肉搏在深圳

早在世界杯進行時已與Denise相約琴日返深圳揼骨玩返日, 而且更為我地日後一齊去旅行作一個好既開始(如果他日去得成的話~~)。

雖然天氣唔多好, 仲成日都落住雨但係依然無損我地上大陸揼骨既興致, 我地一行5人有我, Denise, Ernest, 小菲 & 小菲男友, 就約左12:30p.m係大圍火車站車頭集合。 大家都好準時到達, 於是就開始我地既行程, 聽領導Denise講我地會先係羅湖火車站隔離d酒樓食左lunch先, 之後, 就會去骨場, 係骨場攪得黎都5, 6點, 再去書城, 之後就去打邊爐, 成日行程就係咁。

起身o個時原本想整返個公仔麵食下但係醒起陣間會係上面食lunch, 所以就打消左個念頭。 到出門口個時都係有少少餓, 終於都係頂唔順走左去7仔, 買左個$7/12粒既魚肉燒賣頂住肚先, 唔係容乜易陣間係搭搭下火車中途仲未去到深圳就餓暈的話, 要原車折返就真係瘀皮。

今次, 係我拎左智能身分證之後第一次返大陸, 意下之言就係可以有得玩"e道"啦!!! 嘩哈哈, 真係幾方便個喎, 就咁隊張身分證入部機度, 等多陣, 再印一印你個手指模就攪掂, 方便快捷。 不過, 係我等"入閘"個時, 見前面個條友仔, 印左幾次指模都唔得, 阻住晒, 我心諗呢部機遲d會唔會發展到, 印左3次之後都唔得的話, 就會將o個個人困住係入邊, 之後, 有幾個火搶伸出黎, 將佢燒死, 咁咪可以唔駛阻左後面d人羅。



攪掂香港呢邊, 就過深圳個邊, 原來深圳都有"e道", 不過, 就要第一之的話就要填張好簡單既form係過關個時申請埋就o.k, 我同Ernset之前都未申請過, 所以我同佢就排左去另一邊, Denise佢地就排第二邊, 佢地個邊當然係會快d啦, 所以Eenest就叫佢地去酒樓搵位先。 終於都攪掂, 原本都係俾左張form, 佢就會同你映張相, 印一印手指模就攪掂。 我同Ernest就上去酒樓搵佢地啦!!! 係大陸食野真係都幾平下, 叫左十幾籠點心, 最後埋單都係位位$20。 不過, 唯一唔多好的地方就係叫左個粥&腸粉都唔多熱, 極其量都係叫微暖。

食飽飽就開始左我歷時3個鐘既地獄之旅, 何解咁講一直睇落去你就知!!! 原來, 依家d"骨場"都會有免費專車係羅湖火車站旁接載客人到骨場門口, 由於有去揼骨, 真係唔多知原來家陣有d咁既"service"真係大鄉里。 去到骨場就先更衣, 就到左個大廳, 係個度就先做個腳部按摩先, 經理就會搵左個男的給我們男生, 女生當然搵返d女按摩師俾佢地啦!!!

我o個位師傅睇落都好大隻下, 唔知佢係唔係唔抵得我有對小粗腿, 佢用盡九牛二虎之力起勢咁"慄"我個小腿, 我為左面子關係當然係死忍啦冇叫到"痛"啦, 好辛苦終於捱左1個鐘既腳部按摩。

做完"腳"之後, 於是就去左另一間5人房, 今次我地做全身, 諗住頭先辛苦完依家可以舒服d啦, 同頭先一樣男的就搵返男師傅, 女的就搵女師傅, 我就好唔好彩, 有個比頭先個男師傅仲要大隻既男人入左黎, 第一句就問:『仲有邊個未有師傅?』 Ernest就指指我, 佢就行左埋黎, 咁冇計啦, 人地都入左黎冇理由叫人走架, 咁就由佢啦!! 佢就開始幫我按上半身的左邊, 唔知係唔係佢呢排冇咩生意, 佢好鬼好力水, 野野都好似想"練"爆我d肉為止, 係成個按摩既過程入面, 我講得最多既就係同師傅講:『輕一點~~(國語)』, 唔知係我國語差佢聽唔明, 佢都冇咩減過d力水, 按完岩岩個半邊之後, 我諗我死硬, 因為全身定義係上下半身, 家陣先按完個1/4, 即係仲有3/4仲未按, 今次按完我唔知返唔返到落香港。 都係個句:『輕一點~~(國語)』....我依然同師傅講左無數次。 同最後我終於捱完呢兩個鐘, 原本, 我就真係唔多想俾貼士, 不過, 佢家陣"練"到我散晒, 根本就冇反抗能力, 有咩事佢郁我的話, 我就死緊, 所以都係俾左貼士過佢。

其實, 呢個師傅就係岩岩幫Ernest按腳的師傅, 岩岩幫人按完一鐘腳, 佢仲咁有力按第二個既, 我真係懷疑佢平時唔飲水, 淨係飲"紅牛"(乃補充體力飲品)。

辛苦完兩個鐘. 我真係發覺, 我有少少散散地既感覺。 之後, 我地就去左一間叫"肥羊王"的餐廳打邊爐, 其實上面有"小肥羊", 不過, Ernest話"肥羊王"同"小肥羊"都差不多, 但價錢就平d, 於是就去左呢間啦。我地叫左十幾碟左右的打邊爐配料, 最後埋單都係位位$60左右, 又係抵喎!!!

