要還始終都要還

事緣, 之前Suki想借本人既student card入學校既圖書館借書之用, 早在上星期已打電話俾我, 本已經約好星期四晚拎, 但到左當晚都未見佢打電話黎搵我!! 於是, 當晚就係msn見到佢個時, 問佢幾時拎啦!! 橫掂, 老媽未返到黎, 於是順道約埋佢星期五晚食個飯兼拎埋張學生証!!!

到左星期五朝早, Suki佢晨早流流就打黎, 話想cancal當晚既飯局, 皆因佢有d突發事件令佢自己白白冇左$160, 攪到成個人冇晒mood出去食飯!!! 唉!! 本身都打定輸數夜晚都係單挑返屋企食自己, 到左Lunch個時, Suki又打電話黎話今晚照原定計劃出返黎食, 佢話自己好返d可以出黎食~~, 突然間, 收到Macy既e-mail黎問我夜晚有冇地方去, 佢話突然間諗起我, 想搵食飯!! 所以係機緣巧合下, 呢兩位仲欠我一餐既人就一齊請我食左呢餐晚飯~~~講真, 其實佢兩位本身根本都唔識對方, 順便係呢次機會之下等佢地可以識多個朋友都不失為一件好事, 哈!!!

Suki一早講明想係銅鑼灣食, 最後, 我地決定去世貿o個間Rice Paper食飯, 一開頭聽呢間餐廳個名既時候都已經好熟, 原來佢係Habour City都有間!! 呢間餐廳本身係食越南菜, 我本身就未食過呢間, 野食唔係太特別, 不過, 勝在裝修同環境都不俗, 如果坐窗邊d卡位, 仲可以對住個海景食飯都算唔錯!!!


由於兩位女仕都屬於嬌小型(細粒), 所以我地都冇叫太多野食, 其實實際佢地想食完呢個正餐之後, 再去"哈緊打"食雪糕至真!!! 我地total叫左4款食物: 鮮蝦撈檬, 鴨胸黃薑飯, 牛油果軟殼蟹米紙卷 & 什菌蒸滑豆腐, d野食一般, 冇咩特別, 亦都唔係特別好味, 只能夠講起碼唔難食!! 不過, 係我地等緊野食黎既時候, 突然間, 有人行過黎問我地落左order未, 以為係d waitress, 哈, 原來係Deboarh, 真係好耐冇見過佢啦!! 原來佢同男友黎食飯, 不過, 佢男友未到, 佢黎攞位先, 仲要佢個位係我隔離張枱, 所以我就過左去同佢傾左一陣!!

兩位小姐同場競技~~~

食飽飽之後, Macy & Suki就話要做一做運動先去食雪糕, 所以我地就去左世貿上面間遊戲機中心打機, Macy唔駛講當然係一個箭步走去打Time Crisis 4, 我同Suki就去玩其他機啦!!!

呢個就係Dessert Set!!!

打完機, 我地就去左Haagen-Dazs食雪糕, 貴為Haagen-Dazs尊貴會員既Macy, 介紹俾我地知食呢個Dessert set比較抵食, 呢個set就包左一件Cake, 一球雪糕, 仲有一杯Coffee, 平日afternoon tea就$68, 不過過左tea time就要俾多幾蚊 - $75!! 今晚既cake得一款choice - chocolate & coffee cake, Macy話平時起碼有成4,5款, 不過, 是但啦!! 原先想叫一人一個set, 不過個waitress話得返兩件cake, 咁我地就叫左兩個set就算!! 既然兩位女仕請我食左餐飯, 我當然要請返佢地食甜品啦!!!

食飽兼吹完水, 都已經11點左右, 突然間Macy話想睇戲午夜場 - 『剌青』, 點知成個銅鑼灣d戲院一 鬼咁早close, 一場午夜場都冇, 有個間剩係上"十分愛"優先場, 冇野好睇, 於是就散Band!!

p.s: 多謝晒兩位, 請小弟食飯, 在此再一謝過!!!


Rice Paper
地址: 銅鑼灣世貿中心商場4樓P413-418
電話: 2890-3975
菜式: 越南菜

大掃除

由於自己留係屋企做功課的話, 自己多數都會受唔住誘惑走去睇下電視, 上下網, 打下機, 更嚴重既可能會走左去訓覺, 對於自己份功課既進度, 可以話係嚴重既拖慢!! 所以之前逢星期六&日都會迫自己單拖一條友返學校既Computer Center做功課!!

前排, 成日顧住/煩住份dissertation, 自己自己間房d衫呀, 櫃通呀全部都係亂糟糟咁!! 因為懶得執既原故, 平時洗完返黎既衫, 都係就咁塞佢入衣櫃就算!! 難得今日唔駛再學校做功課, 有時間, 就執下d舊衫順便換下季, 係呀!! 家陣我大部份時間都已經改穿短袖衫啦!!

睇見樓下有個舊衫回收鐵籠, 岩岩好!!! 頭先岩岩執完就拎左落去捐左出去!! 家陣執晒佢之後, 自己又有多d位入下貨, 又可以等自己個d成日都唔多著既衫有機會放佢走!!! 真係好~~~

囍

依家先係2007年既4月, 岩岩先過左2007年既第一季, 但係直至依家為止, 已經收到各方朋友將會係下年2008年結婚既消息, 依家閒閒地知道會係下年結婚既都已經有4-5單!!! 恭喜晒!! 繼上年, 中學朋友小狗結婚之後, 下年再黎多兩單, 呢兩位又係我識左10幾年既中學朋友 - Jackie & Jaemi, 前者就係下年年頭, 後者就係下年年尾!!! 佢兩個都係我最最最最最熟既好朋友之中既好朋友, 總之交情深到不得了啦!!!

好開心聽到自己身邊(尤其是好熟個d)既朋友結婚, 可以係人生路上搵到自己既另一半係一件十分幸福既事, 在此衷心咁祝福佢地~~~

依家都已經有4,5單, 再遲d唔知仲有幾多單黎緊呢!! e!! 岩岩諗諗下, 下年咪差不多隔個月就要去飲一餐!!!

Welcome Back

香港歡迎你~~~

食蕉

今日, 約左d同事去白石BBQ, 4:00p.m準時到達烏溪沙馬鐵站, 去到之後, 過多一陣, 得Anthory兄先到, 其他人遲遲未見, 同Anthory傾左兩句之後, 先見到Benny同Amy到!! 聽Anthory講, 其他人仕, Andy, Simon & C9要遲d先到, 我地先行入去BBQ場霸位!!

