日落雨, 係今個week先出返太陽, 大家都湧晒出黎, 有大有小。 不過, 游左一陣水, 曬多陣太陽, 差不多3:30p.m左右, 個天又開始陰暗, 我聽收音機(我曬太陽時鍾意聽收音機!!)話雷暴警告已經生效, 有冇攪錯~~~ 成個禮拜都冇事, 係今日先黎落, 好彩, 我都係時候走人, 唯有等下星期再曬過啦!!!

突如其來的飯局

琴晚因為俾d野jessica, 傾左兩句, 之後, 佢話原本今晚柯小姐約左佢 & jaemi食飯, 點知臨尾柯小姐放飛機, 咁佢同jaemi都照出黎食飯, 問我join唔join埋一齊, 同時今晚係阿達生日, 阿達已經book左今晚尖咀CEO, 開間大房開birthday party諗住飲到嘔兼玩通頂, 咁順理成章, 阿牛, 堅 & jessica都會去, 不過, 就會食埋晚dinner先去, 所以jessica就約埋阿牛 & 堅一齊食。



一行5人, 去左尖東的一間日本舖頭食, 間野叫咩名就唔係太記得, jessica介紹的, 野食唔係太特別, 都唔係好好食, 同佢間舖名一樣, 都唔係太記得(咁即係唔深刻----> 所以冇分好好食定好鬼難食!!!), 不過, 呢間野最好的地方就是有波睇, 今晚頭場9:00p.m係阿根庭vs塞黑(塞爾維亞和黑山), 南美波真係南美波, 淨係上半場就入場3球, 睇完上半場就埋單, 阿牛, 堅 & jessica就去阿達的生日派對啦, 我原本都想去的, 奈何, 銀根短缺, 要慳d駛, 唯有就乖乖的返屋企。

返到屋企睇新聞話阿根庭淨勝6球, 有一手呀!!! 暫時黎講呢場, 應該係今年世界杯最大比數的一場。

想單身去旅行的你

在此又介紹一本書先, 書名--《跟世界熱戀308天》,點解冇啦啦介紹書呢!!其實, 事緣係早兩日, 講過話放工之後去左搵個friend拎d inivitation card, 由於, 個日早左少少放工, 個friend又話最好6:00p.m之後先好過去搵佢, 一條友係d咁悶熱天氣之下, 又唔想行街, 岩岩又經過書局, 於是就走左落去書局打書釘(呢個活動簡直係慳水慳力, 消磨時間的好節目), 就係咁, 我就足足企左係書局成粒鐘睇晒成本書(呢本書唔算係好多字, 以相為主)。

講下本書先, 書名係叫《跟世界熱戀308天》, 其實作者筆名叫"陳皮"(點解叫"陳皮"咁得意?係書中提及過"如果一世人只能選擇一種零食，我會義無反顧的揀定陳皮")本身係報館的旅遊記者, ，有一天忽然說要去非洲爬山，便撇下人人羨慕的旅遊記者工作，踏上另一段長長的旅程。 佢個行程就厲害, 一個女仔就咁揹住個背包用308日去左 ─ 緬甸、老撾、越南、柬埔寨、津巴布韋、馬拉威、坦桑尼亞、埃塞俄比亞、埃及、墨西哥。 這本書主要以遊記方式黎介紹當中行程及經歷, 當中的經歷可能你與我呢一世都未有機會/膽量(試問問大家, 又有誰現在可以放棄你現時的工作, 用一年時間去遊歷!!)去體驗得到。當中本人最羨慕的, 就是可以一個人毫無生活擔子, 自由自在, 一個人去旅行仲要去d人跡旱見的地方, 呢d體驗真係一世都會記得。

