Part-time / Summer job之談

講開part-time, 我之前都好似做過唔少, 有d係summer job 有d係part-time, 我中學個時第一份summer job(仲要係會考之後的第一份), 當時, 同camus, 一齊去搵, 細個o個時都係鍾意柴娃娃搵工, 就搵左份"行街"做推銷, 我記得, 當時o個間公司, 係要d"行街"拖住個"行李仔"(當然入面係d貨啦!!!)出街, 就四周圍搵人買, 第一日, 我地分別跟左唔同的"行街"傻下傻下咁行左一日, 我覺得份工唔係咁岩, 所以就冇再做。

之後, 仲有做過大家樂水吧, 係呀, 即係沖咖啡, 奶茶個d, 而當時因為係做summer job即6,7月時段, 岩岩係夏天時份, 大家樂都會出d夏日特飲, 所以, 我都識整紅豆冰o個d架。做大家樂都幾辛苦架, 每日要企足10粒鐘, 又冇時停, 朝早, 就要應付食早餐個d人, 下午就要應付食lunch and 食tea d人, 到夜晚收鋪仲要做埋清潔, 真係冇時停。仲有呀, 水吧永遠都係一個人冇人會幫手架...

之後, 仲見過份速遞, 不過, 唔記得左點解最後冇做到。 仲有, 仲有, 我去過"元綠"做waiter, 不過, 我當時呃佢我會係做長工(當然, 我係諗住當summer job啦), 佢又信我喎, 我個時係Time Square後面o個間返工架!! 到臨返學o個時, 個casher走左, 個manager就想train我做casher, 當時, 好彩, 我同個副經理好熟, 副經理通知我呢件事, 我費事佢地train完我就走左去, 浪費人地一番心機就唔好啦, 咪同manager講我搵到第二份工, 所以要走, 好彩o個時都差不多放完summer。 仲有, o個間元綠係收成零晨2:00(依家唔知係唔係), 佢地到左零晨12:00就會播電影, 我就最鍾意呢個鐘數, 一來又冇咩客, 兩來又有電影睇。

又試過係親戚鋪頭街市買凍肉, 即係個d香腸, 雞翼, 豬排個d啦, 日日同d師奶講價, 同埋跟親戚送貨 & 跟車。

又試過去整月餅, 其實當時係去家陣已經結左業的酒家, 好似叫敦煌度做, 係朋友介紹的, 不過, 去到餅廠佢地話, 整餅的人已經夠晒, 問我做唔做倉務, 都係搵錢姐, 咪又做羅, 搬搬抬抬, 唔係講笑, o個個暑假之後, 成個人都大隻晒。公司好好架, 日日都有下午茶, 有試過食西瓜, 珍珠雞(因為本身係酒家), 蛋糕西餅又有, 總之日日新款啦。仲有一樣野唔係人人都試得到, 就係新鮮出爐的月餅, 真係好好好好好食架。 最後, 臨尾o個時, 一人仲有2盒月餅拎走, 幾好呀...

有一份part-time就係前女友的媽媽臨時拉夫, 叫左我&前女友去左地鐵站派野, 至於派d咩, 就唔係太記得...

最後一份就係讀poly o個時, 去左戲院度做part-time啦!! 當時放學就去返工, 星期六 & 日都返, 做戲院就有個好處, 就係爆谷, 汽水任飲, 所以家陣小弟對呢兩樣野冇咩興趣, 因為做戲院o個時食得太多, 飲得太多。 仲有個好處, 就係做戲院職員每個月都有免費戲飛, 可以益下自己d朋友仔, 當然啦, 自己放工個時, 我都會靜靜雞'蛇"左入去睇戲架..hehe///仲有, 係戲院大大話話都做左2年, 都識到一班玩得的同事, 雖然唔係成日再約出黎, 但都會定期有活動(一年一次羅, haha)

原來, 唔計正職, 我大大話話都做過7份工....不得不讚下自己厲害