2006年最後一天

今日係2006年最後一日, 本身無諗住出街玩, 亦都唔打算出去任何地方倒數, 今日反而希望係屋企平平靜靜咁渡過。(其實主要想做下dissertation, 時間所剩冇多!! 頭痕, 頭痕~~~)

一年過去, 代表新既一年來臨, 自己將會係呢一年畢業, 如冇意外, 應該會有好多未知之數會發生, 尤其是之後未來既兩, 三年, 應該會有好多重大決定會出現, 不過, 短程黎講自己希望下年讀完書之後可以去一d自己未去過既地方旅行, 擴闊自己既視野!! 至於其他, 都係等做完份dissertaion先算, 哈哈!!

希望各方好友, 未來一年, 開開心心, 順順利利, Happy New Year!!!!

p.s: 1) 岩岩收到Macy既msn, 佢話岩岩行街見到d好得意既野, 買左俾我, 佢話呢件野除左得意之外, 個重點係"平", 所以就買左俾我啦!!! 多謝先, 太好, 新既一年咁快就知有份禮物收, 總算係好既開始!!!

2.) 又係岩岩, 阿媽打返黎話今晚會係阿姨屋企過夜, 聽日先返, 換言之, 今晚我一個人霸晒成間屋, wahahha!!!

家庭技工

左面係拆左出黎既抽氣扇屍骸, 右面係新買既抽氣扇

今日放假基本上都冇出街, 反而留左係屋企做下電工師傅, 其實屋企廁所個抽氣扇已經壞左一段時間, 但係前排唔係要趕project就係要perpare examination, 都冇咩時間理佢。 於是今日下午就把心一橫走左出旺角買左把新既抽氣扇返屋企, 之後就拆鬼左個舊o個個, 裝返個新既上去, 咁樣攪一攪都攪左我成個下午。

查實我發覺自己d技工手勢都幾好, 之前我試過係屋企換廁所水箱(真係拆左舊o個個, 換個新), 冷氣機滴水就攪掂, 真係得閒出去掛牌幫人維修電器做下freelance都好喎!!!

飢寒交迫

琴晚suki打電話搵我, 佢黎緊要交dissertation(佢唔係我學校), 但係岩岩斷大纜所以上網搵唔到journal & information, 所以想叫我幫佢係學校借書, 咁橫掂今晚會約左supervisor係學校傾dissertation d野, 所以就順便約埋佢今晚放工返學校等。

6:30p.m就同阿sir傾完, 今次meeting好順利, 同阿sir agree左個topic同方向, 一切就可以大大力進發。 之後打電話俾suki, 佢就話on the way黎緊, 差不多7:20p.m佢就到左學校, 我就俾左張student id card佢, 等佢自己入Lib慢慢搵, 我就係學校campus搵個地方坐住等佢, 原先諗住都係等一陣就攪得掂, 點知一等就係campus度等左3個鐘有多, 撞鬼, 今日自己only著左一件衛衣+條頸巾, campus大風不特止, 個人仲要鬼咁肚餓。 好彩佢曉打俾我, 唔係我差d以為佢係Lib入面暈低左。 最後幫佢借埋書成10:30p.m先走人。

Suki你同我聽住, 你好好地做好份dissertation, 唔好無辜負我今晚係出面食左3個鐘既西北風。

p.s: 今晚係等suki期間, 冇聊冇野做見到便利賣$5本, 就買黎消磨下d時間, 睇睇下見到有段小篇幅關於羽絨城, 望清楚內容, e, jessica妳上雜誌訪問呀!!好威呀!!! 駛唔駛我幫妳剪低佢呀!!wahahaha~~~

有家歸不得

今日放左工, 小安話請我食Tea, 有人請喎, 當然好啦!!! 今晚佢要上堂, 我又諗住返學校做下research, 咁就廢事拎住d架生通街走啦, 橫掂都係諗住係附近食完Tea先, 轉頭返office拎返就o.k啦!!

於是就走左去APM食野, 食完之後, 就諗住返上去office拎野走啦! 就係呢個時候就係地下大堂lift口撞到同事阿康, 佢話佢已經係last一個係office走既人, 其他人都走晒, 門都lock埋, 呀!!! 天呀!!! 我同小安d野仲係office入面架!! 家陣lock左門, 點拎返d野呀!! 我唔返學校做research有幾閒, 但係小安都要上堂架, 家陣d野拎唔到攪到佢都上唔到堂, 真係得個攪字, 平時office d人都冇咁早走, 今日就晨早流流走晒!!撞鬼!!! 最後, 都係冇辦法之下唯有各自歸家, 幸好既係大家都拎左d重要既物品係身姐!!! 唔係都唔知點算!! 真係對小安講句: "唔好意思", 話晒佢都係因為請我食Tea先攪到上唔到堂。

咁之後我就返學校啦!!!我返左學校既Computer Center上網搵下d information啦!!! 哎呀!! 點知原來台灣大地震, 令到D海底大纜斷鬼左, 攪到d network short晒!! 料又搵唔到, 車費又蝕埋, 返到去都係白行一趟~~

叮噹馬頭

今日聖誕正日Camus約左我地去參加睇佢係教堂既洗禮大典, 由於前個2日都玩到好夜, 訓得唔多, 都怕今日起唔到身, 已經一早教定個鬧鐘叫自己起身, Jaemi約我9:45a.m係九龍塘火車站等(因為Camus個教會係馬鞍山)自己已經將個鬧鐘就教8:30a.m起身, 點知自己最後都係要成9:00a.m先撐到起身, 快快手刷牙洗面換衫出門口, 本應應該可以好快可以出到去九龍塘, 點知一落樓就送車尾, 又要等下架巴士, 去到南昌站又好多人上車, 又拖一拖, 攪到我d時間遲晒, 最後都遲左15min先到九龍塘火車站。 一路坐車就一路俾Jaemi話我遲到, 就係呢個時候Jaemi就收到Thomas電話, 話Jessica今朝起唔到身應該黎唔到觀禮, hehe, 有人墊我底, 應該冇人記得我遲到啦掛。

咁去大學站就join埋Thomas一齊搭小巴過去教堂度, 點知去度教堂附近個時, 突然收到Jessica個電話話家陣飛的過黎, 嘩!!!! 原本佢既指標係低過我架麻, 家陣俾佢話飛的過黎, 一下子型晒!!! 俾佢攞晒彩添!!!