去到BBQ場, 都已經5:00p.m左右, 叫下野食, 起埋個爐, 擺下個架步都差不多5:30p.m, 呢個時候, Andy終於蒲頭!!! 隔多一陣, 接連收到2個可怕既消息, 一個係C9話有急事黎唔到, 另一個唔駛講當然係Simon, 佢又係話有急事黎唔到啦!!! 嘩~~~兩個飛機王, 擺明玩野姐, 我地呢邊預你地會黎, 一早就叫左成7人份既BBQ食物, 家陣一個唔該就話唔黎, 仲要係明明約4點, 過左個半鐘有多先話唔黎, 你要放飛機自己心中有數, 一早講明, 何解要到最後一刻先講!!!

唔好睇呢度咁少, 其實呢個時候我地已經食左好多(清左3,4樣野食)!!! 不過, 就咁望落去好似咩都冇郁過咁~~

就係咁我地5條友就要食晒枱面上面個7人份既BBQ美食!!! Andy都算有心, 佢3點先食飯, 佢仲要由對面海特登入黎!!! 都幫手食左唔少丸類食品!!! 今日BBQ聚會, 我地5條友仔不斷咁燒就不斷咁食, 我地成晚都係度燒d排呀, 雞翼呀, 丸類呀!!! 我覺得我地成晚起勢咁隊d肉類, 咁食法, 真係幾怕黎緊個星期會便秘!

就係呢梳蕉, 我就拎左返屋企啦!!!

另外, 仲有今日我仲諗住Simon兄會一齊燒野食, 係百佳買野飲個時, 特登買梳蕉, 因為平時我地BBQ都鍾意"燒蕉"(真係好好味架, 大家不坊BBQ個時可以試下燒蕉), 點知家陣佢唔黎, 今次死緊啦我!!! 家陣我一條友要食晒o個梳蕉(一梳 = 7條)!!! 當然啦, 我冇當場一口氣食晒7條蕉, 不過, 就要自己負責拎佢返屋企~~~

2007年度校友會資訊(3)

2007年度校友會資訊(3)

出席者: Camus, Cow, Gary, Ivan, Jessica, Jaemi, Judy

缺席者: Thomas

早陣子由於私事繁忙, 對遲遲未能刊出資訊(3), 深感抱歉!!! 本會於短短3個月已經為Camus(27/1/07), Jaemi(6/3/07) & Jessica(23/3/07)舉辦了3個生日活動, 各人亦各自得到自己喜歡的生日禮物!!! 感覺良好!!! 對於本校友會設立的『我為人人, 人人為我生日禮物籌備基金』亦運行自如, 多謝各member之合作~~

在此亦先作總結各人之禮物價值換算表:

Thomas: $1200 - (3x $200)=$600

其他人仕之生日禮物金額維持不變~

百佳是我好伴侶

5天紅字大假期, 除左我放假之外, 大不良間學校都成16號先開學, 家姐同姐夫都請多幾日假到16號先返工, 老媽都趁機會呢段時間放下大假, 由今日起一個星期, 老媽都同鄰居返大陸玩, 係意言下之意, 又得返我一條友係屋企!!

老媽臨走前, 整定d餸, 等我有時可以唔駛下下齋食米粉(係呀, 我家陣戒左食公仔麵), 不過, 食得米粉多, 都想有粒米落下肚, 如果唔係, 我就會好似o個d賣血者咁手軟腳軟!! 我地呢d懶佬, 唔係唔識煮飯, 不過, 懶開有條路就唔多想郁, 同埋廢事又洗米, 又洗煲, 咁鬼煩!!

就係度煩緊有餸冇飯食之際, 突然間醒起, 樓下o個間百佳個燒味檔, 有d燒味飯盒賣個喎!!! 於是拿拿臨走落樓下間百佳先, 望一望大大盒既燒味飯盒都係$9.9, 嘩, 經濟實惠, 岩岩我呢d獨身麻甩佬, 立即買盒返屋企先, 一打開, 對於食冇咩特別要求既我, 加上呢盒野只係$9.9既關係, 感覺上呢個飯盒都唔錯~~~加埋老媽d餸菜, 咁又攪掂一晚啦!!!

體感

有打過Wii既朋友都應該知!! 係遊戲機入面你可以砌返自己個樣出黎, Jackie一早就為我地整左個公仔, 上圖係我~~~ 頂.......整得都唔似既!!!

早在上兩星期, Jackie打電話話俾我知, 佢已經諗到佢今年個份生日禮物要d咩, 原來佢想要一部Wii, 黎緊五天大假期, 加上佢同小狗既生日都係4月頭呢段時間, 咁就索性約齊腳成班人貢上去佢屋企, 試機兼慶祝生日。

呢個Game係打Boxing, 都幾過癮~~耗氧量最大都係呢隻game, 玩一舖可以出晒汗!!!

小貞貞玩到幾興奮~~

琴日, 我地約左3:00p.m各自各上去佢屋企!! Jackie個姪仔一知道姑姐買左部Wii之後, 學校一放假佢已經走左黎Jackie屋企訓幾日打機, 我地上到去個時佢姪仔已經打緊機!! 呢部機其實真係成班人圍埋一堆玩先過癮, 如果得一條友係屋企玩轉黎轉去就好似有d冇謂~~ 我地由日頭打到夜晚, 中場食Dinner個時就播左隻"死神筆記2"出黎, 我自己就睇過呢套戲, 所以興趣不大, 所以就諗住打電話搵人傾下計, 點知打極都冇人接, 擔心左成晚, 後尾先知原來有人電話冇電, 仲等我以為有咩事發生添, 唉!!!

食飽睇完DVD之後, 再玩多陣UNO, 就再開Wii玩過, 唔係講笑, 平時要早訓既小狗, 今日打機打到忘晒形, 我地玩到成差不多12點幾先係Jackie屋企走!!!

