黃金週前夕

今日下午見冇野做(攪掂晒d功課, 等exam, 不過, 阿sir未放"水", 都係遲d先溫, 哈!哈!), 今晚又約左朋友出外食飯, 成個下午有個空檔走出黎, 見個天又幾好, 於是又去曬太陽!!

(係唔係好奇怪, 點解我咁鍾意曬太陽呢 ??? 其實, d人話著衫著黑色衫的話, 就會顯得個人瘦d, 咁家陣我連個人都曬得黑d, 一來個人就好似健康d, 二來就顯得個人瘦d, 就算減肥都可以減少兩磅呀麻...whahah.)

今日個太陽唔係咁猛, 曬到3:15p.m左右, 就去沖涼換衫, 就係呢個時候就收到ivan個電話, 話今晚飯局取消。噢!!! 仲諗住挨左兩日公仔麵(阿媽呢兩日都唔係屋企, 自己又懶得去煮飯, 又唔想落樓下大快活食--->返工仲食唔夠大快活咩!!!)今晚有餐飯仔食下......點知又冇"行"...

咁就算啦!!! 游完水見無聊, 又唔想咁早返屋企, 於是, 踢住對birkenstone走左去好耐都冇行過的西九龍中心行一圈(真係幾冇聊下!!!), 上到去頂層的溜冰場, 嘩, 係外係邊望入去係超級多人, 其實, 西九龍個溜冰場已經唔大架啦, d人多到就快行唔到咁。係中學o個時本人曾提議去溜冰, 之後就有人話, 做咩要俾幾十蚊人地, 之後自己就係個場入面圍住個圓轉黎轉去, 行黎行去咁無聊姐....當然啦, 當年就係咁飛起左個位朋友, 自己同其他幾位"志同道合"人仕依然去左溜冰。 但多年之後, 依然記得呢番話, 可能人大左, 望住入面班年青人圍住個圓行黎行去都覺得真係幾無聊, haha ....

不過, 西九龍中心真係冇咩野睇, 應該話唔係太岩我, 快快手就咁行完, 之後就搭車返屋企。

今晚食咩, 係, 冇錯又係公仔麵......

俾錢買難受

今個sem終於交晒d功課啦!!!! 我細細個讀書讀過:『受人錢財替人消災』, 點解我每個sem俾成幾皮野, 仲要交咁多assignment, 但無論如何都總算告一段落。

今日, 係office就諗埋, 黎緊畢業寫的dissertation的topic(因為聽日要交!!! 又係dead line前先做...haha), 超級頭痛, 其實都左成個禮拜, 都未諗到岩心水。就算諗到, 個題目又好似勁得濟, 好難搵soucres。

暫時提交的topic就係: "Historical Building in Hong Kong"(香港古蹟)

其實, 呢個topic主要想講下, 巴黎, 法國等歐洲國家對文物保護投放好多資源, 香港係保護文物政策方面同佢地比, 實際上係唔係有咩不足的地方呢!!! 有冇咩地方需要改善呢??? 就例如, 在早陣時, d人成日話拆中環警察局 & 域多利監獄, 究竟有冇咩法例 or 辦法去保護呢d有殖民地色彩建築物呢???

就咁係度"吹"就好似好多野寫, 不過, 到時要寫成一萬字, 都唔知邊"樹"嘔咁多野出黎...唉!!!

p.s: 在此謝過judy & simon今日係office hour, 用msn同我"互溝", 對呢個爛dissertation topic俾意見....thx a lot...

呆下呆下

琴日約左成班朋友一齊去換智能身分證。先前, 聽d friend講, 都冇咩人去換, 所以都冇特登上網做booking。係大前一日, 阿牛打o黎問我駛唔駛做booking云云, 我當然好淡定話唔晒啦, 之後, 就突然聽到牛媽媽係後面講:『你地80個年係最多人出世架!!! 都係做定booking好!!!』, 雖然牛媽媽咁講, 我都好少理。但係, 就係前日, 係公司無聊多手上網睇下個"網上booking"個情況點先啦....一睇, o下~~~full booking!!!(個心不禁寒左一寒....) 80年唔係真係多人成咁呀!!!! 咁都冇計啦, 都約齊人, 大不了, 咪去到排隊羅////

我地6:45p.m左右就去到尖東的入境處, 一行入去, 成個大堂都空了了, 咩叫水靜河飛, 真係大開眼界, o個度真係除左counter個幾位職員之外, 真係影都唔多隻....車, 又話咩full booking, 咁流架.....

好!! 我地就快快手填完form就開始呢個換證手續啦, 唔係講笑, 成個過程, 分分鐘仲快過你煮公仔麵, 同時亦都證明左科技發達 &『時間就是金錢』呢個道理, 真係諗都冇諗過快真咁。不過, 係影相個part, 我就total影左3張, 一張就眼鏡反光唔要, 另外個兩張呢.....唔知係我頸骨係唔係有事呢, 個兩張相都影到我個頭有少少偏左, 定係我少用左邊個腦, 左邊個腦少做運動就重d, 就所以側埋一邊....哈...係都唔定...

攪掂晒之後, 我地就上左去尖沙咀中心的小南國食dinner, 我地total 7個人, 就叫左有9樣"食送", 成張抬都唔夠放....不過, 又抵食喎... 最後埋單都係位位$100...

由於, 第2日阿牛&阿達女友都放假, 食完飯之後, 阿牛就提議去唱k, 去咪去, 怕妳呀!!! 於是, 我地就落左去尖東CEO唱, 開頭都係諗住就咁唱下歌仔之麻.....點知, 阿達就call左個friend黎, 黎到就話叫酒飲, 佢地叫左支"black label", 琴晚仲要做優惠買一送一, 就係咁, 就開始左殺戮開端。成晚, o個兩位提議唱k & 唔駛返工的兩位女仕, 冇咩點飲酒, only坐係度唱k, 反而成班第2日仲要返工, 就唔記得第2日係星期四, 以為第2日係星期日咁, 起勢咁玩起勢咁飲, 不過, 我都唔係飲得好多, 有時都係隔岸觀火多, 最後我地都玩到2:30a.m先走人

嘩...........計一計, 我3:15返到屋企, 3:30攤落床, 我朝早7:45起身, 我咪訓得個4個鐘, 今次大件事啦!!(原本一件好正經的事(換身分證), 點解攪攪下要成2:30a.m(零晨個隻喎)先返到屋企架!!!....)

