辦公室一, 二事

琴日係office同事傾緊計o個時, 唔知邊樹黎左隻蒼蠅飛黎飛去, 同事G就彈左一句話:『我地呢度果然係夕陽部門~~~蒼蠅都黎"嬲"一"嬲"!』, 哈!!! 講真, 係我未轉過黎之前, 我都聽聞我地呢個section成日都話會摺埋, 不過講左幾年都依然健在, 唔通呢隻蒼蠅就係先兆。

今日下午四點零鐘o個時, 我既新阿頭黎左(其實應該係下星期一先黎report duty), 聽聞佢係由SO轉上黎做BSO, 不過, 見佢個樣好似比較沉靜咁, 唔知打後既日子會係點呢!! 不過, 都好既, 唔係咁嚴, 而且大家都係後生仔女易話事, 總之俾我順順利利做晒d功課&讀書就得架啦, wahahahhah!!! 我畢業之後, 就會出去創一番大事, wahahhahahha!!!! 今年係我Final year, 邊個阻我讀書既話我可以敢講係遇神殺神, 遇佛殺佛。

午夜場

之前, 有一段時間"無記"播過『創世紀』, 掀起一陣話題及熱潮, 當時冇人不捱更抵夜去睇12:15a.m o個場電視劇, 『創世紀』之後都有播過一輪好好睇既舊戲例如『尋秦記』, 『刑事偵緝檔案』, 仲有『難兄難弟』添, o個排真係個個返工都黑晒眼圈, 就算同d朋友仔出黎食飯都係講緊, 午夜場個套劇, 反而正場8:30p.m & 9:30p.m個場就冇咩人講。



過左一度氣之後, 無記冇啦啦就整d乜鬼"翡翠首映", 搵返d爛鬼倉底貨出黎, 咩『追魂交易』, 『心慌心郁逐個捉』, 真係爛過唔爛呀!!! 我諗無記咁安排都係等之前d人成日捱夜睇電視有個休息既機會掛!! 岩岩星期二上去牛屋企食消夜(因為打完tennis之後, 順便上佢屋企拎朱古力), 睇到電視原來之前個『倩女幽魂』已經做完左, 家陣播緊『棟篤神探』, 呢套戲最正當然係莫探員(黃子華), 尤其是呢d合家歡劇, 估唔到大結局居然係個悲劇收場, 大家家陣可以捱眼訓再重溫啦!!!!

一籃子問題

今日放工之後約左2個同學返學校見dissertation(畢業論文)個supervisor, 其實原本係約上星期既, 不過, 突然間個supervisor話唔得閒, 所以就轉左今日見面。 返到學校6:30p.m, 見到wilson已經坐左係conference room 等, 另一個同學仔就遲左小小先到, 人齊之後, Wilson就過去阿sir個office叫佢過黎。

之後, 就同佢(應該話係由佢briefing)傾左一陣, 佢提出左好幾個問題, 令到我本身自己定出黎既topic有機會要重新諗過, 佢話我個topic係有趣, 不過, 係佢眼中去到盡都係只能夠去到B, 要合格應該唔難, o下, 唔係呀, 我要求雖然唔高, 但都唔好定到咁低『合格應該唔難』, 所以家陣又要重新定返個大方向, 同佢講左成晚(都係個零鐘姐), 佢成晚都係度講你個point of statement係咩, 佢話你答到呢點, 已經完成左份dissertation既一大半, 超, 鬼唔知呀...『point』, 你估係好似詹瑞文係"春田花花"講咁易呀!!! 捉住個"point", 做人最緊要係到"point", 我要知個"point" 係邊先得架, o個個唔係"North Point"(北角), 拎張八達通do一do搭地鐵就去到!!!

世上只有媽媽好

琴日下午, 老媽與家姐及兩個大小不良出左去尖沙咀逛街, 返黎屋企之後, 老媽就俾左個Tommy既紙袋我, 跟住話:『黎緊你生日, 送件衫俾你!』, 真係令我驚訝, 因為之前不嬲老媽都係係生日當天就咁封返封利是就算, 今年佢居然會送禮物。

老媽對品牌呢一回事不嬲都係不聞不知, 我諗佢最多都係知『佐單佬』, 『G二千』等"名牌", 今趟佢居然會係Tommy度買件Polo恤俾我, 仲要係成三百幾蚊, 雖則明白知道, 老媽佢成日都話我自己買o個d tee下下都要二百零蚊唔抵, 佢話不如落樓下街市幫我買$50/3件個d衫仲化算。 所以今日佢肯買件三百幾蚊既衫俾我, 我真係驚訝 & 感動(當然啦, 我呢d man黎架麻, 有淚心中流)。

善後工作

每一次出去玩, 我都會帶部DC去影相, 一來影下相for寫blog用, 兩來記錄低每次出去既情況, 所以每次玩完之後都要send返相出去俾大家, 呢個亦都係最麻煩既地方, 當然啦之前部機short short地, 就連最基本, 由部DC過d相去部電腦都成問題, 仲話要send俾人, 簡直係高難度動作, 不過, 自從堅幫我攪掂部腦之後, 一切都順晒.....so great & thx堅again~~~~

如果係堅仲未到我整部腦之前, 根本冇可能出現到咁既畫面係我個桌面度, 可以同時through msn & icq send相俾3個人(send緊既係牛牛生日相片)

p.s: 想要相既人麻煩自己係non-office hour係icq or msn "hi"我, 叫我send相俾你

緊接其後 - 深圳地鐵之旅

呢個就係我一早就食既麥記早餐~~

早在月頭已經約左Jackie佢地話今日會上去深圳玩, 所以琴晚都唔敢玩得太晏(雖然都係玩到成零晨2:30a.m先返屋企)。 所以琴晚返到屋企更醉都要記得臨訓前攪定個鬧鐘, 唔係唔知醒就死硬。 琴晚返到屋企, 沖涼換埋衫都已經4:00a.m左右。 實際我得4個鐘左右既時間訓覺, 因為我要8:15p.m就起身刷牙洗面換衫出門口(我地約左9:30a.m係九龍塘火車站等。)

8:15a.m就自己彈左起身, 個人都仲係弗弗地咁, 但係又廢事訓返落去, 因為呢d行為係最危險既一訓就一定會唔知醒, 於是就走去起身刷牙洗面, 之後8:45a.m就出門口。 我問阿Ling今朝駛唔駛食埋早餐先上去, 佢話食少少野先, 上到去再飲茶。由於琴日(今朝)飲到嘔, "獲利回吐"左好多野, 個肚入面基本上係空了了, 咩都冇, 如果仲有捱成粒鐘火車入去深圳先有野食我應該會客死異鄉, 所以就去麥記買左個豬柳蛋漢堡頂一頂住先。

9:30a.m好準時到達九龍塘火車站, 其他人好奇怪地今日異常地準時, 就係咁我地準時出發我地今次深圳之旅。 今次深圳之旅有我, Jackie, William, Ling, 康, 小貞貞, 奶一行七人。