Andway, 今日係Camus & Melody係信仰上既一種肯定, 希望神對佢地有幸福, 愉快既祝福。

平安夜大食會

今日, 約左Lingling佢地上小狗新居玩大食會, 今次大食會, 一人要整一樣食物, 今次我勁啦, 我見上次食大閘蟹個時阿文整左個白汁煙肉天使麵好好食, 咁我就照上報同佢地講我整天使麵啦!!!

之後, 4:00p.m約左係北角MTR度等, 人齊之後, 就一齊去supermarket各自買今晚要煮野食既材料。 我就買左煙肉, 磨菇, 不過, 搵極都搵唔到天使麵, 就唯有用意粉頂住先啦!!!

今晚就勁羅, 我地由5:30p.m開始各人分批入廚房煮野食, 煮到成8:00p.m先有得食。 問題唔係廚房唔夠大, 只係小狗屋企d煮食爐具唔夠, 每次只可以俾1個人入去煮野食, 所以就唯有分批入去煮野食啦!!! 我個白汁煙肉意粉, 今次都係我第一次煮, 係上次見阿文好似好輕易咁整, 所以我先至choose呢樣野整, 第一次煮就真係第一次煮, 首先要整熟d意粉先, 點知落唔夠水, 所以底個d意粉燶左, 幸好面頭至中間個d意粉都仲食得都算係不幸之幸。 之後, 我就照阿文既方法去煮, 用左半磚牛油起鑊, 原來又真係幾好味, 不過, 我同Lingling佢地講我係用半磚牛油起鑊個時都嚇親佢地。

今晚我地有好多野食-日本壽司(百佳買), 白汁煙肉磨菇意粉, 炒烏冬, 瑞士香草雞翼, 咖哩魚旦, 香煎銀雪魚, 蒜蓉包 (用小焗爐即製架!!), 仲有小狗落重料親手煲既羅宋湯。食飽之後, 就玩左陣UNO, 之後又當然係抽禮物啦, 今次我抽左上面相見到左手面長條米奇老米既"咕ion", 今年都唔錯, 起碼都唔會抽到D唔等駛既野, wahahahah~~~

之後, 我地就再繼續玩UNO, 為左增加剌激度, 就決定每人拎$20出黎, winner就可以拎走個筆彩池, 唔係講笑, 當大家知道winner有錢贏之後, 就個個都認真係上黎, 咁又係, 個度大大話話都有$120, 唔算多, 不過, 有錢贏玩法就唔同左, hehe!!! 最後, 我地玩左兩round, total$240, 不過, 冇用呀, 我一舖都贏唔到, 真係失敗~~~我地都好難得玩到成2:00a.m先人, 因為平時小狗10:00p.m左右就叫眼訓, 咁難得佢陪我地玩, 仲要玩到咁夜, 真係開心!!!

雨過天晴

今日係考試大日子, 琴晚12:15a.m就攤左落床, 因為諗住今朝早d起身溫多round書, 等自己可以refresh一下個memory (個alarm都教左4:30a.m起身), 不過唔知係唔係呢幾日都係勁"對"咖啡or奶茶, 身體入面儲左一定數量既咖啡因, 係張床上面look黎look去(半粒鐘有多), 都仲未訓得普, 最後好似都係成1點幾先訓得普。 到左第2朝, 4:30a.m當然係起唔到身啦, 不過都5:30a.m起左身。

今日個份卷真係撞鬼, 自己tip個條題目居然冇出到, 好在自己平時吹水有功, 當然我答d野係有point架啦, 唔係亂咁寫架!!! 考完之後自己睇返d notes, 自己吹個d答案有9成同notes個d一樣, 真係都不得不讚下自己, wahhahah!!!

由於今晚同聽晚都約左fd出黎玩, 當中仲要係交換禮物, 之前因為要溫書, 所以就冇時間去買野, 於是一考完試就拿拿聲走人去尖咀shopping買禮物, 一次過要買幾份禮物, 原來都有少少頭痛。就由1:00p.m開始行到差不多5:00p.m先買得齊d禮物, 我好有heart架, 唔係隨便是但買份垃圾就算架。


今晚係入去阿達個fd屋企度BBQ, 佢個fd屋企係"三杯酒"係西貢個頭黎, 我地7:00p.m左右入到馬鞍山再join埋阿達佢地就一齊搭的士入去, 嘩, 佢個fd個度, 係原來係個d西班牙式屋, 成座都係佢地屋企, 仲要屋企前面仲有個大空地可以BBQ。

阿達好慘呀!!!

大家燒野食燒到十一點幾, 就到左最重要既環節, 就係聖誕禮物大抽獎, 今晚最慘既都莫過於阿達, 今晚佢抽到jessica份禮物, 而呢份禮物入面係total 50粒既珍寶珠, 50粒珍寶珠呢個都唔緊要, 但係個50粒都係係珍寶珠入面最唔好食既味道!!! 我就好d, 今晚抽到個份係一個Hello Meme既大碗一個, 都好, 用黎送俾大不良都不俗。 不過, 應該咁講, 起碼好過阿達達......hehe....

我地抽禮物燒完野食之後, 就入返屋打牌, 玩到2:00a.m左右, 由於Jessica仲有下一場要過海落蘭桂芳玩, 見佢要call的士出去, 就順道叫佢車埋我出去, 之後就係紅隧放低我, 就再搭巴士返屋企。

虛驚一場

上星期係屋企, 開電腦時突然間聽到部腦"do____do____do____do"聲, 畫面又冇野睇, 死啦!!! 唔通部機又死左, 諗住俾佢休息一晚唔開機(都開唔到, 休咩息!! 扮好人), 到第2晚再開機o個時個情況都係一樣冇變到, 都係"do____do____do____do"聲。 唔通上次整完之後, 咁快就玩完!!!

之後問過堅, 佢話可能係天氣變, 冷縮熱漲關係令到底板d硬件鬆左, 只要塞返實佢應該冇事。果然, 打開部腦, 係拆得開既野都塞下佢, 之後, 真係開得返部機, 自己嚇自己, 好彩冇咩樹姐。

偷懶的第2天

今日一朝早要起身(其實都已經係10:00a.m, 都唔係咩一朝早咁誇張), 今日最主要係去打工商盃, 其實之前係小狗結婚當日已經打左第一場, 不過o個日就要做姐妹就冇得去啦!!! 今日對個場係懲教, 唔係講笑, 人地個隊成班人都神高神大咁, 全部都係人柱黎架!!! 我地個邊唔係冇, 不過, 就冇咁多咁解羅。

唔駛講對住班人柱邊樹有得贏, 其實未打之前都預左會輸, 不過, 只望就望唔好俾人大炒啦!! 事實最終都係俾人炒左獲甘!!! 我都有貢獻架!! 1籃板, 1助攻, 1犯規, 都算係幾平均呀!!! wahahhaha!!!