大家如果行過書店, 就入去望望, or 買返屋企睇都好架 (仲有佢係"10本好書"之一黎架!!!)~~~

好朋友系列: 阿牛

牛牛又係我中學入面d同學, 不過, 係Form2 同班先識, 講真當年同佢都係一般熟, 講熟, 當然係家陣熟好多好多啦, 依家仲時不時成日"貢"上佢屋企食飯添, 最鍾意上佢屋企食飯之餘, 仲可以同牛爸爸 & 牛媽媽一齊傾下計, 之前去新年攝太歲呀, 牛媽媽都有叫我去呀...haha///而阿牛, 亦係我唯一個同佢&佢整個family(因為包括佢2個妹, 牛爸 & 媽, 仲有牛嫲嫲)都咁熟的朋友

其實阿牛中學讀書個時係一個好勤力的學生黎架, 由於佢成日讀書讀到好夜關係, 所以佢中學個時有個超級super勁大勁黑的黑眼圈及眼袋, 不過, 話雖如此, 佢始終敵不過香港考試制度, 未能升讀大學(其實, 當時, 我覺得佢應該有能力升到上去架!!!), 不過有失就必有得, 如果, 唔係因為升唔到大學, 佢就唔會去左讀旅遊, 佢家陣就可能做唔到依家個份工(我個人應為佢依家呢份工真係十分十分之岩佢做~~~)。 係中學時代, 牛好少講野(應該話係我好少同佢講野姐), 好鬼死靜。 到依家"b lee 巴啦"咁, 佢口才都不知幾咁了得, 唔係佢又點成日"呃"到咁多客俾錢佢駛..hehe, 當然啦, 我都覺得佢係一個叻女黎架。

自從畢業出黎做野之後, 我覺得每個人都有一定的變化, 但係我覺得阿牛的變化比較大, 於中學時代佢夜晚出街係要11點前就要返屋企的人, 到10點左右牛爸or媽就會有個"追魂call", 招佢返屋企(招魂), 當時的牛爸&媽(當時同牛爸媽未太熟稔)對佢的管教十分之嚴格。 不過, 自從牛牛出黎社會做事之後, 佢就成個人變晒, 開始飲酒(中學個時都係頂多都係飲jolly sandy, 家陣就係芝華士, black lable....個d喎), 應該係劈酒先岩, 佢又鍾意"千嬅", 我感覺上佢成個"千杯不醉"咁, haha, 又去夜街。 我估都係主要因為細個o個時俾屋企壓迫大得濟, 到有依家有自由個時, 佢概潛意識就會叫佢多d出去玩, 一定係咁....wahhaha(家陣, 我好似變左行為&心理學專家, wahhahaha)

仲有, 佢對牌子的追求都越黎越大, 成日咩日本version, special limited, 我諗呢一切一切都係受"壞孩子"阿達(佢係牛牛讀poly時識的朋友)的影響罷了!!! 不過, 佢地兩個真係好岩key, 成鬼日shopping, 兩條友成個"最愛女人購物狂"入面的張柏芝咁, non-stop, 停不了, 哈!!! 不過亦因為如此, 佢先會咁發奮搵錢, 佢平日都仲有幫人補習架, 做人都係有d目標好, 唔錯唔錯....不過, 亦都係咁概原因, 我先識到阿達, 同佢埋做埋朋友, 又打波, 又唱k, 仲有玩winning, 仲有, 仲有, 阿達教識我(仲有阿牛佢地)打台灣麻雀, 大家一齊出黎玩, 真係好開心。

頭先講開牛牛好鍾意買d名牌子, 不過, 佢發現自己兩年後plan定要結婚之後, 自己都開始忍手, 不過, 有時有d野佢自己都係忍唔到, 尤其是同阿達出街的時候, 真係收唔到手(岩岩同佢傾完電話之麻, 佢又話今晚同阿達出街shopping掃貨), but anyway 我都好期待佢地兩個結婚的時候。