就係呢佢保齡球場, 我地搵左佢好耐~~


首先, 我地先去酒樓飲茶, 可能係一D唔駛返工既日子要大家咁早起身係一件相當困難既事, 所以, 大家係飲茶呢一part既活動, 好似提唔起勁, 當然係包括我在內啦(大佬我真係訓左4個鐘)!!! 食左少少野, 就買單走人。 之後, 就由今次領隊Ling Ling帶路搭地鐵, 去一個叫『球王』既保齡球場, 由於Ling Ling手頭上個本介紹深圳既旅遊書係好好幾年前既貨仔, 所以我地係千辛萬苦既情況下先搵到呢間保齡球場, 係上面碌齡真係幾平下, 1:00p.m前就$10一局, 1:00p.m就係$15一局, 係香港玩, 都要成$5-60一局, 真係平, 而且環境都o.k啦!! 為左增加個刺激度, 我就提議一人拎$10出黎做彩池, 贏左就可以拎走呢個彩池d錢。 由於, 保齡球場個system只可以set六個人玩, 所以我就part住奶做同一team, 開頭我同阿奶係威係勢, 點知後尾俾Ling ling追到兼返超前, 最後就失落於個彩池上, 俾Ling Ling係我手中搶走$70。 之後就玩多局, 今次我就part小貞貞, 點知都係俾人追返上黎, 今次贏家就係Jackie。




玩完d咁"劇烈"運動之後, 個個都死晒狗咁, 根據之前原訂既行程表, 我地再接住會搭地鐵去書城, 呢個書城, 俾我既感覺似係"商務印書局"開既, 因為佢入面d裝修, 格局同"商務印書局"個d係一模一樣, 成座書城樓高6層, 每層都有唔同既分類。 去到書城, 就俾左45min既自由活動時間大家逛下, 睇下書。 我一路行, 就覺得呢度d人有d都唔係睇書, 好多人就咁坐左係地下訓覺都有, 仲有, d人坐晒係地下阻住晒d路, d人行過個時又冇咩意欲縮開讓路俾人過, 我諗08年北京奧運要攪得好好睇睇, 人民既質素都變得好重要, 正如有d報道所講, 硬件就齊晒(such as運動場, 體育館個d), 軟件就仲要好好裝備下。



之後, 由於我地諗住食飽飽先去揼骨, 所以今日就早d去食dinner, 於是我地又再一次搭地鐵, 今次既目的地係去今晚食dinner既地方-小肥羊。 去到國貿站, 我地就係o個個商場, 行左一陣, 突然間, 阿Ling就見到有一間『鼎泰豐』就係台灣食小籠包好好食o個間, 係香港蔡 美食坊都有間, 不過, d人話香港分店唔好食。 一場上到黎, 就一於去試下啦! 我地7個人就叫左兩籠小籠包加一籠蒸餃, 味道真係一般, 就連我呢d十分好小籠包人士都覺得佢唔多好食就知啦!!! 黎到呢度, 我好懷念當年畢業同牛牛, 堅, Jessica去台灣食正店『鼎泰豐』既情境, 4條友叫左起碼5籠小籠包&蒸餃, 正呀!!!

食完呢個『鼎泰豐』小食之後, 我地就急急腳走去小肥羊, 因為大家之前碌完保齡之後, 已經消耗左一大半既體力, 所以大家都肚餓非常。 我地5:30p.m左右已經到左小肥羊度坐底, 一坐低就拎起張點菜紙係度點野食, 其中有一個係烤羊排, 可以話係"讚呀!!!" 大家如果有機會上到去深圳既小肥羊都有點呢個黎食好得....食完埋單計人數都係位位$50左右, 如果係香港既小肥羊食, 我食過一次, 起碼要位位3舊水落樓。


就係呢個烤羊排, 掂呀!!!

食飽飽只不過都係7:30p.m, 我地就由小奶奶帶路, 搭地鐵返去羅湖火車站o個邊揼骨, 今次呢間就正正係羅湖火車站隔離, 我地個個都首先按一個鐘頭腳, 之後, 原本諗住揼兩個鐘頭骨, 不過, 師傅提醒話如果揼兩個鐘既話, 可能過唔到關, 經師傅提一提我地就由兩個鐘轉返一個鐘, 最後, 我地差不多成11:30p.m先離開搭火車返香港。

總結, 今次行程由朝9晚11半, 都只係用左3百蚊都唔駛, 所以閒時返大陸玩都幾好....仲有, 今日前前後後搭左4次地鐵穿梭呢個深圳四圍玩, 真正地鐵之旅。

七、八、九飲到嘔

星期六先係牛牛既生日大日子, 但係正日當然係留返俾佢同堅過兩人世界啦!!! 所以今晚我地就先同佢食飯慶祝先, 聽日就由得佢地兩個過佢地兩人世界。 今晚我地book左一間係銅鑼灣既泰國餐廳食dinner, 呢間餐廳正正就係總統戲院樓上叫『泰簡單』。到左5:15p.m左右我已經到左銅鑼灣, 由於牛牛先前已經同我講佢想要個軍曹公仔掛係我地將會送俾佢既生日禮物(一個X-girl既布袋for佢遲d返學用)上, 我就四圍搵下邊度有得買呢d野, 幾經辛苦終於斜我係d玩具舖頭搵到。

6:15p.m左右, Jaemi打俾我, 問我係邊樹佢話佢放工過黎搵我(佢係銅鑼灣返工), 我就係Sogo附近等佢啦, 佢一過到黎就同我講話好肚餓, 我地見時間尚早(我地book左7:30p.m), 於是就走左去KFC坐下兼食少少野, 佢就食左個鬆餅, 我就要個細薯蓉, 大家食住野吹陣水, 過一陣已經7:20p.m, 於是就行過去『泰簡單』度, 我同佢兩個好準時就去到餐廳, 仲有其他人, 唔駛問當然係例牌遲到。 我同Jaemi雖然剛才係KFC食左少少野, 不過, 眼見Menu入面咁多款野食, 加上頭先個d鬆餅, 薯蓉都只不過係過下口癮, 根本頂唔到肚, 於是就趁其人未黎先前, 我同Jaemi就偷偷地叫左個雞翼食先。 原來偷食個感覺好正, 一路望住個門口(睇住佢地黎未), 一路大大啖食, 真係幾正, 唔怪得之咁多男人去偷食啦, wahahahha!!!