所以攪到我今日, 成日係公司都呆下呆下咁.....雙目冇神...

一口悶氣

話說其實琴日維修電話時有一段小插曲, 應該先由上星期講起先, 上星期友人生日, 原約定今日放工後與另一位朋友和她一齊食個tea, 一來當慶祝其生日兼送上生日禮物, 二來借個藉口作朋友之間聚會。但突然醒起, 今日早上要外出工作(direct site), 而送給友人之生日禮物亦不便帶在身邊, 剛巧琴日要維修電話, 於是就先回家取份禮物, 並相約友人琴日放工後先行拿取該禮物, 而今日食tea 的計畫就照常進行。

未幾, 當我維修完部電話後, 就接到友人的來電, 向我講:『你咁想返屋企食飯呀麻, 咁你聽日就唔駛出黎啦!!!』 我都未出過一句聲, 佢就cut左線。就係我摸不著頭腦時, 想打返電話俾佢想問下發生左咩事, 第一次打, 冇人聽, o.k 當你miss call, 再打多次, 都冇人聽, 我諗住佢都係miss call啦!!! anyway, 佢應該會check到有2個miss call就會打返俾我, 哈, 等左成晚都冇打返俾我。

到今日, 返到office, send左個e-mail問佢發生咩事, 點知成日都冇覆到....其實, 我之不過, 係想知發生咩事姐, 開頭心諗你唔係就咁拎左份禮物就算呀...我當你係friend先送禮物俾你, 家陣好似個賣家&買家去地鐵交收貨物咁, 一個俾貨另一個就拎, 成個交收過程完晒, 大家就再冇關係, 朋友送野俾你, 你都唔會拎完就算架麻, 都可能飲杯野, 傾下計......嘩..家陣即係點呀////

最後, 雖然知佢因為想同另一位朋友(即上文所提及的那一位)買d女仔野, 就唔想我去, 但畢竟都要有個理由話我知, 就咁一句彈埋黎, 令到我好似俾人放飛機&好無奈 ...唉..!!!!縱然有因由都應該解釋清楚....

其實, 之不過是小事一樁, 不過, 始終有啖悶氣在心中..........可能大家睇, 覺得唔係咩一回事, 但自己感受就不太好...想申一申而已...謝各位看完此"悶"文

高科技喎...

今日係公司用部手提電話打緊sms俾d friend, 打左唔夠兩句, 部機突然翻左白眼(成個畫面白晒, 咩野都冇), 我以為係hang機姐(因為時不時都係咁, 都習以為常), 咁就熄左部機restart過啦, 點知, 再開過都係冇畫面, 咁我就再試多次啦, 死火, 都係唔得。 咁就再試下, 抽返晒d sim card呀, memory card呀, 清下部機入面d塵就再插過落去試下啦, 點知都係唔掂。

唉!!! 咁就唯有拎返去nokia度整啦, 放工之後, 就拎住部機去noika專門店維修。 嘩!!!多人到呀....咁就唯有拎籌排隊等啦, 等左一陣, 終於輪到我, 點知, 個位櫃台姐姐就同我講話要拎返張售據先可以幫我維修, 不過佢就補充一句話見到好多客都可以去返自己個間電話公司補返張單, 仲話攪掂(張售據)的話, 返黎可以直接搵返佢唔駛再排隊(佢真係好nice, o拿, 呢d先叫做服務態度), 咁我就去對面間『新世界』度(因為部機係零機價係新世界得返黎架!!) 補返張單啦。攪掂, 就再搵返頭先位nice姐姐(眼尾見到佢叫"christy"), 佢幫我check完之後, 就話要放低部機俾師傅整, 不過, 就1個鐘之後就可以拎返, cool, 效率真係高, 開頭我仲諗住部機要留過夜, 聽日先有得拎返....

一行出門口, 仲諗緊黎緊個一個鐘行去邊時, 岩岩經過一間漫畫cafe, 哈, 岩晒, 一來就唔想行, 二來唔知行去邊好, 就入左去, 就係入面消磨左1個鐘之後, 就去返nokia拎返部機。

o.k, 掂晒, 終於個畫面有返野睇, 滿以為萬事攪掂之際。e, 死, 咁次大件事, 點解電話入面個phone book得返幾個電話no.架, 死啦死啦, 一定係冇save返落去sim card度, 之後維修師傳幫我維修個時, 連入面d record都清埋啦~~~shit!!!

家陣, 就順便係度同各方好友講聲, 如見此blog者, 請用各方式, 如msn, icq, e-mail等, 將你個電話no. 話我知, 好讓我可以set返入部電話度....記住, 唔好咁蠢, 係呢度留言話個電話no. 俾我, 我唔幫你delete......架....

下水禮

今朝一起身, 就見到個天好好太陽, 於是就立即執架生(泳褲, 太陽油等.........)走左去泳池曬太陽啦, (今日都係我今年第一次落水開齋)。其實係公眾泳池游水的話, 只要係全日制學生就可以$9特惠價就入到場, 而成人就要$19, 其實, 我係part-time student黎, 不過, 我通常都有理冇理都"隊"左張學生証俾佢check左先, 唔知係d職員好人定係佢地唔識睇學生証呢, 佢通常都當我係full time student咁, 俾我用$9個條line入場, 哈, 咁就慳左$10, 真係好....

由於自己係個d曬極都唔黑的人, 就算真係暴曬完都只有曬傷(係紅晒), 之後就甩皮, 唔會黑架。 所以係前年開始用d兩度太陽油(曾經有d friend罵我short, 兩度, 你就咪鬼買啦.....慳返d錢仲好啦!!), 係就係黑左少少, 不過, 功效未見顯著, 如是, 就開始用人地俗稱"黑鬼油", 呢隻黑鬼油就勁羅, 聽個名都知, 佢係用黎曬黑, 所以係連丁點防曬功能都冇架, 所以佢個說明書都講, 要隔15-20min左右要搽一次, 唔係好易曬傷....

