濕晒

唔好講對鞋, 對襪都濕晒!!!

琴日朝早返工, 突然間落起大雨, 好彩, 我一早就上左小巴唔係肯定淋濕晒!! 以為安全冇事, 可以大步檻過啦!! 點知間車由荔枝角到官塘個天仲不停咁落雨, 起勢咁落, 落狗屎咁, 仲唔係細雨個隻! 頂!! 一落車, 成地都係水氹, 點避都避唔到! 終於行到返office之後, 完全feel到自己對鞋入面濕晒, 點解咁講, 因為我對鞋濕到, 只要我行路個時就會聽到"滋滋"聲, 可想而知係幾咁濕呢!!

所以一返到去office之後, 立即除左對鞋, 如果唔係咁濕法, 仲塞對腳係入面, 夜晚返到屋企成隻腳都肯定會發臭!!! 咁又冇理由赤腳係office通街走架, 好彩, office仲有對鞋, 個對鞋係入職個時, 公司一人派一對安全鞋俾每個staff, 基本上公司係想我地出site個時用既, 不過我由始至終一次都未著過呢對安全鞋!!! 成日都覺得佢放係個位度阻住晒, 估唔到今日用得著佢, 如果今日冇佢既話, 肯定死硬!!!

好朋友系列: Jackie

暫停左好一段時間既好朋友系列, 係時候再一次出場, 今次講既朋友仔應該該係我好朋友之中既好朋友, 因為我地可以話係冇所不談, 我地大家都知彼此既好多既秘密, 當然啦, 講到秘密, 我唔會係呢度講啦!!! 難得佢前排終於上黎我呢個blog度睇, 終於留左一個小小既留言!! 早前, 佢終於都開口問我呢個好朋友系列幾時寫到佢, 哈, 其實佢唔出聲, 我都已經諗住黎緊呢篇"好朋友系列"都係寫佢架啦!!!

之前講過對上一個篇係我好朋友系列入面既分水嶺(section 1), 依家呢個就係section 2!!! 係呢個section 2入面介紹的全部都係我中學入面第二批最熟最要好既朋友, 除此之外, 佢地仲係全女班, 我地呢班"混一色團員"total有6位(including me!!), 我係難得佢地中學朋友堆中唯一既男仔, 嘩哈哈, 係唔係好威呢!!! 講真個感覺除左覺得自己係萬紅之中一點綠既感覺之外, 更加似係一個馬伕, wahahhah~~~當然啦, 我地又係大時大節, 生日呢d時間出黎聚一聚啦!!! (係佢地仲未有男朋友之前, 都幾盞鬼, 一拖五出街, 真係威盡全場), 最威一次, 係我地成班人, 我一個拖佢地5位女仕去澳門玩, 個次真係好威威!! 話雖說佢地係女生, 不過佢地對於集體活動such as: 行街睇戲食飯等活動都唔係太熱衷, 所以基本上大部分既活動發起人都係由我黎做起!!

其實呢班朋友, 係中學時期既時候並不是太混熟, 只不過, 係畢業之後, 唔知點解, 冇端端, 居然熟左起黎, 大家得閒就會約出黎食飯, 攪活動(我地成班都有試返過大陸旅行架!! 不過係跟團~~) Jackie係我中學既同學仔, 識左十幾年o架啦!! 如果你問我咁多個好朋友之中, 以邊個最熟, 我諗應該就係Jackie, 因為我同佢真係咩都講一餐, 事無大小, 應該講既當然有講, 連唔應該講既我地都有講!!! 至於係d咩就唔寫出黎啦!!

你問我點解會同佢咁熟, 講真, 呢個問題冇從考究, 我地中學個時又唔係特別熟!! 但係畢左業之後, 大家又可以無所不談, 可能呢d就係人夾人緣, 又可以咁講, 我鍾意同佢傾計個時, 大家都放開懷抱, 你問到我問題時, 我會毫無保留地告訴你, 到我問你問題時, 你又不會扭擰地說東說西, 當然啦, 呢個係信任上既問題, 彼此互相信任, 我信得過佢, 佢唔會將我d野隨便話俾其他人知, 佢都清楚我唔會爆佢大獲(起碼暫時未爆過, hehe!!)!! 如果大家想知邊個係你心目中既真正朋友, 方法好簡單, 只要當你有事想搵人講, 傾既時候, 係你腦海入面第一個浮現的那位就係你既真正朋友!! 興幸, 自己仲有二, 三位咁既朋友, 不至於孤單, Jackie你都係我個名單入面架, 話晒我等車, 搭車個時都想搵你傾下計, 攝時間, 唔好睇少呢個俾人攝時間既角色, 冇返咁上下份量既人我都唔會搵佢黎攝架...hehe_

係佢身上真係可以發現好多係平常人身上唔會發生既事出現, 例如: 佢會走去報玩Phyical做gym, 仲要係一次過俾晒一年既費用, 佢居然夠膽死可以係成年入面, 一次都未去過Phyical做gym, 唔好講做gym呀, 連涼都好似未係入面沖過!! 中學時代, 個個人升上中六, 好正常咁會繼續讀埋個中七考A-level, 佢又唔係個喎, 讀完中六既上學期, 居然就話唔讀要出黎做野, 當時既佢話唔適合繼續讀書, 不如早d出黎儲下經驗仲好!! 不過事實上証明, 佢都係岩既, 雖然佢讀書唔差, 不過就唔會係好好叻個隻, 高不成低不就, 與其係咁, 不如出黎早d工作, 佢依家係佢個行, 都算係做到senior既位置, 成績幾好!!!

最感動既係, 佢有時一年有一兩次出trip, 每次佢會買份小手信俾我, 不過, 多數都係d唔特駛既野多, 最經典個次, 都莫過於佢去德國做exhibition個時, 係個邊買左本德國既咸書俾我, 冇記錯, 其實係佢去之前, 我叫佢幫我買本德國版既playboy, 開頭我都係咁e講下, 估唔到佢真係買左返黎俾我!! 呢d咁既朋友真係邊度搵呀!! 簡直係將我地既友情度立即標升到極點, 係呀, 我好膚淺架, 你買本咸書俾我, 我就會當你係我好朋友架啦!!! wahhahahah!! 講笑, 講笑~~~

中學時代既佢, 身形算係正常, 無線有段時間熱播"還珠格格"時候, Jackie佢憑住一副同趙微有幾分相似既面孔, 佢成日都自稱自己為"港版小燕子", 哈!! 其實當時既佢都真係有幾分似!! 不過自從佢出黎做野之後, 呢隻小燕子食得太多家外雜糧, 由小燕子身形變成火雞咁, Sorry, 我好似講到誇張左d, 不過呢個係事實, 就算冇10成都有7, 8成架啦!! 下年, 佢將為人妻, 為著可以以最佳既狀態穿起婚紗, 佢依家已經積極進行瘦身計劃!!

佢黎緊俾人逼婚, 雖然佢滿口話呢樣, 講個樣, 其實我知佢心入面都不知幾鬼咁開心!! 難得可以搵到生命中既另一半, 而且大家都致趣相投, 我係呢度祝佢同William未來生活愉快, 如果William恰你既話, 有咩事, 隨時call我!! 我撐你架!!!

Jackie, 呢度既規矩, 要留言呀!! 唔好睇完就算呀, 唔係我爆你d秘密出黎架, whahahaha!!

(下期預告: Ling Ling)

雜

前日, 同舊同事Simon, Eric佢地打籃球! 打完波之後, 少不免去食下飯傾下計!! Simon兄, 岩岩先轉完工, 新工未返夠1個星期, 就知海關收左佢, 黎緊7月佢就會入camp training, 恭喜晒!! 換言之, 我地又會少左個波友, 走下一個走下又一個, 我個team人除左我仲留係呢間公司之外, 基本上全部都走晒出去做!! 過埋6月, 都係時候, 的起心肝搵下工先!! (不過, 好似仲未休息夠!!!)