員工福利

話說上次阿J生日個時, 佢俾左段短片俾我睇, 佢話佢公司早陣子唔知發咩神經, 冇啦啦請左班人返黎幫佢地按摩, 其實又唔係有咩特別野, 之但係個重點, 平日你去按摩都係訓係度俾人按摩架麻, 但係當時佢地個個同事都係坐係自己個位度, 仲要係一路做住野, 一路有條友企係你背脊, 側邊, 一路按你隻手, 整你個頭, 哈, 感覺上真係有d怪......唔好意思, 我膚淺, 我都係第一次聽, 有公司會有d咁既員工福利俾人!!

唔信, 佢就俾左段片我, 大家可以睇一睇...wahahahha

我係孝子

連續5日長假期開始, 頭炮第一擊去拜山是也!!! 今朝晨咁早就俾老媽叫醒左, 今日係清明正日我地要上圓玄學園掃墓, 原先, 往年我地都慣左會避開正日廢事同人迫, 會早d or遲d先去掃墓, 之不過, 今年二舅父係咁多日假期入面, 係得今日先得閒, 所以只好今日去同其他人迫下啦!!! 原先約好左其他親戚8:30a.m係上面等, 但我同老媽就遲左少少, 9:00a.m先上到去, 上到去個時其他親戚都到齊!! 雖然今日成個都圓玄學園都係d孝子, 但係唔算真係好多人, 俾想像既少, 起碼唔係真係去到水洩不通, 人疊人個隻!!! 就咁係攪一攪, 唔覺唔覺就咁去到12點~~

之後, 我地仲要過去鑽石山o個邊再拜, 過往, 我地都係去開圓玄學園個邊就算, 今次去埋鑽石山呢個, 真係好少可, 係我記憶中, 對上個次黎都應該係幾歲既時候。 原來鑽石山呢個係我既太公, 不過, 聽老媽講, 原來佢都未見過太公個樣, 太公一早已經過左身, 過往多數都係得大舅父同二舅父去掃墓, 我諗可能今年佢地見冇時間, 又橫掂都係成棚人, 就順便全部人都過埋去!!!

鑽石山個邊原來係原始行上山個種座地墓地, 聽舅母講呢d就真真正正搵山黎拜, 幸好, 太公個位都唔係算係d特別高, 只係山腳至山腰位置, 我見到有其他人個d仲勁, 唔係講笑真係行山咁行上去。 我地上到去, 成村人又係度摺摺摺個d元寶呀, 舅父個d就清下d雜草咁啦!! 又攪下攪下, 成3點幾先離開....

講下講下, 係唔係好似冇提過我地中間有冇食過野, 係呀, 我地由頭到尾都冇食過野, 好彩一朝早出門口之後, 同老媽去左大快活食左個早餐先姐, 如果唔係真係唔多掂~~咁樣攪一攪都成日, 行足成 日, 好倦呀~~~~

冇屎病

今日有人同我講左一個有關屎既新常識, 縱然淵博如我, 自問都見過聽過聞過大大小小奇怪事件, 都不其然應為呢個新常識係一個天為驚人既新發現!!
聽佢講, 話說有一次, 佢係屋企突然無程程發高燒, 仲燒到要特登向公司請sick leave留係屋企休息先得!! 之後佢就發現左一樣大事件, 呢件事就係 ~~~ "原來當一個人長期冇屎痾(便秘), 係會令人燒高燒架!!!"

至於點解佢會認為發高燒係同冇屎痾有關呢!!! 其實主要原因係o個排天氣良好, 又唔係特別凍, 又唔係特別熱, 佢自已更加冇食錯野, 所以應該唔會係因為冷傷風所引至而發高燒, 仲有, 仲有另一個最最最主要令佢對呢個"Theory"堅信不移既原因, 就係o個次, 當佢有得"去"既時候, 佢將d毒排晒出黎之後, 佢個燒就"爸爸"聲就即刻退返晒落黎.....自此之後, 佢就覺得冇屎痾係會令人發高燒啦!!!

當我聽完佢講之後, 我既反應淨係識得笑....whahahhah~~~真係笑到停唔到口wahhahah....

靚靚明信片

話說Macy早在3月中既時候, 去左日本既京都旅行, 佢呢次旅行, 係有位日本既網友接待佢, 真係好!! 佢今次同上次去蘇梅島既時候一樣, 都寄左張card俾我, 好靚..多晒!!! 佢返黎香港之後, 我問佢今次寄左幾多封名信片出去, 佢話大概8張左右, 哈!!! 實在太多謝, 我有幸可以成為你8個會諗住寄明信片的人其中的一位!!

不過, 你唔好諗住因為咁, 我就會唔記得你仲欠我一餐飯, wahhahah!!! 做完份功課, 就要做返之前未做既野!!! hehe~~~

p.s: 仲有呀!! 叔琪, 你都有份呀, 你都欠我一餐呀...whahahhah

拖欠

成舊水, 遲d仲有本係public library借既書要還~~都應該又幾十蚊...

話說做呢份dissertation其間, 少不免都要借下d Reference Book, 充下大頭鬼, 話俾人知自己有睇過下書呀, 有時更加要引經據典, 冇返一兩本書旁下身點得呀!! 所以一早就借左幾本書作天書之用, 一心諗住, 我個d書既topic咁鬼冷門(Heritage Conservation - 古蹟保存), 邊樹有人會借呀, 所以一早就好鬼淡定冇人會黎同我爭啦!! 咁就如常臨到還書既日子前夕, 就上網renew個booking啦!!

有一次如常上網renew個booking啦, 一打開renew個版面, 佢就話有人book左我本書, 冇得再俾我renew個booking, 哎呀!! 邊個粉皮係度攪攪震, 攪到我冇得renew!!! 話明係天書黎架麻, 俾佢落左係人地手上面我仲得了架!! 所以就算冒住要被人罰, 都要keep住本書到最後先放返出去。

直至琴日終於交左份dissertation之後, 就順道去還書啦!!! 去到Library之後, 個Librarian就同我個:『同學, 有罰款喎!! $105!!』, 嘩, 心諗, 兩本書遲左成個月, 原來要成舊水, 不過, 呢幾本書(有d係public library借)又真係幫到我, 呢d錢點都要駛架啦!!