講開佢兩個結婚的事, 係幾年前佢曾經同我講過, 佢同陳生諗過佢地兩個仔女會改咩名(係呀!!! 阿牛有時真係好鬼無聊), 我冇記錯, 當時佢同我講過其中一個叫陳奧雲, 另一個就唔多記得叫咩名啦!!! 又有一次大家出黎食飯時又傾開, 陳生應該要每個月搵幾多錢, 佢先可以唔駛做, 無憂無慮咁生活, o個次大家都好認真咁計一計條數, 得出結果陳生起碼要搵成$50,000一個月, 就岩岩好, 我地計個時make左好多assumption架, 又當佢地有2個仔女, 又要供樓, 供車, 又要俾各自雙方屋企.......陳生一聽到一個月要搵5萬, 當堂塊面都青晒.....haha。

最後, 牛牛, 雖然知妳係我的blog的捧場客, 但未見過妳係度留言, 難得呢篇blog係專講妳的事, 快快係度留言啦!!!! 仲有, 你話要登張特別d的相, 家陣呢家, 夠唔夠特別呀!!!

(下期預告: 堅)

Winning x World Cup

唔知係唔係前排同阿牛, 阿達佢地打得Winning Eleven多得濟!!! 家陣到睇世界杯個時, 睇到d人走位, 尤其是見到有球員走到空位, 應該去"入攝"個時, 個腦唔知點解忽其然彈左個『三角形』logo出黎(有打winning的朋友應該知咩意思!!!, 唔知, 可以留言問我!!! )又或者, 見佢大腳長傳, 個腦又彈左『圓』掣出黎(同頭先個情況同出一徹)。如果個球員入攝唔成功, 之後, 自己就會諗起, 如果, 俾我打winning個時, 咁樣走位, 一定入硬........

我家陣, 已經開始分唔清, 邊個係winning, 邊個係world cup, or 佢地兩樣野已經係我個腦入面crossover左呢....haha, 定係我開始有思覺失調....

現場實況

友人話佢公司黎緊會有staff sale, 但係要inivation card, 佢話俾幾張我, 咁我今日放工就到佢公司拎啦!!! 佢公司係灣仔, 當我去到佢公司附近o個時就見到有警察將條軒尼詩道封鎖左, 天生好奇心爆棚的我, 當然就走過去"昅"下咩事啦!!! 就見到有人企左係天橋頂大叫(當時, 唔知咩事, 返到屋企, 睇新聞先知係d爭取居港權人士示威)。於是就打俾友人, 問佢知唔知發生咩事, 我同佢講:『你公司樓下有人跳樓喎!!!』, 點知佢以為我講笑就話:『咪顛啦!!! 你跳樓就行開d啦!!』, 算!!! 佢唔信就罷, 於是就去到佢公司拎左d inivtation card(多謝妳幫我搵到d我想要的時間, 麻煩晒!!!), 拎完佢就繼續返office做野。

而我今晚就約左阿牛一家去食buffet, 其實原本應該係上星期五去的, 不過, 牛牛book唔到位, 所以就順延至今日。 點解冇啦啦會去食buffet呢? 其實最主要係因為牛牛個親戚俾左張半價coupon俾佢(好抵架, 由原價3百蚊, 家陣半價只係百五蚊左右), 佢就叫埋我一齊去食, 原本有叫埋阿達 & jessica, 不過, 佢兩個都各自有不同原因, 所以就缺席是次buffet。

牛牛同我講話去Marco Polo Prince食Buffet的時候, 我都已經話又去呀, 之前已經食過兩次, 點知佢同我講話佢自己唔多記得添(真係冇記性, 咁快老人痴呆!!!) 一去到個間restaurant的時候, 突然間佢就"呀"左一聲之後就話:『 e, 係喎, 我醒起啦!!! 我地黎呢度食過架~~~』, 我一早咪同妳講左, 妳又唔信!!! 之後, 食到中途, 友人打俾我, 同我講:『岩岩放工, 見到有人跳樓!! 之後, 就醒起你講過呢件事, 乜原來係真架...haha, 跳到依家都未完(當時, 已經係8:00p.m左右)』, 哎呀!! 乜家陣, 我成日講大話咩, 點解冇人信我講架野。haha, 雖然, 我有時講野係有少少浮誇, 係多左少少形容詞之麻...