同Simon佢地傾開, 原來Kenix已經離開左我地有成2年咁耐!!(佢未死, 只不過係離開呢間公司去做海關!!), 嘩...時間, 真係過得好快, 唔開唔覺, 原來有成2年時間!!! 再講開, 原來身邊好多朋友都走左入去做海關, 聽聞, 遲d會開多幾個邊境口岸, 所以就一口氣請左好多人入去!!

由於Simon將會入camp training, 遲d我地係佢入camp之前黎個方榮記打邊爐聚會, 到時可以見到Kenix, 因為聽Simon講Kenix佢依家好似"學警出更"o個個徐子珊!! 唔知到時有冇人搵佢簽名呢!!

舊生聚會

琴日夜晚同Poly Part-time d同學仔去左尖東德興打邊爐, 成班同學, 讀左四年, 今次係第一次一齊食晚飯, 雖然唔係所有人都出席, 不過全班28人, 有14人出席, 即半班人喎!! 都尚算不俗!!! 其實, 好多時依家d活動都係由班長提議(我地冇正式選過, 不過因為佢年紀大過我地好多(4,50歲左右), 所以我地已經當佢係班長), 而班長又唔知點解又成日鬼咁鍾意叫我出e-mail俾各同學仔, 做聯絡, 家陣攪到我似半人辦事人!!!

講開, 琴日去德興酒樓打邊爐, 呢間d火鍋配料都幾新鮮, 又冇時間限制!!! 仲要唔係特別貴個下先好(星期六 - $123, 已經包埋加一, 湯底, 醬油<----所以好抵食!!! 我諗閒日會仲抵食d)!!! 其實之前, 都係因為同Jessica去過呢間打邊爐, 我見幾好食, 所以先推介俾班長作為今次食飯既地點!! 好彩都冇令各位同學仔失望!!!

仲有, 推介一種打邊爐配料俾大家 - 水晶包!! 我少出黎打邊爐, 大鄉里, 唔知水晶包都可以成為打邊爐既配料, 係德興個度有3種既水晶包俾大家選擇, 包括: 奶皇, 豆沙&叉燒, 我個人應為, 奶皇係最好味!! 叉燒就唔係好得!!!

德興火鍋海鮮酒家
地址: 尖沙咀麼地道67號半島中心2字樓
電話: 2721-8102

贈券

嘉禾贈卷就見得多, 其他院線既都係第一次見~~~

上星期兩端午節正日, 我地呢d大家族係大時大節既時候都會出黎聚一聚, 今次, 我地就去左尖東既百樂酒店食Lunch Buffle, 野食一般啦!!! 一來呢間酒店又唔係咩大酒店, 但勝在夠平, 岩晒我地呢d Big Family!! 食完野, 都係同d親戚傾下近況, 發現, 原來表弟岩岩考完會考, 今年summer term走左去嘉禾戲院度做, 咁講, 我咪係佢師兄, 話晒, 之前我都係做過同一間公司既戲院, 不過, 我就係海運做, 表弟佢就做旺角既!!

做戲院有個好處就係可以免費任食爆谷, 汽水啦!! 仲有另一個好處就係可以免費睇戲, 另外公司每個月都會有幾張贈券俾各員工, 呢個都算係包係員工福利入面, 都幾好, 等如去麥當當返工, 你都可成日免費食薯條咁解!

舊時, 係戲院返工, 基本上都係放左工之後, 就會靜靜雞咁蛇返入去戲院睇戲(其實, 員工手則好似話唔俾咁做!!!), 不過, 唔通放左工換完衫之後, 走返出門口買飛入場睇戲咁白痴咩!! 所以, 每個月d贈券基本上都係益d朋友, 自己都用唔著!!! 唔知表弟, 遲d會唔會益張贈券俾我呢個表哥呢!!hehe!!

我係"殘酷一丁"

話說琴日下午去interview, 所以下午就請左半日假, 一放Lunch就立即跑去搭小巴返屋企, 諗住沖返個涼換套衫先去interview。 Lunch呢個鐘數, 基本上都好少人會搭小巴, 我上左車之後, 等左10分鐘左右, 成架小巴依然都係得我一條友, 基本上, 司機大佬點都要開車架啦, 如果唔係後面d車就會湧入黎, 冇位泊!!!

開車之後, 司機大佬就用無線電同其他人講:『好慘呀!! 冇啦!!! 得個"殘酷一丁"!!!』好明顯, 佢口中所謂既"殘酷一丁"就係我, 哈!! 不過估唔到佢會用d咁既暗語黎形容好少客人~~~

++++++++++++++++

琴日interview個份係Building Surveying Graduate(見習屋宇測量師), Job duty主要係俾人training兩年, 之後, 就等你去考牌(Building Surveyor)!!! 其實, 睇落就好似幾好, 有人幫你training之外, 仲有糧出俾你, 但係人工就趺返落去10K左右!! 講真, 如果真係Fresh Grad d同學仔, 岩岩出黎做野, 呢個人工又真係o.k既, 不過, 好似我呢d做混混噩噩做左幾年野既人, 一下子又趺返落去, 又真係幾難頂!!! 不過, 又有人講, 做人要睇長遠d!!! 正所謂, 公說公有理, 婆說婆有理!! 讀完書就係要煩呢d架啦!! 真頭痛~~~

粽.....糭.....腫

老媽天生人緣好!!人面廣!!! 四海之內皆姐妹, 四周圍d朋友呀, 街坊呀, 通常都係呢d大時大節都會送d應節食品俾老媽應節!!! 端午節應節食品唔駛講當然係粽啦!!! 家陣, 一打開雪櫃, 基本上除左見到粽之外就係粽!!! 多到佢呢, 唔駛講, 我呢d當然係首當其衝啦!!! 家陣, 每日既早餐就先黎一隻粽!! 由上星期開始, 我已經連續食左個幾星期既粽當早餐食.....

仲有呀, 有一次, 我夜左少少返屋企, 老媽見我返黎之後, 就問我肚唔肚餓, 駛唔駛蒸隻粽俾我做宵夜~~~天呀, 朝早都已經食粽, 宵夜都係要食粽, 殺左我啦!!!

又, 平日d粽既材料都係用"糯米"為主, 口感比較粘, 但係老媽話佢有個朋友, 俾左d粽佢, d材料係用我地平時食個d米(金象個d呢!!)黎包, 佢個位朋友話用米包粽, 好似人手健康d喎(有咩根據???)!!! 當我咬落去個時, 個感覺真係好鬼實在, 真係一粒粒米黎架!! 我都係第一次見人用米黎包粽, 又見識多一樣野!!!

雜

屋企冷氣機滴水問題終於解決, 上星期六, 用左$150搵左個冷氣機師傅上屋企, 佢爬左出窗口, 用個電鑽係條冷凝水水喉開個新口, 等d水可以流暢咁去水!!! 攪掂晒!!! 有時, 錢真係要用, 呢d就係應駛得駛!!!

+++++++++++++++++++++++

小不良唔止係病咁簡單, 原來佢出疹, 聽老媽講個d叫"感冒疹"!!! 我咁大個人都係第一次聽到, 感冒都會出疹!!! 哎呀!! 家陣佢成身一撻撻~~ 好核突呀!!!

+++++++++++++++++++++++


隻公仔既大小, 岩岩好fit晒隻杯~~~

早兩日返到屋企, 就見到牛牛隻杯(手信)被人(估計, 唔係大不良就應該係小不良!!)放左隻公仔入去, 哈!!! 望落又幾得意, 隻公仔好似係度浸溫泉咁~~, 好爽, 幾嘆!!!

