世上只有媽媽好

琴日下午, 老媽與家姐及兩個大小不良出左去尖沙咀逛街, 返黎屋企之後, 老媽就俾左個Tommy既紙袋我, 跟住話:『黎緊你生日, 送件衫俾你!』, 真係令我驚訝, 因為之前不嬲老媽都係係生日當天就咁封返封利是就算, 今年佢居然會送禮物。

老媽對品牌呢一回事不嬲都係不聞不知, 我諗佢最多都係知『佐單佬』, 『G二千』等"名牌", 今趟佢居然會係Tommy度買件Polo恤俾我, 仲要係成三百幾蚊, 雖則明白知道, 老媽佢成日都話我自己買o個d tee下下都要二百零蚊唔抵, 佢話不如落樓下街市幫我買$50/3件個d衫仲化算。 所以今日佢肯買件三百幾蚊既衫俾我, 我真係驚訝 & 感動(當然啦, 我呢d man黎架麻, 有淚心中流)。