呢碟就係我同Jaemi偷食既釀雞翼~~~

7:50p.m 牛, 堅, 達終於都黎到, 過多一陣Camus, Melody & Jessica都黎埋, 齊人於是就叫野食, 今餐都幾豐富, 我地叫左個中既冬陰公湯, 蝦餅, 燒墨魚, 泰式濕抄河, 明爐燒魚, 抄芥蘭, 泰式豬頸肉, 飯筒(其實只不過係炒飯), 仲有泰式豬肉多士。 係一路食野期間, 大家就開始商討我既生日去邊樹玩好, 其實上次阿堅生日食飯o個次, 大家都傾好左話9月16, 17號大家一定要請假去『海泉灣』玩返兩日一夜, 琴日就舊事重提, 主要係因為阿牛聽聞『海泉灣』得返黎既回應係一般, 所以有見及此, 今日就再動議去邊樹玩, 今日提出去幾個方案1.) 海泉灣, 2.) 露營, 3.) 長隆野生動物, 4.) 去長洲or 南Y島等地宿營。 經過各方面一大輪既商討, 大家暫時得到一個共識, 就係去露營。 雖則我自己中學時代去過幾次露營, 但係同佢地去都係第一次, 所以都應該係幾好玩, 在此都十分多謝呢班朋友咁用心去傾我既生日。

食到9:45p.m左右, 就埋單走人。大家見到標題寫住『七、八、九飲到嘔』, 又點會咁快完呢, 我地幾個除左Camus, Melody & Jaemi之外, 我地幾個幫牛牛係登龍街其中一間bar度包左間房($300任飲酒水), 可以等牛牛叫埋佢d同事&朋友仔一齊黎同佢慶祝生日, 我地10:00p.m左右就到場, 之後, 其他人就陸陸續續到場, 牛牛今晚就威, 四圍飲, 四圍"乾", 芝華士綠茶, shooter......等, 除紅酒以外, 基本上只要含酒精既飲品佢見到就拎上手。 到左12:00a.m, Jessica就拎出早已準備好既生日"蛋糕"出黎, 當然壽星女許願, 影大合照啦, 係唔係見到我用『""』括住蛋糕兩個字呢, 因為呢個唔係普通既忌廉蛋糕, 聽Jessica講係西瓜蛋糕, 至於好唔好食呢, 冇人知, 因為當阿牛同我影合照個時, 我就黎手將個"蛋糕"塞左去佢塊面度, 成個"蛋糕'就俾我K.O左。

全酒精類飲品

係唔係成日都唔見我呢, 因為, 今晚我係充當戰地記者, 成晚就幫『七、八、九飲到嘔』既主角-牛牛幫佢影底開心每一刻。

好難得有我個樣既相, 同埋清醒時既阿牛, 因為之後開始佢既『獲利回吐』人生。

遠鏡 - 牛牛的兩位好同事"美寶" & "珍尼花"幫手照顧牛牛。

大家請留意呢張相, 唔好以為牛牛好清醒, 你click大張相黎睇, 佢對眼係定左格架, 佢應該係處於"不醒人事"狀態, 仲有前面個桶就係佢既開心"泉源"~~ 仲有張相做咩樹咁朦, 因為我都應該係醉醉地手震~~~whahahaha

不過, 就算係咁, 牛牛今晚都玩得好開心, 因為, 未過1:00a.m佢就已經飲到嘔, 係起勢個隻, 佢個前同事"美寶"與現同事"珍尼花"就幫佢拎住個酒桶俾佢『獲利回吐』, 佢已經係不醒人事個隻, 淨係識得起勢咁嘔。 堅更尤如一位小小太監要陪伴在則啦!!! 而我成晚不斷係度講『我冇醉!!!』既人, 當然把握機會將牛牛呢d"嘔心"相片一一影低啦!!! 由於, 我聽日約左Jackie佢地返深圳玩要成8:00a.m起身, 我就玩到2:30a.m左右就走先, 如果唔係聽日實起唔到身。

一個人醉醉地就落左去灣仔搭架旺角小巴出旺角, 一上車就合埋左對眼, 再打返開對眼個時架車已經出到旺角, 中間既過隧道個d呀, 我完全冇印象, 架車好似識"瞬間轉移"咁一下就標左去旺角, 次後, 就上的士返屋企。 返到屋企都已經3點幾, 就立即換衫沖涼, 訓覺。

p.s: 今日同阿牛傾完電話, 佢話我已經俾人爆左大"獲", 俾牛媽媽知道我掟"蛋糕"整污穢左牛牛件衫, 之後, 牛牛話牛媽媽話：『叫Gary上黎食飯, 叫佢記住買返個蛋糕上黎』, 我諗呢排我都係唔上牛牛屋企食飯住。

家中的大小不良

大不良 - 3歲8個月, 今年升中班並且將會返全日制幼稚園(之前係返半日!), 。 佢鍾意含飯多過食飯, 佢可以將一啖飯含住係個口度15鐘都唔可吞落肚, 所以平時佢比我地早15-20分鐘開始食飯先。

小不良 - 11個月大, 之前只係識兩手爬爬拖動那臭屁屎忽行走, 岩岩先學識手腳配合四腳爬爬。

老媽稱此動作為之"叉電 "(意思係小不良將其手指公塞入口中, 食得津津有味), 小不良"叉完電 "之後就會鬼打咁精神!!!

Friend定唔Friend

話說上星期上牛屋企食飯, 食飯既時候都會傾下計, 之後講開JC既事, 牛媽媽話我唔好成日取笑JC, 牛爸爸就話:『Gary都係當JC係熟朋友先講姐, 知大家太熟先會敢講!!』, 牛爸爸果然係了解我!!!

朋友們呀!!! 你要知道, 如果以下情況發生係你身上, 我真係當你係我既好朋友先會咁做:

1.) 我經常性拎你作開玩笑對象, 你千萬唔好嬲。 因為我當你係friend, 兼且知我同你太熟(起碼我覺得係!), 你都應該會知我只係講笑唔係認真。 如果唔熟既, 我都唔敢同你開埋d咁既笑話啦!!!

2.) 唔好謙我煩成日問你呢排有咩野攪(縱然可能琴日已經問過一次), 有冇咩特別事發生。 因為我已經當你係我好朋友, 我先會關心你。 如果我唔當你係我個friend, 我係唔會花時間問你d咁既野, 大家係咁e閒聊兩句就算, 有時間我唔好走去打機or出去玩, right~~~

冷笑話-爛笑話@Round 2

正所謂『野草燒不盡, 春風吹又生』, 沉靜左一星期既冷風, 唔知咩樹, 失驚無神又黎過, 無聊同事們又黎一個狂風掃落葉式勁post冷笑話出黎:

小榮想要幫他新交的女朋友買生日禮物，他們交往不久，
經過細心的考慮後，他決定一雙手套是比較好的選擇，
很浪漫而不會過分。而且，最近快有寒流來襲了。
他跟他女朋友的妹妹一起到百貨公司買了一雙白色的手套。
他女朋友的妹妹則為自己買了一條內褲。在包裝時，店員弄混了，
女友的妹妹拿到手套，而他得到內褲，沒有檢查一下包裹裡的東西，
他將禮物寄給女朋友，同時附上一封信：

親愛的：
我選擇這件禮物因為我注意到你在晚上出去時，沒有習慣穿它。
如果不是你妹妹的話，我就會選大一點的，但是她穿的比較小，
比較容易脫。它的顏色很淡，我怕容易髒，但是售貨小姐穿了同樣的一件，
她說她已穿了三個星期，她給我看了，都不嫌髒。我看她的尺寸跟你一樣，
我請她試穿，穿上後看起來非常漂亮。我希望我能第一次幫你穿上它，
因為我相信，如果我不是第一次，在我看到它以前，一定有別人的手會摸它，
也一定有別人的眼睛會看它。當妳脫掉它時，請吹一下再收起來，
因為它一定會有一點濕。想一想，這一年我會親它多少次。
我希望你在星期五夜晚會為我穿它。
P.S. 如果趕上流行，戴它時，將上面摺下一些，這樣裡面的毛才露出來。