食飽9:15p.m左右, 書城應該已關門, 所以今次就唔去啦, 但時間尚早就係附近行左一陣街, 最後, 行到10:00p.m左右, 我地就搭深圳既地鐵返去羅湖火車站個邊。 講開呢個地鐵站, 原來都開左1至2年, 我呢d大鄉里真係第一次搭, 見佢個車廂都幾乾淨, 幾好幾方便唔駛下下都搭個d公車出出入入。



P.S: 唔係講笑, 俾師傅"練"完, 到家陣個膊頭仲痛緊~~~~

兩本新書

琴日放工, 走左上去隔離APM的書局逛一逛, 其實上去目的主要是知道有兩本新書出左, 所以就上去昅一昅, 一本是阿德的《標童話集》, 而另一本是小克的《偽科學鑑證》, 如果大家有買東touch睇的話, 基本上都知佢兩位人兄都常常係都東touch度連載佢地短篇漫畫, 依家出版社幫佢地係東touch連載的漫畫結集成一本書, 現價88大元, 不過, 就有85折, 即係$74.5, 不過, 我到最後都係冇買到, 都係慳d駛先得, 因為黎緊8月好似好多活動玩&黎緊又要交學費(too bad!!!) 。


講開點解我會識呢兩個藝術家的漫畫呢? 我呢d潮人為左跟貼潮流尖端, 個個星期都會買東touch解構下現時"興"d咩, 有咩hit緊....但係當我俾左錢拎到本東touch個時, 往往就先會翻到最後個幾頁先睹佢地兩位的連載漫畫, 雖然不是有什麼的連續故事, 但係佢地單單一個故事, 永遠都令人會心微笑。 如果大家有錢都買返呢兩本野睇下放係屋企, 得閒拎出黎睇下笑下都好呀!!!!

美妙人生

依家失業(秘撈姐!!!), 因為無錢出街玩, 所以除左返學之外放工都係返屋企多。 無線家陣係黃金時段播埋個套乜q『神鵰俠侶』, 我睇o個時以為自己部電視機有問題, 因為成套野三句唔埋兩句就起勢咁叫『姑姑, 姑姑, 姑姑~~~~~~』, 唔講仲以為自己睇緊Discovery Channel, 就係咁所以就轉左去睇亞視, 依家亞視8:30p.m播緊一套叫『美妙人生』的韓劇, 其實開頭睇o個時主要係因為賣廣告見到個小朋友好得意, 所以就有興趣睇, 當然都係多得無線既鵰兄的推波助瀾啦!!!

講返呢套劇, 其實個故事大綱都係一些老掉牙既故事, 但其小朋友實在可愛非常~~~



故事大綱:

《WONDERFUL LIFE》是一部幽默的愛情喜劇，一個是為了看望女友、好不容易踏上旅途的21歲男孩聖元，一個是頭一次出門到異國旅行的女孩世貞，倆人碰巧搭乘同一趟班機來到新加坡。但是在新加坡機場，倆人因為互相拿錯護照發生矛盾，因此結下了不解之緣。

聖元去尋找自己的愛人彩英，卻親眼看到彩英和其他男人卿卿我我的情景。為了安慰傷心的聖元，世貞陪他一起喝酒聊天，並說出了自己選擇到新加坡旅遊，是為了紀念死去的初戀男友的內心傷痛。兩人同命相連，喝得酩酊大醉，最終陰差陽錯地睡在同一個床上，做了不該做的事情……

第二天他們醒過來後大吃一驚，聖元雖然嘴上說要負責任，但還是偷偷一個人溜回了韓國。不久，世貞因為這〝一夜情〞懷上了孩子，當她知道的時候已經失去打掉孩子的機會。身為天主教的信徒，世貞也覺得不能違背良心，便決心一個人養育這孩子……如今，平時總是惹自己生氣的小兒子竟然要當爸爸了，儘管聖元才只有21歲。
但是聖元並不肯結婚，父親大發雷霆，痛打了他一頓，並威脅說如果他不馬上和世貞結婚的話，就斷絕父子關係，把他從戶籍上除名。迫於父親說要切斷資金資助的話，聖元硬著頭皮迎娶世貞。但是兩個人並沒有辦理登記手續。

婚 後倆人常常在爭吵中度過，不斷地互相折磨對方。聖元一直不喜歡世貞，認為他們之間根本沒有感情。等孩子長大能送托兒所的時候，聖元馬上表示要跟世貞離婚， 把初戀女友彩英找回來。 有一天，聖元竟然理直氣壯地把一直沒有斷絕來往的彩英帶回家。世貞開始覺得活在這世上毫無意義。在她傷心的時候，自己的鄰居，彩英另一個男朋友閔道憲給了 她真誠的安慰，兩人之間萌生出一份特殊的感情。

經歷了一連串感情波折的聖元和世貞，最後是在孩子的感化下慢慢開始和諧。懂事的小女兒經常逗吵架的父母開心，成了家裏歡笑的源泉。不太懂得愛情的聖元，終於通過世貞和孩子才懂得了真正的愛情。可是，這時二人發現孩子竟患上了血癌…….

大家有時間就睇下呢套韓劇啦, 好過睇o個套『姑姑』, 仲有聽講, 由於呢套劇結局太慘, 係韓國放映時, 有觀眾要求更改個結局為"Happy Ending"添~

濁不可耐之大浪灣

今日阿牛約左我去大浪灣曬太陽(嚴格少少係阿達同佢d同事去, 就約埋阿牛, 咁阿牛就約埋我啦!!!), 同行仲有ivan, 阿恩 & 阿文, 約定1:00p.m上去阿牛屋企一齊出發, 今次, 我地威啦!! 我地今次係深水步搭的士去大浪灣(call七折的), 12:45p.m 我已經準時去到阿牛屋企, 點知ivan兄仲未到, 等左一陣, 就收到ivan既電話話唔好call的士住, 大家一險疑惑諗住咩事呢! 妖, 原來條友仔"內急"家陣上緊黎阿牛屋企要放幾"兩"先走得人, 不過都好, 家陣去左, 總好過去到沙灘先黎咩既, hehe。

就係佢同"屎"神搏鬥期間, 阿文已經call左"七折的"係樓下等, ivan一攪掂, 我地就出發啦!!! 上車之後, 司機同我地講, 好少可有人由深水埗入大浪灣, 所以頭先阿文打電話問價個時, 佢自己一時間都唔知點覆。 haha!! 就係咁, 我地每人只需付出$36 & 半小時既車程就已經入到去大浪灣, 其實咁仲方便, 如果由九龍個邊搭地鐵去到筲箕灣再轉小巴都要廿幾蚊, 仲要起碼個幾鐘頭車程, 家陣, 俾多幾蚊又慳到時間, 幾好呀。 大浪灣, 黎就黎得多, 不過就唔係黎游水, 呢度既BBQ場係每年玩『環島行』個時既終點站, 次次都係夜麻麻黎, 今次先第一次係日頭兼黎呢度游水。