馬--------謎女郎

早前, 無線夜晚10:30播左一套"謎", 基本上, 我都係睇過一兩集左右, 一來對呢套野冇咩興趣, 二來老媽通常都會轉左去隔離台睇"第一手真相", 不過, 我都知呢套謎入面個三位主持人 - adam鄭, 貽興王同埋謎女郎成日擺埋d怪post!! 原來, 前排亞視, 夜晚有套"馬上全接觸"照辦煮碗copy"謎"既口吻, 動作咁做節目, 不過, 睇落又真係有幾分似, 最攪笑, 係最後"馬.......謎女郎"講左一大段野, 之後, 兩位主持好驚訝咁講 : "嘩, 乜佢咁多對白既"~~~

雜

信封 & 底都吸左呢個印~~~

今朝係公司食緊早餐個時, 有位GR同事突然俾左封公司信, 信封上面仲要係吸左個"CONFIDENTIAL"印, 正路黎講, 我地收信既日子多數都係出糧之後過幾日既糧單之麻, 但係多數都係普通一個信封就算, 而且 糧單好似早幾日都已經收左!!! 心諗, 唔係呀, 我岩岩考完試, 工又未搵, 唔係冇啦啦炒我呀!!! 於是, 早餐都唔食住, 即刻打開個信封睇睇先, 車, 原來佢話我係呢度做左3年或以上, 所以家陣既annual leave由12日加到14日, 唉!! 係咁呀, 早講, 晨早流流俾d咁既野黎嚇我, 我唔嚇得架麻!!

++++++++++++++

睇完醫生係屋企發呆中~~~

今日放工返到屋企, 老媽話小不良病左, 家姐同佢去左睇醫生, 原來, 之前聽講既野真係冇錯架!! 原來幾日冇屎痾, 真係會病架!!!

++++++++++++++

頂!!! 老媽間房部冷氣機又滴水, 今晚又俾管理處d人上黎拍門!!! 上年都已經整過, 家陣又再滴過, 整極都係滴水, 撞鬼~~~

力有不逮

小不良是也~~~

話說小不良平日係飲好少既水, 所以身體水份就相對都比較少, 需則知道平日痾便便, 係需要水份既幫助, 排便先會暢通!! 由於缺乏水份既關係, 小不良佢既便便都相對地硬 & 乾!! 聽老媽講呢幾日小不良已經冇排毒, 家陣成日都放屁屁, 咁就証明佢應該有好多既廢物囤積係體內!! 所以今晚老媽就捉住小不良進行"清腸大行動"~~~

老媽一手就捉住小不良, 將佢大腿一開, 好明顯係佢個"門口"已經隱約見到便便既存在, 可能舊便便真係太硬, 再加上幾日冇排毒, 要佢一下子將舊超大既便便釋放出黎都唔係一件易事!! 我只係見到佢喊住口係到大叫:『唔好呀..........唔好呀......冇呀......冇呀!!!!』就知佢係幾咁辛苦, 唔講真係以為佢係去生仔!!! 大家唔好以為, 我係側邊就可以袖手旁觀, 老媽叫我拎起張紙巾, 提起我無比既勇氣, 伸手去幫佢係門口既囤積物挖出黎, 大家試想想, 一個小如一亳子既門口, 要排放半條冰條咁大既便便, 係何其令人慘不忍睹!!!

唉!!! 我呢個做舅父既都算唔話得, 係食飯之後, 仲要攪埋d咁既野!!! 幸好, 晚餐d飯餸一早落晒格, 唔係佢排毒時, 我都一齊排~~~

又一喜事!!!

這是牛牛的大板手信 - 人人有份, 仲要係唔同色 & 字, 係一set入面有5隻杯, 我地各人拎一隻~~有心, 有心, 多謝!!

見無聊, 影下近景同遠景~~~wahahahahha

星期六, 牛牛約左我地成班人食飯, 平日都係我同jessica約食飯, 今次係佢約, 當然係有大事宣佈啦, 佢下年11月就會同堅結婚啦!! 其實, 呢件事我一早就知, 我話晒同牛牛 & 堅咁friendd又點會唔知呀, 不過, 佢地話一日未confirm酒席個d, 都唔好咁早同其他人宣佈, 大家睇到麻----> "其他人", 好明顯我唔係歸納於其他人類別之中, 我係超凡d個隻, wahahahha!!! 當然啦, 依家佢就訂晒酒席, 所以就要正式同我地呢班老友宣佈!!!

話雖如此, 但係Camus兄都係因教會事忙, 而不能應約!!! 雖然如此, 我地幾個都全數出席!! 成晚我地都圍繞住牛牛既婚禮大傾特傾, 基本上唔似係佢地結婚, 似我地去玩咁, 講真, 佢地兩個我地都咁熟, 到時, 家陣講都咁開心, 到時真係玩落都仲更加開心!! 仲有仲有聽佢地講, 到時擺酒仲會請埋中學d老師, 起碼有一圍人喎!!! 嘩!! 咁就真係勁呀!!!

早前, 牛牛同堅去左大板旅行, 返左黎之後, 同我講, 話有手信俾我地, 但係一定要全部齊人先可以分手信, 唔係就唔公平!!! 我就成日問佢係咩黎, 佢又成口唔講, 今晚終於等齊人(算係!!), 終於可以分到手信, 原來係一set好靚既杯, 杯上面仲有不同既祝福單字, 其實我選要邊隻個時, 我唔係志在佢個字, 我係鍾意隻杯既顏色, 好搶眼!!! 多謝牛 & 堅, 好有心思既一份禮物!!!

我地食完飯之後, 意猶未盡去左Paris Cafe繼續傾, Jaemi就因為牙痛(生智慧齒!!)而因產生頭痛, 所以就早走!! 我地上到Paris度, 一 路睇電影台, 一路傾, 差不多傾到3:00a.m先捨得走!!! 今晚最難得, 中途傾開, 原來大家好耐都冇一齊去旅行, 所以我地暫定9月會成班一齊去個短線旅行(3日2夜), whahahha, 家陣講起都開心!!! 咁岩又可以順道慶祝埋我生日, 今次仲唔發達!!!

朱凌凌

朱凌凌唔係一個人, 佢地係一隊band, 其實之前係東touch個時都見個介紹, 只係見到佢地衣著特別, 幾條友都著住條小學生短褲+cap帽, 當時就冇咩太留意!!! 但係早兩日係人地個blog度睇到有條link去youtube, 有段片應該係佢地既迷你演唱會, 佢地唱其中一首歌叫"李白", 好好笑, 同時都好好聽 - 得, 掂!!! 大家可以去聽下!!

另大家聽完李白之後, 佢地其中一位成員扮古巨基 & 陳德章, 仲好笑, 好好好好好似~~~ 原來, 再睇清楚, 佢地之前係上過TVB個d音樂節目, 都唔少野!!! 大家可以多多支持本地製作~~



呢個係扮古巨基 & 陳德章~~~(仲有part 2, 自己睇!!!)

好鬼屎興奮

手上面就係三舊屎~~ 頂~~~~~

頭先岩岩睇到報紙有段新聞話"學生見到熊貓糞興奮, 四川自然保護區考察", 睇埋內容之後, 再加埋張相, 不其然打左個冷陣, 其中有一段講到「野生大熊貓的黃一點、乾一點，這些就綠一點、濕一點……」, 大佬, 我完全明白, 呢d野係好難得, 不過, 你唔駛講到咁detail呀!!! 我陣間lunch仲要食飯架!!!

大家睇到張相, 就係講緊兩個大學生去參觀個陣時, 托起手入面個兩舊屎既興奮樣, 仲要將舊屎隊到個鏡頭前面, 個記者影相個時, 其實都應該不知幾驚, 驚佢舊屎high左埋去部相機度, 真係唔得你死!!

不過, 我突然間係度諗, 如果有人助養我個時, 我又痾d屎出黎, 又會唔會有人好興奮咁, 拎住我舊屎去影相留念呢!!! 嘩, 如果真係咁都幾爽喎!!!