愛你的　　小榮上

喂？搵邊個？
呀，我搵楊過呀！
我係David Bowie呀，你係邊個？
車，我係David煲湯呀！
我係David煲薑呀！
係咁我David Bowling呀，喂，你個電話幾多號呀？
四號呀！
hello，我想搵你戴帽
喂，你住係邊度呀？
我住係印度呀，喂，你一陣間去邊呀？
我一陣間去金邊！
喂，我去海邊呀！
我去扎辨呀，你屋企邊度呀？
我屋企係隧道呀！
喂，d生果點賣呀？
比錢買囉！
喇，我要兩杯檸茶、兩杯檸水、兩杯奶茶，你要咩？
我要檸奶呀，喂，呢度準唔準搭台架？
呢度比唔比搭棚呀？喂，我識方太，佢寫方太與你呀，你識邊個呀？
我夠識馬太囉，佢寫馬太福音呀！
咁你貴姓呀？
姓騷擾呀，咁你貴姓呀？
姓性呀！
性家班呀？
緊係啦！
做舞獅架？
唔係！
咁做咩呀？
做衣車呀，你吹呀？
我吸呀！

目前溫度: -273.15C

主考官問蘇軾: What is your name?
蘇軾答 : I am So Sick.

主考官想 : 問非所答 , 可能是病得很嚴重了 . 不過始終要 Fail.



到蘇轍了...
主考官問蘇轍 : What is your name
...
( 大家估下他點答?)



...











蘇轍答: I am So Cheap.
主考官大感錯愕: 為何這人如此坦率 ! 不過問非所答 , Fail.



到蘇荀了...
蘇荀能pass, 但其答案也令主考官莫名其妙 .
...
...
( 大家想下他的答案是什麼?)
...
...







蘇荀答: I am Susan.

在美國留學的小玲回港慶祝她媽媽的生日派對,

她還帶來了在大學所識的鬼仔男朋友~

生日派對那天早上,

小玲教她的男友見到她媽媽時要說廣東話

「褔如東海,壽比南山」,

他練了一個早上~

男友到了小玲的家,

開門的是玲媽媽,

於是小玲的男友便大聲的說.......












「Fuxk you don't high,收皮爛西」

想睇返--->冷笑話-爛笑話@Round 1 可按此

I Travel, so I am alive

上星期冇野做上網四圍click下click下, 係Macy個web-site度click到條呢條link, 一click入去, 就見到好多好多好多好多好多既靚相, 睇完真係成個人都呆晒(應該係話O晒咀!!! 因為d相實在太靚)。 Pink(網主)一個人獨自backpack去西藏及尼泊爾, 並在旅程中認識不同的人, 加上見到佢係文中描述既過程十分有趣, 並且旅程完結之後, 整左呢個"遊記+靚相"的homepage同大家分享, 所以在此亦推介俾大家去遊覽下, 仲有佢個homepage仲提供左好多去西藏既有用資料俾大家<<<< 下年畢業之後, 我應該會去西藏一趟, 尼泊爾都o.k!!!(如果有錢有時間的話!!!!) Pink: I travel, so i am alive: 一位女子隻身去西藏及尼泊爾旅行, 當中包括佢影既靚相及記錄左佢既行程趣事: http://happy_pink.sinagirl.com/index.htm

Wallpaper

話說上個星期一上左阿牛屋企食飯, 食完飯之後, 牛就拎左個部DC出黎講下佢前排佢同堅入左南Y島, 仲有佢同佢polyu d同學仔入長洲影個d相俾我睇, 仲係部大電視機度一路播一路講介下d相既內容, 唔講以為自己去左個旅行社茶會, 係度講解下自己報左o個個團有咩玩添, 睇到其中一張, 牛就問我呢張相影個藍天係唔係好靚, 係唔係好得, 係唔係好正, 做wallpaper係唔係一流呢? 我都未俾得切反應, 佢已經自動自覺咁用個card reader入左相張去我部電腦度(部腦岩岩俾堅攪掂左, 不過未install晒d software), 就係咁家陣我部腦就用左呢張相做我部電腦重生之後既第一張wallpaper(~~~唔知我會幾時頂唔順換左佢呢!!!)

手術成功

今日, 上去阿牛屋企拎返部電腦, 呢幾日屋企冇電腦既日子, 晚晚都十一, 二點就攤落床訓覺破晒紀錄。

在此先謝過今次既主診醫生->>>堅, 佢親自為電腦診症及解剖, 將有問題既病毒取出, 並殖入一d新既器官(ram), 等部機可以行得快d。 得佢為部電腦加入續命丹, 呢部機應該可以用多2-3年, 又可以慳返d錢....great。

上去拎完部電腦之後, 就托住部機返屋企, 去返深水步個頭搭巴士返屋企, 今日天氣超悶熱, 就算自己著住件背心出街都係成身汗。 返到屋企拿拿臨就駁返晒d電線。 家陣開機時間唔駛再等, 話咁快就可以去到桌面......呢個情境好感動, 真係好耐都冇試過可以咁快show到桌面(因為舊時要load好耐!!!)

好朋友系列: 蘇生

蘇生又是本人的中學同學之一, 都唔知佢係食咩大, 好鬼"高"佢好似應該6尺有多, 舊時大家都係同一間中學返學, 早餐&Lunch大家都係食o個d野, 唔係餐蛋麵就係什排飯架啦, 有咩理由佢就標得咁鬼高架, 所以我成日都懷疑佢應該係個d腦下垂體生左個腫瘤, 之後就有個d"高大症"之類既野, 不過, 識左佢十幾年佢都仲係"生勾勾"仲未死, 所以我既推斷應該係錯既!!!