偷懶的第1天

早在十二月頭個時, 朱朱已經問我16號得唔得閒, 佢話佢公司有 christmas party叫我一齊去(每位員工都可以帶多一位partner), 最大個賣點係唔駛錢, 順道睇下有冇靚女都好, 我就一口話去啦!!! 話說佢地公司年年都會有特定既dress code(即係d人要穿指定既服飾), 上年就係"紅男綠女", 而今年就係黑與白, 不過, 我地呢d guest就唔受呢d限制。

今晚, 佢公司就係尖沙咀中心既red stone包左場。夜晚6:30p.m約左朱朱係尖咀MTR度等, 之後就同埋佢d同事一齊行去目的地。 去到之後, 佢地真係好嚴謹架, 個個入去之前真係要除左件褸睇下符唔符合佢地dress code先可以入去, 原來最大原因係如果唔符合dress code就冇得參加抽獎, 而main point係個頭獎原來係$17,688~~既現金獎, 嘩!!! 唔怪得之要咁嚴謹啦!!! 成皮野喎!!!

坐底之後, 就先黎玩遊戲, 而我好好彩被抽中玩其中一個game, 就係玩"大兵步操"(聽佢地講, 係1516入面玩過既game黎), 不過, 呢d遊戲真係好少玩, 話咁快就俾人out左, 真係失禮。 之後就開始上antipasto, 包括有ceser salad, potato skin, pizza仲有雞, 款就多, 不過, 味道就一般, 而main course就有幾款撰, 有beef, salmon & turkey, 我就要左beef, 上碟個樣就幾好不過, 味道都係一般, 唔係好夠肉味, 不過, 我就最鍾意佢最後上既dessert, 又多款, 仲要幾好味, good!!!

食完都已經11點幾, 佢公司之後仲係Neway CEO包左間大房, 原本朱朱都有叫我去, 不過, 第2日介有野攪所以就冇去到, 如果唔係要考試, 或者第2日有野做, 都不知都幾想去!!!

p.s: 今日朱朱介紹我俾佢d同事個時, 有個就好快咁話:『 e, Gary係你細佬黎架!』, 跟住, 朱朱伸過頭過黎細細聲同我講左句:『喂!!!契弟!!!』『....................』, 我仲可以講d咩呀!!! 不過就係咁, wahhaha, 成晚我同朱朱就以姊弟相稱。

台灣手信

上星期, jessica係佢個blog度提到會去台灣旅行, 貪心如我知道之後, 當然叫佢買返盒綠豆糕返黎做手信啦!!! 佢返黎之後, 就打俾我, 話我要既綠豆糕已經買左返黎, wahahhahah!!! so great, 呢d咪朋友羅 !!!( 係呀, 我好膚淺架!!!) 不過, 佢黎緊星期五晚要Exam, 橫掂我都成日返學校溫書, 咁就叫佢考完打俾我, 之後再一齊去食個飯。

放工之後, 就返左學校溫左陣書, 之前jessica話9:30p.m先考完, 點知, 8:30p.m左右佢已經打電話俾我, 話佢已經走左, 於是就係Lib門口等, 我問佢因乜解究早成粒鐘就走人呢!! 佢話要答既野又答完, 新既point又諗唔到, 佢自己又眼訓費時磨爛席, 陣間一個唔覺意真係訓著左就失禮啦!!! 今日天氣大趺, 佢話不如打邊爐(任叫任食個隻), 佢就帶左我去尖東o個間"德興火鍋海鮮酒家", 佢話呢度係平價版既"泰豐廔", 呢度只需俾多$8就有得俾你"混醬"。 呢度雖然係任點任食, 不過, d配料都算係幾新鮮。唔錯, 下次可以再黎過~~~兩條友, 就係咁一路食一路傾計, 最後都食到成11:30p.m。


德興火鍋海鮮酒家

地址: 尖沙咀麼地道67號半島中心2字樓
電話: 2721-8102

入夜後醒神症

繼早前發現自己有"注意力失調症"之後, 我又發現原來自己仲其他病, 就係"入夜後醒神症", 話說上星期日, 一心諗住返學校圖書館溫書啦, 返到去就開始溫下書, 坐低冇耐睇左唔夠15min, 眼前d"雞腸"開始模糊不清(好明顯呢個時候身體話俾我知, 呢個係眼訓既跡象), 不過當時只不過係2:00p.m左右, 其實自己朝早已經係訓到成11:00a.m先起身, 斷估都唔會咁快又想訓覺掛。 於是, 當自己一想訓既時候, 自己就會好似一隻岩岩游完水上岸既狗咁, 起勢咁fing自己個頭, 等多d血可以谷上個腦度, 如是者, 成個晏朝斷斷續續出現d咁既情況, 係呢d情況下, 成個下午都好似冇咩溫過書入腦度(等閒冇事就fing頭梗係溫唔成書啦!!!)。

眼見窗外天色入黑, 突然間唔知邊樹黎既神力, 發覺自己既注意力一下子標升到一百倍以上, 一對眼突然間變得孔武有力, 金精火眼咁scan d notes, 個腦更如supercomputer咁運算, 如果你叫當時既我計算圈周對落個幾十個小數位, 我應該可以好快咁話俾你知。 就算d野不斷咁塞入腦都冇hang到機喎!!