但係又諗諗下, 如果有條友拎起我舊屎, 上面又好似插住支旗而旗上面又有我個名"強強" or "嘉嘉", 之後, 仲要四萬咁既口黎影相, 都咪話唔恐怖~~~

哥士的

呢排去游水曬太陽個時, 慣性聽住收音機塞住對耳仔訓住覺黎曬, 岩岩上星期六又如常一路聽一路曬, 突然轉到香港電台個時, 聽到一把好熟既聲音, 哈....原來係曾sir, 唔係朝早亞記教人抄窩輪個"曾sir 28"個肥仔, 係好耐好耐細細個睇"婦女新姿"個時, 有個阿叔, 係唔係都教人用"哥士的"清潔o個個曾sir呢(唔係我咁講佢架--維基百科都係咁介紹既)!!!

原來家陣佢係香港電台逢星期六下午都有個節目叫"住家男人", 專接d電話都係問下屋企d野點修理, 有污積又點清潔, "哥士的"呢家科果然係萬試萬靈, 聽左大約半個鐘既節目, 事無大小都係叫人做"哥士的", 再唔係就成日都聽到佢講, 叫人去化工原料舖頭買d唔知咩"三 氯 乙 烯", 有位婆婆打電話去, 又係叫人去化工原料舖頭, d後生既都可能會知(其他我都唔知咩叫化工原料舖頭), 但係d老婆婆, 老公公又點會知呀~~~

不過, 佢都幾十歲, 其實都算係幾夠中氣, 大家有咩事得閒聽下都好既, 可能有時都可以幫到你做下家居維修~~~

好朋友系列: 特別加開 - 神秘嘉賓

其實今次呢個並唔係咩什麼特別嘉賓, 只不過好耐之前Jessica打電話黎同我投訴(係好耐既事, 大大半年有多), 話佢個篇blog是在云云眾多篇好朋友系列中, 篇幅較短, 故強烈要小弟加開一個specail俾佢, 我都明白, 因為佢個篇係好朋友系列既第一篇, 當時仲未摸透點先可以好深入咁寫一個朋友, 不過, 每寫一篇, 寫作既技巧都好左, 同時都好似勾起返好多回憶, 岩岩都睇返自己之前打個D好朋友系列既blog, 感覺良多!!!

講返Jessica, 前文冇提及的, 其實佢同我一樣, 主要係係呢班朋友仔活動入面既召集人兼聯絡主辦單位, 基本上, 佢所有大大少少既活動, 唔係佢的話, 就係我去負責籌備, 所以透過係呢d大大少少既活動上, 我同佢既關係都越黎越熟!!! 有幸既, 我同佢都係一齊讀part-time, 雖然唔同科, 不過, 有時放學之後, 原來大家都岩時間, 佢都會搵我一齊去食dinner, 傾下計!!!

在中學時代, Jessica曾經諗過中七畢業之後會出國留學, 我記得佢好似真係走去考toefl, 雖然唔記得佢最後出黎既成績係點, 但係當時都真係幾驚佢會去得成留學, 你知啦, 平時都係得我同佢先會攪活動(包括出黎食飯聚餐及慶祝各位生日), 如果佢真係走左, 一來, 咪得返我一個人攪, 我咪死硬, 再者, 當時, 我都未同jaemi同thomas好熟, 唔算係有太多野講, 到時出到黎, 佢又唔係度, 冇佢做一個中間人既角色(佢同jamei & thomas熟d), 到時大家出到黎出現冷場既話, 大家都可能都會好尷尬!!! (當然啦!! 依家就算冇左佢, 都唔會出現呢個情況, 因為大家都熟左好多同成長左好多!!)

其實, 講開攪活動, 佢真係幾有心架!! 時不時都提出去玩d新玩意, 或者去d新既地方食飯!! 係我最深刻個時, 我諗都係有一年既christmas, 我地成班人係馬鞍山一個酒店式既住宅book左一晚既房玩, o個一次我同Jessica都安排左大大小小既遊戲(又畫鬼腳交換禮物, 又分組煮飯仔比賽.......), 而且為左呢次既聖誕大節, 仲同佢特登走去IFC個間citysuper(當時係岩岩新開)訂party食物, 而且仲有佢精心炮製既Shabu Shabu (雖然我覺得唔係咁好食, hehe~~), 個次係我地咁多年黎玩得最開心既一晚!!! 講真如果冇左佢係度, 我自己一個人都攪唔到咁多花臣出黎, 大家都唔會玩得咁開心!!! 實在係感激不已~~

佢本身既身子有d毛病, 自從佢發現自己有呢個病之後, 曾經有一段時間, 唔知點解, touchwood講句, 我硬係覺得佢會係早死個隻, sorry, 純粹感覺, jessica, 我唔係咀咒你呀, 所以呢, 我一早就同佢講左, 咪鬼成日蒲, 自己身子差又唔多d做運動, 仲要成日蒲!!! No good ar!!! 早陣子, 佢走去學人跑馬拉松個時(10km), 我真係覺得佢應該係會跑跑下粹死個隻, 所以平時我都會問佢想我送咩花牌俾佢, 又或者花牌上面寫d咩字好!!!(講笑~~~) 平時做運動唔應該係得個講, 走去跑下步, 再唔係游下水都好, 最緊要就吸下陽光, 進行下光合作用, 持之以恆, 咁就成個人都會好好多!!!

早前同佢傾計個時提及過, 依家有一段情係佢前面出現, 雖然都未有什麼的真正著落, 佢對呢份情有一個好好既形容, 就係:『好想有被人照顧既感覺!!!』, 聽到呢到我既感覺特別強, 是的, 由中學時代開始, 唔知係性格關係定係俾我地任何一個人早出世既關係(佢係3月生日), 係我地朋友中最大既一個, 佢永遠都當著一個領導既角色, 如果有任何問題既時候佢都會做一個最終決定者!!! 都會以一個照顧人既角色出現!! 難得依家有段令妳有咁既感覺出現就應該好好把握, 明白, 一切都應順其自然, 但願一切如妳所願~~

佢計劃係未來既日子當中, 可能會作出一個好大膽既嘗試, 佢暫定會係30歲之前會去apply "Working Holiday VISA"其實, 呢個plaining都唔錯, 話晒可以擴闊自己既眼界, 而且係我朋友之中, 暫時都未有人參加得成, 當佢同我提及會join呢個Scheme既時候, 我係十分之贊成, 襯我地仲係後生呢段時間入面, 襯自己仲未有任何既擔子, 而屋企又容許妳可以放縱一下, 呢D係十分難得既機會, 時間眨眼就過, 下定決心就應該多多去放眼世界, 對自己既將來絕對有好大既幫助!!!

最後一句, 唔好飲咁多, 適可而止!!!

老規矩, jessica特登為妳再打多篇, 希望今次岩妳口味!!!你要多多留言呀!!!