講開佢食野, 佢屋企係一個非常十分健康的家庭, 佢屋企既廚房係搵唔到呢個世界上最偉大既發明, 而且係生活既必需品(起碼我應為係~~)----->公仔麵, 天呀, 一個屋企, 點可以冇公仔麵做儲量架!!! 曾經聽佢講佢媽媽唔俾佢地食呢d咁唔健康既野食, 仲有呀, 就算屋企煮公仔麵的話, 都唔可以落個包味精, 個包公仔麵點解會值$2.5, 完全就係個包味精既存在, 唔落, 咁我寧願食粥算罷!!! 所以中學o個時, 同佢出開去茶餐廳食野, 佢都會食公仔麵(仲要係丁麵個隻喎)。 正因如此, 有一年佢生日, 我地成班人夾錢原本想買箱丁麵俾佢拎返屋企, 不過, 就算送左俾佢, 佢返到屋企咪一樣冇得食, 仲有我地要送既話咪托餐死, 所以我地後尾決定買一條有"出前一丁"print既的孖煙通俾佢, 當佢想食個時就可以除左條褲就可以有得幻想下自己已經身處呢個"丁麵海"之中, 仲有條雞尾腸送添!!!!(唔好意思, 爛gag一個~~~)

我同佢中學時有個特別既稱號叫『黃社孖寶』(其實係我自己作既!!!), 因為我o個時同佢都係黃社既人, 係每一年既陸運會, 我同佢均係不同既項目上面贏取冠軍, 佢就跑長跑, 我就跑短跑, wahahhah, 各自為自己既house拎到不少既分數, 所以我地個house可以連續幾屆得到在場總冠軍, 都係拜我地兩個所賜, wahahhahah~~~

出黎做野之後, 雖然至今我都唔係好知佢份工係做d咩, 不過, 都幾羨慕佢份工可以四周圍飛, 佢去美國, 德國, 英國..........總之就去左好多地方啦, 因此人和事佢都見識過不少。 試過有一次大家去飲野o個時, 佢好晏先到, 聽佢講話佢岩岩見完客, 係中國城飲完過黎, 什麼! 中~國~城~!!!! 係香港鼎鼎大名既夜場, 我呢世仔暫時仲未儲夠錢入去玩一晚, 依家只會係『金雞』既橋段先會睇到既場合, 佢居然有得去, 天呀, 家陣呢間老牌夜總會仲要已經執左粒!!! 你話我係幾咁羨慕佢呀!!!又可以去唔同國家地方(雖然都只不過係做野), 又可以去d特別地方such as 中國城。 雖然係咁, 但係因為經常四圍飛所以都另自己既私人時間&空間都少左好多。

身邊有好多朋友都係教友, 佢都係之一位, 嚴格d應該話佢對信仰呢方面既不斷修練(好似d武打小說咁, haha!!)同時都對自己既教會放左不少心血, 因為有時約佢去玩, 佢都係話要幫教會做事or係教會開會等, 不過, 平日既佢絕少開口埋口都係耶穌基督等。

係咁多個朋友入面之中, 我諗我對佢既了解應該係好少既一個, 一來平時好少同佢傾計, 另外, 佢既一切好似都係神秘, 攪到我都好少去問佢野(問既當然唔係學業上既問題啦), 不過, 好多時, 有佢既出現成個好多活動都會變得有趣好多。 記得, 有一次, 大家去旅行, 唔知係澳門定中山o個次, 佢因為眼訓佢就提議玩一個新遊戲, 大家以為佢有咩提議啦, 佢就話不如玩睡王子/睡公主遊戲, 佢話邊個最快訓得著就為止贏, 哈....咁既野都俾佢諗得出!!! 根本就係佢自己眼訓之麻...

仲有一樣野, 雖然識左佢十幾年, 佢屋企應該係唯一個不對外公開既地方, 基本上, 牛, 堅, jessica, jaemi & camus既屋企我都上過晒, 就係單單係佢屋企就未去過, 唔知佢幾時會安排我地上去實地視察下佢屋企呢...

(下次預告: Jaemi)

此情不再

上星期有新莊打電話黎話佢地O'camp係今個星期舉行, 問我地呢d老鬼入唔入去同佢地一齊玩, 於是就問阿Denise佢地入唔入, 佢地話好忙, 平時放工都已經9:00p.m入得去都成10:00p.m, 玩下, hea下冇十一, 二點都唔駛旨意走, 所以就決定唔去, 熟個班人都唔去咁我當然都唔去啦, 唔通入到去自己玩手指咩!!! 原先都決定唔入去, 點知轉個頭阿耀就打俾我問我入唔入o'camp, 我話Denise佢地都唔入我唔入羅, 佢話佢會入, 不如一齊好唔好! 既然有人陪入去昅下有冇d靚女師妹都好!!!

今日放左工之後, 約左d舊莊員耀&jerry, 仲有我既上屆Erica入去新莊攪既o'camp, 約左6:30p.m係彩虹MTR等, 先行食飽飽先再入去, 點知個Erica遲到, 差不多成7:20p.m左右先到, 我同阿耀就已經食飽飽坐係間茶餐廳等佢, 之後差不多8:00p.m左右就入到camp site, 係門口仲見到其他既老鬼, 係包括左我既下屆, 下下屆等....一行都有成十廿幾人, 不過除左我既下莊之外, 其他人真係唔多識。

入到去camp site, 佢地就玩緊mass game, 睇佢地玩左一輪之後, 就開始成個camp最好玩既時候就係『Camp Fire』(其實係o'camp入面既camp fire唔係真係有營火, 只不過主要成班人係度跳營舞), 係我個年小弟有幸做o'camp既M.C, 所以當年要勤練營舞, lead住成班freshman一齊跳。 唔知係唔係人大左(記住今屆已經係第13屆既o'camp, 我攪個屆係第8屆, 即係4-5年前既事), 對呢d camp fire既舞步已經忘記得一清二楚, 仲有家陣都唔會再做d咁白痴低能既動作, 不過, 曾經自己都玩過呢d野, 當時真係覺得好好玩, 係琴晚都勾起左自己不少當年自己攪o'camp既事。

Camp Fire玩到10:00p.m左右就完左, d freshman同其他人就返宿舍沖涼換衫繼續佢地活動, 我地呢d老鬼既探營活動都隨之結束。

p.s: 抱歉!! 應承左阿牛去打羽毛波, 但時間太晏出唔到黎, 放左你飛機添, sorry, sorry!!!

Mon & Wed =/= Mon to Wed

今日放工, 約左堅返polyu lib借書(係佢借, 唔係我), 放工6:00p.m左右返到poly, 見佢仲未打俾我, 醒起佢話今日4:30p.m去interview, 諗佢都係未攪掂, 所以就廢事打俾佢, 淨係send左個sms俾佢, 叫佢攪掂就call我。

6:35p.m左右佢先打電話黎話返到poly啦, 就係lib門口等佢啦, 入到去lib問一問個librarian先知原來今日個open hour係去到7:00p.m, 原來我係web-site睇個時係睇錯左, 我開頭係以為MON to WED係close 10:30p.m, 點知原來係MON & WED先係close10:30p.m, 家陣都6:45p.m搵得黎都借唔到, , 撞鬼白行一趟, 。 堅就提議不如上牛屋企食飯啦!! 都好, 又上去"痴"餐, 於是堅就拿拿臨撥個輪搵牛媽媽話我地兩個上去, 堅仲問牛媽媽駛唔駛加"送", 佢話屋企已經有燒&燒肉, 叫我地買燒鵝就o.k。 之後, 我同堅就去左買"斬料", 半隻鵝加半隻雞, 買完之後先知死, 我覺得牛媽媽一定會話:『哎呀!!!Gary, 做咩買咁大盒斬料上黎呀!!! 你今晚好食晒佢先好走呀!!!』

上到去, 不出我所料, 牛媽媽完完整整將個句對白隻字不漏咁講出黎, 堅仲要加多句:『係啦!!! 我叫左Gary佢唔好買咁多!!!』, 呢條屎忽精呀~~~ 好彩, 牛爸爸出黎解圍:『e, 呢間燒鵝, 靚野黎個喎!!!』, 之後, 就開始講下其他野啦!!!