就係咁, 終於還埋跟左我成2個幾月既Reference Book, 唔係講笑真係日日都孭住呢幾本書係背囊度, 家陣終於可以放低呢個重擔....cool

Game Over (後補)

唔好意思, 有d野想再補充一下, 仲有要多謝埋Macy, 因為佢"十分之關心我", 話說有一次佢打黎俾我, 就同佢傾左短短15-20分鐘既對話入面, 佢就足足講左起碼有50次同一句說話:『我打黎係關心你架, 你知唔知呀!!』 可想而知佢真係幾咁關心我呢!! 在此謝過, 仲有當然謝過你張明信片啦!! 好靚!! 遲d有時間, 先再開個版新既blog講下你張明信卡片~~~^^

Game Over

終於到左要交dissertation既日子, 下星期二就要交, 家陣都接近尾聲已經去到九九, 十十, 依家係度執埋d手尾, 星期一printout再binding, 攪掂!! 本身"死線"係星期二交既, 不過, 唔想再對住呢份咁既野, 所以可以既話, 都係快快手下星期一KO左佢, 冇後顧之憂!!!

哈, 係呀, 自從新年, 應該係Christmas之後, 成日都閉關練功咁, 不見天日, 斷六親, 除左係好朋友生日既時候, 先出黎蒲一蒲頭, 大部份時間都係對住部電腦!! 直至近日, 開始接近完成階段, 人就開始心郁郁四圍攪攪震, 所以近排多左人同我講呢一句:『e!! Gary, 你復活羅喎!!』

過埋呢兩日之後, 我就會好似個d失蹤左一段時間、 葬身於大海既浮屍一樣, 慢慢會浮返上海面, 俾人撈返上去, 等人黎認屍~~

在此嗚謝幾位好友, 冇可否認牛牛可以話係居功至偉, 佢簡直係我既dissertation進度"篤"導員, 因為佢得閒冇事就會打電話黎問我份功課做到幾多成!!! 之後佢就會話:『點解你成日做, 但係都做得咁慢架!!!』云云...., 雖然佢打黎都係講廢話居多, 不過, 難得係我做到個腦實實地既時候, 有人出黎幫我relax下, 都不失為一件好事!!

小菲雖然冇打俾我, 不過, 佢時不時都會係呢度留言, 起閧兩句大嗌兩聲加油以表支持, 在此謝過!!!

阿妹多謝妳出手幫忙!!! 唔好意思, 咁遲先send份野俾妳, 叫妳幫我改gramme, 妳都唔推塘, 實在感動萬分!! 最鍾意妳講句:『Gary, 你份野, 唔改問題唔大, 不過改左就好睇d!!』, 難得妳對住我呢份垃圾都可以咁厚道黎形容佢, 實在太好!!

當然仲有小安啦!! 妳知我忙功課, 妳就將有關File放埋一兩邊, 見我日日對自己份功課多過d File, 妳都視而不見, 由得我自由發揮, 仲不時關心我既功課進度又一大大感動位 T_T~~ 我知我已經拖欠妳好多File, 好多野仲未followup, 我會好快攪掂佢, don't worry!!!

p.s: 岩岩牛牛又打黎....又問我做成點...唉!!!

已連線~~好幸福呀~~~

咬左幾啖先醒起要影相!!! 當順道俾個橫切面俾大家睇~~

其實已經好少去麥當當食野, 一來佢已經再唔係舊時咁一個餐一張廿蚊有找就可以賣到, 感覺上同一樣野, 要付出多幾蚊去買, 我覺得幾唔化算(我係咁婆仔!!!吹咩~~), 二來自己知自己事, 呢d唔多健康既野都係少食為妙!!

之前曾經講過想試下食麥當當新出既至尊漢堡, 今日有機會食到, 嘻!!! 唔係講笑, 真係幾好食下!! !佢個塊牛肉真係幾厚下, 當然啦, 你咪諗住買返黎之後, 真係同佢影個硬照一樣咁厚身, 好明顯呢個係冇咩可能架啦!!! 不過, 我自問都屬於口大食四方之人仕, 面對呢個包既時候都要將自己個口傾盡全力咁撐大, 方可品嚐到其自家推介個7層口感之味道, 如果對於一d櫻桃小嘴既女仕, 就麻煩佢到一d人少地方先好食呢個包, 如果唔係既話, 一定會狼狽不堪, 失禮於人前~~ 大家有機會就快d去試下, 套餐-->$24.8

^^ 原來幸福就係咁簡單!!!

p.s: 食指仲有少少痛添~~嘻~~

技術性擊倒

上上回提到Fanny臨別在即, 派左個香芒俾各同事, 自上星期五將佢放係office兩日之後, 今日返到office見到香芒已接近熟到透既地步, 只要將個鼻微微走近個香芒附近, 已經可以感受到個下陣陣香氣!!! 黎緊聽日請左假, 再返黎見香芒既日子已經係星期三, 心諗如果再唔食左佢, 到左星期三容乜易由香氣化作惡臭, 香芒因熟透過度而腐爛身亡架!!

有見及此, 今日Lunch時段, 趁有時間就拿拿臨KO左佢先!! 本當想食香芒之際, 發現自身並冇任何利器割開其表面, 腦筋一轉眼見枱頭有把界刀, 善用資源, 就用界刀幫我將芒皮界開四塊, 咁就攪掂!! 不過, 當我用把界刀界開d芒果皮個時, 發覺自己有d似d變態殺手, 一手摸住一個軟淋淋既野(熟左既芒果), 另一隻手就拎住把界刀, 慢慢, 慢慢咁界開佢d皮(芒果皮)....<---真係好似d變態殺手咁...

不愧由油麻地果欄托返黎既香芒, 甜度十足, 唔錯, 唔錯~~ 順帶一提, 未食香芒之同事們, 如果你地仲未食的話, 呢兩日好食左佢, 再唔係就拎返屋企, 同屋企人分享, 我唔想公司會變左蟻兜~~

Gary是我的名字

在此謝過庇護工場主管為本人製做的名牌~~

左: 聽聞用料係"超輕發泡賿", 本身仲有個托, 但不幸俾小弟在不知情既情況下整碎左!!

中: 磁石簿片, 好不幸, 本人枱面除左打孔機同釘書機之外, 圍邊既partition都冇任何金屬既物料可以俾呢塊磁石貼上, 所以只好由得佢附係打孔機把上

右: 用不同顏色既鐵線扭曲, 從而弄到我的名字來

在此再一次謝過這些名牌為本來了無生氣既枱面加添左不少既色彩~~再再謝again!!