不過, 真係好多人, 成個沙灘都係人, 由於大浪灣係一個玩滑板勝地, 所以都有好多人拎住d滑板黎玩, 仲有呢個view俾半月灣望出去係闊好多, 仲有, 仲有, 呢度d女仔質素可以話俾半月灣高出幾倍有多, 所以我同阿達傾過, 以後我將會地放棄半月灣轉戰去大浪灣。 不過, 呢度唯一比較差的就係d水好污穢, 好多垃圾物體係身邊飄過, 仲要一群群咁黎, 我仲見到有條死魚係我面前飄過, 你話魚都死d水真係幾咁污穢呀, 但係呢一樣野並冇阻礙我地"活動"....hehe///// 玩到4:00p.m左右, 阿達d同事就走先(因為佢地早我地成2個鐘去), 阿恩同阿文都話走先, 原來阿文琴晚冇訓覺, 所以係烈日當空情況下頂唔蒲, 要走先。咁我, 阿牛, ivan, 阿達, 仲有阿達同事&女友就繼續係沙灘hea下, 玩下。 玩到差唔多6:30p.m左右, 就開始執野, 之後就各自歸家休息。

兩小時游水教練

琴晚同阿ling傾開電話, 唔知講開d咩, 講講下就話約今晚放工之後一齊去游水。

今日lunch o個時, 阿ling打俾我話小貞貞今日放早, 6:00p.m放工之後可以一齊去游水。5:30p.m放工準時走人, 搭架旺角小巴話咁快15min左右就去到九龍城, 於是就先join左阿ling先, 小貞貞話要執埋少少野先黎。 入到去九龍仔公園泳池, 換完衫出到去大池一望, 嘩!!! 好鬼多人, 應該話係好鬼多小朋友先岩, 7月乃係放暑假既時候, 真係唔同d, 可能呢排天氣炎熱, 太陽高照, 曬到d水滾晒, 一落水以為自己浸緊溫泉, 泳池d水一d都唔涼, 怪怪地咁。 一開始o個時, 自己走左去大池游左2個直池先, 可能人多的問題, 個大池d水質唔係幾得, 一路游係水既能見度簡直係可以話去到"零", 你好明顯係見到好多一粒粒係你面前。

之後, 就同左阿ling去左中池游, 一來o個邊d高度岩佢多d, 兩來個大池有幾條link俾人租左, 得返2至3條link俾人游, 成"揪"人聚埋一齊, 如果要游一個直池的話, 可以等同你打機一樣要不斷係度閃避人。去到中池就正式開始教水(其實唔係話教水, 只不過係睇下有咩地方要改善下姐), 嘩哈哈!!好型!!! 叫阿ling先游一次, 其實佢係識游只不過係游得唔夠快&唔去水, 常常只係游十幾步先去左兩, 三吋位置, 用"停濟不前"黎形容就岩晒, haha~~ 於是就同佢講左一d基本動作, 再改善下d游姿。 好快就游左2個鐘, 係呢個時候係唔係好似仲有個小貞貞冇出現到呢, 係泳到7點鐘左右, 我就打左俾佢問佢黎唔黎, 佢話岩岩執完野, 好倦想返屋企休息, 所以黎唔到。

由於一早約左小奶奶係我地游完水之後一齊食飯, 最後我地就去一間叫"洋一"的日本餐廳食dinner, 我同阿Ling就坐低等小奶奶, 小奶奶黎到, 第一眼見到佢成個人都殘晒, 鬼咩!! 病左成個月, 唔殘就有鬼羅。我地今晚就叫左個『豬柳燒餅』, 『雜菜鍋』, 『咖哩吉列朱排飯』, 『滑旦鰻魚飯』, 雖然都係一般菜式不過都算不錯, 不過, 係佢上『咖哩吉列朱排飯』既時候, 就俾我地發現到係d白飯度有條黑色頭髮, 於是拿拿臨叫個侍應黎幫我地換左佢, 雖然, 佢最後佢好似換左第二碟新既俾我地, 不過, 係唔係真係第二碟新既, 定係佢係咁e挑返起條頭髮, 再擺過晒d位呢, 就不得而知啦!!! 但係我地3條友都傾得開心, 傾到10:30p.m人地收舖, 就送阿ling返屋企, 一路行就同阿ling繼續傾計, 點知越傾就越多野傾, 於是就係九龍城公園行左兩個圈, 吹多一陣水。 傾到成12點, 送埋佢去屋企樓下, 就自已返屋啦!!!

中左就發羅!!!

今朝返到office坐低冇耐, 就有同事俾左張A4紙我, 係A4紙上面印左5張六合彩的副本, 張紙上面仲寫住:

『各位同事: 吃午餐有剩$89-, 所以買了六合彩, 祝各位好運!』

原來琴日食完個餐"千人宴"之後, 埋單仲有錢剩, 所以就拎左去買六合彩。真係好, 有得食又有得拎!!! 我就拿拿係部電腦出黎click小算盤出黎計一計先, 如果好彩中左頭獎, 頭獎當3千萬計, 3圍人即係36人, 粗略估計每人都分到8萬蚊左右, 嘩, 呢次發達啦!!!!

p.s: 天意永遠都唔係完美, 岩岩睇完新聞, 話今期六合彩冇人中頭獎, 不過就有4注中二獎, 每注派30幾萬, e, 都好過冇, 聽日返去check下張六合彩先。

由朝飽到晚

為慶祝大老細做完手術休養一個月後回歸, 今日lunch係陶源酒家同佢攪左個千人宴(講笑姐! 只係擺左3圍姐, 全部都係自已team d人), 呢間陶源酒家原來係官塘總算數一數二好食(唔好意思, 見識少, 今次都係第一次係度食飯), 今次食飯係預先收左錢先, 多謝位位$100, 正所謂俾咁多就真係食多d。 今日去到個時, 原來訂位的同事已經一早事先點晒的炒粉麵飯&點心, 唔駛坐低先睇下食咩, 呢個安排very good。 坐低冇耐就上菜, 先黎原隻燒鵝, 呢隻燒鵝皮脆肉滑(好似聽講話係$240一隻), 一個字"正", 之後就上荷葉飯呀! 帶子米線呀! 上完黎d之後就勁啦, 停不了的點心源源不絕的送上, 我諗閒閒地都起碼有20籠點心, 真係食到有少少頂到上喉嚨。

講開呢個大老細真係好好人, 好易話為, 冇咩架子, 仲時不時請我地食野添。 食完個Lunch之後冇耐, 有同事話大家陣間3點3唔好走開, 大老細會請食蛋撻仲要係泰昌個隻喎!!! 原來泰昌岩岩呢幾日係官塘開多間分店(原先得旺角新世紀一間), 所以就有得食新鮮熱辣的蛋撻, 泰昌除左出名蛋撻之外, 仲有就係佢既沙翁, 今日都有得食呀~~~食完個豐富午餐再加件蛋撻&沙翁, 爽呀!!!