食完飯, 攪下呢樣攪下個樣, 差不多成12:00先返屋企, 呢排好似上阿牛屋企食飯密左添...haha!!!

入廠 - 勞改

部腦都跟左我5年有多啦, 但係佢老人家(以電腦年齡黎計)近排佢既身子唔多掂, 已經開始去到我忍冇可忍既地步。

首先, 係早一陣子(其實都成年前已經開始)佢已經係我同d fd玩icq or msn既時候, 會不定時地hang機或者自我restart(對於時不時同我玩msn or icq既朋友都應該已經習慣左, 我傾傾下會突然消失左 or 冇啦啦會彈出黎)。 依家, 開個d window/real player都會hang機, 什至乎去youtube睇野都廢事, 因為都係怕佢hang。 點解咁怕佢hang機, 因為呢個老野一開機就要做成不少於10分鐘時間俾佢warm up, 呢個情況近排更有惡化之現象, 一開機就淨係聽到佢好似俾人強姦咁既尖叫聲, 之後就當然都開唔到機啦! 於是就要連按10-20次機殼上的restart掣先有機會開得著部機, 係呀, 我真係試過按過30次都開唔到機, 最終個晚我放棄左, 走左去訓覺。

所以琴日, 我終於的起心肝拎左部腦去牛屋企, 等一個係HKU修讀機械工程學的畢業生同我修理佢, 所以呢幾晚, 大家係msn or icq都見我唔到架啦!!!

How do you do? (第一次見面的問候語)

原定今日已出發到開平一事 , 由於今日下午Macy要補考日文, 所以被迫取消, 於是就相約Macy今晚出黎食餐飯見過面, 由於佢下午4:00p.m先考完, 於是就相約4:30p.m係尖咀地鐵站等。 由於大家都係都未見過大家的樣貌, 我開頭諗緊駛唔駛好似個d電影咁, 一人拎住一支紅玫瑰係手作相認之用呢!! haha!!!

第一眼見到Macy既感覺就係, 佢好細粒呀, 真係好細粒, 真係好細粒呀!!! (你睇我張呢句講3次, 你就知佢真係幾細粒呀啦!!!!haha), 如果要我係我識咁多人之中, 以高度size黎排位的話, 暫時佢應該係排第一位.......wahahha。好, 大家見到面之後, 佢就話好肚餓, 話要食野, 都好既, 因為陣間我地去睇7:05p.m個場的『死亡筆記』電影, 篇長好似成2粒鐘左右, 如果家陣唔塞d野入去, 唔係陣間睇睇下戲可能會餓食, 到時係戲院d冷氣又凍, 真係真正體會到咩叫"飢渴交迫", 好難得佢有個好特別既要求, 就係去食"火腿通", 我地就走左去尖咀橋底大排檔食野, 岩岩好就有個常餐, 我就叫左個"沙爹牛麵", 佢就叫左"炸雞翼通", 呢個常餐係包火腿奄列的, 塊奄列真係好大塊, 正呀!!!

時間尚早, 大家食飽飽之後就走左去隔離新港中心的機舖打機, 打左幾舖佢最鐘意玩既"Time Crisis 4", 由於近年我已經絕跡機舖界, 所以打唔夠兩下就死左, 之後都係望住佢打solo, 望住佢拎住支槍真係好攪笑, 手又唔夠大, 但係扣板速度又非常之高, 情況好得意。 之後, 都仲係未夠鐘睇戲, 佢就提議行玩具反斗城, 佢話佢同d fd冇野行個時, 就會入去玩具反斗城hea下d時間, 呢個hea時間方法, 我都係第一次聽, haha。 都好既, 我都好耐冇行過玩具反斗城啦, 我諗應該同海洋公園一樣, 對上個次去應該都係幾年前既事。 係玩具反斗城, 玩下呢樣, 攪下個樣, 兜個圈又真係hea左半粒鐘有多既時間, Macy所言非虛。

之後, 就走左去港威睇戲, 去到門口, 我地見到李璨琛到林家華, 我諗岩岩係港威入面做左場佢地既新戲『狗咬狗』試映, 所以佢地兩個會出現係呢度。 由未入場開始, Macy不斷係度問我『死亡筆記』係唔係鬼片黎架, 我就不斷答佢話唔係, 不過, 佢始終都好似唔多信我咁, 哈。 開頭, 我以為港威係細院多, 所以choice位個時, 就買左後少少的sit位, 點知入到去先知o個間係大院, 再加上Macy既高度......... 真係難為左佢, 我真係差d再問戲院d工作人員有冇bb sit位俾佢墊高黎睇, 真係唔好意思, 如果下次再有機會一齊去睇戲, 我一定會買返前少少&冇人會阻到你d sit位。

『死亡筆記』係日本漫畫改篇而成, 我都有睇呢套漫畫, 都幾好睇架, 而漫畫真係原原本本將漫畫其中第一部份拍出黎, 對於我黎講基本上大部份既劇情, 我都已經知道晒, 不過, 套戲都o.k既!!! 未睇過漫畫既朋友都可以去一睇。




故事大綱:

故事講述死神流克在人類世界丟下一本死亡筆記，由高中生夜神月拾獲，更認識死神流克，只要在筆記裡被寫上名字的人類便會死去，夜神月為了達成自己心中没有 罪惡的理想世界，不繼殺死罪犯，引來天才青年L及警方的追捕；從此之後，夜神月及L便展開了一場「貓捉鼠」的鬥智角逐戰!

睇完之後都9:15p.m, 就搵野食, 我地去左亞士厘道搵野食, 我地都係旨在搵個地方傾下計, 就是但就左間餐廳食, 我地就入左去"Shadowman Cyber Cafe'食野, 好得意, 呢間餐廳有好多外國人黎食, 仲有d侍應同收銀都係印度人, Macy就話呢一間野一定係旅遊書介紹的, 所以先會有咁多外國人黎上網兼食飯。 我地點左個咖哩雞併薄餅&羊排意粉, 大家share黎食, 大家有講有笑, d菜未上之前, Macy就係佢個袋度黎左支鉛芯筆, 一舊刷膠, 仲有兩粒可樂糖俾我, 話係見面禮, 哈, 其實支筆&amp;amp;刷膠係佢今日補考唔記得拎筆袋, 迫住要買支筆&刷膠之麻...anyway, 多謝先。大家一路食一路傾計, 咩都講一餐(應該係話我咩都講一餐先真)。 食到最後, 佢就話廁所有d野睇, 叫我入去昅下, 原來佢係趁我去廁所個時就埋單, 佢話放左我飛機(去開平), 所以要請返我食飯補數, 真係客氣。 既然係咁下次就到我請返啦!!! 在此謝過你呢餐~~~