香芒

一個生生地既芒果~~~

公司非正式習俗, 無論轉section, 升職, 轉工等(俾人炒例外), 都會係臨last一day向眾同事派餅(西餅), 此舉對於一個又大, 流動性又極高既公司黎講, 除左平時準時出糧, 仲有可以準時收工放工之外, 時不時有人請食餅, 都應該已經係歸納左係員工福利範疇之一。

同事Fanny做埋聽日轉新工!! 今日, 佢就破晒格, 平日d同事如果離開或轉section, 大部份都係草草了事係咁e係美心買幾打西餅打發我地就算!! Fanny十分有心, 今日見佢推住3大箱芒果(真係未開封紙箱個隻喎!!), 遂位人士派發, 尤如皇后出巡咁, 見者都一人派一件芒果是也!!! 到佢派完之後, 佢就黎我個位, 傾返兩句, 講下佢d遺言!!

起初問佢係邊樹托三大箱芒果返黎, 佢話係"果欄"買返黎架!!! 細問之下佢口中既果欄, 原來真係油麻地o個個果欄, 嘩, Fanny真係有心, 我地身處官塘, 妳就走到去油麻地整幾箱芒果返黎, 雖然妳只不過都係搵個朋友幫手, 但難得既就係妳咁有心, 唔請西餅請食芒果呢種咁有諗頭既野, 都應該係得妳諗到~~

Anyway, 係度希望妳係新公司前程錦繡, 有更好既發展, ~~ 仲有多謝妳臨尾都整返件蛋糕我食, 好味!!

p.s: 呢兩日就咁將個芒果放左係office, 唔知星期一會唔會返到去個時已經俾d螞蟻重重包圍!!!

華麗的冒險

唔係我自己懶清高, 不過自小真係好少話會追咩明星, 鍾意咩歌星, 我諗陳綺貞應該係我唯一個我會比較喜歡既歌手, 係我 i-pod咁多首歌入面, 我唯一唔會delete既應該係得陳綺貞d歌, 亦只有佢d歌可以長期霸佔我 i-pod入面既memory!! 唔知點解佢d歌聽落去個時, 永遠都可以俾到人地一種好舒服既感覺~~ 早排, 見佢個官方網頁close左, 近日, 手痕又click下入去, 哦!!! 又開返喎, 仲要成個版面都改頭換面, 大家可以上去望一望呀: http://www.cheerego.com/

《華麗的冒險》
作曲, 填詞, 主唱: 陳綺貞

長長的路的盡頭是一片滿是星星的夜空
這一趟華麗的冒險沒有真實的你陪我走
長長的時間的旅程充滿太多未知的誘惑
數不清對你承諾過的一切 還有多少沒有實現過

不願放開手 不願讓你走
瘋狂的夢沒有了你 還有什麼用

不願放開手 不願讓你走
不願眼睜睜的看你走出我的生活

有時陳綺貞d歌, 只要你細心咁咀嚼當中既歌詞, 原來又係另一番滋味~~近日鍾意聽返上面呢首歌!!

近日

近日, 有人同我講, 呢排我少野講左!! 冇計, 呢排個腦成日都係諗住份功課, 個腦成日都係度諗野度野, 冇時冇刻都係度運算當中, 由於記憶體有限, 平日善於口技既我都開始懶/疏於開口說話, 其實應該個腦諗得太多野, 有時想俾佢休息下而已, 但亦因此可以趁呢個機會可以享受一下寧靜既一刻~~~

我諗只要到左4月, 我應該可以回復本身, i will be back, hehe~~~ 等我~~

咁岩得咁橋, 岩岩發現原來上年差不多呢個時候都係呢度post左個日誌都係關於自己啞左既文章~~唔通呢家野會周年性發作

偶照

其實, 呢個係上年小安俾我既顏文字扭蛋小玩意, 佢實際用途可以話係零, 主要佢放係keyboard上面作裝飾之用, 通常我都將佢放係number key個邊, 唔駛阻住自己, 不過, 早排, 有野做, 唔覺意將佢地掃出keyboard範圍, 為怕佢地走失, 將佢地安置係一咖啡罐面之上, 突然發覺出現有趣情況, 三個原自獨立既顏文字湊埋一齊, 居然可以得出呢幅畫面, 一個人篤住另一個人鬧, 而另一個人則係背後偷偷地咁笑~~有意思, 有意思....

人日 - 團拜 - 逗利是

前排新年"人日"o個時, 成個Big Family(都成廿幾人架!!)去左酒店食buffle順道團拜, 我地呢d做細既當然係想逗返封利是啦!! 好似好耐冇提過屋企個兩隻大小大良既狀況俾大家知, 當日就同佢兩隻野影左唔少相(唔係我影, 係我家姐影), 整兩張相俾大家睇下佢地家陣變左咩樣!!!

自從小不良曉行曉走之後, 成日見佢拖住肚腩仔四圍走~~(呢張相正面影唔覺有肚腩, 不過打側佢個人, 就知佢個肚腩有番咁上下份量)

呢個就係得閒無事病一病既大不良, 佢近排好似好返dd~~

呢個小不良, 家陣除左識叫:『媽咪!!』呢兩粒字之外, 其他咩都唔識講, 痾屎又係叫『媽咪!!』, 飲milk又係叫『媽咪!!』, 仆親又係叫『媽咪!!』, 見到我都係叫『媽咪!!』總之佢有理冇理都係叫左『媽咪!!』先~~

2007年度校友會資訊(2)

2007年度校友會資訊(2)

出席者: Camus, Cow, Gary, Ivan, Jessica, Jaemi, Melody

缺席者: Thomas

為對上次校友會資訊(1)提及的新措施作公平原則, 由Jessica動議一新補充方案, 內容如下:

於每次活動完畢前, 大會將會為各出席者影一張大合照, 用以証明各人是否有出席/早退該次活動, 並由本常任秘書處作報告, 以便準確地記錄各人是否如實出席該次活動, 以示公正!!

各人之禮物價值換算表:

Thomas: $1200 - (2 x $200)=$800

Jessica: $1200 - $100= $1100(上次你遲到早退, 已經紀錄在案!!!)