(下期預告: Jackie)

龍貓秘史

話說早兩晚, 朋友send黎一條link, 係一個討論區張貼出黎既文章, 內容係同"龍貓"(宮奇駿個套動畫)有關, 睇完之後, 都不禁打左個冷震, 當然啦, 我諗事實並非如此, 但係有人可以諗到d咁既野, 簡直係天馬行空, 不得不讚許一番~~~

"龍貓等於死神說 兩姐妹在故事裡面已死? "

龍貓其實是死神!! 途中妹妹的影子不見了!!等等
這個說法是在2007年2月左右開始傳開

稍微整理了一下日文的資料
大概的翻譯一下
是巧合還是真實信不信就在於在個人了
大家推測的版本很多
其中有一種是其實兩姐妹已經在故事的途中死掉了
然後是父親在想像如果兩姐妹活著的話應該會這樣的故事
而父親在動畫裡面寫的小說就是這部"龍貓"的原稿
首先 其實龍貓是死神，冥界的使者
和遇到龍貓的人都會死期將近或是即死
然後故事中母親入院的七國山病院的藍本
八國山病院其實是真的存在的
在網路上查一下就可以發現這個醫院是主要收容末期病患和精神病病患
故事途中妹妹小梅失蹤時候在池子裡面發現的她的拖鞋
其實那個時候妹妹就已經淹死在池子裡面了
姊姊皋月看到妹妹的拖鞋
由於不敢面對現實
而說了"這不是小梅?"的謊
而在此之後的水池的拖鞋這一幕以後
兩姐妹出場都是沒影子的狀態
然後為了尋找小梅而來到當初和龍貓相遇的地方
「拜託?#35731;我見龍貓」
「龍貓，小梅迷路了
找了也是找不到
拜託 幫我找小梅!! 現在?#20182;一定是在哪裡哭著?BR>到底要怎麼辦才好?」
「原來大家都看不到?#12301;
這一系列的台詞以後姊姊皋月自己開始了冥界的大門
而專門用來載靈魂的龍貓巴士 就帶著姊姊皋月往妹妹的位置去了
而最後母親在醫院的那幕
「現在，在那個樹上，我好像感覺皋月和小梅在那裡笑著」
不知只有母親彷彿看到了兩人
兩人為何在附近 卻不和母親見面
而卻放著帶有留言玉米?
其實是在那時候兩人都已經死亡
有一種說法是玉米的日文諧音
剛好和"殺小孩"很相似
●小梅失蹤那幕以後，小梅的影子就不見了
●最後的一幕全員變年輕，其實那並不是事件之後的故事，而是把生前的景象做成好
像happy end一樣而已
●整個龍貓的故事的舞台是日本琦玉縣的所澤
在所澤這個地方 昭和60年代曾經發生過一對姐妹被虐殺的狹山事件
而龍貓正是以這個狹山事件為藍本
兩個姐妹的名字
姊姊皋月(satuki) = 日文的5月
妹妹梅= May =英文的5月
(這兩個翻字典都可以翻到)
而狹山事件發生在5月1號
首先是妹妹不見，而被目擊姊姊慌張的尋找妹妹的情況
隔天妹妹在森林裡面被發現身中16刀被殺害
而姊姊大受打擊 在對警察作筆錄的時候
說了一堆"貓的怪物" "見到很大的狸貓怪物"等等的意味不明的話
而母親已經病死是單親家庭等等
和龍貓的故事有很多共通點
當初傳出

另, 原文在此

信心陽痿??

早前同個朋友出去買新衫, 其實佢既是我既同事, 亦都係我既同學!! 佢希望考完試之後, 為自己改變一下形象, 正所謂"先敬羅衣後敬人", 難得佢出到聲, 當然樂意奉陪啦!! 既可以shopping, 又唔駛洗自己錢!!! 完全可以滿足晒我地呢d窮等人家, 但係又有沒完沒了既購物慾, 可以幫到人之餘, 又可以滿足到自己私慾, 可樂而不為呀!!!

我地呢d口水佬, 一路行街睇衫, 當然就一路傾計啦!! 朋友說到自己對於認識女仔個方面係某程度上缺乏自信, 平時不太懂打扮, 甚至連內涵上有點兒空洞!!! 朋友說到這, 突然彈出俾大契還要強勁既金句:『唉!!! 我呢d又唔識打扮, 又冇內涵, 冇晒自信, 簡直係"信心陽痿"!!』, 『信心陽痿』呢個新term, 真係聽到未聽過, 但係如果用黎形容一個人冇自信又黎得貼切!! 聽到呢一點, 我就忍唔住笑左出黎, 其實, 真係有d唔好意思, 話晒朋友用心的跟我訴說麻!! 但係, 當我聽完之後, 以我呢d無限想像力既後生青少年, 立即就聯想到成個實際情況, 有舊野突然間"拿"埋一舊~~

其實每個人都有自己既優點與缺點, 可能有d優點係別人先會察覺得到, 自己卻不以為意, 不要常常將自己的缺點無限既放大, 要對自己有信心, 自自然然成個人都會精神起黎, 常言道, 美麗由心開始就係咁解!!!

各有事煩

近日, 唔知係天氣唔多好既關係, 呢幾日都收到不同既消息(其實又同天氣冇咩關係!!), 大多都是負面不開心的居多, 有朋友家中有事, 亦有的朋友寵物過身, 而有的是跟男友大吵......種種....不開心時, 最好就係走去游水, 一下子跳入冰涼水中, 清醒一下自己既頭腦, 暫時忘卻一切, 將自己放鬆!!! 各位, 有事想搵人傾, 隨時搵我, 講出黎, 總好過屈係心入面!!! 小弟樂意奉陪~~

自考完試之後, 好似都冇好好休息, 成日都諗住出去玩!! 不過, 又懶得約人!! 身邊所有既朋友都係叫我約人出去玩, 安排時間, 不過, 可能自己已經有一段長時間冇約人出去玩, 依家已經冇左約人既動力! 算罷!! 都係等自已re-cover返先!!

還有, 畢業旅行計劃暫時擱置一下, 唉!!! 意外就係意料之外, Macy, 這次是我欠妳的! ......食雪糕, 我既~~~

成人池 vs 嬉水池

琴晚去左游夜水, 我呢d游泳高手當然係去游主池啦!!! 游到咁上下, 個人有d倦(其實係隻腳游到有d抽筋), 所以就上水休息下, 附近冇位坐, 所以就係泳池四圍行下, 話晒都係第一次黎, 都應該昅昅四周圍d環境, 於是就走左去嬉水池個邊望下啦!!

嬉水池有好多小朋友, 後生青少年係個邊玩水, 佢地大部份都係玩水居多, 都唔會話太認真咁游一個直池, 就算有都係同個朋友仔以比賽形式玩著玩地進行游水比賽!!!

睇下睇下, 對比返主池既大人, 同嬉水池既小朋友, 不其然發現左d野!!! 係成人池個邊個個都不斷咁向前游, 一落水個個都會不斷咁向前游, 冇一個會係中途停低, 應該咁講主池既深度, 根本就唔容許你停落黎(因為泳池中段位置係比較深), 正於一個人, 畢業之後一但投入社會, 人人都要向前衝, 為著自己既前途, 努力進修, 併命工作, 沒有一刻可以停下來!!! 挑戰永遠都接踵而來~~

小朋友呢!! 還好!!! 社會還容許你可以停下黎休息, 嬉戲一番, 休息完, 有力氣可以再繼續游過!!!

但有時, 不停的游, 沒有好好的作息, 就會好似我咁會游到抽筋(失禮~~~), 事實上, 好多朋友係工作上都會不停地努力而往往遺失/錯漏左身邊好些東西, 時光飛逝~~ 不要令自己老時才後悔, 到時就太遲啦!!

另, 係快線, 又有一 有趣的事, 明明有說明規則, 但係永遠都有人唔守規則, 喜歡逆線而行, 雖然如此, 不應該的事情就是不應該, 不是人家做你就做!!! 有時, 做人就應該不要太受人影響, 應該要有自己既判斷力!! 自己了解事情既是與非~~~

夜水

為左實踐我瘦身大計, 再加上之前講過要趁張學生證仲用得, 今晚就決定去公司附近既公眾泳池游水, 官塘呢邊泳池係有時搭巴士經過就見得多, 但係就一次都未黎過, 呢個泳池係度, 不過就唔多清楚個入口係邊, 幸好小安對官塘比較熟悉, 一問之下就已經俾到答應我!!!

唔係講笑, 原來都幾多人夜晚去游水, 有部份係d公公婆婆, 可能怕曬既關係, d公公婆婆大多數都係游早水或者夜晚, 平時下午我去曬太陽個時, 多數都係d麻甩仔多走出黎曬太陽(included me!!! whahahah~~), 好少見到d公公婆婆出沒!!!