班馬

原定今晚放工之後與Macy出發北上作開平之旅, 但琴日得Macy通知, 佢有突發事情要做, 令原先一切北上的計劃只好打消。 原定自己今晚出發去開平玩返2夜2 日(星期五晚出發, 星期日返), 今個weekend應該有d特別野玩下啦, 點知事出突然取消左. 還正苦惱今個weekend難道自己要返屋企發霉, 就係呢個時候收到阿昌既電話打黎, 叫我今晚食飯, 咁好死, 一定係有d野, 原來今晚有位讀ive時的K同學仔(簡稱K)約左其中一位同學Jackie食飯(佢地好少約出黎食飯), 但Jackie聽聞知道呢位K現轉職做傳銷, 心知不妙, 唯恐有被sell之懼, 於是就call埋阿昌一齊出去壯壯膽, 阿昌又知小弟口才了得(口多多先真), 為免到時出現冷場, 於是就call埋我出黎, 冇所謂啦, 一來我冇野做, 二來朋友有難理應要兩脇插刀, 何況仲要係佢特登打俾我求救添, 於是就約左今晚8:00p.m尖咀地鐵站等。

放工之後, 係公司搭巴士落尖咀, 上車之後, 遇到一位好耐冇見的polyu同學仔Chloe, 原來佢岩岩係6月o個時quit左份工, 用左一個月時間&大約3萬旅費backpack遊歐洲, 好羨慕佢呀, 同佢係巴士上面傾左一大輪, 真係好耐冇見, 原本都想繼續傾, 不過, 佢今晚約左d前同事食飯, 我都不便打擾, 下次有機會再傾過。

由於時間尚早, 於是走左去中港城的Page One逛逛, 睇下書涼下冷氣, 突然收到堅的sms, 於是係電話同佢傾左兩句, 堅話想返polyu library借書想借我的學生証一用, 我話不如借多張証, 等我陪佢入去library仲好, 我見自己又係中港城, 當時都係7:30p.m左右, 估計工作狂人jessica應該都冇咁早放工(佢係附近返工的), 於是就打俾佢啦, 果然不出我所料佢仲係office, 於是交代左一下, 問佢方便拎張學生証俾我啦, 佢話差不多攪掂office d野, 轉頭落Page One搵我。 拎完學生証同佢傾左兩句, 佢就返屋企, 我就去"登"腳啦!!

由於要拎張証的關係, 我差不多8:15p.m左右先到, 其他人都到齊, 今晚"主角"當然有K啦, 仲有Jackie, 昌, 麟 同埋我, 5條仔除左阿昌之外, 另外3個都有少見。 之後, K就帶左我地去一座唐樓,
話有間食小菜的餐廳, 去到個時真係嚇死我, 個間野門口淨係寫明只招待會員, 我以為一黎就sell野, 唔係咁快手呀, 原來個間野真係食d小炒的餐廳, 唔係咩直銷公司, 不過, d裝修就真係一般過唔一般啦。 Anyway, 一場黎到咪叫野食羅, 何況又唔係貴, 一路食一路傾, 我呢d平日吹開水, 要打開話題容乜易呀!!! 而食飯其間K的手電不繼地響, 食到大半K就話office打電話黎話有d事急call佢返去, 至於係咩事, 佢就冇交代過, 我亦都唔方便問, 佢就放低幾十蚊就走左人。 可能, 我心邪啦! 我諗今晚K原定既sell野既計劃, 係我既出現的情況攪亂晒(因為成晚主要就由我不斷開話題, 等佢冇咩機會入到位sell野), 佢見冇肉食, 於是收工早走啦!!(當然呢d都係我自己估既姐!!! K走左, 大家繼續傾計, 之後差不多11:00左右就散水。

p.s: 雖然未能北上旅行, 但亦在此謝過camus & 堅send左個msn or sms提醒小弟北上小心, 有心, 有心!!!

去你的會考放榜

今日係會考放榜, 想當年, 我會考放榜前一晚, 冇記錯好似成班人上去左堅屋企度玩, 有人打機(又係足球game 不過唔係winning), 有人玩icq(當年好似未興icq, 仲玩緊一個叫cyber city既chat room), 有人吹水傾計, 成班友仔都唔識死, 玩通頂, 第二日, 個個牙又唔刷口臭臭, 頭又唔梳, 成班人好似屍喪咁一齊柴娃娃返學校拎成績表, 當然啦, 有人歡喜有人愁, 唔駛問我當然係愁個批啦!!!

幸好上天有好生之德, 俾我重讀中五, o個一年都有幾個朋友一齊重讀, 第2年重讀中五, 放榜前個一晚, 我地都出左去唱卡拉ok當係relax下, 今次就冇第一次咁癲啦, 我地冇玩通頂, 只係唱到8,9點就各自返屋企休養生息。

你當年放榜前一晚又做過d咩呢??

p.s: 講明先, 呢張唔係我既成績表(我係讀理科架~), 係我上網個時search到, 唔明點解有人會upload自己張成績表上網。

冷笑話-爛笑話

近日, 唔知點解公司內部吹起一陣冷笑話之風, 各同事之間, 得閒無事就彈一, 兩個冷(爛)笑話出黎, 其實事緣係由一位同事問起一個極之普通問題

同事A:『 昨日我的家裏來了隻狗仔 , 唔肯走...
諗住暫時養任先啦...
咁我應該買咩俾佢食呢 ? ... (昨日買麵包頂任當先 , 如果買狗糧 , 邊隻牌子好 ?)
同埋 , 要唔要帶佢去漁農署到檢查呢.........』

之後有同事(男的)回覆:
同事B:『我一出世就黎左隻雀仔 , 唔肯走...
諗住暫時養佢先啦...
點知佢越黎越強壯...咁我要唔要帶佢去醫管局到檢查呢??
哈哈, 講笑姐』

繼而再有同事回覆
同事C:『今日真係好冷...』

從此, 冷笑話就在在同事之間此起彼落, 家陣post 幾個出黎俾大家睇下我地有幾冷~ ~ ~

1.) 今日小明約左女朋友行街, 心諗今日要讚下佢靚先!
咁佢見到女朋友之後就同佢講: 嘩! 你今日真係靚爆!





於是佢女朋友就BOOM一聲爆左

2.)一女子因胸小而嫁不出去，
一次相親時問男方：我胸小你嫌棄嗎？
男人問：有饅頭大嗎？女人說有。



成親之夜男人衝出洞房跪地仰天長呼：天啊！旺仔小饅頭！

3.) A蛇同B蛇睇緊風景.......
A問：我地有冇毒嫁？
B：唔知wo，做咩咁問？
A：冇，我咬親自己條利之嘛......

4.) 一天在森林裡大灰熊跟小白兔一起在疴屎
大熊問小白兔：「小白兔呀，你疴屎的時候怕唔怕你的屎沾污了你身上雪咁白的毛毛呢？」
小白兔很精靈的說：「我唔怕架，對我沒有影響架。」
大熊淡然的回應：「咁就好喇..............」






跟住一手就拿起小白兔來「抿屎」！！！！！

5.) 當年花木蘭代父從軍................
有一日當佢同班戰友上戰場殺敵，忽然月經來潮........
由於佢"失血"太多，佢騎住馬向前衝的時候就非常暈眩
就咁樣，佢就墮馬暈鬼左..........
當佢醒返的時候，d戢友同佢講 : 你頭先你中箭失血過多暈左，小雞雞無左啦，不過唔駛擔心，個傷口我地同你縫埋左啦..................