食完之後, 都差唔多9:30p.m, 之後, 就各自返屋企。

英格蘭 vs 巴拉圭 - 悶

琴日, 一朝早起身就check下exam result, 喜出望外, 今次有1A, 1B成績, 唔錯, 唔錯!!!

琴晚世界杯頭場 - 英格蘭 vs 巴拉圭, 早一星期前jessica已經話約埋一齊睇呢場, 原本話上去阿達屋企的, 不過, 由於阿牛要食家庭聚餐, 應該趕唔切出黎睇, 所以就取消左。原以為冇得睇英格蘭呢場波啦!!! 點知, 下午, Denise打俾我話Harvey約今晚睇波, 掂, 有著落, 原本佢話不如落聯誼會一路打住麻雀一路睇波, 我就冇咩所謂, 又有波睇, 又有野食, 又有牌打。到最後, 由於Ernest屋企人去左飲, 所以夜晚冇人, 哈!!! 我地連去聯誼會都可以閒返。

6:45p.m係地鐵站等齊人出發, 我地先去吉之島買野上去屋企食, 就係吉之島買野o個時 , 竟然撞到阿耀佢地喎!!! 原來佢地都約埋上Karen屋企一齊睇波, 大家寒暄兩句, 就再各自買野食。我地就勁啦!!! 我地得個4條友, 就買左好多野食, 等我數一數先, 我地買左：

炸雞軟骨, 炸蟹仔, 炸薯餅, 炸魚柳, 壽司, 魚生, 兩隻油雞脾, 西冷牛排 x 2(自己煎個隻喎), 灣仔碼頭水餃(兩包---最後都食開左一包食), KFC(4件雞 + 1白汁雞皇飯 + 2蘑菇飯), 仲有薯片5包

就係單單4條友就係吉之島就掃左成4舊水左右野食, 當然啦, 我地呢d眼闊肚窄, 到最後當然係食唔晒啦...

我地買完野食都差唔多8:00p.m, 就上去Ernest屋企啦, 一入到屋, 就開始set場, Ernest & Harvey就負責廚房煮食部, 因為有西冷 & 水餃都要整, 我同Denise就負責將d野食, 拎晒出黎, 齊齊整整放好晒係張抬上面, 最後, 煎得d西冷, 整得d水餃, 仲有反煎薯餅 & 炸魚柳(因為都已經凍左, 熱d好食d), 就岩岩好9:00p.m開波, fit到漏油...

成場波, 除左頭3分鐘的own goal之外, 基本上用一個字黎形容: 悶.....悶到爆.....悶到嘔...悶到顛....好辛苦先睇到佢完場。



但係我地死心不熄, 於是在乎就等多一個鐘左右我地就睇埋, 瑞典 vs 千里達, 唔知係唔係受頭先個場悶波影響, 我地開始冇咩心機睇波, 於是, 我地就開始一路玩鋤大d, 一路睇波.....雖然呢一場就互相都有攻勢, 不過, 都係冇波入, 又一個字悶。

睇完兩場悶波, 都係時候散水, 就各自歸家去。

p.s: 由於睇波個時, 食得太多炸野, 今朝起身, 喉嚨有少少痛添....

666 - 好邪呀!!!