其實, 今日都算幾多人, 我就由1:30p.m就開始暴曬。我的曬太陽習慣就係每曬完半個鐘, 就落一落水, 一來降下溫, 二來就游返兩個直池當做運動, 之後上返岸反煎(即係如果岩岩曬完正面就反轉曬背脊)。 我係曬太陽其間, 我就鍾意聽住radio(冇咁悶呀麻), 今日就聽到原來今日係香港仔運動場舉行『饑饉30』, 其實係中學時代, 都有人叫過我玩, 不過, 唔知點解最後都不了了之, 其實呢個活動當中的意義很大, 很想參與其中, 那種感受定必很大。就係咁樣, 一路聽『饑饉30』就一路暴曬左2個鐘。今日暴曬成績唔錯, 個人黑左....wahahha....不過好似有少少曬傷....hehe

補貼

話說今日Benny兄睇過我個blog後, 就through msn向我投訴話『BBQ take2』篇野入面張團體大合照, 點解唔用張有佢個樣o個張。見講開又講, 就等我順便解釋下點解會choice切燒豬o個張呢!!!

第一.) 係先前個blog都講過, 去白石BBQ最特別就係有乳豬燒, 當然要choice返張"應景"先岩。
第二.) 大家唔好以為『燒豬相』冇Benny係度, 係因為佢去左拎相機影相(呢張相係我地叫人幫我地影架!!!), 不過, 我地影完先發覺佢唔係"樹", 我地估佢當時應該去左"爆石"...hehe

But anyway, 家陣補返張有佢概相係度...

撞鬼

呢排都有睇無線夜晚播個套『向世界出發』, 今晚個集就講, 有d少數民族覺得要擦黑排牙先覺得叫"靚"。係電視入面, 開頭由主持人港姐林莉講左一輪開場白, 之後個鏡頭一轉就見到d小數民族"e"起排全黑的牙係度笑(我見到呢一o下, 都當堂打左個突)(個問題唔止佢整黑排牙, 佢仲要搽白塊面, o個一個"對比差"好鬼極端, 就係咁仲顯得佢更恐怖), 我就馬上叫我個外甥女(佢得3歲!!!e!!)過黎睇野啦, 佢望左一眼電視機, 就即刻放低頭冇出聲咁走左去牆角一邊, 跟住就話好驚, 唔敢再望個電視機一眼, 之後, 到賣廣告, 都仲企係牆角度, 頭望向地, 再叫我抱佢返入房, haha, 佢真係好驚, 我抱佢入房個時都仲係都頭向頭, 佢一上床就縮埋一舊.......攬住個公仔就訓。

之後, 睇完『各世界出發』就轉左去now的HBO台, 岩岩線就播緊『猛鬼街』第一集, 我記得細個o個時睇覺得好恐怖, 好驚。 唔知係唔係家陣個人大左, 個膽大左, , 一路睇就一路覺得套戲一d(係丁點都冇)都唔恐怖&驚, 仲嫌套戲有少少悶添。 e!!! 唔係喎, 會唔會早排去"海洋公園"o個時, 玩跳樓機, 嚇到short左。

遊記

呢排係公司除左『無間』地做assignment之外, 係空閒時間(真係好鬼曬命!!!已經係冇野做, 仲要話係忙碌!!!痴線架!!!)就上網睇下人地d網上遊記, 有d真係好好睇架...係呢d遊記入面, 佢地將成個旅遊入面過程, 詳細咁記錄低, 再透過internet將呢件事同大家分享, 當中包括d靚相, 睇完之後都有種衝動去一去旅行.....

以下係幾個我睇完, 值得推介的『遊記』, 當中的網主, 都映左好多靚相:


Macy's Land: 是四位朋友一齊去西藏之旅的遊記, 西藏亦係我想去旅行的其中一個目的地....
http://macy.travellife.org/

小妹&阿比: 歐洲●夢飛行: 兩個女仔拎住兩個大背包遠征歐洲16日....
http://www.siumui.net/2005europe/plan.htm

瑪姬的麵包超人:4位好朋友, 一齊歐遊, website設計精美.......
http://www.demon-shop.com/maggie/2004europe/index.htm

終於開齋

o拿!!! 講明先, 唔係我曬命, 轉左section成個月(真係岩岩好一個月!!!), 真係未用過部電腦做公司野, 唔係講笑, 計埋後日交個份assignment, 今個月就做左3份assignment + 1個present。

今日, 突然o黎個"神來之筆", 終於開齋, 雖然唔係話做d特別野, 但都話晒破左處(終於可以有d野做!!!), 都有少少興奮感覺, 今日係新office終於用到d文具(因為, 平時做assignment都唔駛點用d筆, 膠水, 打孔機等........)

《齋鹵味》歌詞(原曲﹕Yellow Bird 詞﹕謝立文)

　齋—鹵—味
　 齋—鹵—味，散發著鹵味味
　　齋—鹵—味，夠似舊鹵 味未?

　　明明係鹵味
　　原來係舊齋
　　明明係舊鴨
　　原來係面筋
　　明明係切雞
　　原來係腐竹
　　明明係舊腩
　　原來都只不過—

　　齋鹵味，細個就已經 食
　　齋鹵味，至正係拜山 食
　　明明係鹵味
　　原來係舊齋
　　明明係舊鸭
　　明明係舊雞
　　明明係鹵味
　　原來係舊齋
　　原來都只不過—

　 （齋—鹵—味）

Reference:春日花花同學會

p.s: 講返少少琴日lunch的事, 講真, 未轉黎官塘之前, 成日以為官塘乃係一個工廠區, 區區一個工廠區食野可以幾貴呀, 就算貴極都有個譜(當然啦!!! 去APM食野就唔計啦!!!) 點知黎到呢邊之後, 就發覺, 呢邊食野d駛費都幾高下, 講緊下下都要成$28- $29蚊(就算去普通茶餐廳都係), 埋單落樓, 唔通係呢邊做野d人, 人工特別高架咩。