今晚, 放工約左好友J小姐食飯, 同佢都隔左一排冇見啦, 我地慣性隔一排就會出黎相聚一聚, 呢個"一排"就岩岩過左, 所以今晚就出黎食過便飯順便傾下計啦!!! 放工之後, 7:00p.m左右就係銅鑼灣等, 原先諗唔到食咩, 於是就走左去加寧街(百德新街隔離)搵野食, 由於都係諗住傾下計, 所以就求其搵左間野食就算!!! 我地今晚食個間餐廳叫『九斗半』, 主要係食上海菜, 開頭諗住叫少少食就算, 但係花多眼亂, 於是J小姐就一手指住個2人套餐啦! 都好, 因為正正好有我最鍾意食的小籠包!! 一如以往, 一路食一路傾, 絡繹不絕, 大家好似有好多講唔完的話題。 就係咁, 一講就由7:00p.m傾到成9:15p.m左右先埋單, 不過, 我地兩個人可能食量唔太大, 最後d野都食唔晒, 又係一個字"飽"。

食飽就要消化下, 於是係銅鑼灣行左陣街~~ 到最後就係陪佢等巴士既時侯就傾開去旅行 講開我想去西藏, J小姐就好興奮咁話都想去坐下個青藏鐵路, 佢就話如果去的話就搵埋佢, 好, 一於要plan下去西藏先, 不過, 我諗最快都要等我下年年頭3月交左份dissertation先。

好朋友系列: 余弟兄

又一位中學同學, 中學時代佢乃係"攪攪陣, 冇幫襯"叛逆學生一名, 佢可以話係老師黑名單中應該係穩守住一定的極高位置。 佢同時係『促進"花名"生產力主席』一席, 經佢出手的"花名"真係可謂不勝其數, 數之不盡, 佢可以媲美一位婦產科的接生醫生, 將一個又一個的小生命(花名)迎接到呢個世界, 當然啦, 當年我地成班人都冇一幸免, 包括小弟在內。

佢係我識咁多個男仔之中, 最鬼"哦過", 記得中學時期時不時都一齊搭小巴返屋企, 佢係早過我落車但係佢永遠都唔會自己叫站落車, 永遠都係推我叫我幫佢叫落車(記住, 我係遲過佢好幾個街口先落車, 真係幾驚司機以為我玩野, 岩岩叫完落車又唔落, 過多幾個街口又叫過), 真係唔知佢係怕羞呀, 定係什麼的一回事。正所謂"哦過"的事, 唔止呢d架(難得有機會, 篤多d先, haha!!!), 佢舊時買新衫新褲, 佢自己一定會搵d朋友陪佢去買, 到買o個時就會問呢件好唔好睇, 個件得唔得, 唔講以為自己陪緊女朋友去買衫, 仲有呀(死~越講越興奮添!!!), 舊時同佢去買褲, 佢永遠都係係試身室試完就算, 唔會著出黎俾我地過目, 佢唔講有時真係唔知佢原來已經試左條褲, 我諗佢可能怕俾人睇蝕掛。

係我咁多朋友入面, 佢係唯一一個中學時候已經有自己夢想&理想的人, 係中學時代佢曾想過自己會成為馬榮成2號(香港漫畫書"天下"的主筆), 佢真係好想實現呢個夢想架, 何以見得? 就係中學o個時, 只要有一個直徑10cm x 10cm的空白地方, 佢就好自然咁拎起支筆就起勢咁係度畫公仔, 不過, o個時佢都係受"天下"個d港產式漫畫所影響, 次次見佢畫親都係得個幾款樣(唔係聶風, 就係步驚雲類), 所以, 你打開佢本教課書時就一定見到佢"筆跡"(唔係上堂take note, 係畫公仔個d)。 自畢業後, 佢依舊朝著呢個目標方向進發, 雖然佢唔係去左d咩漫畫公司做助理, 但係佢就從不間斷地去左不同的地方進修佢畫功上的技術, 佢係呢方面真係付出過不少。 經過不斷修煉, 佢既理念亦開始轉變, 現在的他不再是去當一名出色的漫畫師, 而是要當一位講求創意無限的設計師來, 雖然係理論上佢有持續增長, 但係係實戰上經驗始終欠奉, 佢到左近呢兩年先開始踏觸設計呢個範疇, 雖然表面上好像俾人遲人起步, 但還希望見到你有成功的一日。 (仲有中學o個時, 佢好型架, 佢同我講:『Gary, o拿!! 你keep住我d畫, 第時我出名之後, 你個d畫一定升到"巴巴"聲』, 上面個幅係其中一幅, haha)

係中學同學入面, 佢應該係唯一一個會單獨搵我食飯傾計的男同學(sorry, 我係比較受女士歡迎, wahahahha)。 我同親佢出黎食飯個時都會去我地的指定吹水飯堂, 該吹水飯堂座落於旺角洗衣街的『美而廉』, 呢間餐廳其實只係一間普通不過的扒房, 呢度有名你叫啦 - 平靚正呀麻! 兩條麻甩佬都係岩去呢d地方爛爛地feel的地方吹下水就最岩。 不過, 近呢兩年都少左, 你得閒就搵我啦, 我知我呢d兩袖清風, 幾時都咁得閒, 唔好得個講字呀, 我等你架!!!