其他人仕之生日禮物金額維持不變~

溫馨提示, Thomas如果你再缺席多兩次, 我諗遲d你既生日禮物錢, 恐怕只足夠去朗豪坊買個 LeSportsac 散銀包, 你自己小心d啦!! 仲有, 仲有, 你已經拖欠Camus & Jaemi既生日錢尚未繳交, 如果你出席到下次既生日活動既話, 煩請你盡快繳交過期款項! 如果你真係出到黎既話!!

p.s: 由於本人正忙碌於功課中, 下次生日活動, 活動主辦人將由Jaemi負責!! 特此通告~~

Last one

經歷左沉重既四年part-time讀書生涯, 岩岩前日終於交埋呢個令我萬劫不復的大學最後一次既學費, 終於終於交晒所有學費啦!!

原來唔覺唔覺我已經嘔左十幾萬出去, 唔講我都唔知原來自己可以咁有錢, 查實我d錢係點樣黎既呢?? 從今之後, 唔駛成日再為d學費3個月捱一次, 半年頭痕一獲!!! 實在太好啦!!

除左學費之外, 上星期都做埋大學生涯入面最後一次既presentation, 結果順利完成, 做埋最後一次既powerpoint之後, 如無意外, 我諗我呢一年之內暫時都唔會再掂powerpoint 呢個software~~T_T~~

攝太歲

琴日朝早返工搭小巴正正係呢個睡夢中既時候, 突然收到牛牛既來電, 平日既佢邊樹會晨早流流打俾我, 8:45a.m呢個鐘數, 莫講佢未返到公司, 正路黎講佢應該連屋企門口都未出!!! 一打黎佢就話牛媽媽今日會去攝太歲, 話幫我攝埋好唔好!! 哈, 呢d婆仔野岩我, 我當然話好啦, 聽牛牛講今年我地好似都沖太歲喎, 總之話今年就好似好多事非啦~~

其實早幾年老媽帶過我去攝過太歲, 當時廟宇入面仲容許各善信點香入內, 當年一條友入左去(老媽留守係大門外), 以為自己報左名參加飛虎隊訓練營, 個種煙霧迷漫既情境, 真係以為自己上左仙界搵玉皇大帝, 仲有百幾人點住香塞晒入去丁屎咁細既地方, 煙到對眼呢!! 除左剩識得標眼水, 對眼根本就睇唔到野~~

之後, 近呢兩三年, 老媽要照顧我個兩隻大小不良, 都無暇理會我仲係唔係犯太歲定沖太歲!! 幸得牛媽媽照顧, 上兩年都由佢陪我地, 或幫我地做呢種攝太歲事宜!! 係度唔該晒牛媽媽, 做完份功課之後, 一定多多上黎牛家拜訪"痴餐", 哈~~

紅蘋果

今日路經citysuper見到有一果汁推介, 試飲之下, 味道不俗, 還記得之前好似係邊樹睇到有人推介過呢隻果汁, 見citysuper依家做緊promotion, 就買左支返屋企飲~~~呢支就係RingoWork出品既新鮮既Apple Juice, 大家經開Citysuper都可以去買支黎試下....原來呢個牌子既蘋果汁都好似幾出名下~~

年初三拜年去

就係呢盒由牛家大小姐指定賀年禮品~~

係屋企閉關兼不食人間煙火左幾日, 都係時候出一出街, 唔係真係唔多似過新年, 今年既年初三就上左去牛牛屋企拜年, 其實早在兩, 三年前已經開始有呢個習慣, 之前講過, 因為某d原因同牛牛一家人, 上上下下都已經混熟到不得了. 新年喎!! 當然要上去登門造訪啦!!

之前幾年, 大多數都係買盒XO醬上去牛牛屋企作賀禮之用, 今年比較特別, 問過牛家大小姐, 佢話今年唔好再送XO醬啦!! 今年改一改口味, 買盒蒙牛!!! o下!!! 新年買牛奶去拜年, 我都係第一次, 佢話呢盒唔係普通既牛奶, 係一d頂級純牛奶黎架!! 一箱有12包, 都唔講得笑, 呢箱野都成$80幾蚊, 差不多接近$90蚊架!!!

5點鐘左右上到牛牛屋企, 牛牛佢原來先係將軍澳出緊黎!! 一按門鐘, 應門既居然係jessica, 佢早我少少上到牛牛屋企, 呢個時候, 牛爸爸就拎左一大碟煎年糕出黎俾我地食, 我個日除左朝早食左個公仔麵之外就咩都冇食過, 因為諗住留返個肚食今晚呢餐, 家陣有野食, 仲唔快快手食多兩塊!! 除左年糕之外, 後尾又煎埋d蘿白糕出黎, 其實最衰jessica口多多, 話自己唔食年糕, 好客既牛爸爸就當然就立即再去煎d 蘿白糕, 真係麻煩晒牛爸爸~~~

d畫面真係好鬼靚~~~ 仲可以上網同其他人in-line打, 我地winning就連線同人打, 成班人坐晒係個廳度V嘩鬼叫~~~nature high...

今晚除左我同jessica之外, 仲有堅, 阿文, 堅的細佬, 傑佬都上黎牛牛屋企拜年兼食飯. 到左6點幾差不多齊人, 不過因為之前食左d年糕同蘿白糕, 所以就冇咁早開飯!! 今晚阿文就拎左部X-Box 360上黎玩, 堅到文兩個人夾手夾腳快快手駁好晒d線, 嘩!! 唔係講得笑, d畫面真係好靚得好緊要~~ 佢得兩隻game拎上黎, 1隻係Winning另一隻就係Gears of War。 我地玩到差不多成8點先食飯, 飛機王Jessica果然例不虛發, 就係開飯之前, 牛媽媽煮緊餸之際, 佢接到佢媽媽既電話話係附近食飯, 佢就一下子就話唔係度走。 今晚又係一餐好好餸既飯, 難得我地成班嘩鬼係度噪生晒, 牛媽&牛爸都咁歡迎我地, 真係難得~~

p.s: 係唔係發現, 唔見左牛牛個損友達達呢, 今晚佢俾佢女友仔(迫)夾左去拜年!! 係我地打機打到好開心個時, 我地就用左3G打俾佢, 唔知係部電話既問題定係其他事呢!!! 我地見到達達塊面灰到呢~~~ wahhaaha

食檸檬

平日lunch食飯叫餐飲既時候多數都會叫奶茶/咖啡居多!! 不過, 自開始『鋼條之鍊成』計劃之後, 有一次同小安食飯, 見有小安佢喜歡叫熱檸水作餐飲之用, 並且不落糖, 仲要仲要篤到個檸檬溶溶爛爛為止先肯收手, 眼見咁飲法, 叫佢俾我試飲一啖啦!! 不得了, 酸到呢!!! 咁飲法真係唔知會唔會有冇問題架!!! 會唔會飲到胃酸過多, 之後走出個胃病黎架~~