話說回頭, 琴日同同事食lunch, 點知, 佢地居然話去"太興燒味"食lunch, 都心知不妙, 平時都知呢間野都唔平, 不過算啦, 諗住食過燒味飯, 貴盡都係$28左右姐(平時去燒腊錯駛鬼$28, 預多俾佢添架啦!!!), 點知, 一打開menu, 真係眼都突埋, 真係唔知我見識少, 定係呢個野d燒味真係咁好味, 一碟雙併燒味飯要成$40蚊......我真係冇野好講, 我翻左晒成個menu最平都已經係呢個『優惠午餐--雙併燒味飯』。冇計啦!!! 最後都食左個我有"屎"以黎係茶餐廳最貴的燒味飯。

所以, 今日就放棄同d同事食lunch, 自己走落樓下, 買左個車仔麵食就算數, 我真係命苦, 食都冇啖好食////

BBQ Take 2

琴日係復活長假的第3天就約左BD班同事去BBQ(4日內BBQ2次!!!好熱氣!!!), 雖然, 我地成日都出黎玩, 但今次就特別d呀, 今次有師姐mandy & 阿樑出席(因為之前都未試過同師姐出去"反"), 當然啦, 仲有新成員『廣東道之花』阿Mei,不過, 阿C3-eric因事不能出席。

琴日, 相約去白石燒烤場, 不過首先我地先到烏溪沙o個邊間百佳買野飲先&買少少野食, 因為係白石入面買野飲&食都幾貴架(之後, 入到去睇下個order list, 一包香腸要成$20包), 好彩, 係出面買定d野入去, 可以慳返d。今次係百佳, simon又買左個新食品(起碼我之前未燒過)---小饅頭, 之後燒落都幾好食.....下次同其他friend都可以一試, 之前佢都介紹過燒蕉(香蕉)都係一絕....

由於, kenix身有要事要遲d先黎到, 咁我地就開始燒先啦...kenix今次就帶埋個friend一齊黎BBQ, 佢地o黎個時打電話俾我, 第一句就叫:『喂, 阿強!!!』, e, 我心諗, 係得Denise佢地先咁叫我, 原來佢個friend係阿lok<----佢就係Denise個班(佢係poly個時係o'camp識的helper)(當時我係o'camp的MC黎架!!!)

大家一路燒, 一路傾下計, 講下笑都幾開心, 開頭仲擔心會悶親mandy & 阿樑, 但係個氣氛都o.k呀!!! 係白石唯一特別吸引的地方就係有燒豬燒啦!!!係呀, 自己落手落腳燒架.....今次, 我地燒完之後, 就由阿樑親自執刀, 佢手起刀落, 快快手將隻豬支解。

之後, 大家將隻豬食完之後, 大家都差不多都飽, 但係benny依然默不作聲繼續燒野食, 就係呢個時候, 佢就彈左一句出黎:『死火, 急屎添!!!!』當場大家都立即發狂咁笑......唔怪之, 佢唔出聲啦, 原來佢要集中精神.....專心做d野。

大家食完之後, 就係白石度打左一陣Golf, 再出去沙田圍食糖水, 係等糖水黎個時, benny就再一次彈多句:『唔知, 呢頭有冇廁所呢!!!』, 大家又再大笑一次, 原來佢頭先去呵清, 不過, 佢就堅稱今次之不過係"小解"姐....

最後, 大家, 食埋糖水就12:30左右就各自歸家....今次可以盡興, 希望下次再黎多次好玩d。

下次活動預告係5月尾行山.....

曰: 打羽毛球 / 夜: BBQ

琴日係復活長假的第一日, 係早兩星期前阿牛已經book定場(將軍澳廣場的Club House)琴日去打羽毛球, 仲約埋我, jessica, 達, 傑佬 & 佢女友(朱朱), 當然仲有ivan啦!!! 係前一晚, 我都再confirm阿牛一次時間, 之後再打電話confirm jessica, jessica佢話佢一定會去打波, 仲鬼咁興奮咁同我講佢好想做運動呀!!! 仲叫我第2朝9:00 a.m打俾佢云云////

如是姐, 到第2朝, 我準時9:00 a.m打俾jessica, 第一次, 冇人接; 再打多次都冇人接(我都預料到!!!); 唯有留言啦!!! 待我整理好行裝及吃過早餐後(當時大約9:40 a.m左右), 我死心不熄於是再打多次俾jessica啦!!! 今次掂啦!!!有人接啦, 係jessica把聲, 我叫佢起身啦, 佢ee哦哦咁話轉頭打俾我, 咁好啦, 我諗住佢起完身, 擦牙洗面完先再call返我///

當我搭MTR去九龍塘站時, jessica終於打返俾我, 佢話佢今朝唔打, 話今晚先黎BBQ, 之後佢又再一次ee哦哦咁就cut左線, 我懷疑緊佢知唔知自己講緊咩......

當我去到將軍澳廣場join埋阿牛同ivan時, 我就同佢地講jessica唔黎, 佢地一d驚訝表情 or 感覺都冇, ivan仲話佢前晚已經賭jessica唔黎, 讀多兩年書真係唔同d, 咁都俾佢估中....『jessica睇下你呀...唉~~~咩都俾人估到...』

等齊人11:00 a.m就開始打波, 打左兩個鐘, 打打下見到阿牛同朱朱出左去, 返黎之後, 就話岩岩book左2:30打保齡球(係Club House入面), 打完波就去沖涼再食個飯就差不多2:30 p.m。

黎到保齡球場, 達話增加剌激度, 就分team比賽, 輸左要俾$10, 包剪泵分tream, 我就同ivan & 傑佬一team, 達就慘羅, 拖住兩個女仔....首先, 各人都有不俗的開局分數(即係起碼個個都打中有分), 到ivan啦, 唔知係咪佢頭先lunch冇飯落肚, 冇力, 一支都打唔中, 死火, 仲衰過兩個女仔, 不過, 唔緊要有我係度, 我先黎個全中先.....之後, ivan 雖然都相繼再出現多一次全失, 不過, total我有3個全中, 可以彌補佢概不足....wahahaha....當然啦!!! 3個男仔始終著數d, 由我地勝出啦....