唔知係唔係我生前係隻貓頭鷹呢, 天生係要夜間先可以靈活咁活動!!! 就咁對比日與夜既分別, 真係差天共地。

若要人似我, 除非兩個我

早陣子去遊覽人地d blog, 發現左有一個有趣web-site, 只要你upload你張相上去, 佢就會幫你睇下你個樣會同d咩人相似。 查實由細到大都冇咩人話我似咩明星, 不過, 就成日話我眼細, 耳仔細!!! 唔知點解所有單眼皮人仕, 如同患有唐氏綜合症人仕咁, 個個都係咁上下樣子, 例子如黃喜似中田英壽, 中田英壽又似Rain, 全部都係餅印咁~~~



岩岩玩完個呢個matching, 唔知我個樣係唔係唔似中國人呢, 試左幾張相, 冇一次係show個中國人, 唔好話中國, 連亞洲人都冇show過, 撞鬼!!! 我個樣似鬼佬咩!!! (岩岩終於有一張似亞洲人, 似咩邊個呀, 似王家衛喎!!! wahahhahaha~~~~)

就係呢個web-site: http://www.myheritage.com

陪考三寶

黎緊就快考試, 家陣開始返library perpare溫下書, 每次都會有呢三樣野同我一齊溫書:

唔好以為呢件係咩垃圾, 呢舊野就係每次Exam溫書都陪住我既文曲星字典, 我特登刷甩左佢個面頭上面大大隻"文曲星"三個字, 之後, 自己再搵張型爆貼紙幫佢裝身架(因為都幾年啦部機, 所以d貼紕都甩甩地)!!! 對於我呢類英語有限公司人仕, 冇部咁既野旁住真係唔係好掂。 平日基本上都係將佢放埋籠低、一二邊, 係到exam溫書呢個時候先會拎返出黎用。

記得中學聽過阿sir講過, 夜晚訓唔著, 最好拎本書出黎溫下, 唔駛十秒即訓。平日已經唔多溫書既我,(應該係接近"零"先岩!!!) 一時間要睇大量"雞腸", 閒日書都已經唔多睇, 一下子仲要睇咁多野, 望多兩眼真係好容易會瞌眼訓, 。 所以exam溫書期間, 我都好鍾意買呢包"味覺糖"放係身邊, 一來有d野咬下可以冇咁容易訓著, 二來呢隻糖係酸酸地可以醒下神。

通常溫書都係係Lib磨足成日, 點可以水都冇滴, 不過, 我多數鍾意買支烏龍茶黎飲, 不過我會買"津路"呢個牌子既烏龍茶, "道地"個隻d味好似濃得濟!!! 全日已經要好苦悶咁留係圖書館溫書架啦, 飲啖野都係要飲水, 淡"貿貿"咁, 真係成個人都好鬼乏味下, 飲烏龍茶又可以提神, 仲可以去油膩(佢個樽面係咁寫架!!!)

生活小節

"官逼民反", "官字兩個口"----撞鬼, 呢兩日, 成日接/打埋d咁既電話!!!! 逼你!! 我冇呀, 呢個係社會既錯, 我都唔想, 不過, 冇計!!!!

++++++

今日同Macy傾左一日msn, 真係咩都傾一大餐, 仲要係幾無聊個隻, 家陣傾完都唔記得左傾過d咩, 所以吹水都係要睇對手。 好耐好耐之前遇岩d冇貨交人仕出黎單對單食飯, 即使我呢d吹水王, 真係隨時都俾佢搓乾d腦汁。

++++++

今日放左工, 返左學校Lib搵下書, 事關黎緊就快考試, 係時間搵下d referance book, 因為單靠阿sir d notes根本冇咩可能答到兩個鐘既題目, 仲有, 最大問題就係阿sir冇放水, 家陣就要自己tip題目, 不過, 睇完d past-paper都係冇咩頭緒, 你知啦!! 呢科係Management, Management呢家野都係吹水題, 冇咩特定答案, 你講得通就得, 你話有2日時間俾你做就話可以慢慢諗d point姐, 家陣得個兩個鐘, 諗完野仲要寫, 得個攪字。

9:40p.m左右仲係Lib好苦惱睇緊書個時, 收到堅兄電話, 佢話佢同牛牛係印尼餐廳食飯, 問我過唔過去join佢地, 之後, 牛牛一手搶左個電話話:『我估你應該會係Poly溫書, 所以特登打俾你架!!!』(哈, 哈, 呢d咪係朋友羅, i like it!!!!), 其實晚飯我就一早食左, 不過, 一來自己都冇咩mood係Lib磨爛席, 二來又好似好耐冇見佢地(原來唔想讀書o個時要搵籍口係咁易, wahahhhah), 就拿拿聲執野閃人, 去到佢兩條友都食緊野, 我去到都食左少少野, 之後就開始我地吹水時間。 係生活緊迫當中搵下朋友傾下計, 尤其是講下是非, 都幾爽, haha!!!!

Mix & Match

早排為左小狗結婚事宜, 自己買左套千幾銀既新老西, 新衫就當然係留返正日先著, 但未著新老西之前已經在此部落格事先張揚此事, 點知公司冷笑王早在成個星期前就幫我黎個matching大配對, (就係上面個幅套), 佢將我個頭+我套老西+隔離男model既手&腳, 合成出黎, wahahhaha!!!

此子無聊作可謂一羅羅!! 之前曾在此地post過的冷笑話就是此子之傑作, 雖則無聊, 但亦為沉悶既office帶來一些衝擊, 起碼各同事們唔駛終日都埋頭苦腦係堆file中工作, 有一個休息透氣空間, 甚至乎有時更為大家帶來一陣子的騒動, 起哄!!!

講開呢套老西, 我琴晚發夢夢見新娘子小狗, 小狗佢話見我咁有心買左套千幾銀既老西參加佢既婚姻, 佢好感動, 所以就塞左封利是俾我, 我就拆開黎睇啦, 嘩!!! 入面有成$2,200(我到家陣都好記得, 真係四張$500+2張$100, 我係夢入面真係當街當巷拆封利是數錢), 不過, 唔知點解, 利是入面d $500紙係綠色既, 冇理由架, d銀紙上面明明寫住係$500, 之後, 我就笑住口咁醒左, 仲有, 成個夢既情節到今朝甚至乎到家陣都仲記得好清楚。

張蔡聯婚

星期日係小狗大婚日子, 晨早流流就要成6:00a.m就起身, 真係除左自己去旅行之外, 真係冇咩機會咁鬼早起身。 一起身就去沖個靚涼, 不過, 6點幾就去沖涼都幾凍下, 之後就梳洗下, 再著返套千幾銀既老西出黎, 6:45a.m左右就出門口。


(左)伴娘小貞貞化妝中, (右)得camus弟兄出手幫助既易拉架"愛的宣言"

之前一早就約左班姐妹係小狗屋企樓下一齊食早餐, 之後先一齊上去, 由屋企去北角都要成粒鐘時間, 差不多7:45a.m先到餐廳, Jackie, Ling & 奶都已經差不多食完, 所以我都拿拿臨食埋就閃人。 上到小狗屋企, 已經一早打開左門, 睇一睇個schedule原來小狗6:30a.m已經要開始化妝, 家陣都已經8:00a.m都見佢好似仲係化緊妝, set緊頭, 幸好, 小狗一早估到有此一著, 所以就搵定多一個化妝師幫班姐妹上妝(我當然唔駛啦!!!) , 其他姐妹排隊等上妝其間, 我呢d冇所事事既人就唯有走去perpare下陣間玩新郎哥d道具先, 再唔係就走去四圍影下相(花絮)!!! haha!!!