但係原來細問之下, 佢話飲熱檸水有減肥之功效(當然仲要唔加糖啦!!), 於是就開始照著做, 現在每次如果會叫餐飲之時都會照著嘗試叫熱檸水飲~~, 幸好飲多幾次之後都已經習慣左個種味道!! 唔知幾時先可以廋到呢~~~

恭喜, 恭喜

今日係年初一, 祝大家新年快樂~~~

恭喜發財！身體健康！萬事勝意！

今日有人同我講佢會去長沙灣個頭拜年喎!! 咁你知我呢d係長沙灣大既, 當然就關心(八卦先岩!! 都係一句姐~~)問下係長沙灣邊樹拜年啦!! 佢就同我講話係張保仔洞附近。 e, 張保仔洞!!! 乜唔係係長洲既咩!!! 我係長沙灣住左廿幾年, 我都冇聽過有張保仔洞呢家野!!! 不過, 我一下子就估到佢講咩啦, 我問佢係唔係李鄭屋古墓呀!!! 嘩....哈....哈....以我呢d咁淵博既人, 真係俾我估中左喎~~wahhaha

呢位朋友去完張保仔洞拜年之後, 佢知我今年新年變左做孤兒仔, 好有心咁約左我一齊食lunch, 好開心, 新年唔駛一個人食開年飯, 雖然lunch唔係食咩大餐, 不過, 有人陪都好開心!!!

新年前在公司的最後一天

琴日係新年前係office既最後一日, 基本上大家都冇咩心機做野!! 小安係屋企拎左d homemade既"芋蝦"返office請大家食, 大家食完之後, 都一致高度讚賞呢個"芋蝦"既味道, 同出面舖頭買個d有得fight, 小安俾人讚到當然係見牙唔見眼啦, 咁我地有得食, 咁有口福都開心呀!!

聽小安講原來佢屋企仲有整角仔, 包湯丸等, 不嬲都覺得如果識整呢d賀年或應節食品既屋企, 其實都係一件幾威既事黎架, 個個人都係出面舖頭買返黎食, 你就食d自家製, 自己整自己食, 食落去都覺得warm d, 好食d~~舊時, 阿婆係度個時都鍾意整下d蘿白糕, 年糕個d, 端午節就包下粽咁, 不過家陣後生個輩(我老媽個d)都唔多識整, 失傳左, 所以家陣都冇d homemade野食(平日個d屋企飯唔計啦!!!)

小安你既煩惱事, 都係過埋年先諗啦!! 新年要開開心心!!! 老張講既野都值得一諗~~不過, 重點都係睇返你自已既意願啦, 想就去馬, 唔想都冇謂迫自己!! 無論如何, 我都撐你架~~

孤兒仔預告篇

今年, 老媽一如往年一樣, 新春期間將不會留港消費, 上年老媽就同阿姨佢地一齊跟團返大陸玩。

至於今年, 佢就會同舅父&阿姨佢地兩家人一齊上大陸玩幾日, 因為舅父早係好幾年前係祁福新村買左間屋, 其實耐唔時佢地都興上去玩下&渡下假!! 所以由年廿九開始至年初三, 我都係要食自己, 新年流流, 一條友係屋企, 又要趕功課, 又要冇飯開, 好鬼可憐呀!!!

不過都好既, 老媽新年呢期間有得同d親戚出去玩下, 平日都已經成日留係屋企照顧個兩隻大小不良, 新年有得出去玩下, 唔駛屈係屋企都係件好事黎既!!!

各位朋友, 新年期間, 得閒就打個電話俾我, 睇下我會唔會有事啦!!! 你知啦, 一個孤獨老人係屋企, 好危險, 一個想唔開就.....就想走去訓覺, 唔做功課!! hehe~~~

施比受更有福

你知啦, 人有時都幾化學架麻, 正如DoDo姐講:『意外就係意料之外!!』咁易俾你估到羅喎, 你都中左幾次六合彩或者3T啦!!!

所以呢!! 我自己一直都有袋住一張器官捐贈卡係銀包入面, 咁起碼就算自己生前冇做過d咩大事, 死左都可以有d野可以貢獻俾社會呀麻!!! 橫掂你死左, 如果d器官都仲用得既, 你又拎埋去一齊燒(火化), 你估家陣去BBQ燒內臟好食d咩(好似好恐怖!! 唔好意思, 嚇親大家!!), 不如幫助d有需要既人, 咪仲好~~

其實呢張卡已經由中學個時keep住到依家, 睇相你都見到上面個張就係舊既, 大大話話都有成10年啦!! 早排執銀包, 見舊個張又殘又梅, d資料又唔update(因為要填地址同電話), 所以見公司附近有民政署就走去拎返張新既先。 家陣有張新既係我銀包度啦!! 就快新年, 講埋d死死聲, 唔多好, 哈! 不過, 幫到人就冇咩所謂, 如果你地都想要, 其實好簡單, 只要去是但一間民政署問佢拎就得!!

唔知過兩日會唔會寫blog住, 提早少少同大家講聲:『恭喜發財, 新年快樂!!』

被遺忘的孤兒仔

早在上星期六, 晚上安坐在家中睇緊電視既時候, 老媽突然問我通常逢星期幾會返學, 我就答佢:『一, 四』, 之後佢話想睇下下星期邊日可以一齊食團年飯。事隔兩日後, 即星期一是也, 放學回家, 老媽就同我講：『團年飯星期四食, 你個晚返學呀! 咁留飯俾你啦!!』當時既我仲未識有咩回應, 只係輕描淡寫咁:『哦!』左一聲。

到左第二日我就越諗越唔對路, 點解明知我星期一同四都要返學, 偏唔係星期二, 三或者五去食, 硬係要星期四先食呢!! 心心不忿既我, 當晚, 就返屋企, 同老媽問個究竟啦!!! 我問佢:『因咩樹會係星期四食團年既呢?? 個日係好日呀!!』老媽簡單一句:『冇架!! 是但一日架炸, 個日冇咩特別!!』天呀, 我係唔係你個仔黎架!! 團年飯喎, 你個仔喎, 冇左你個仔都叫團年咩.....