有一點不可不提出的, 在此亦當我向余弟兄的忠告, 有時每個人心中都有些已過的憾事, 這些事在其他人眼中可能不足為道, 但係就唔好將呢d事當作笑話般看待, 你都唔想有人將你d唔開心野當笑話咁講架, 有時唔係講我什至乎在其他人的都不願再提, 或再掛在口邊, 希望你明白。 有時過左火位就唔再係笑話。

在余弟兄生命中, 不得不提的就是他的女友Melody, 佢簡直尤如一位馴獸師般令余弟兄由一隻張牙舞爪的老虎馴服至一隻牙都未出的小貓, 令佢那不修邊幅的人生, 完完整整的重新執拾起來。而 我地亦認定呢個世界上只有Melody先可以整治到余弟兄, 所以Melody你有咩事, 余弟兄激嬲妳的話就同我地講, 我地實撐妳架!!! 自從佢識左Melody之後, 就開始佢既信仰之道, 因為信仰令佢有更加大的轉變, 當然呢個係一個好事~~

其實, 我同余弟兄當中有一件鮮為人知的秘密, 嚴格D黎講, 其實係關於佢的事, 由始至今係我地朋友界中, 真係冇咩人知。當然啦!!! 我都唔會係呢度講出黎~~~waahahhaha

老規矩, 余弟兄你識做啦!!! 堅都寫到咁多野, 你冇理由少得過佢呀!!!

(下次預告: 蘇生)

我都威過下架!!!

早兩日睇新聞得知劉翔於瑞士洛桑以12秒88破世界紀錄的成績完成男子110米跨欄。 能贏取田徑短跑這種需要極大爆炸力的運動項目, 對於天生身型及體能不及於黑人的亞洲人來說, 絕對是一個鼓舞及驕傲。 曾看過報章上的一些報導說, 由於亞洲人的體格天生與外國相比是有一定性的距離, 故此於一些需要力量形的運動上如: 田徑短跑, 游泳等項目, 都很難見到有亞洲人的存在; 反之, 由於亞洲人的身段靈活多變, 於一些需要講求技巧的運動上卻能取得相當的成績如: 羽毛球, 兵兵球等。 所以, 劉翔他於賽後接受訪問時說：「誰說黃皮膚不能跑在黑人前面？我就跑給他們看。」, 呢一句說話可以講係超級型爆呀!!!! 因為証明他可以帶領亞洲人衝破那"不可能"的理論。

睇完劉翔的新聞後, 令我回想起細個o個時都曾經想過自己可以做一個運動員, 由小學四, 五年級開始已經當學校的田徑隊員, 到中學時期亦常於校內的陸運會上取得不俗的成績, 可恨的是, 由於中學時代學校並沒有什麼田徑隊, 所以就更加沒有什麼器材及導師給予訓練, 所以距離原先的目標亦越來越遠, 尤其是當睇見新聞或報紙報導講有些中學會為自己的學生提供器材及定時的集訓時, 總是用羨慕的眼神, 再問自己點解自己學校冇d咁既野, 不過, 唔係你就唔係你, 冇辦法啦!!!

依家d獎牌都已經擺左係一兩邊, 但係見講開田徑, 岩岩就搵返舊時中學d獎牌出黎睇下, 數一數原來自己都有成廿幾面大大小小的獎牌, 不過, 要數最"巴閉"的當然是於中學時有一年取得陸運會上的全場總冠軍的獎盃啦!!! 當時都幾威下架~~ 當時的全場總冠軍係係全個陸運會閉幕時, 所有同學都企晒係看台, 再由校長當住全校的同學仔面前頒獎架!!!

我猜我猜我猜猜猜

近日冇所事事, 有人send左段片俾我, 呢段片係一個台灣的綜藝性節目『我猜我猜我猜猜猜』的其中一個環節叫"人不可貌相"。 原來呢個節目歷史攸久, 同香港的"掌門人"有得Fight, 佢地係台灣足足播左10年咁耐, 佢地主持人由吳宗憲(佢由96年主持到現在呀!!! 好比香港的曾志偉!!)、柳翰雅(阿雅)(不過, 岩岩5月阿雅去左美國進修, 依家由不同女藝人代替)、楊丞琳組成。雖然吳宗憲的攪笑方式有點兒爛, 但係就真係可以令你笑不朧口。 所以推介下俾大家~~



可能, 呢幾日勁煲『我猜我猜我猜猜猜』, 自己不其然潛移默化左, 將佢節目入面d口頭嬋例如: "我的媽!!"(唔係粗口黎架), "so goodness", "不可能, 不不不不可能", 掛係口邊, 當然啦! 我只係有衝動想講姐, 未至於真係講出黎!!!



講返我個friend send俾我呢段片先, 係呢個節目的其中一個環節, 叫"人不可貌相", 個集請左5個"少女系男生", 何之為"少女系男生"呢? 就係講緊一d個樣十分似女仔的男仔, 粗d呢講就係"拿"型, 不過, 你睇下上面個段片, 呢個男仔真係好似女仔(真係真係真係好似女仔呀!!!), 唔講真係都唔知, 佢原來係男仔黎架, 死啦, 我睇個時都覺得佢好cute添!!!(死啦!!! 我係唔係好似好變態呀, 仔都岩!!!)

如果想睇埋其他個d可以去youtube度慢慢睇, 由於係唔駛錢, 又方便, 岩晒大家:
http://www.youtube.com/results?search=%E6%88%91%E7%8C%9C

捱夜世界杯後遺症

今年世界杯Finial o個晚差不多通頂睇波(加時完場兼互射12碼已經係朝早5:00a.m左右), 訓左兩個鐘就起身返工。 唔知係唔係個人大左, 身子唔係好掂, 到家陣(今日已經係星期三)個人仲係呆下呆下, 就算第二晚返屋企12:00已經攤左落床訓, 都好似仲未補得返, 仲未回到氣。

講返通完頂o個日返工d野先, o個日真係唔係好掂, 首先, 返工個時就搭小巴, 一上到車就好自然坐底訓覺, 係小巴度"鐘"下"鐘"下, "鐘"多幾下就成個頭就撞左埋塊玻璃窗度, 仲要唔止一次喎, 前後撞左兩獲"甘"。 個頭撞到痛唔緊要, 個問題係好瘀呀麻!! 我係自己坐單邊位第3 o個個位, 即係小巴有個位, 硬係冇啦啦升高左少少o個個位呢! 呢個位就係最養眼, 真係有咩事發生, 成間小巴d人都望到晒。