3:30p.m打完, 我就先返屋企放低d臭衫, 再出去BBQ, 約左5:30p.m係荃灣MTR等, 今晚就多人羅, 有今朝打波個班啦, 再加埋, camus, melody, jessica, judy &amp; her "pretty" friend, cow2妹, 文, 勤, 輝仔, andy & his gf。呢個世界真係細, 原來傑佬個女友(朱朱), 係jessica讀poly的同學仔........我地一行17人就去城門水塘BBQ, 夜晚真係好凍呀.....d風『把把』聲, 一大伙人玩, 玩得特別開心, 玩到差不多零晨1:15左右就散水....

我的壁報板

一直以黎去到人地屋企, 甚至乎行IKEA o個時, 成日都睇到人地d房間的佈置都一定有個『壁報板』係度。由於係舊屋冇自己房, 一直都想有自己的房間及私人空間, 所以, 搬左黎新屋當有自己房間時, 就決定一定要買番個返屋企裝。



等我介紹下個board入面d野：

左上角：
1.)有今年&上年 "環島行"的號碼布及今年的10周年揸打馬拉松的號碼布,
2.)仲有3張BB仔概相...真係我黎架...好Q呢...wahahha
3.)仲有仲有, 由於, 我平日好少去睇演唱會, 對上個次已經係2002年陳綺貞o黎香港係九展開的演唱會, 所以都特地將呢張演唱會飛keep住, 同時, 呢張飛都見証左我人生d野...不過, 過左去就唔講啦..當然啦!!! 前排Hit爆的林狗show我都有去睇架...有張飛証明我有去架...

左下角：
1.)我去過旅行的機票, 最近計有泰國, 之前就有北京(o個次係我人生中最型的一次, o個次單拖自己一個人自由行去架!!!), 仲有日本啦, 韓國啦 & 台灣....暫時係咁多, 最大希望衝出亞洲, 仲有, 如果有機會, 想去西藏!!! 超型......
2.)今年新年阿媽俾封利是, 家陣仲未拆....入面仲有錢架....
3.)自已畢業之後返的第一間公司, 一間公司有兩個身份, 一係contractor, 二係consultant, 所以有兩張唔同身份的咭片。

右面:
全部都係我同d friend Snap Shot, 由中學到依家都有d。 仲有, 右下角, 有張油畫係由公司一班同事一人一筆完成, 係張畫係為左慶祝我新居入伙而送俾我的, 多謝晒!!!

對上個次係5年前啦!!!

琴日同d friend去ocean park玩...記得對上一次去應該係5年前同BRE班莊員一齊去"反"。今次重遊, 覺得有d野差左....唔係好得...

琴日約左佢地10:30a.m係正門等, 點知住得最近個兩位--->jackie &佢男友(佢地屋企同ocean park車程只不過係15min左右)竟然遲到...

Anyway, 齊人報就出發------------>GO~~~~~~~~

我地入左場之後, 就一下子就直接去左o個個"超動感影院", shit, 舊時係免費架麻, 點知家陣要另俾$10入場費, 妖, 俾成百幾蚊入場費, 入到去仲要再俾錢玩其他野, 嘩乜家陣你(ocean park)好唔掂咩, 唔講以為自己返左去荔園玩添!!! 不過, 冇計啦!!黎到一場又冇理由唔玩架...都係奉上10蚊雞。 超...入到動感影院, 咪同我5年前去個時咪一樣, 冇變過////



玩完個唔係好動感的動感影院後, 就去搭纜車, 過去對面山玩機動遊戲.......過到對面, 先黎個warm up, 玩個飛天"千秋", 玩完呢個, 我地見人仲未多, 就拿拿臨跑去玩"跳樓機"cool...唔係講笑, 升到上去最高個點等佢放落個時, 有陣風吹埋塊面個下都幾驚, 之後, 就"風"一聲就急速趺落去......我為左我個$152入場費的本身價值能夠發揮到最高點, 我就冇蝕低咁起勢咁狂叫, 就係我落返黎地面個時, 我發覺可能頭先情緒高漲得濟, 仆X, 條頸好似拉親添.....不過, 為左面子問題, 冇出聲, 唔理羅.....



玩完跳樓機, non-stop的跑完"海盜船", 又再一次本住冇蝕低情況下, 再狂嗌再叫, 玩完之後, 發覺條頸就冇咩事, 不過, 就把聲就開始沙沙地.....咁玩完呢個就走去玩摩天輪cool down下個人啦......cool down完就走去食lunch, 我同阿ling就去左排麥記, 嘩!!!多人到呀...排一排都排左成半個鐘都有。


大家睇下見唔見到我

食完之後, 就去左睇海洋館, 真係好大下(個魚缸 & d魚) , 如果要我俾錢潛落去都幾爽喎, haha。之後再去睇海洋表演(即係有海豚, 海獅表演), 個show唔多好睇, 冇左殺人鯨表現, 真係差幾皮。睇完之後, 就走去玩個我想玩但次次都玩唔到的機動遊戲---->"越礦飛車"點解話次次都玩唔到呢, 係因為, 我對上兩次去親唔係維修就係落雨...今次, 終於有得玩啦....一個字掂...



最後一擊, 就係去玩"滑浪飛船", 嘩.....由於冇人願意坐船頭的關係, 於是就由我頂上.....點知, 真係high野, 玩完之後, 成個body有成百分之80地方都濕左。差不多, 5:30p.m左右就走, 我地就打的上jackie屋企, 再玩下場。

由於, 一早知道, 去完ocean park就會上jackie屋企, 所以係前一日就訂定壽司 & 魚生。除左訂左壽司, 仲叫多個pizza set, 係大家食緊野其間, 就一路播"情義倆心知", 套戲o.k好睇(以睇碟黎講), 食完野, 睇完碟, 我地就玩左個好耐冇玩過的遊戲"層層疊"。唔知係咪大家智商高左呢...個game玩一round都玩左好耐 & 疊得好高....



