風繼續吹

琴日, 返工個時, 一出門口d風已經兜口兜面咁打埋黎, 如果大家有睇過郭富城演唱會的話, 應該記得有一幕係Arron企係個台度, 之後就成個人打斜成40度。 琴日我就係持續保持呢個動作咁樣係條街咁行, 你就可想而知真係幾大風呀.....就係呢個咁大風既情況下, 可能我件衫比較軟身, 吹兩下就吹到翻左上黎, 我就好似d女仔咁按住自己件衫尾, 等佢唔好吹起, 就係呢個時候, 我諗我件衫都吹得起, 咁女仔d裙就......hehe, 係我搭小巴個時就馬上坐係窗口位, 望住條街睇下有冇奇境睇啦....點知, 位位女仕都好醒目都冇著裙出街, 冇野睇。

返到office, 見到&聽到d雨"打"落去d玻璃窗度, 真係好勁, 好彩行快兩步返到office, 出面先落大雨。 今日同事Alan放工之後今晚就會飛去英國玩, 我臨走前仲問佢, 咁大風仲飛唔飛到架, 佢都話唔知(之後,係新聞報告話當晚所有航機取消, 唔知Alan會點呢?)

琴日放工之後, 為左堅兄必生日禮物, 風塵僕僕咁去左尖咀搵阿牛一齊去agnes'b睇野。係等佢放工之前, 行左去HMV度行下, 因為知道佢搬左竇, 所以就過去昅一昅, HMV家陣搬左去斜對面的舖頭, 由先前既3層轉左依家既2層, 好似冇左舊時個種氣勢。 之後見仲有少少時間就去左『重慶站』(重慶大廈隔離, 大電視機個度)的商場逛一逛, 點知係個度就撞到個舊同事Raymond, 佢係呢個商場的物管個類(實際係做咩, 佢冇講到), 傾左兩句之後就去搵阿牛。

同阿牛去左agnes'b睇左個份禮物之後就閃人, 跟住就順勢上埋牛家屋企"痴"餐, hehe!!! 堅今日見完工就上左去牛屋企, 所以上到去就已經見到佢, 等埋牛爸爸返黎就食飯, 今日雖然係3號風球, 不過牛2妹阿潔依然都係要返泳池開工, 夜晚返到黎個時, 佢話今日雖然打風但係好似仲多人左去游水。食完飯傾下計, 睇下電視, 12點走人。