琴晚, 為同事kenix farewell, 所以我地成班人一行10人琴日放工之後就安排左一連串活動(其實都係睇戲 + 打邊爐姐!!!), 首先我地先去旺角新世紀睇"The Omen"(兇兆), 我同alan一放工就馬上搭小巴落新世紀join佢地。 呢套電影, 俾我想像中多好多血腥場景, 如果, 近排想追女仔的話, 呢套戲應該可以列為首選, 唔好話女仔, simon話alan頭先坐佢隔離個時都俾某d恐怖鏡頭嚇到成個人都彈起左, 試諗下男仔都俾佢嚇一跳, 何況係女仔。 不過, 成間戲院睇戲o個時, 一有個d恐怖, 核突鏡頭出現, 我地成班友仔係度大o益大叫(你諗下一行成排10條友喎!!!), 仲有呀, 睇完散場出戲院時, 仲係度好興奮咁講返頭先d核突場面, 我諗我地呢班人有少少變態, 哈, 哈。

之後, 我地就照原定計劃, 去長沙灣的新星酒家打邊爐, 就由新世紀行落去太子地鐵站, 搭地鐵過去啦!!! 當我地行到落去地鐵站概時候, 摸一摸褲袋, e, 死火, 少咁d野, 我部手提電話冇左架。我估計部手提電話應該留左係戲院, 因為一開始係戲院睇戲o個時都拎過部手電出黎攪"震機", 睇完戲之後都係去過toliet之麻, 而且, 我部手電都冇電話繩, 應該冇人咁大膽伸隻手落我個褲袋度偷, 如果真係有人伸隻手落我褲袋, 我咁大碌大脾冇理由feel唔到呀!!! 所以, 我就鐵定一定係留左係戲院, 於是我就以9秒9時間由太子地鐵站上番去戲院。

去到戲院, 我就搵個staff講返個情況, 佢夠膽死, 同我講話依家開左場, 叫我散場o個時先返黎(即係2個鐘頭之後), 佢地會幫我check, 仲話其實頭先佢地職員check過, 冇野執到, 應該唔會有, 我一聽完呢d野, 我真係火都黎, 我都做過戲院, 你地點會真係逐行慢慢睇呀!!! 我同佢講, 你到散場開燈, 實有人見到啦, 到時咪又係俾人執左, 佢就死死地氣, 係咁e行左入戲院話幫我望一望, 之後, 佢就兩手"fing""fing"行出黎話冇, 佢話我頭先坐個位就冇人坐, 但係隔離就有人, 佢話唔方便開電筒搵, 我就叫佢, 真係冇人坐的話, 你就試下坐落我個位度摸下四周圍有冇(當時我真係越講越火), 佢就開始驚就叫左經理出黎, 我就同佢講多次, 因為, 我係褲袋跌出黎, 所以今次我叫個經理自己坐落去個位, 睇下周圍有冇野, 果然, 不出我所料, 係我一切英明領導之下, 呢個經理搵番我部電話出黎, 我個心情簡直遊歷生死, 我feel到頭先搵電話個時, 見到一柱白光招喚緊我, 我搵唔到部電話, 簡直係想死, 好彩家陣失而復得....大命, 大命...666好邪呀....



之後, 當然係去join返佢地啦, 原來當晚mei要返學, 佢地就叫我係地鐵站等埋佢先一齊過去。 去到之後, 大家都坐定定, 我就去一去toliet定一定神, 洗個面先。 係我洗面其間, 睇到一位爸爸抱住個小朋友去尿尿, 小朋友攪掂之後, 就到爸爸去, 就係呢個時候位小朋友就踎左係地下望住爸爸講左一句:『嘩!!!! 好大呀!!!』, 我不其然打左個突, 點知爸爸仲堅, 爸爸話:『係好大架!!! 不過就唔好亂咁摸呀!!!』, 我於是認住笑兼一額汗咁走返出toliet。

成晚, 一大班人有講有笑, 好開心, 我地夾夾叫左差不多有成40碟火鍋配料, 勁呀, 仲有臨尾仲叫多3包"丁麵", cool, 成班大胃王, 仲有仲有, 呢間酒家, 由於係任點任食兼包野飲, 當佢一見到我地飲完d汽水, 就立即問我地仲黎唔黎多罐, 起勢咁幫我地refill。由於, 全世界都要睇world cup, 所以, 食到11點, 大家都要各自趕返屋企or上朋友度睇開幕戰, 就快快手埋單走人。