最後, 玩完9:30p.m左右就散水////

脫離地獄生活後的第一天

由於連續兩個星期都係趕assignment, 今日決定乜都唔做(above assignment), 原本暫定聽日去ocean park慶祝兩位好友的生日, 由於呢幾日天氣都唔多穩定, 所以到今日先決定到聽日去唔去ocean park, 眼見今日都有太陽, 於是今日就約左kenix借佢個friend張教協証黎買飛, 因為係教協買飛有discount架, 由原價$185---> $152, 超值呀......由於佢今日係long week關係, 就約左佢一齊食lunch, 去左壽司亭食lunch, 坐左冇耐, 就撞到thomas, 之後打個招呼(真係say左一個"hi"), 就各有各食。同kenix傾計, 傾左都有成個鐘, 就過左去教協買飛。

攪掂d野, 就去恤個髮, 今次又high野, 真係唔知james(hair cutter)真係咁多客, 定係我時運低呢, 今次, 又係要等成粒鐘先有得剪, (都唔係第一次) 唉....我講多次, 我個頭成係好簡單, 係咁"e", 剪碎佢, "透"簿d, 冇咩野攪....就係咁成個剪個過程之不過用左20min左右, 但係我就係salon度坐左成2個鐘, 我諗我同 james d 八字唔係好夾, 下次都係唔去佢度剪....




今晚睇左金像獎頒獎禮, 我睇到新人獎由周董拎左, 有小小覺得唔係路, 係我心選名單, 我覺得"早熟"的fiona應該得獎, 首先, 講明, 我唔係佢fan, 之不過, 只要你要睇過佢套"學警雄心"之後, 再對比返"早熟", 你就會明我講d咩, 可以話係差天共地演出....係"早熟"入面佢表現自然, 比起電視劇硬bond bond的演出好好多....毛姐係"早熟"入面演出都係一讚, 岩岩睇完, 佢話佢提名過9次金像獎, 今次終於有得攞, 真係好開心...

其實, "早熟"個故事都幾舊下, 不過, 冇咩特別大期望的話, 呢套戲都幾好睇架, 都可以推介下。

p.s : 可能, 呢排成日對住部電腦做assignment, 冇咩點出街, 一出到尖咀好似好陌生咁.....個人唔係好自在....死啦!!! 我係唔係同社會脫左節呀......

終於可以抖下

連續忙左兩個禮拜, 2個assignment + 1個present, 高潮疊起.....一浪接一浪....., 終於可以(暫時)抖下, cool, 好累呀....

今晚就刺激啦.... 今晚有兩group present, 我地係第2 group, 第一group present o個時, 係power point 入面show得唔係太清楚個building desgin layout plan出黎的關係(阿sir晒最後俾comment話：『係real exam, 個layout desgin係非常重要, 如果冇就可以話一定foul』), 於是乎就"扯"起阿sir條筋, 係Q & A o個part, 阿sir就用佢個超級 professional knowledge 去問佢地問題, 佢地可以話係俾人問到話啞啞, 體無全膚, 就係佢地俾人問到啞啞個陣時, 我就開始諗:『今次仆x啦!!! 你地班友仔(第1 group), 挑起阿sir條筋, 陣間到我地present咁咪死得~~~』, 於是, 我地就係放break個時就不過, confirm d information齊唔齊料。

到最後, 係丙騏領導下, 都有驚無險咁解答晒阿sir所有問題.....

維持左兩個星期功課黃"甘"週終於可以話係告一段落......不過, 黎緊仲有份dissertation topic & object要交, 死得羅, 到家陣都仲未諗掂有咩題目特別得黎又易做, 唔"行"得黎又夠特出....唉! 真係煩...

p.s: 在此謝過, 丙騏單拖"攪"掂個present.....

不聽話的後果

今日, 因機緣巧合下就返舊office搵Debroah, 問有關黎緊星期五present topic的資料, 同Debroah傾完個present之後, 就同佢吹下水啦!!!

之後就見到大頭 {T.I(即依家的IVE)d同學仔}, 佢就入左黎Deborah間房同我打個招呼啦!!!咁我就係咁e, 同佢寒暄二句, 佢就走返出去啦!!

之後, Debroah就問我識唔識大頭, Deborah同我講, 話大頭佢岩岩係office派帖(係全office都有派)(當然佢都有啦!!), 佢問我收到未, 我就話我同佢唔係好熟"炸", 大家係讀書o個時都係點下頭, say個hi, 我連佢叫咩名都未知, only知叫佢"大頭", 佢應該唔會請我。(其實之前都收到風話佢黎緊5月要擺酒結婚。)

點知轉頭Deborah就話：大頭見到我出現, 家陣應該出去print緊張帖俾我, 仲叫我快d走。哈, 我就唔信邪啦!!! 於是就繼續同佢吹水啦, 講同咁上下, 我望出去見到大頭個樣真係好似print緊野喎, 於是, 叫Debroah幫我開路---鬆人啦!!! 點知, 真係俾大頭佢截住, 話有d野俾我。 唉!!! 心知high野, 跟住, Deborah講架野就發生左啦!!! 大頭真係俾左張帖我, 我只好笑住口(苦笑)收啦.....

岩岩仲笑Deborah要俾$300(佢唔去飲~~~) 破費, 好彩我唔駛姐, 點知 ,一轉頭就high野....

Anyway, 雖然, 大家唔係咁熟, 不過, 結婚都係一件人生大事, 恭喜晒~~~

p.s. 呢張係我人生第一張抬頭寫我個名的"喜帖"....

到我啦!!!

終於到我啦!!! 係時候換身份證, 當然係智能個隻啦!!! (1980, 1981 & 1982概你都係呀~~~) 我個張身份證大大話話跟左我8年, 飽歷風箱, 甩皮甩骨, 平時非必要時都唔拎出黎, 費時嚇親人, 佢個塊膠面都差不多俾我起左出黎。好彩係我就快忍冇可忍之前, 就到我換身份證, so great!!!

上次, 係Jessica生日個時, jamei提過不如約埋一齊去換呀....我都覺得呢個都係好提議, 哈...成班友一齊去換證, 都幾攪笑。 好!!!! 等我今個星期攪掂晒d assignment就去剪個髮先, 再約大家時間...一齊去換證....

友人6個靚佢都係今期換身份證, 佢4月12日生日的, 佢就決定係當日去換證, 有意思, 有意思!!!(我記得妳12號生日架!!!)