(左)呢位就係靚靚新娘子, (右) 兄弟笠絲襪...

之後, 新郎哥同兄弟們9:30a.m已經到左小狗樓下, 但係姐妹們都未化好妝, 所以就要佢地等一等!!! 差不多10:00a.m一切都準備好之後就call班兄弟上黎, 開始都係離不開要玩下新郎哥啦!!! 哈, 哈, 第一個game係要佢地班兄弟笠絲襪, 笠完之後, 佢地個樣真係好好笑。 玩完game就開始奉茶, 小狗屋企都唔算係大家族都算係好快手就攪掂晒, 之後就要過去男家度, 我同班姐妹&兄弟們一齊搭架40座巴士過男家(架40座主要for陣間下午去香港公園影相, 送男女家d親友去), 男家Micheal兄就勁羅, 超級大家族, 奉茶極都仲有親戚要俾, 不過多親戚就有個好處就係多d禮收, haha, 我見小狗奉完茶之後, 成條手臂都係d金飾, 唔講真係好似"功夫"入面個位耍鐵線拳個位師傅咁!!!


(左) d親戚幫新娘子練鐵線拳, (右)奉完茶就拿拿臨除返d金飾落黎

Lunch就去左酒樓食飯, 之後就去左香港公園影相, 嘩o個日好鬼多人, 除左結婚人士去影相之外, 仲有好多畢業生係度取景影相, 正所謂, 呢d大家族合照, 都唔到我地呢d兄弟姐妹份, 咁我就同Jackie, Lingling佢地四圍自己影相自娛一番, haha!!!


時間話咁快就到左5:00p.m就要去酒樓, 我地就要perpare下d野, 因為今晚我係MC之一, 所以就要同另一個partner夾一夾稿, 睇下要順住個rundown去!!! 當晚, 小狗大大話話都換左3套晚裝, 1件婚紗(因為當晚係請左律師到場做註冊), 真係好鬼成靚, Jackie佢地成日影相個時都有得攬住小狗條小蠻腰真係羨慕死。

之後, 散完席都11:30p.m左右, 等埋小狗送埋客, 睇下有咩幫到手, 之後, 就各自歸家, 返到屋企都就快成點鐘!!! 就係咁就攪左成日!!!

係呢度, 祝小狗 & 米糕, 百年好合, 永結同心, 當然最重要就係快快手生返個俾我地玩下!!!

師姐, 師姐

話說今日放工之後, 見又未夠鐘上堂, 又拉左小安陪我消磨下d時間, 於是就走左去食tea, 食tea就不外乎傾下計(不過, 好似我講野多d), 其實不嬲都知佢係我polyu既師姐, 不過今日再傾下傾下個時, 原來佢同時都係我既IVE(前身係叫T.I)既師姐, 其實呢個都唔出奇, 話晒有building呢科讀既地方, 黎黎去去唔係IVE, 就係POLYU, CITYU or HKU, 撞口撞面唔係師兄師姐就係師弟師妹, 不過, 原來我地仲有一個最特別既共同點就係係T.I時代, 我係有參與Student Union(SU), 原來佢都有參加過, 不特止, 我當時既post係IVP(Internal Vice President), 原來佢都係同我一樣係同一個post, 真係有緣, 估唔到佢原來都有上莊之餘, 仲要係同我同一post。 哈! 哈! 真係不得不叫多幾聲師姐, 不過, 佢話廢事暴露自己年齡問題, 死都唔講自己係等幾代師姐, 不過, 以我小時候睇咁多金田一漫畫, 數字推理簡直係我強項, hehe, 其實都估到&略知一二。

今晚係今個sem既l最後一堂, 通常先前其他科d阿sir都會放下料(Exam)俾我地, 因為佢地都知道我地d part-time同學仔比較辛苦, 所以都會幫幫手, 點知佢今晚所謂既revision真係同我地復習一次就算, 唉!!!今趟都係食自己。 之後, tutorial差仔又黎, 今堂係最後一堂, 佢就公佈先前做既presentation既分, 今次我地第一次既present有"A", 掂晒!!! 又過一關!!!由於第3 & 4team今日先交report, 所以第二份present既分, 今日就冇公報到。

P.S: 小安, 唔好唔開心呀!!! 唔開心就搵d 朋友傾下計, 唔好屈住屈住。聽話就請你食糖呀!!!

愛的宣言

為左有得分姐妹團入面既開門利是, 點都要做返少少野先得既, 家陣開始明白點解姐妹要有開門利是, 原因好簡單因為要準備玩新郎哥d準備, 事前功夫都幾煩, 又要玩得唔太過份, 又要有d攪笑成份, 仲要玩個game有d meaning, 家陣連"愛的宣言"都要我攪埋, 真係撞鬼!!!

原先, 只係諗住用返小學生d最傳統方法(剪剪貼貼)整個board出黎, 點知我地個美指lingling 用word desgin完出黎之後, 完全冇美感可言, 只可以係話完全似係小學生勞作是也, 慘不忍睹!!! 情非得而, 立即msn搵Camus弟兄出山相助, 難得Camus弟兄係百忙中抽空幫助, 實在感激不盡(右圖就是Camus之大作!!!), 講明, 入面個兩段野, 係本人嘔心瀝血之作....不過, 都唔明, 又唔係我結婚, 點解要我作埋d咁既野, 呢d工作理應由新郎哥做。

另外, 之前曾經睇過一個e-mail send出黎話, 萬樂珠加可樂會勁爆d氣出黎, 原先想將呢個行徑放入玩新郎既環節度, 就係叫新郎哥含住粒萬樂珠再飲可樂, 再唱情歌, 照理應該爆到成口泡先岩, 理論就係咁姐, 實際係唔係咁呢, 冇人知, 所以本人琴晚就特登買左排萬樂珠 & 可樂返屋企做實驗, 事實証明, 如果一個人食住萬樂珠, 再去飲可樂係唔會有事, 因為我琴晚已經試左。我死心不息, 諗住係唔係d份量唔夠呢, 於是, 一口氣"拍"左六粒萬樂珠入口, 再飲可樂, 事實再一次証明........係冇事既, 岩岩上youtube search, 原來呢個世界上無聊人唔止我一個.....