最後, 希望kenix係新工作入面順順利利, 家陣去唔到澳洲溝鬼仔, 希望你係第2度都搵到你個春天啦, wahahha。(之後, 記住都要keep住多d出黎玩呀!!!)


p.s: Macy你張post card好靚, d字就.......一般啦!!! haha, 我將妳張post card釘左係我個空了了的partition。終於有d野俾我釘上去....(咁岩, 今日有帶DC就影張相..哈..哈..)

水長流/漏

今日返到屋企, 打開屋企信箱時, 見到一封由房委會俾我屋企的信, 於是馬上打開, 信中提及有人投訴我屋企的冷氣機有滴水問題。 於是一入屋, 就即刻問阿媽發生咩事, 佢就同我講, 話今日下午, 有管理員上黎話有人投訴話我地屋企有冷氣機滴水(因為屋企o個兩隻靚妹係度, 天氣悶熱, 下午好多時都開冷氣), check一check, 原來係兩間房的冷氣機滴水, 於是, 我就打開工具箱, 拎d"架生"出黎, 立即變身"小小冷氣機師傅", 首先, 處理左阿媽間房的冷氣機, 攪左一大輪, 終於, 暫時解決左滴水問題, 因為條冷凝水的水喉彎曲左令水未能去到去水位置。 之後, 就攪自己間房啦!!! 好簡單, 都係條喉插得唔夠入, 塞入d就o.k, 就係咁, 一返到屋企, 就攪到開飯, 都攪左成粒鐘, 出到成身汗!!!

到夜晚食飽飯之後, 再開番阿媽部冷氣機試下, 睇下仲有冇滴水啦!!! 撞鬼呀!!! 又滴水, 頭先攪到成身身水身汗, 點知都係咁。 冇辦法, 今晚, 唯有開廳個部冷氣機, 打d冷氣入去間房, 滴水部冷氣機今晚要停用一晚, 等我聽日再攪過.....

p.s: 今日, 情況嚴重少少左, 除左喉嚨唔舒服之外, 個鼻同部冷氣機一樣, 漏水....

一個出牙...一個哮喘

呢個係我家姐個細女....阿媽話佢出牙喎。

今晚返到屋企, 聽到話大甥女病左, 睇完醫生之後, 醫生話佢有輕微哮喘, 其實, 呢兩隻野, 近排好似個電台節目咁玩"輪住黎試", 一個病完就到另一個。 死啦!!! 我今日都有少少喉嚨痛添!!!

失業

當然唔係講我份正職啦!!! 講緊的, 係我份"秘撈"~~~ 話說今朝返到office, 個屎忽都未坐熱, suki個friend就打俾我啦, 佢話今朝"秘撈office"個邊打俾佢話, 今晚冇電腦"吉"到出黎俾我地用, 所以今晚唔駛返, 原本, 我以為咁即係話遲一晚先返啦!!! 點知佢話係另行通知, 咁即係唔知幾時先有得返, 唉!! 我都係第一次, 返都未返就俾人炒魷魚。 秘撈大計失敗, 果然係貧者越貧, 富者越富, 我又跌返入去貧窮線之下啦....岩岩仲諗住可以去到貧窮線邊緣, 點知都係唔得......硬崩崩又將我拉返落黎...好可憐呀!!!

六四運動 - 游水是也

今日11:30先起身(終於冇人噪醒我!!!), 見到個天有"丁屎"咁多太陽, 同奶媽慶祝的"六四晚會"又提早一日舉行左, 見下午又冇野做, 於是, 就走左去泳池曬太陽兼游水啦!!!