涮羊肉

今晚約左成班friend一齊慶祝堅的生日, 係3:00p.m左右上網時見到thomas係msn出現, 多手send個message問佢係唔係返到香港(因為之前佢去左北海道旅行, 話今日先返), 佢話岩岩返到香港家陣仲係機場, 仲話轉頭返公司做野, 我同佢講今晚出黎食飯, 如果o.k出到黎的話就打俾我。 到左4:00p.m左右突然收camus電話, 佢話一條友行街好悶叫我出去陪佢, 都好, 橫掂岩岩打完個blog, 就換衫gel一頭出去, 落樓冇耐, thomas就話今晚出到黎食飯, so great。 出到去尖沙咀, camus與thomas已經join埋左一齊, 我地3條佬就走左去"星巴克"坐底飲杯野, 傾下計。

6:30p.m, 除左主角, 牛&阿達之外其他人都準時到齊, 於是我地就先去今晚的食飯地點坐定先, 今晚食的菜館是一間叫『泰豐廔』的酒家, 呢度最出名的是『混醬』, 正確d黎講, 係黎度係食涮羊肉的, 而這裡打邊爐時, 點的醬並不是平時食開的豉油加雞蛋加辣椒呢d平凡之輩, 而是係上爐之前伙記會先 拎黎各式醬料的大盤, 俾我地黎混自已的醬。 當中有不同的醬料及佐料包括麻醬、魚露、花雕、白 糖 、醬油、醃菜蓉、辣椒油、芫萎、蔥花、南乳等等。 之後, 就個個開始『混醬』。不得不提一點, 呢度打邊爐, 唔係用平時個d電子爐, 呢度係用銅炭爐打的, 十分之正宗。 攪左一大輪, 主角都仲未到, 經理就話:『你地打邊爐架麻, 唔駛等架啦, 打邊爐有個好處就係邊食邊等!!』, 經理一講我地如夢初醒, 立即叫d邊爐配料上菜, hehe, 係經理叫架, 唔係我地唔等你呀!!!

食左一陣, 主角, 牛&達終於出現, 佢地一到步, 都快快手"混他們的醬"先, 之後就一齊手起筷子落, 打呀打, 打呀打。 當然啦, 一路打又係一路吹水啦~~



食完都係10:00p.m左右, 之後我地就去左一間bar度傾計, thomas由於遠程歸來未返過屋企, 所以就走先。 坐定之後, jaemi, 阿譚, jessica & camus就出去櫃員機拎錢, 我就出去搵蛋糕, 夜晚10:00p.m呢個時候, 唯一仲會開門的麵包舖, 我諗都係得凱詩餅店, 所以就係個度拿拿臨買個cake就返去。 去到間bar既門口先諗住點蠟燭啦, 撞鬼, 點知個門口有個風口, 我同jaemi點左好耐都點唔到, 終於搵到個位點火, 攪掂晒..最後, 同堅傾計傾到12:00a.m同佢講埋聲"Happy Birthday"就散水。

泰豐廔
地址： 尖沙咀漆咸道29-31號溫莎大廈(赫德道入)
電話： 2366 2494
菜式： 北京菜

E304NV05

聽日係慶祝堅的生日, 佢一早講明話要agnes'b的袋做其生日禮物, cherry在此店買野有discount, 所以特拜託佢幫我買, 臨放工前msn問佢今晚點俾我, 由於佢成日O.T, 佢話今晚都可能要8:00p.m左右先出到黎旺角俾我, 到時再打電話俾我。

由於佢工作忙碌, 既然話8點就8點啦, 我都不便打擾。 放工之後又唔想留係office or係條街行到8:00p.m, 於是就搭車(係office一程15min巴士就返到學校, 好方便~~)返學校享用下polyu d facility先, hehe, 話晒都交左學費, 應該要善用資源。 如何善用? 就係去lib借碟睇(係呀, 係library的AV section係可以借碟睇架!), 其實有一套戲想睇好耐, 當時上畫個時冇去睇, 落左畫想買佢隻碟時, 佢就成日都企硬$35, 死都唔趺到$15隻, 所以就冇睇到, 呢套就係『喇叭書院』啦!!!

其實, 點解咁想睇呢套戲呢, 係因為之前睇過一套『五個撲水的少年』, 覺得好好笑, 呢套『喇叭書院』都係呢個導演拍, 所以有興趣睇, 我都知好多人睇左, 不過都推介一下：



故事大綱:

這是一個悶熱的炎夏。

在日本東北遠離城市的小村裡，一群女學生為了逃避沉悶的數學補課，於是自動請纓去送飯盒給為學校棒球隊打氣的管樂隊。

由 於天氣炎熱，這群女學生又忘記下車，廷誤了幾個小時才將飯盒送到會場，飯盒變壞了，管樂隊隊員在不知情下吃了那些已變壞的飯盒而集體送院。由於女學生們途 中抵不住美食的誘惑吃了一個飯盒，令管樂隊隊員拓雄(平岡祐太飾演)因禍得福，管樂隊隊員只有他一人安然無恙，拓雄遂要求女生們頂替管樂隊以示負責任。在 人數不足的情況下，拓雄唯有建議組成爵士樂隊，可是這群女生對演奏樂器一竅不通。

進行了兩個星期的密集訓練，這群女生開始懂得吹奏簡單的旋 律，這時原來的管樂隊隊員卻康服回來了，女生們唯有不捨地離開樂隊。她們離去後才發現自己已愛上爵士樂，誓要組成爵士樂隊。這群平日只懂花錢沒有積蓄的女 生連買二手樂器的錢也沒有。為了買樂器，她們不惜用盡所有方法賺錢：到超級市場做兼職推銷食物員，可是因貪玩而屢次闖禍；聽聞森林裡的野生蘑菇轉賣會很值 錢，沿途卻巧遇最凶猛的野豬…

同時，原來數學老師小澤先生(竹中直人飾演)也是爵士樂痴，於是在小澤先生的領導下，女生們決定努力向她們第一次的舞台表演進發…

到差唔多9:00p.m終於收到cherry個電話, 佢問我咩款, 我用盡我人生入面所有既形容詞話俾佢聽個款, 佢亦都好聰明咁get到係邊個。 話咁快佢就由中環去到油麻地拎俾我, 真係麻煩晒, 之後佢就同阿龜就行街食飯, 我就拎住袋野返屋企啦!!!

堅, 你要好好報答我, 我為左你份禮物, 捱餓捱到10:00p.m先返到屋企先食飯, 仲有我今日lunch係食左個公仔麵only。

p.s: 1.) 麻煩晒Cherry特登幫我係中環個邊買過黎, 唔該晒!!! 我欠你一餐呀!!!
2.) 至於個標題係咩意思呢, 係得我同阿牛先會知, hehe~~~