做完一陣熱身, 天氣熱辣辣, 一心諗住跳落水有冰涼既感覺直上大腦度, 點知, 頂, 我以為自己去左浸溫泉, d水興到呢, 就好似你岩岩痾出黎個篤尿既溫度差不多, 溫溫吞吞的!!! 冇左涼快既感覺都算, 由於岩岩講過夜水, 好多時都係d公公婆婆黎游, 所以呢, 久違了既一件頭泳衣真係比比皆是, 四周圍都係一件頭既泳衣, 唔好話三點式, 二件頭都應該已經係幾難能可貴!! 咁都好, 我就可以專心游水~~

不過, 人實在太多, 所以我就轉左去由快線個邊, 不過, 真係唔多明, 已經有個instruction講明係快線游水係單一方向, 泳者應該係盡量靠左游, 我都唔明點解死都要唔睇指示, 成日都逆方向而游, 唔識分左右都唔緊要, 你咪當自己係鐘, 順時針游咪得羅, 呀!!! 估唔到d人死都要逆游, 所以呢, 每當有人係我面前游緊過黎個時, 我都死都唔避開佢, 仲要趁佢過我個時, 我對腳就特登踩多兩下水, 試圖睇下會唔會可以踩到佢, 咁根本係佢唔岩(逆方向而游), 所以就算我踩到佢都冇錯, wahhahahah~~~

總結成績: 游夜水有個好處, 就係冇太陽曬, 等我可以專心咁游水, 今晚都大大話話都游左30個直池!!! 不俗, 不俗~~~

倒楣的一天

還記得星期五已經係blog度計劃好星期六的節目嗎??? 那天朝早根據自己原定計劃訓到10, 11點左右起身跟住就去食Brunch, 黎到呢一刻就尚算順利!!! 享受完美味既Brunch(其實都只不過係香腸墨丸麵已, wahahahah~~), 望到出面仲係陽光普照, 心諗今次仲唔發達, 仲唔俾我曬到黑炭咁, 於是就拿拿臨執埋d架生就出發啦!! 搭左上巴士之後, 突然間醒起, 頂.....漏左樣野冇拎添 --- 膠袋, 泳完水之後, 走個時d濕淋淋既泳褲毛巾個d咪冇野袋住, 係我仲煩惱緊係邊樹可以冇啦啦走個膠袋出黎既時候, 諗下諗下就唯有走去7仔是但買樣野, 再叫佢俾個膠袋啦!!

一心諗住曬太陽既我去到泳池, 一換完衫出去個時, 天色都尚算不俗, 點知當我擦完太陽油之後, 頂, 成舊黑雲蓋頂, 個舊黑雲大到連丁點既太陽光都走唔到出黎, 開頭仲諗住係一陣子太陽會自己走返出黎啦!! 點知成個下午都冇出現個, 天陰陰的!!! 我的天~~~ 咁平時, 我曬太陽既習慣都會順便訓下覺, 點知, 原來我自己計算錯誤, 醒唔起自己岩岩兩個鐘之前先起身, 家陣又訓過, 邊有可能訓得著架~~~唉~~

都算!! 4點零左右就離開泳池, 向salon進發, 大約4點半左右到達salon, 點知James話要等等, 咁好啦!!睇下雜誌慢慢等啦, 點知睇完一本又一本(真係遂粒字去睇個隻), 一等就等左個半鐘有多先到我, James都同我講左好多句唔好意思, 佢話今日好多人唔知咩事差不多同一時間黎salon搵佢(當然我係其中一個), 因為夜晚要過牛牛屋企食飯, 所以都叫佢剪快d!! 唉!! 連埋剪頭個半個鐘, 我大大話話困左係salon兩個鐘頭有多, 撞鬼!!!

幸好, 之後, 上到牛牛屋企, 見到好耐冇見過既牛媽媽, 當然同牛媽媽傾下計啦!!! 同牛媽媽傾緊計既時候, 牛牛打俾我話, 見我好耐冇上佢屋企, 所以家陣就特登走去買部Wii, 話等我黎到有得玩喎(根本就借我黎過橋, haha), 不過, 難得佢咁講都算係好朋友呀, 而且最重要都係有得玩呀麻!!!

食完飯之後, 我地成班人一齊係度玩, 玩到2點左右, 突然間成間屋都黑晒, 哈, 我地打機打到跳Fuse!!! 其實我諗跳Fuse既真正原因係屋企, 又開住2部冷氣, 又打機, 之後, 仲有人去沖涼開埋個熱水爐, 一下子承受唔到, 所以就跳左Fuse啦!!!

明天的行程

聽日會如平常的星期六般, 訓到黃朝日晏(都係10, 11點零鐘左右啦!!), 之後, 係屋企上網睇下報紙呀(慣左平日都係一早就上網睇下Apply Daily, 唔係就會成日心癢癢, 我要掛心下社會大事!!!)

到左12點左右, 就開始整個Breaklunch(仲乎於早餐與午餐之間的), 食飽飽之後, 就出去享受我既陽光與水, 好耐冇去過泳池游水啦, 最重要原來係我張學生證去到今年既9月就完, 自此以後, 去泳池就要俾返成人價, 享用唔到學生優惠, 唔係講笑, 貴成個double(學生價$9 ---> 成人價$18), 講起都肉痛死!! 同埋都好耐冇去曬太陽, 係時候曬返我d古銅色肌膚出黎, whahahaha~~

游完水曬完太陽, 就走去恤個髮先, 話晒都成個有多冇去剪頭髮, 夏天黎都係時候整個涼爽d既頭!!! 而且聽晚上牛牛屋企食飯, 我自己不嬲都係係深水埗剪頭髮, 岩晒, 順路!! 恤完頭髮, 岩岩好夠鐘上去牛牛屋企, 不過, 記住要買返盒靚燒肉上去, 牛爸爸上次同我講, o個間燒味檔d燒肉好好食!! 難得咁耐冇上去, 都應該買d野上去!!! (雖然每次買完之後, 都會俾牛媽媽鬧我: "Gary 做咩又買野上黎呀...唔駛啦!! 妳睇陳志堅佢成日上黎食飯, 都冇啦!!!" , 哈!! 講笑!!!)

讀完書既星期六既生活係幾咁豐富~~~~

咁就4年(後話)

續...

上星期六考完試後同同學仔食buffle一事, 係席間, 有同學講到, 畢業之後, 好似咩都由頭再黎過, 因為之前個4年都係大家日日夜夜都係讀書, 生活中有目標, 求畢業!!! 但係依家目標達成, 家陣打後既星期一至五都悠閒得很, 正常謂冇所事事, 了無生事!!!

唉!! 諗諗下都係, 家陣畢業, 畢業代表就要搵工!! 之前, 係呢度做, 主要係因為貪呢度舒服, 工作壓力唔大(唔該各位, 記住, 我唔係冇野做, 我都有野做, 只不過唔係太大壓力姐!! 唔好成日話我好得閒, 雖然呢個都係事實!!), 方便自己讀書, 雖然人工一般, 但都可以接受!! 另係呢幾年, 自己份人工都維持係同一階段, 每當見到人地年年有得加, 自己就.....都唔多掂, 但係為左讀書先忍住先!!

家陣畢業, 又要面對另一個新既大挑戰, 有機會既話, 都可能去考牌, 雖然自己都覺得自係力有不逮, 未必有能力考到, 不過, 如果唔係又唔知應該做d咩好!! 不過, 家陣都係岩岩考完試都未夠一星期, 都係慢慢再plan下先!!!