Lonely Planet

如果係backpack人士對這個名字應該絕不陌生, 話說前日去拎牛王o個時, 見有時間就貢左去書局睇下書啦, 行下望下, 突然俾我見到Lonely Planet出左中文版, 立即走去望兩眼, 發覺入面d內容同英文版一樣都係密麻麻咁, 雖然係中文版, 不過就係簡體字。

家陣Lonely Planet暫時只係推出左《澳大利亞》, 《德國》同埋《歐洲》。 睇左一陣之後, 就反轉睇下幾錢啦, 嘩!!! $100唔駛就買到, 平成英文version三分一有多(因為平時英文version既Lonely Planet售價around$270-$300左右) , 超抵.....

返到office就上網search下相關資料啦, 原來8月o個時已經出版左, 只不過, 當時只係係中國國內北京、上海、廣東等地方出售, 而又有太多人賣所以, 當時未可以運到黎香港賣。 依家, 香港既書局已經有得賣, 如果有興趣, 而又就快會去以上個三個國家既朋友, 可以買本返屋企睇下, 橫掂都係$90左右之麻!!!

相關新聞: 都市話題﹕Lonely Planet中文版售價低英文版逾半

Lonely Planet offical web-site:
http://www.lonelyplanet.com/

Lonely Planet offical chinese web-site: http://www.lonelyplanet.com.cn/

牛王

話說自己條老牛都已經去到溶溶爛爛既地步, 爛其實都唔係一個咩問題, 仲衰就係爛係d敏感位置(褲襠位是也), 爛係呢d位都唔緊要, 大不了叫老媽補一補照著是也, 但係我家老牛, 尤如一塊裂左既玻璃一樣, 裂左補返之後, 其他地方又會相繼出現裂紋, 撞鬼!!! 成日坐底都唔敢開張大脾坐, 走光是少, 影響形象是大!!!

上星期出完site見冇野做, 小安又好似冇野攪, 於是硬拉埋佢陪我走去Levi's買條新老牛, 我同佢係個衣架上面睇下呢條, 望下o個條, 睇左十幾條, 發現條條老牛好似都係咁上下, 冇咩分別, 又再望真d個價錢牌, 有d就成千銀既老牛同d幾舊水既老牛既款式其實分別唔大, 甚至乎千幾銀個d老牛仲要好似好有型咁幫你整爛dd, 整幾個窿窿出黎, 嘩..呢d褲拎返屋企, 話俾老媽知實俾佢鵝死, 千幾銀買條爛褲返黎, 想死呀, 就算係都唔緊要, 最怕買左返去, 老媽一個唔為意, 同我補返晒d窿窿就死得啦!!!

基於以上原因, 試褲個時都係搵d冇窿窿既老牛試, 試左2,3條就攪掂左, 不過, 又要改褲兼叫佢tranfer返公司附近間Levi's shop拎, 終於攪到今日先有得攞, 等左咁耐終於有得拎, 太好啦有新褲著。 黎緊聖誕有新褲著......good晒!!!! 今個月好似駛左好多錢~~~

收帖

琴日係小貞貞既生日, 正日當然就唔輪到我地同佢慶祝啦, 所以就留到今日先幫佢慶生。 下星期日就係小狗既結婚大日子, 上次提過我件$1,900~既老西, 今日隨道出去拎埋, 今次就冇上次咁壯觀有四位女仕陪伴在則, 今日得Jackie一位女仕旁住, 不過, 今次都係拎衫都唔駛咁大陣仗成幫人去, 所以都冇所謂啦!!!

今日約左Jackie 4:00p.m係TST MTR等, 撞鬼佢又遲到, 等到4:25p.m先到, 之後就去返playload拎衫, 順便再試下岩唔岩, 試過之後當然good fit啦!!! 由於佢地話要我襯返佢地, 所以入面個件要著粉紅色恤衫(因為佢地d姐妹衫都係粉色系列), 所以我就去左G2000買埋件恤衫, 係啦, 點解我唔係Playload買埋呢??? 因為playload一件恤衫都要成3舊水, 我家陣去G2000都只不過係佢既一半價錢就買到, 而且Jackie又有G2000 VIP, 所以就係G2000攪掂佢。

呢張就係小狗張請帖~~~(佢話佢手中文字差, 所以張帖寫英文)

之後, 今晚約左小貞貞佢地入九龍城食日本放題, 呢間餐廳裝修就唔係好得架啦, 不過, 佢d放題又o.k喎, 尤其是佢d魚生剌生真係野野都厚切, 我諗我地6個人都起碼食2隻既剌生船既份量既魚生, 我諗我地食魚生已經食飽左一大半, 去到最後我再點d爐端燒既墨魚丸, 我係點菜紙度寫左個3字, 開頭以為佢會俾3粒我啦, 點知原來個unit係"串", 唔係"粒", 仲要一串要成3粒咁多(之先都有點過, 不過就冇為意), 3X3等個9, 死!!! 我除左叫左呢一款墨魚丸爐端燒之外, 好似另外仲點多左兩, 三樣野(都係爐端燒), 而每一樣我都係點左3 or5左右, x街, 陣間咪有好多野食黎, 當時查實我地已經食飽晒(因為d魚生真係勁厚), 我地6個人, 除左我係男仔之外, 其他都係女仔, 最後, 我地都清左一大半, 都不得不贊大家厲害。

食完之後, 就一大伙人走左去九龍城廣場買玩新郎既道具, 攪掂之後, 大家就散水。

行行重行行

今朝起身, 一望出房門就見到有隻野飛奔閃過, 哈, 原來小不良已經唔駛再四腳爬爬, 曉得用兩隻腳自己四圍走, 聽老媽講原來小不良係岩岩今個星期初先學識雙腳行路, 不過, 可能呢排我都留係office or返左學校, 太夜返屋企, 返黎個時佢地都訓晒覺, 所以先唔知姐。

今日, 見小不良行路個時, 左搖右擺成個醉酒佬咁, 行個時兩隻手仔又要撐開, 我諗佢主要係想好似行平衡木咁balance返自己。起身打開房門之後, 佢話咁快就入左黎我間房度, 攪左兩攪見冇野玩, 佢自己就走返出個廳度~~~