之後返到公司個人都仲係"拾下""拾下", 去完panty斟水飲啦!!! 返到埋自己個位度, 正當想閉目養神的時候, 有位同事行埋拍住我膊頭同我講:『Gary, 你係唔係跌左錢呀? 地下有疊20蚊紙, 係唔係你架!!!』(點解佢咁肯定呢疊野係我呢? 因為頭先個幾分鐘入面係得我行過條lobby), 摸一摸褲袋, 再諗一諗個疊應該係朝早搭小巴找錢的20蚊, 真係死火, 跌左錢都唔識執返。

唔好見我好似好精神, 查實, 你講野個時, 我都係條件反射式答你, 我個靈魂都唔知飄左去邊同埋冇經過大腦諗過, 我諗仲要過埋今晚先可以回到氣....

我的小時候

今日有讀者提議, 『你可唔可以試下唔寫日記,寫篇文貼係blog呀?』就係咁我就寫出呢篇文章出黎啦!!! (呢個topic好"娘"呀, 唔係我出架!!!)

"我的小時候"

古時的平民白姓們對至高無上的皇帝的專稱:『萬歲, 萬歲, 萬萬歲』, 意即高高在上的皇帝能活能活萬歲之多, 就這麼簡單的推算, 那麼我們這些平民白姓則只能活多至一百多歲了罷! 根據剛才的論據, 年屆二十五的我, 於這短短百年人生之中已經經歷了四分之一的時間, 可能小弟的心態蠻像老人家罷, 總喜歡向人提及自己一些老掉了牙的兒童往事, 但"分享"不就是這樣的嗎?

平日總愛聽老媽提及自己兒時的時事情, 於小時候尚在手抱嬰兒階段時, 本人在親戚界中已響負盛名乃係一名"超級聽話寶寶", 何以見得呢? 實況是本人兒時生性懶惰, 生活習慣除了吃之外就只有睡, 當然總會有睡醒的一刻, 但當我睡醒時只要你扭開電視機我就會動也不動乖乖的坐在床上, 況如讓魔術師摧眠了一樣, 是否很怪的啊!

可能幼時太少活動的關係, 所以就儲存了不少能量。 到了小學時代整個人就開始動了起來, 潛在的『頑皮細胞』開始以幾何方式不斷生長及分裂, 於每年小學的每一個年度見家長時, 老師總是對媽媽說:『你的孩子上堂時總是坐不定, 在家都是這樣的嗎?』, 還有一點, 大家還記得成績表旁總有一欄空格是讓老師們填寫對該學生的評語嗎? 我的評語永遠都是『過份好動』, 『經常坐立不安』等字眼或詞句, 雖然是這樣好動, 但我卻是一位十分遵守規矩的學生呀! 現在經常被人大罵本人那來這麼多不切實際的空想, 我想這一切可能是建基於兒時的生活, 不妨在此告訴大家一件事, 兒時本人因為頑皮的關係, 常常被母親大人用雞毛掃"侍候", 當用刑之後, 有一次本人忽發其想, 自己與母親大人同時各自拿起雞毛掃, 之後, 尤如西方武士般格鬥, 你一劍時我一刀, 場面驚險萬分, 當然, 這一切都是我的幻想中, 並無如是實踐過的。

回頭一望短短二十五年, 人大了! 人生的閱歷越多了! 學懂的知識多了! 眼界亦因而已擴闊了不少! 正因如此, 更覺得老媽的"老"了, "老"的不止於身體上, 心態上都出現退化的跡象。 到現在眼見長出滿頭白髮, 多行幾步亦會喘氣的老人家, 很難想像他/她曾在你的幼時, 曾替你捉蟑螂, 並將家中的一切大小事務一手包辦。在父母的心目中子女永遠的長不大的, 方便之門他們隨時為你打開。 老生常談的一句:『樹欲靜時風不息, 子欲養時親不在』, 你又有沒有發覺自己的父母已經在不知不覺之間老了嗎?

早知唔做咁快啦!!

今晚, 唔駛返學咁當然又走左去秘撈啦!!! 今晚返到office就攪咩d手尾, Holy俾我個疊data差幾頁就攪掂, 諗住快快手攪完呢疊野就可以做下其他野啦!!! 對左佢幾十個鐘, 次次返工都係對住個疊野, 真係唔再想再對住呢疊爛鬼data。

於是乎快快手用左個半鐘時間就攪掂晒, 諗住走去同Holy講話攪掂晒d野, 睇下仲有冇其他野攪啦, 點知佢話, 佢仲整理緊d data, 仲未有野俾我入住(吓!!!咁即係點呀!!!), 佢終於講出一句:『家陣應該暫時冇野入住, 一係你收工先, 我有野再入就打俾你啦!!!』, 唔係呀!!! 你個句說話簡直係直插我心, 冇野入你唔早講, 之前個疊野我就唔鬼同你入得咁快啦, 同你dum下波鐘先呀麻!!! 話晒同你段鐘計, 時間就是金錢, 你明知我有大把時間, 就係爭咁d金錢, 家陣我就係想用我d時間去換取你d金錢姐, 你咁都唔俾我, 實在大過可惡啦~~~咁我當然冇當面咁同佢講啦!!! 最多就係笑笑口同佢講說:『走先啦!!!拜拜!!!』

就係因為我既高效率, 令到我冇左份游水秘撈啦!! 唉!! 阿媽點解你生我生得咁鬼叻, 做野咁有效率架......