由於, 張學生証借左俾人, 今日要用返正價$19元大洋入場, 好肉痛呀!!! 平時俾開學生價$9, 家陣要俾多$10, 所以, 今日我一換完衫, 就立即落水游返幾個直池先, 咁先可以彌補返俾多$10的差價。 今日基本上, 真係除左我起身個一刻有過唔夠1分鐘的太陽出現過之外, 成日都係天陰陰, 所以今日落到泳池都全主要游水多。就算攤係個沙灘椅上面休息時都覺得涼風陣陣。 由於天陰再加上俾多$10入場費, 本住冇蝕底的情況下, 今日足足游左30個直池, haha....

游完水, 就走左去附近的公共圖書館, 順便攪埋將張圖書証加埋入去個智能身份証度, 咁以後借書就方便好多啦, 其實, 手續都係好方便, 只要填張form, 之後, 拎去counter, 就有職員幫你, 十分方便快捷。

今日係六四, 17年前的我都係先得個9歲, 當時睇新聞電視直播天安門, 仲以為係播緊電視劇做戲, 到大個d先開始了解係什麼一回事, 發覺自己身處香港係一個國際都市, 乃係一個幸福的事, 起碼, 七一遊行個時, 唔會冇啦啦有架坦克車走出黎剷你架麻, 係香港頂晒龍, 都係d警察拎支胡椒噴霧, 請你食下辣椒。 自由很重要, 請大家享受下。



p.s : 由於星期日去游水、曬太陽關係都會聽下收音機relax下。 又係度推介下個電台節目先, 逢星期日1:00p.m - 2:00p.m由嘉琳 & 陳輝陽主持的<最佳配樂>, 佢地每星期都會定一個topic, 之後佢地就會圍繞呢個topic, 再閒聊一些相關的話題, 再介紹一些特別歌曲, 很好聽。 係星期日, 聽呢d節目成個人都relax晒。

提早六四慶祝晚會

哈, 我講的當然唔係17年前的六四民運啦!!!

聽日係六四, 原本聽晚約左jackie佢地出黎食飯, 慶祝奶媽生日, 點知jackie琴晚打俾我, 話記錯左以為係3/6(星期六)食, 所以佢星期日就約左要去william屋企食, 所以黎唔到, 我叫佢自己打俾奶媽聽啦!!! (自己記錯唔好要我幫妳補飛呀!!!) 點知個衰婆之後打返俾我話, 咩幸福之神眷顧佢, 話奶媽星期六原來得閒, 就係咁所以由原定的六四慶祝晚會就提早一晚。



今晚去食飯的地方由奶媽自己定的, 我去book位, 我地去左九龍地鐵站對出的City Golf入面o個間泰國餐廳食dinner, o個間餐廳叫"Thai Mary", 可能間餐廳係Golf Club 入面, 個感覺好似high d, 當然啦, 佢本身的裝修都很靚, 一入門口仲有個四面佛係度添, 個四面佛同泰國o個個有得比。

係前晚, 小貞貞打左俾我話佢自己胃炎, 所以未必黎到, 我就叫佢休息下啦!!! 點知, 今日下午, lingling打俾我話, 小貞貞可以捱到過黎坐下, 但係唔食野, 連埋小貞貞我地一行8人啦!!

呢間餐廳, 你book位個時可以選擇坐indoor or outdoor, 其實, 天氣唔係太熱基本上坐outdoor都o.k架, 環境不俗, 不過, 我地一行8人, 都係入去indoor嘆下冷氣算啦!!! 係門口我發覺有個牌寫住member only, 車, 都唔係呀, 我都唔係member咪又係一口可以book位、入黎食。食個方面, 一般, 又唔係特別好食, 又唔係難食, 不過, 佢d份量比想像中少&細, 價錢同普通泰式餐廳一樣, 唔係貴。成個overall呢間餐廳評價, 可以一去, 食個環境 & 氣氛, 野食就普通水準啦。