人生路上多煩惱..... 快d俾我中返期六合彩頭獎就好啦, 我唔貪心架, 幾千萬個隻就夠架啦!! 各位朋友, 得閒就將"中六合彩"個d念力傳俾我, 我中左既話, 大家實有得分!!! 我唔會虧待大家~~

畢業禮物

原來個boxset都幾大盒!!

內附: 演唱會CD x2 + 演唱會DVD x1 + 海報x1 + 親筆信一封(from陳綺貞)

幾鍾意佢拎係結他個時, 一路陣一路唱, 幾型呀!!

之前曾提過陳綺貞黎香港做左個校園演唱會, 無奈, 撞岩自己考試去唔到, 琴日食飽飽Buffle之後行街個時, 俾我見到佢個演唱會Boxset岩岩出左, 咁岩同行之友伴有該店會員卡之優惠, 而且岩岩個演唱會去唔到, 為左彌補我心靈上創傷, 加上見自己岩岩畢業(應該冇問題掛~~whaha), 所以順理成章有幾個藉口supoort買份畢業禮物送俾自己(好可憐呀!!! 呢d野都要自己送俾自己~~~T_T), 總算有d禮物慶祝下自已4年黎既努力, hehe~~~(又多個藉口!!)

雖然未睇晒隻DVD, 不過, 應該都會幾好睇, 話晒佢之前黎香港做個一次演唱會個時有去!!

咁就4年

琴日終於考埋呢個大學生涯既最後一科, 考完試之後, 有同學仔提議去食buffle, 既然難得讀完4年書就係為左呢一日, 所以大家都起哄一齊去食, 我地浩浩蕩蕩都有成20個人都差不多大半班同學仔去食, 讀左4年書, 都未試過成班同學仔坐埋一齊食野!

今次我地去左美麗華地庫個間Todai食野, 呢間餐廳之前都食過, 不過都已經係早幾年前既事, 其實個度d野食都算唔錯, d野食種類幾多, 尤其是d甜品, 上次去食個時係Dinner, 個時有個廚師專整甜品, 其中一個係即焗梳乎里, 咁可能係Lunch關係就所以今次就冇, 不過, 都依然有好多野食!!!

難得大家坐係度同枱食野, 少不免都係傾下計, 有大部份人都諗住會去返個畢業旅行, 有d仲係過兩日就出發, 有人去日本, 有人去台灣, 有人去沙巴, 應有盡有, 咁又係, 大家話晒忍左4年, 黎到呢一刻點都要去返個旅行散下心, relax下, 至於我, 唉, 冇計, 我係生活於貧窮線下既人, 搭飛機咁傷荷包既事我當係做唔出啦(冇能力做!!!), 所以都係諗住返大陸玩(仲要係"咩"背囊個隻), 唉!! 人家畢業旅行唔係歐洲就係美國, 我都算係最兜踎一個, 不過, 最緊要係有得去玩, 呢個先係主點, wahahahh!!

Todai
地址: 尖沙咀金巴利道1號美麗華商場地庫1001-3號舖
電話: 2375-9883
菜式: Buffle

最後一夜

因為差不多去到考試尾聲, 大部份人都考晒試, 都已經冇人返黎圖書館溫書, 所以我先有機會將d notes &什物放晒係張枱度!!! wahaahaha~~~

呢張相, 係我係學校溫書既最後一晚影既, 睇怕應該都未有機會再留係學校圖書館溫書!! 所以就特登影張相留念下~~~ 平時, 我都慣左一個人去溫書(由中學會考起已經有呢個習慣), 因為人多我會好容易分心, 雖然一個人係悶d, 不過就自由好多, 起碼, 我鍾意幾時去休息, 幾時去溫書, 幾時去上網都冇人理~~~

又過一關

岩岩考完第一科, 先過一關, 過埋星期六, 攪掂~~~

p.s: 家陣係學校既電腦室, 轉頭就要返工!!!

p.s.2 : 另, 牛牛&堅話, 佢地去完旅行有手信, 人人有份, 不過, 先要條件係全體人員必須全數出席先可以派, 有關派禮物活動安排將於19號之後舉行, 敬請各位大大, 在此留言, 告知本人, 19號之後, 邊日會唔得閒!!!

大契上身? 家庭會議?

今日臨出門口返學校溫書個時, 老媽同我講左以下一段說話,

老媽:『仔, 聽晚返黎食飯!!』
我:『但係我想留係學校溫書!』(我知我係不孝, 不過我真係怕溫唔一切~~, 請見諒)
老媽:『聽日咩日子呀!!』
我:『我知母親節呀麻, 好, 冇問題, 橫點都係, 咁不如出去食!!』
老媽:『唔駛!!! 聽晚留係屋企食, 聽晚要開家庭會議!!!』
我:『...............』

唉!!! 之前我已經同家姐吵過大獲(都已經係成年前既事), 雖然, 之後, 佢都有少少改進, 但係其實仲有好事都.......唉!!! 其實, 之前老媽都提過呢件事, 不過, 佢就冇實際講過會係幾時, 估唔到會搵著呢d大日子先黎!!! 總之就頭痛啦!!!

仲有, 唔知老媽近排係唔係睇得"溏心風暴"多得濟, 家陣俾大契個d思想入左腦!! 我今大個仔係屋企都未開過咩"家庭會議"~~~ 就連"家庭會議"呢個term都未曾係屋企聽過!!! "溏心風暴"果然係有d料到, 家陣真係做到深入民心!!!

消滅九龍 , 殺出香港

喜歡打書釘既我(講多次, 呢d免費消閒娛樂, 我最鍾意), 好耐都冇行過書局, 今日Lunch個時, 食飽飯又見唔眼訓, 仲岩岩經過APM, 所以就貢左上書局昅下有咩新書出!!! 行行下又俾我發現到有新野喎, 原來, 阿德同小克已經靜靜雞出左第二集既" 標童話集" & "偽科學鑑證"(可能人地係有做宣傳, 只不過, 我唔知姐!!)!!

上次都推介過呢兩本書!! 其實呢兩本書自上次出街之後, 坊間都有好大回響, 今次出第二集, 應該都會有好多人去買, 如果大家見悶就不妨買黎睇, 睇完個人都會開心晒!! 仲有既就當然係支持本地創作啦!! 今次呢兩本書都有個sub-title就係: "消滅九龍 , 殺出香港"~~

終於出返黎啦!!!

頂.....原來條USB線一直匿埋係公司個櫃通度喎!!

之前曾經提及過, 自己i-pod個條USB線唔知死左去邊既, 今日係公司做做下野, 見自己個卷膠紙用晒, 就順手拉開自己個櫃通睇下有冇存貨啦!! 呀....呀....居然俾我見到, 我條可愛既USB線走返出黎, 我諗主要都係之前係office用完d架生之後, 望都唔望一手就掉左入去個櫃通度, 呢排都冇乜點用到d架生, 所以都冇特別打開個櫃通望, 點知今日一望就見返條USB線, 實在太感動啦!!

之前, 唔見左條USB線之後, 真係就算有新碟出都懶得搵, 依家終於有動力搵d新歌入部i-pod度啦(Jessica 快d send"五月天"俾我呀)!! 其實早兩日自己都差d忍唔住想買過條新既USB線架啦!!! 好彩, 好彩, 差d想買個一刻, 就立即醒起老媽個句說話: 『只要冇掉到, 佢實係仲係屋企啦!! 到時到候佢自自然然就會走返出黎架啦~~~ 』, 就立即打消買線念頭!! 雖然唔係係屋企蒲頭, 不過家陣佢都出現返啦, 慳返幾十蚊, 幾好呀!!! 嘻!!!

所以呢都係薑越老越熱辣!! 老媽係有d料子!!

高科技

唔係講笑, 佢入面都有好多詞彙, 好堅下架!!