當然啦, 你估我仲細咩, 我聽完老媽呢句話之後, 只係好慢咁渡步返自己房, 冇同老媽撤嬌!!岩岩之麻, 就食完左今晚既團年碟頭飯(係呀, 我老媽幫我留飯既話, 多數都係將D飯餸夾埋一碟做碟頭飯, 方便食呀麻!!)

醒腦醒神

第4, 5行, 見到麻!!!

近日既生活都不外乎煩緊份dissertation, 之前講過自己有"注意力失調症 ", 之前大多數都係會走去飲咖啡黎協調返自己個精神狀態. 直至前排, 幫阿妹考牌個時, 見佢同partner話飲呢隻"有特殊配方"既葡萄適(係阿妹口中形容呢支野叫"子彈", 你冇energy個時, 就用佢黎上彈), 可以提升思維潛能. 之後就試下飲啦, 唔駛下下飲咖啡好鬼死寡架麻, 飲完之後, 又好似o.k得喎!! 之後就開始多左飲葡萄適, 突然間, 有一次心血來潮, 走去睇下個樽背寫左d咩成分, 可以飲到個人咁high, 唔睇由至可, 一睇, 原來呢支野既成份其中入面有"咖啡因 + 人參提取物"!!

唔怪得之飲完佢之後, 個人可以咁醒神啦!! 不過, 都好既, 咪當飲下甜味咖啡, 唔駛下下成口都係咖啡味, 甜甜地都唔錯....幾甜~~~

小安見你今日眼訓, 介紹左呢支醒腦醒神俾你, 得唔得呀!!! 係唔係幾甜下呢!!

秘密

今日係特別日子, 原來行宜家傢俬有野送, 今日我已經拎左份好大既禮物, 有禮物收喎!!梗係開心o架!! 仲有, 唔該, 見到我冇啦啦笑既人, 唔好以為我傻, 我只不過係開心姐!!! 你由我笑一陣就o.k架啦!!!過左度氣就冇事~~~

愛上SMS

平日大多數如果要約朋友出街既話, 都會用sms send段message俾大家, 問下大家意見, 因為作為活動主辦單位既我, 若然次次都要逐一打電話約時間, 地點, 日期, 稍有不測, 打到中途, 其中一個衰女/仔, 話o個日唔得, 要另約日子, 咁就又要由頭再打過, 之後要confirm各位既時候, 又要再打一次既話, 真的有點兒費時失事! 講真, 我唔係謙打電話麻煩, 但係雖則知道, 我打襯電話, 劈頭第一句永冇話講主題重點先, 我深信傾計同做運動一樣, 係需要warnup, 大家開首閒聊兩句(通常唔止兩句), 先入主題, 總好過, 大家草草了事, 交行貨!!

近日, 因趕忙功課關係, 少用sms約人出街(根本冇得出街, 仲約咩人!!!), 反而用左sms作為其他用途, 喜歡用上短短的sms閒聊兩句, 尤其是係沒有心理準備下收到的message, 好比飛鴿傳書般失驚無神飛到你面前, 有時關心一, 兩句的問候更為窩心, 你一言我一語, 盡在不言中~~(變態如我, 有時坐車冇野做, 得閒冇事既話, 隨手會拎起手機, 睇返之前人地send俾我/我send俾人既sms message!! 其實都幾有趣~~~)

Happy Friday

有d事~~~有時真係好難用文字表達得到!!! 唔~~就係咁羅!!!

鋼條飲食餐單

前日係我發表"鋼條之鍊成", 呢兩日既清單

前日:
午餐: 飲茶 - 因為有阿sir要轉section, 所以farewell去飲茶, 既然都係要夾錢所以呢餐食盡佢 ...(最後埋單位位$120,你就知係叫左幾多野食啦!!!)
晚餐: 7仔燒賣10粒 + 老媽靚湯(因為日頭飲茶個時, 食得太勁, 所以夜晚個餐都唔係太餓)

琴日:
早餐: 豬骨粥
午餐: 吉野家- 野菜煎雞飯
tea+晚餐: 小安請客 - 去左"赤丸製麵屋"食, 叫左好多野食, 有天婦羅茄子, 天婦羅獅子狗, 日燒玉子, 冷烏東, 吉列豬扒撈烏東, 牛肉薯餅, 餃子, 唔好以為好多野, 查實佢d份量好少, 每碟都係一件起兩件止, 呢度查實等於港式車仔麵, 你就咁叫個淨烏東(凍$10/熱$15), 再配其他餸, 每款餸大約$7- $9左右, 都算幾抵食!!!
當然返屋企又有老媽靚湯~~

今日:
早餐: 艇仔粥
午餐: 大家樂 - 輕型常餐 - 栗米肉粒飯
晚餐: 雲吞魚蛋米 + 老媽靚湯

赤丸製麵所
地址: 觀塘觀塘道418號創紀之城5期apm 第3層13號舖
電話: 3148 9088
菜式: 日本菜

p.s: 做人要有目標, 我家陣既短期目標係"食慾不振", 而終極目標係患上"厭食症", wahhahaha!!! 唔知咁落去可以keep幾耐, 我會唔會死既呢!!!

美白mask

包裝說明~~~

wahahahhaha!!!! 幪面超人~~

早兩日, 同小安傾開計, 問佢有冇做開mask, 我話自己好耐好耐有之前有做mask不過係搽係面度要洗個隻, 一塊塊個d未試過!!! 今日返工個時, 佢就俾左一塊mask過我, haha, 多謝晒!!

有得玩!!! 放學返屋企, 等老媽入房訓覺先有得玩, 廢事夜麻麻嚇親老人家就唔係咁好!!! 老媽一入房, 我就直奔廁所, 話晒之前都未試過, 成日聽人講full mask好舒服, full full下可以訓得著, 唔~~~ 第一下full落去就係涼涼地羅...查實又唔係有咩特別, 20min過去, 撕返落黎, haha, 感覺又好似係滑d喎....依家打緊呢個blog個時, 係岩岩full完冇耐, 塊面滑到呢!!! 隻手不其然走去塊面度摸多兩下(好似有d變態, 一條麻甩佬, 冇啦啦係度摸自己塊面~~~)

聽講呢d mask都好似唔平, 都應該要10幾蚊一塊!!! 再一次多謝小安!!!