完場後15min

琴晚(應該係今朝)世界杯finial法國vs意大利, 上半場1:1, 呢個賽果去到完場, 其實去到下半場最後幾分鐘既時候, 我個心都不知幾想是但一隊入埋個球就算數, 因為實在太眼訓, 唔想睇加時, 但事實永遠事與願事違, 去到加時下半場, 成個人開始頂唔蒲 "忽"下"忽"下咁, 自己隻眼定晒格, 淨係睇到個電視機, 有粒白色一點野係度飛黎飛去, 如果唔係施丹頂人, 紅牌俾人趕出場, 之後聽到電視機有人叫囂的話, 如果唔係分分鐘真係係個廳訓著左。 睇埋加時完場, 再加埋12碼, 完場已經係差不多5:00a.m, 見個天都就快天光咁濟, 一完場, 再望多一望對面樓, 好多戶都熄燈訓覺, 呢張相係完場之後15min影的(即係5:15a.m時候影的), 冇晒人個個急急腳訓返兩, 三粒鐘, 之後就要起身返工, 我都係..... 訓先

開波前30min

睇下呢張相, 唔好以為仲有咁多人開住燈未訓, 就好以為呢張相係夜晚8, 9點鐘影喎!!! 今晚係世界杯finial, 新聞報紙話今晚全港有8成人會通頂睇波(包括我在內~), 呢張係我岩岩影過對面樓, 家陣係零晨1:30a.m, 即係話仲有30min就開波, 望一望對面樓, 原來真係有幾多人睇波個喎....

終於唔駛等

我呢d貧窮線下的人, 係琴日出糧終於有錢去剪個頭(係我真係窮到剪頭錢都冇, 真係可憐~~), 於是琴日返返下秘撈都特登打過打電話去搵James做booking, 為免重演上兩次剪個頭(要等成粒鐘剪個15分鐘)的情況, 今次我就book左12:00p.m, 呢個時間d人1.)要返工者, 一定未放工, 就算放左都冇咁快去到salon; 2.)唔駛返工者, 一定唔會咁早起身, 晨早流流走去剪頭髮, 哈!!! 我就係介紹兩者之間, 一我係唔駛返工, 但係我會好早起身去剪頭髮的人, 今次實掂呀!!!

今朝起身張開眼原來已經係11:00a.m, 醒起book左12:00p.m, 咁就快手快腳煮個麵食, 換件衫就出門口。 去到salon都係12:15p.m姐, 只不過係遲左少少, 我呢d讀理科, 果然係計算準確, 一切都係我計算之內, 我個theory果然係正確呀!!! 今日, 我應該係James第一個客, 我一坐低就搵人幫我洗頭, 洗完頭James就馬上幫我剪, 手起刀落, 可能今朝得我一個客, 其他客都未到, 所以James就好有耐性咁逐忽逐忽咁幫我剪&修。哈, 話咁快, 剪完, 沖水, 吹乾, set頭, 俾埋錢, 都係一個鐘多少少就攪掂晒!!! 其實, 我要的就係咁簡單之麻!!! 仲有, 係呢一次實驗中, 我所諗theroy, 學『大發現』話齋:『係得既~~~』

既然咁快手, 攪掂左個頭, 知道Alan今日會返poly搵料做下星期GE present, 於是打俾佢問佢係邊樹, 佢話係library搵緊書, 就係咁就返左poly搵佢, 睇下有咩幫到手啦! 話就話幫手都係越幫越忙, 係咁e, 幫佢搵左兩, 三本書就冇再攪其他野, 見時間尚早, 於是走左去CC(Computer Center)上網, 由於之前收有讀者阿牛的投訴, 話我交"行"貨, 於是就係CC度急急腳寫返之前一日的blog先(阿牛, 我係好有心架, 岩岩之前個篇"30分鐘暢遊北歐"係我係poly度寫架!!!), 不過, 好似用大學設施做d非學術性既野, 好似唔係幾好, 好彩岩岩家陣係放summer & saturday, 就冇咁多人返學校姐!!! 唔係就失禮人。 打到一半(個blog), 就收到Alan電話問我食唔食tea, 於是同佢去左canteen食野, Alan由上星期到依家, 足足病左一個星期, 差不多成個星期都唔見佢返工(佢係我同學之餘, 仲係我同事, 仲要係坐我前面個隻!!!), 食完個tea之後, 佢就返屋企, 我就上返去CC繼續我未完的blog(真係好鬼鬼無聊~~~), 其實差少少就打晒, 話咁快就攪掂, 鬆人。

p.s: 阿牛我記得你話要係你返工前要打好個blog, 我諗呢篇野, 你今晚都應該唔會去我個blog度睇, 你聽日就有野睇啦!!!whahahhahah

30分鐘暢遊北歐

琴日下午係office突然接到Kenix打黎的電話, 佢話放工之後約出黎食tea兼派手信, 原本放晚要返秘撈, 但係佢話過左今日之後唔知自己幾時先有時間再出黎見我地....因為佢將會入camp training20個week《佢就係之前曾提及過放棄現職, 原先諗住獨個兒去澳洲大半年生活(apply左working holiday visa), 點知突然收到海關offer, 家陣就將會轉戰去海關工作啦!!!》, 咁難得佢咁有心有買手信俾我地呢班舊同事, 我就算搵少幾十蚊都出一出去會一會佢啦!!!

出到去旺角, 就先同Kenix去買d入camp用品, 佢話原來入camp都有好多零星野要買, 海關有張list俾佢地, 提醒佢地有咩要perpare, 佢就俾個張list我睇, 我發現有樣野都幾細心, 入面有一項提及如果有戴眼鏡的同學最好就帶多副後備眼鏡perpare, 幾好, 諗得幾仔細, 照顧周到。 咁我都係陪佢去買電筒姐, 因為佢話入到camp之後, 到左10:00p.m成個camp site就會熄晒燈, 佢話如果有咩活動都要靠支電筒黎活動, 所以就一定要有支電筒仔幫手。 最後同佢去左旺角d爬山運動舖買左支 MAG Lite, 應該都夠佢用。

之後就同佢去左"扒王之王"食tea, 由於tea set只係去到5:30p.m, 而Simon & Eric都未放工, Kenix就打俾佢地問佢地食d咩, 順便幫佢地落埋order, 就係等Simon & Eric時候, 我就開始睇Kenix去瑞典及芬蘭時影的相, 就係我一路睇相時, Kenix又一路講佢係北歐的所見所聞, 其實佢係瑞典o個邊有親戚係度, 但係係十幾日的旅程當中有幾日佢係自己一個女仔揹住個背囊去芬蘭, 不過佢話自己一個人去旅行原來都幾悶, 尤其是係芬蘭o個邊冇咩野睇, 加上一條友仔行路都特別行得快過人, 令佢原定遊覽的境點時間都加快左, 令佢的行程計劃有點兒失左預算, 哈......