G 點

何謂G點呢? 就係女性某部位, 受刺激而產生源源不絕的快感從而得到高潮!!! 平時要得到高潮非一般易事, 可謂十年一遇(睇"姊妹"講)(當然啦都係要講對手架~~~)

唉, 今期我就掂呀!!!今日岩岩攪掂一份assignment, 下星期仲有個group present and indivial assignement, 下再下星期就交埋個present的report 真係可以話高潮一浪接一浪, 我個G點(大腦), 經常性處於高潮, 興奮狀態(因為成日要諗點做份assignment), 原來成日有高潮都幾辛苦架。

我家陣個腦硬碰碰咁, 個腦日諗夜諗點攪份assignment真係想死....朋友們, 你地得閒就自己攪活動啦!!! 呢排, 唔好成日問我紅字o個幾日約成點啦呀, 去邊樹反呀!!! 俾我快快手做埋d assignment, thx.....7/4/2006之後就會攪掂大部份aasignment, 就可以放下心頭大石....

"老練"回來的禮物

友人Jackie早排飛去美國New York出trip, 回港後, 神神秘秘的同我講買左份手信俾我.....我諗咁好死!!! 唔通買左本USA playboy俾我 (因為佢之前去德國出trip, 都買左本德國playboy俾我)。 由於大家都係官塘返工, 於是今日就相約食Lunch啦, 今日去左杏花樓食lunch, d野食一般姐, 麻麻地。

食完飯後, Jackie就份手信俾我, 係GAP度買, 佢都係GAP度都買過野俾我, 咁就係個袋度拎出黎啦, 哈, 哈, 點知原來係一條Under, 仲要係一條very colourful的un, 個公仔係馬騮仔...唉....你老練咁遠就係買條under俾我.....

趕....

成日都係咁, 唔到dead line都唔做, 份assignment已經晨早俾左, 人天性就係咁, d野未迫到埋身就永遠都唔上心, 所以就攪到今日成日(由12:30p.m - 8:30p.m)踎左係polyu個CC度攪份assignment, 今日做左一大半, 聽日就要做起佢(雖然係group project, 唔明點解得我一個人做, 可能見冇人郁, 又頂唔住頸, 自己食左佢啦~~~), 因為黎緊仲要第2份要交, 所有assignment係4月7日前就會交晒, 之後, 就輕鬆晒(暫時), 因為份dissertation個topic都仲咪諗到, 想要個特別得黎又唔"行", 新鮮得黎又易做, 呢d topic, 可以話係世上難求。唉!!!!!

這麼近, 那麼遠

返左官塘office 2個星期, 今日難得第1次係office直接返屋企(平日, 要返學 or 出街, 再唔係就返左去舊office攪埋d手尾), 今日5:30p.m放工就去左搭架往美孚的小巴返屋企, 唔係講笑, 架小巴開車之後, 只需要半個鐘左右就去到我屋企。快到呀!!!

e, 唔係喎, 舊時係旺角office返屋企都係好似半個鐘左右(當時係搭巴士), 點解家陣係官塘返屋企都係半個鐘左右(如果以MTR station計, o個度大大話話都應該差成起碼10個站呀@@), 究竟家陣我係返遠左, 定係冇變到呢.....

魚旦粉之夜

今日放工約左simon佢地打波, 好耐冇打過波, 難得有得打, 打足兩個鐘non-stop個隻, 唔錯唔錯...打到8:30左右收工。

simon話邊個食dinner, 我記得alan成日都話屋企冇飯食, 我就幫佢應承左simon, 之後eddy都話食, 我見咁情況(大家雖然係識, 但係simon同alan & eddy都唔多熟), 咁我都係去坐一坐先(我屋企有留飯架!!!), 最後就決定去『樂園』食啦!!! 就係咁開始我地『魚旦粉之夜』。

何謂『魚旦粉之夜』, 其實原先諗住食完就散水, 點知佢地食完之後, 就冇咩意欲想走, 咁就開始吹水, 呢晚我就做m.c引導大家講下d感情生活(係呀!!!幾條麻甩佬踎係個魚旦檔講埋呢d野, 有少少毛管"棟")(其實, 佢地d野, 我都已經略知一二)。

見平時大家好似好少同eddy講野, 咁就由eddy問起先, 點知佢又話自己少講呢d野, "扭扭拎拎"咁, 車, 大家都係麻甩佬, 怕乜鬼呀!!! 你講完又唔會拎你去雞姦, 最後, 由我悉心引導下, 都只係講左少少。 到阿倫啦!!! 開頭係咁e帶佢講下, 之後, 佢就將佢個感人肺府、動人故事, 講左出黎, 私人野就唔好係度講啦, 只可以係度講少少, 就係佢為左個女仔個幸福甘願放手, 呢d野應該似係零晨3點鐘概『粵語殘片』先出現概橋, 家陣都會有出現, 失敬晒, 失敬晒.....到simon, 佢d野都冇咩特別(因為 , 我聽過晒), 不過, 其中一part就好勁, 佢試過佈置一間2000呎概屋(雖然, 唔係佢), 黎逗自己女友歡喜(好似係用黎過christmas), 呢種心思幾得下, 值得學習, 掌聲鼓勵。

最後, 大家都吹到成11:30左右, 我成晚係個魚旦檔, only飲左隻可樂....挨住肚餓返屋企食原本的dinner, 就變左食消夜。

老屎忽之集體回憶

上星期六, 因為jessica生日(正日係星期五), 所以就按照慣例出黎食返餐壽宴, 訂左7:30p.m Fat Angalo食America Food。 下午, 先約jessica落尖咀執返佢 & jaemi份birthday gift, 佢兩個份禮物就勁羅, jaemi就係Gucci的銀手飾, 而jessica仲勁就係Hemis的皮手帶。買完之後, 就搭船過海, 係灣仔附近食左個tea, 差不多, 7:00p.m就行過去銅鑼灣。7:30p.m就上左去Fat Angalo, 今次有judy出席, 通常我地呢班識左十幾年, 亦都可以話係由中學識到依家(係F.1已經識個隻)的老屎忽, 出到黎都係講返中學d舊事, 雖然次次都係咁講, 但係唔知點解, 永遠都可以重複又重複, 都係咁好笑.....