月事

正所謂月事就係個個月都會黎一次, 風雨不改, 黎反而冇事, 唔黎先有d擔心, 今個月我遲左, 仲要遲左四日, 正所謂有d野唔解決, 個心始終都係唔係咁安樂。 講既當然係去剪頭髮啦!!! 頭髮呢家野一個月恤一次乃正常不過既事, 因為d頭髮生長到咁上下長度, 如果要gel頭的話乃係一件十分困難既事, 因為分分鐘你會gel到一舊屎or成個雀巢築左係個頭上面都唔定, 如果係咁出街成日, 成個人都會周身唔自在, 硬係會凝住成條街d人會用d奇特既眼光望住你----個頭, 所以平時都keep住一個月去一次salon修一修個頭。

早兩晚困左係office做完份垃圾dissertation proposal, 因為阿sir話呢份野唔係咁重要, 只不過要交俾department睇, 所以就是但執d野俾佢就算, 不過, 都攪左兩, 三晚。 用腦過度後果就係頭痛, 所以決定今晚放一晚假黎個"腦輕鬆", 加上下星期日小狗結婚, 都係要執得靚仔少少(因為佢話係擺酒當晚, 佢會分派我同佢d女同事同一抬食飯, hehe), 基於以上理由, 今晚節目就係去恤個靚髮, 臨放工前同macy傾開msn, 佢話好耐冇打過機, 而佢又得知我去剪髮, 就問我有冇興趣剪完頭再去打機, 橫掂今晚都預左係"腦輕鬆", 就陪佢玩下。

7:30p.m剪完頭, 我地就去左食雲南米線, 由於是夜主打題目係"打機", 所以都係快快手食完就閃, 對上個次同佢打機已經係成個月前既事, 今次同佢再打Time Crisis 4又再進步左, 我真係好少見女仔曉打機之餘又勁(阿牛打winning都有一手, haha!!!), 佢打呢隻槍game係可以唔駛continue既情況下打到Stage 2既尾段(成隻game得3個Stage)。

打到9:45p.m左右, 因為佢要趕住返屋企(因為有人幫佢整電腦)就一齊搭702走人, 今晚兩條友用左$$17打左個零鐘, 仲抵過去漫畫cafe睇書!!!(d漫畫cafe通常都係$9/hr)~~~

嫌錢鯹

琴日, 放左工, 同小安走左去office附近一間日本料理度食Tea, 我就因為轉頭會返office做功課, 所以就唔食咁飽, 費時陣間飽得濟訓左覺, 所以我就叫左個餃子蟹子沙律, 小安見我咁細食, 所以佢都係叫個雞翼蟹子沙律食就算(查實佢轉頭就返屋企食晚飯, 費時食咁飽就真!!!)

食飽走人就自然要埋單架啦, 我地一個Tea$20連埋加一就$22, 兩個即係$44啦!!! 我就俾左張一百紙埋單啦, 個侍應就好快咁找返錢俾我, 最後我拎淨個$1係個盤上面(當時, 個盤上面得返個$5 & $1), 諗住當俾貼士啦 ! 點知位侍應居然將個$1塞入我隻手度, 之後, 就講左一句:『 我地已經加左一, 唔駛俾貼士~~~~』, 當時, 我同小安個表情都"O"晒咀!!! 究竟佢係不屑我個$1, 定係真係咁好服務呢!!!

人間交差點

上星期, 牛牛突然打俾我話要問我一個心理測驗, 仲話呢個心理測驗係佢同堅一齊"發明"出黎, 但係當時我打緊籃球話唔得閒, 佢就話等佢放左學就再打俾我。 返到屋企沖克涼之後, 牛牛真係再打俾我, 死都要問我個心理測驗!!! 好! 我就將個心理測驗同大家玩下~~~


Step 1: 首先你要先諗一位你心目中你認為重要既人!!! (該人仕不得是血緣關係者such as: 爸爸, 媽媽~~)

Step 2: 你同你o個位重要人去左一間餐廳度食飯, 而你地坐既位置係相當接近門口既位置, 而你地食飽飽之後, 就諗住食霸王餐, 於是一食飽, 你地就一個箭步就"標"左出門口, 突然間你個另一半趺低左。

問題黎啦!!!呢個時候>>>你會.....
1.) 返轉頭扶佢起身!! 但係記住, 你一返去扶佢, 你就一定會俾人捉住!!!
2.) 繼續咁走, 唔理佢!!!

好啦!!!黎到呢度, 等我講下牛牛點解會冇啦啦"發明"到呢個心理測驗呢!!! 話說, 有日佢同堅去左一間餐廳食飯, 食完之後, 佢地出去櫃抬埋單時, 居然冇人理佢地, 堅就同牛牛講, 查實我地家陣走左都冇人理個喎(當然, 佢地最後都有俾錢啦!!!), 出左餐廳門口之後, 堅就唔小心趺左一趺, 之後, 堅就問左頭上面個實況問題俾牛牛, 點知牛牛第一時間答佢:『我當然係走啦!!!! 走得一個得一個呀麻!!!!』<-----佢兩條友都幾無聊下, 哈, 哈~~~ 就係咁牛牛就四圍去問人呢個"實況問題", 而當晚我同佢都就呢個問題都討論左一陣子(我地仲無聊~~~), 仲要將"另一半"換轉左另一個既話, 又會出現咩情況呢!!! 最後發現, 當你換不同既人落左個"另一半"度既時候, 係會出現唔同既情況, 應該話你就算返去扶佢的話, 你都會有不同既原因。 好!!! 講到呢度為止, 無聊完畢!!!!

Macy send左個真既心理測驗web-site俾我, 都o.k既, 大家又不妨玩下:
http://www.whobirdyou.com/whobirdyou/thought.asp

注意力失調症

我開始懷疑自己有注意力失調症, 成日做做下一樣野就走左去做其他野, 永遠唔會做晒一樣野先做另一樣野, 開左十幾樣火頭, 但係就冇一樣野係完成到, 你睇我家陣明明係學校做緊功課嫁麻, 又會冇啦啦上黎打blog都有既, 我係唔係有病呢!!!

(打完呢篇野, 繼續做功課!!! wahahhahaha~~~~)

送舊迎新

其實之前自己著開個對籃球鞋, 已經爛左一段時間, 在此其間, 如果同人打波的話, 都係著住一對閒時用黎行山or跑步既New Balance出去, 撞鬼!! 明明係係跑步用既鞋, 就走去用黎打籃球, 呢d就叫錯配羅!!!