話說呢排開始溫習, 自問雖然自己學左英文廿幾年, 但係到依家為止都唔未清楚知道英文字母總共係24定26個(講笑姐, 又點會唔知呀!!!), 所以, 考試溫書時段每每都會有部電子字典機跟身!! 但不幸, 字典機跟左我都好幾年, 居然係呢個時候玩野, 一開機時就吱吱聲, 再唔係就係hung機, 每次開機查字個時下下都要篤粒reset制先, 麻煩得很!!

突然間, 我醒起自己部手機好似有個"漢英雙向詞典"function, 於是一開機, good晒!!所以依家就放棄左自己個部老爺字典機, 我依家溫書既時候, d人成日都以為我唔係係度溫書, 只係顧住係度玩sms打字, 嘻!!! 原來部手機有d咁既function都不失為一件好事!! whhahahaha~~~

宣傳易

早前朋友仔Macy隻身到訪日本的京都x大阪x奈良, 並記錄一些有趣事情寫成遊記, 各朋友們有興趣可以上去睇睇佢個遊記 "另類日本體驗●京都x大阪x奈良", 當中佢過左去日本參加左當地既馬拉松(仲要係落住雪咁跑), 另外, 佢仲有走去當地扮雞(其實係藝妓先岩, hehe)~~~ 仲有好多好多....

滴水不沾

奶茶
+
醒腦醒神葡萄適
+
奶茶
+
烏龍茶

琴日我淨係飲過呢d野, 一滴水都冇入過肚, 唔怪之得家陣都仲係咁精神啦!!!

p.s: 現在時間係零晨2:00a.m

衰左!!

唉!! 今日係Houston Vs Utah第七場, 係呢個系列賽入面, Houston本身開局做得好好係主場2:0, 點知就俾人起勢咁追, 之前都lead住3:2既局面, 只差一步就入到第二圈, 點知又再一次俾Utah係主場追到平手, 都算啦!!! Houston last one有主場之利, 但係點知, 一開始, 眼見Yao進退失劇, 下下俾人食住, 已經成7"6架啦!!! 係籃底應該冇人夠佢打, 點知佢成日都左閃右避, 唉!!! 失敗...



今朝自己係屋企睇到第2節開段都冇眼睇, 走左返學校, 係雖然最後Yao搵返手感total有成29分, 但係都為時已晚, 仲有呀, 身為一個中鋒, 得個6個籃板球, 真係小得可憐!!! 雖然臨尾都追得返, 不過最後都係敗陣~~~唉,冇計, 鬼叫Houston d後備既板凳深度不足, 成日靠Yao & Mac Grady!! 仲諗住今年, Houston應該入到Seond Round, 點知都係眼白白錯過左, 又要等多一年!!

唉!! 今日真係兩個袋(too bad)~~~

不奢望有人來愛,但要好好愛護自已

朋友傳來的一篇不俗的文章, 蠻有意思~~~

++++++++++

小心讀每一個，再用一兩秒想一想我愛你不是因為你是誰， 而是我在你面前可以是誰。

沒有男人或女人是值得你為他流眼淚，值得的那一位，不會要你哭。

那人不是你所想般愛你，但不代表那人不是全心全意地愛你。

一個真正的朋友是向著你伸手，觸動你心靈的人。掛念一個人最差的方式， 就是你坐在他身旁，而知道你不能擁有他。

就算你不快樂也不要皺眉，因為你永不知道誰會愛上你的笑容。

在世界裡你可能只是某人，但對某人你可能是全世界。

不要花時間在一個不會花時間在你身上的人。

可能神要我們在遇到那位對的人之前先遇上一些錯的人，讓我們遇到那位對先生/對小姐時懂得珍惜。

不要因為完結而哭，要為曾經發生而微笑。

這個世界永遠也會有一些傷害你的人，你要做的就是繼續去信人和小心你下次信的人。

在你嘗試了解其他人和盼望其他人明白你之前，先把你自己變成一個更好的人和了解你自己。

不要太努力去找，最好的東西是在你最預計不到的時候出現。

Long Time No See

呢兩日唔知發生左d咩事, d好耐冇見既人, 都不約而同地係呢兩日之內搵我!!!

首先有既係我係polyu讀Higher Diploma個時做part-time時候識既一班同事, 琴日Katherine突然打電話黎話我地成班GV同事好耐都冇出過黎, 係時候出黎聚一聚!! 其實往年慣常, 我地呢班同事都係一年一次BBQ, 不過對上兩年唔知咩事, 好似冇攪到, 所以黎緊就約左下星期六出去BBQ, 雖然之後o個個星期二要考試, 不過, 足足有3年冇見喎, 點都要出去會一會大家先得!!

今日, 係圖書館溫溫下書, 突然有個陌生電話打黎, 啊~~啊~~原來係個小學同學, 彭生搵我, 佢應該係除左林小姐之外, 另一位仲有聯絡既小學同學仔, 話就話仲有聯絡, 之但係對上個次傾電話都已經好似係5年前既事, wahahha~~~呢個先真係long time no see.....好!! 考完試之後, 一於搵佢食下飯先~~

仲有, 牛牛同堅兄, 好似好耐都冇見過你地, 對上個次都已經係上次jaemi生日個時, 等我考完試再約出黎食飯 or玩, 當然都要上一上牛牛屋企見下牛媽媽同牛爸爸~~~

依家d後生

早兩日開始返學校溫書, 見有d note未download晒落黎, 就走左去computer center個邊, 攪埋掂佢先啦!! 坐左一陣冇耐, 就聽到兩位同學仔傾計, 好明顯佢地係度趕緊功課啦, 之後就聽到佢地講:『喂, 聽人講, 我地個班有人將條功課題目放左上去yahoo小知識度, 問人地點答!!!』聽到呢度, 我心入面都不期然嘆左一口氣, 唔駛呀, 做份功課, 攪到要放上去yahoo小知識~~~攪咩呀!!!

又, 有一日放工返屋企途中, 我聽到一對著住校服既男女對話!!
女:『阿xx, 叫我聽日陪佢上去喎!!!』
男:『上去邊呀??』
女:『上去落仔呀, 佢都痴架, 邊樹有錢呀!!!』
男:『嘩, 咁唔小心呀......』
之後, 我已經步塵而去, 最後結果都不得而知

唉!!! 唔知我保守定係咩呢, 家陣d靚仔, 真係咩都做得出個喎~~

考試準備中

黎緊15 & 19號將會舉行最後一次考試, 為左唔想臨尾香, 家陣都係時候開波溫下書!! 唔係扮勤力, 只不過, 成個sem為左攪份dissertation, 都冇咩心機上堂(咁都俾我搵到藉口俾自己, 我果然係聰明呀, wahaha~~), 家陣開始執返下d notes, 睇下阿sir教過d咩, 攪下攪下都差不多架啦!!! 好快...好快, 又可以出去玩過!!! 到時就真係真正復活啦~~啦~~啦~~~

我的四年同學仔們

上星期四終於返埋呢個course既最後一堂, 最後, 臨落堂前, 我地既班長 (其實由頭到尾都冇認真選過, 不過, 佢係我地班入面年紀比較大的, 所以我地都會稱呼佢做班長), 就叫我地企定定, 襯臨last一次齊人, 影張大合照以作紀念!! 多謝班長既提議, 如果唔係都唔會有呢一張大合照既出現!!

講真係呢4年入面, 我做親group project都係慣性地會同阿Hang, Tommy同埋Alan同一組, 好少再夾其他人, 所以基本上除左自己group member之外, 其實同其他同學仔都唔多熟, 再加上大家都係part-time既關係, 通常一放學就會"鳥四散"咁, 一下子就會唔見晒人, 所以呢, 其實由year 1 直至現時為止, 有d同學仔, 雖然我知佢係我個班但係就唔多知佢叫咩名~~哈!!

所以聰明如班長就整左個table, 叫同學仔們填上各私人資料, 好讓大家畢業後, 大家有機會的話, 仲可以keep contact, so great~~