就係咁, 今晚, 我就特登, 係床下底搵返d中學時大家o個d相出黎, 寫下佢地, 無論樣貌, 身材, 以至心智有咩變化~~~~

1.)呢個勁啦~~~!!可以用十年人事幾(十)翻新黎形容jessica, 佢由一個『脹皮艇』身形, 去到家陣, 可以比美『鄭因而』血哭史, 激瘦過程『true man show』, 但係佢依然keep住女人最應該keep住的東西, o個一個party係冇瘦度, 好野好野。佢亦由一個可愛小豬妹變成家陣一個bar場擘酒后(佢家陣收左山), 可以話係前無古人, 後無來者....仲有, 佢對工作個份『熱誠,』 同一個工作狂冇咩分別.....

2.)呢個就由一個對『性』相對貧乏的小妹妹(妳同佢講可樂可以殺"精", 佢都信架!!!wahahha)變成一個貪慕虛榮的實幹女騙徒christy, 係呀, 佢成日呃d客錢架...佢就係用呢d錢黎買佢個d咩new balance歐洲version, Levil日本version.......數之不盡.....但係佢都係一個十分長情的小女人....佢深信以佢自己的旺夫, 自己另一半一定會飛黃騰達, 所以佢有個拍左拖10年的小小小小小小小小小超人係身邊。

3.)呢個就係o個位小小小小小小小小小超人ivan, 佢由中學開始, 都係keep住係全級頭10名之內, 佢對學業執著, 可以係冇人能比, 佢可以為左考唔到第一, 會唔開心到喊(佢當時係考到第2), 終於比佢達成心願, 升到全港最高學府- HKU......恭喜晒!!! 畢業出黎, 人大左, 知道自己另一半如此貪....唯有將自己小宇宙發揮到極點, 發誓要做個有錢人, 佢另一個稱號叫『有錢男朋友』

4.)呢位迷途小羔羊camus, 終於回歸主懷抱, 由一身旺角賣咸碟長毛飛仔look, 變成依家的小天使, 佢身邊的馬利亞(melody)可以話係功不可沒, 雖然係中五畢業, 但係佢一直不斷進修, 永無休止, 體現活到老學到老, 同時由當初想成為漫畫家變成現在的設計師 如果, 佢再努力d成為出名設計師, 我諗『傑出華人系列』可以搵佢拍一拍。

5.)骨瘦如柴的jaemi, 唔知係佢家族遺傳定係有咩問題, 佢同佢細佬, 本身生活好健康(起碼健康過jessica), 唔知點解, 病魔永遠係攪住佢地。幸好, 上天有好生之得(係呀!!!佢都係信教), 俾佢執到件好男人, 有人照顧, 可以話係有仔萬事足, 佢亦係暫時我識的人當中, 係一間公司度做足咁多年都冇轉工的人....佢對公司有一種家的感覺, 好有歸屬感。

6.)呢個人係我一生之中第一個識的高人thomas, 唔係講佢個智慧, 係講佢高度, 佢好很高, 真係好高, 高到呀~~~~, 仲有, 佢隻眼好細, 細到好似一條線, 你平時根本唔知佢係打開左隻眼未, 佢打唔打開隻眼, 你都係見唔到佢個眼珠。佢係中三o個時已經俾miss批死, 讀唔到理科, 佢到依家都一直懷恨在心, 不過, 佢口中就會話, 好彩讀唔到理科姐, 我知佢係得把口。 不過, 佢都好好, 可以搵到一份成日飛的工, 可以增廣見聞, 成日見客, 可以話係岩晒佢個辦(佢係超級吹水王)....

總結, 呢一班就係我最熟的中學同學之一啦....多謝收看///

原來我係監躉

琴日lunch, 同同事食lunch, 係閒談間佢地將官塘office稱之為監獄, 何之為監獄呢!!! 因為我地好似係監獄入面d犯咁, 成日冇所事事, 得閒打下籃球, 篤下康樂棋(當然唔係真係打 or篤啦, 比喻姐), 佢仲話我地就似係個d好勤力的犯人咁, 係監獄入面進修, 係入面做功課、溫書咁, 拎到張cert就可以快d放監, 唉, 原來, 我係不知不覺間已經變左個監躉.......

下午2:30p.m左右, 梁仔打俾我話有人full我個位, 睇下我幾時返去handover d野, 咁好啦, 橫掂冇咩野攪, 又有人同我講full我個位係個女仔, 咁就放低晒手頭上所有工作(根本一樣都冇), 就走左返舊office。

唔係講笑, 係官塘搭小巴15min左右就去到旺角, 真係話咁快就到。新黎個位女仔叫阿Mei, 好似話係上年岩岩畢業, 咁我同梁仔打聲招呼後, 就開始交代返我先前做的duty, 一輪咀講, 講完都唔知佢明唔明, 不過, 都冇咩所謂啦, 一路做一路學啦, 舊時我初黎報到, 都冇人handover俾我啦///最後, 就攪到6:00p.m左右先放佢走, 我就俾梁仔捉住清埋d手尾。 攪得黎, 再幫阿Mei再執一執返dfile, 自己都攪到成7:30p.m先返屋企。

我把口廢左...

新office d人唔講野架!!! 成個office靜到隻蒼蠅飛過都聽到, 我會唔會以後都唔識講野架....help me.....help me..... 悶死我啦.....

新office, 舊電腦

今日, 轉新post[SO(C)], 一早就返始創report duty, 之後, 知道去官塘的天台組, 之前聽人講, 個邊好似冇咩野做, 可以話係幾"游", 不過, 冇野做又好似幾難過日子, 不過, 算啦!!! 俾心機讀下書啦!!!

今日去到新office, 個office都幾新下, 不過, 同同事介紹過後, 就發現alan原來就坐係我前面, 阿權就坐係我隔離, 可以話係四圍都係自己友, 之前仲幾驚新同事唔知係咩人黎添, 家陣都安心。

不過, office新就新啦!!! 不過, 就唔係好明, 點解家陣仲有office用window98, 舊時係舊office時, 成日笑kenix用window98屎波(除左佢之外, office其他人都係用XP--include me), 家陣真係現眼報, 自己都要用window98....唉