欲罷不能

今日情況有些微好轉, 琴晚訓左個好覺。 一起身, 阿媽同我講, 抬面有方包可以當早餐, 當我梳洗完畢就走左食塊方包, 咬左兩啖, 覺得淡淡地(就係咁, 又賴野啦!!!), 於是就走左入廚房, 手起刀落, 就搽左塊牛油落塊麵包度, 食完都冇咩野(自己以為!!!), 點知, 一踏出門口, 就心知不妙, 個肚就黎料, 即刻轉返入屋, 入廁所將頭先岩岩食個d麵包一次過放返出黎。 清完條"跑道", 終於安心返公司。

返到office, 成朝都冇驚冇險都只係去左2,3次姐, 已經比琴日少左3倍, 已經算係成績不俗。 但一食完lunch(今日lunch只係敢食餐蛋米), 個肚又黎過, 可能係d藥過左時效, 於是拿拿臨落樓下"7仔", 買返樽喇叭牌, 好彩有d丸仔, 塞住個門口頂得住下, 安然渡過一個下午。

今晚, 係屋企上緊網的時候, 突然收到suki個friend的電話, 佢話"秘撈公司"話急趕要人用, 問我聽晚返唔返到工, 當然返啦!!! 錢喎!!!我家陣就係缺乏的一樣野....好!!!聽晚個肚要生生性性, 唔好再痾, 唔係一個唔覺意俾間公司塞我飲d咩健康水就死火啦!!!