所以就的起心肝, 要換對新鞋, 同事Simon之前都好鍾意上去外國d web-site訂波鞋, 因為就算連埋船費, 其實都係平過係香港波鞋街買一對, 不過, 唯一既缺點就係要等(我呢對鞋都等左3個星期), 同埋有時就算你睇中你鍾意既款但有機會冇你既size~~我就自己上網睇下有邊對岩啦, 之後就麻煩Simon兄幫我訂, 上星期就送到香港(佢幫我拎左先), 今日放工之後就去接佢放工順道拎對新鞋~~

岩岩上左HK Nike個web-site check到自己對鞋係香港買, 要成$879-, 家陣我只需$432-就買到, 平成半呀....whahahaha, 好抵呀!!!

p.s: 1.) 如果大家都想訂d平波鞋可以去www.eastbay.com, 之後再click入Outlet個icon, 再click你要d咩(such as: men or women...)
2.) 在此再一次唔該晒Simon幫我訂呢對咁靚既波鞋!!!

姐妹日

今日, 約左姐妹團一齊開會, 當然係商討一下小狗結婚當日朝早玩新朗哥既遊戲啦, 其二就係叫佢地順便陪我去買返套老西, 話晒身邊第一個好朋友結婚喎, 都應該出少少力買返套靚仔少少既西裝見下人。

今日下午約左2:00p.m係尖咀既Italian Tomato度等, 2:00p.m準時到達, 見其他人未到就先上去坐底先順便搵定位, 坐底冇耐, 電話就不斷咁響, 先黎個Lingling, 佢話旺角有波鞋開倉想出去望一望, 遲少少到; 之後, 就到Jackie, 佢就話岩岩先上巴士, 係公司黎緊(佢office係官塘)好快就到, 如果唔塞車既話; 仲有小貞貞佢就同佢個肥佬食埋lunch先出黎; 最後, 奶奶佢就一早放左工, 不過, 我頭先miss左佢call, 佢就自己係尖咀行緊街, 轉頭就到。 撞鬼, 我準時到o個時, 佢班友仔就齊齊遲到, 早知頭先唔駛趕住出門口啦!!! 哎呀, 平時我遲少少o個時, 佢地就起勢咁打爆我電話為止~~~家陣就.....

3:00p.m左右, 大家都終於到齊, 由於大家都未食Lunch, 所以就一路食住野一路傾, 由於今晚小狗(準新娘)約左姐妹團同埋班兄弟食多次飯, 主要都係再講多次結婚當日既rundown, 所以我地傾到5:00p.m左右就到Ocean Centre買西裝去, 佢地話playload d款好睇d young d, 仲有家陣45%off, 所以就去左呢間度買。

我今次買呢套野都係為左襯佢呢班姐妹, 所以我都冇咩點出過意見就由得佢地幫我配, 仲有, 1個男人有四位女仕伴住去買衫都幾威下, 哈, 哈!!! 係咁e, 試穿左兩, 三件西裝褸之後, 就入去dressing room 換套full dressing出黎俾佢地睇下, 其實都已經選定左邊套, 不過, 係著埋出黎俾佢地過下目姐。 到俾錢個時, 原來件西裝褸+西褲折左都要成$1, 900-(因為開頭都係預左$1,500-1,600左右), 聽到個時真係眼都凸埋, 當然啦, 話就話眼都凸姐, 我當時個樣依然keep住冇咩野既表情, 仲要好自然咁拎張Visa出黎, 唔係出醜人前就唔係幾好啦! 不過當時個心真係"拿"住"拿"住痛, 但係其實用完今次, 之後自己都仲用得著, 都o.k既(係要咁樣搵個藉口安慰下自己先得!!!)

之後, 我地5條友屎忽痕話搭渡海小輪過海(今晚食飯地點係北角), 岩岩Jackie男友打電話黎, 就順便問下佢如果我地搭完船再轉的士去北角會唔會塞車, 佢就一句塞埋黎就話:『你班友係尖咀, 做咩唔直接搭地鐵!!!』, 我地冇理到呢d世俗人既眼光, 於是照繼續行去搭小輪過中環個新碼頭, wahahhaha~~~

今晚, 小狗係酒樓book左一圍抬食飯, 連埋兄弟+姐妹都有10幾人, 其實話就話想大家食多次飯等d兄弟同班姐妹聯絡下d感情, 不過, 成晚同佢地真係冇咩交流, 應該話都唔係特別想同佢地有d咩交流先真, haha~~~食完埋單, 兄弟有下場走先, 我地到出左酒樓之後, 阿ling同我講左一句:『唔知點解, 班兄弟d樣到依家都仲係唔係好接受到!!!』哈...好彩我地都係忍一日姐!!!

P.S: 今日同姐妹傾緊遊戲途中, 收到Carrie電話, 問我係唔係poly, 佢話有睇開我個blog, 知我呢排都會返poly做功課, 而佢咁岩又返開去同人影畢業相所以就順道call我!! 哈, 多謝Carrie, 原來妳都有黎呢度睇, 得閒就留個字呀!!!

下年到我(如果一切順利的話)

呢班就係我D同事~~~wahahhahaha, 咁樣影畢業相, 型爆~~~

岩岩星期日, 舊section同事Anthory約左成班同事一齊返polyu影畢業相, 其實, 應該咁講, 佢係我既是同事亦是師兄, 因為佢同我都係讀同一科(Building Surveying), 不過, 佢就早我一年讀。

Anthory約左12:30p.m係圖書館門口等, 今日遲左起身, 於是急急腳出門口, 返到去都已經12:50p.m, 以為自己係最遲一個啦, 點知, 原來大把人未到, 我已經算係最早o個幾個, 早知唔駛咁急趕返去啦!!!

影畢業相都不外乎四周圍影下行下企下笑下, 由於全城polyu畢業生都係呢段時間返campus影下相, 所以都有不少女生(include畢業生, 佢既朋友, 親戚....)打扮得靚靚咁同人影相, 就係正正因為咁, 今次我地成班友仔返到polyu既主要目的好似昅女多過似同Anthory影畢業相多, 我地成日都拎左Anthory部相機四圍去影其他女仔既相, 我諗相機入面起碼有成1/4係女仔相, haha, 成班都係變態佬咁!! 應該話佢地簡直已經係將Polyu變左做金魚缸一般看待~~~

影完之後, Anthory係Polyu 酒樓book左抬飲杯茶食個包, 大家食飽飽之後就散水。 其他人就散水, 可憐既我同阿倫要留係學校既CC(Computer Center)繼續我地份persent, 唔係講笑, 一攪就由下午3:30p.m攪到夜晚12:15a.m先走人, 阿倫仲要攪到成點幾先返屋企添。 不過, 今次persent阿倫個case studies係今次persent孭重飛, 雖然得2日時間都俾佢攪得掂, 勁呀!!!