就係咁用左大約30min, 我一路睇相時再由佢一路簡述佢既北歐之旅, Simon & Eric佢地終於出現, 佢地黎到, 我就係時候出發返秘撈。 最後, 多謝Kenix你份手信.......希望你係camp入面順順利利, 到你passing out個時, 記住叫我地黎睇呀....努力呀!!!

咁就半年

今年好似過得特別快, 好似冇做過d咩, 又好似唔係喎, 係度summary下岩岩個上半年度做過d咩先!!!!

工作上: 1.) 係3月轉左個『虛名』, 人工冇加到, 反而工作量直線下滑 (哈, 仲好多d時間溫書, 做功課), 仲有, office電腦由windowXP轉用window98, 家陣仲係時不時會hang機, 煩!!!!

2.) 岩岩上個月尾開始返秘撈, 辛苦錢....辛苦...

學業上: 成功努力得到回報, 成績總算不俗, 1A & 1B。

健康上: 1.) 今年年頭痾左獲"甘", 到左岩岩個6月好似中期試咁, 唔知係唔係個天想考驗下我個身體狀態, 要我又呵多獲"甘"!! 不過, 今年大致上除左痾之外都冇咩特別大病, 係記憶中, 好似連小病都冇乜, 大幸, 大幸.....

2.) 年頭開始, 終於"的"起心肝, 晚晚做sit up, 做掌上壓, 總算有d成績, 家陣有d人問我係唔係去左做gym, 邊樹有錢呀, 不過, 咁做都有d野睇下家陣連去phyical既錢都慳返, 我家陣都有個唔係好顯眼的"田"字係個腹肌度架(點解得個"田"字, 因為sit up only練到腹肌, 所以個肚腩依然健在, 所以家陣我係一個有腹肌但有肚腩的人, 雖然唔係好mark sence, 但呢個係事實, wahahhah), 阿牛, 堅 & 阿達佢地可以做証架....不過, 就算係咁, 我都係肥仔一名....

朋友上: 1.) 係年頭終於同位小學同學Emmy就到時間出黎食餐飯(因為大家成日都好忙, 我得閒時, 佢又唔得閒) , 我地係差唔多十幾年冇見個面個隻喎(真係幾驚出到黎認唔到佢), 所以約到出黎食飯都好特別, 難得出黎佢仲要有手信俾我(佢岩岩去完旅行冇耐), 哈...真係多謝晒...Emmy有機會再約出黎食過飯呀!!!

2.) 係網上識到Macy呢個網友(應該話係我係佢hompaper留言), 經過佢發掘發現我同佢原來係同一機構工作, 所以依家都成日借公司上的方便係度傾計, 本人都係第一次見有人自我介紹話自己係一好多野講的人。仲有, 仲有, 佢係唯一用"顯淺"黎形容我的人。

3.) 今年唔知係唔係Denise寂寞難耐, 今年頭上半年, 佢得閒冇事就叫(點)我"班馬"出黎玩, 就係咁就係個突如其來的情況下, 約到BRE班舊莊員出黎食餐便飯, 自畢業之後, 同Denise, Cherry, 小菲, Harvey, 阿妹佢地時不時都有見面, 但係另一班莊員Carrie佢地就真係未見過, 所以呢次都係幾難得聚會。

4.) 上半年多左"貢"上去阿牛屋企食飯, 又同阿牛爸爸, 媽媽熟d。前排agnes'b satff sale個時, 阿牛媽媽都有去, 我係阿牛屋企妹仔呢個concept已經係牛媽媽腦入面根深柢固, o個次佢將我介紹俾佢d親戚個時, 佢話:『呢個係Gary, 係我屋企個妹仔』wahahahah!!!

活動上: 1.) 今年突破性第一年去參加『渣打馬拉松10km』, 仲有拉攏到同事Simon, Anthory, Kenix一齊報名參加, 第一年參加呢項活動, 雖然唔係跑得好快, 但都好enjoy &可以跑到西隧, 唔駛再係電視睇人地羨慕人地跑青馬大橋&西隧。

2.) 今年又係突破性一次, 相隔『馬拉松』一星期後, 就去玩『環島行』, 今年係第3年去參加『環島行』, 亦都係唯一一次完成唔到個賽程, 有少少遺憾...不過, 都好開心, 可以同simon , suki同埋小貞貞一齊玩, 其實時間已經比之前個一年快左好多, 只不過係當日天氣唔係咁好落住雨行係比較辛苦。

3.) 其實呢樣係上年年尾, 係上年christmas同左3位朋友, Dorothy, 阿恩 & 佢男友, 一齊去曼谷旅行, 第一次同呢班friend去玩, 又係另一種感覺, 好好玩, 想多d同唔同朋友去旅行。

4.) Disney開左一段時間, 同d friend唔係去Disney反而去左Ocean Park。 我家陣仲未去Disney架!!!

就咁數一數原來都........好似好忙咁, 尤其是係玩方面, haha///

係黎緊個下半年, 希望各方面都順順利利。你地又有冇睇下自己上半年做過d咩.......?

83分鐘

今日下午與jessica相約今晚放學之後一齊食飯, 由於下半堂是同學們做presentation, 自己個part一早就攪掂左, 於是就靜靜雞"鼠"左出去, 打俾jeesica佢話未放得, 自己就單拖去左library 3/F借左隻『三岔口』係度睇(library有個facility可以借d DVD or VCD睇), 其實, 都唔係對呢套野有咩特別興趣, 只不過, 係想消磨下d時間姐, 同埋由於時間關係都係睇左套戲一半左右, 所以都冇打算係度寫呢套電影的影評。

到左9:30p.m左右就join埋jessica去食飯, 我地去左尖東o個間"霸王山莊"食飯, 2個人叫左客小籠包(4粒), 雲吞雞(例), 仲有個抄飯, 我地落左單之後個侍應先拎d宵夜特餐menu出黎, 過份!!! 不過都冇計都落左單!!! 我地就一路食一路傾下計, 11:15p.m埋單走人。

返到屋企, 都11:45p.m左右, 今晚係世界杯四強德國vs意大利, 由呢一場開始無線都有得直播, 原本都諗住攪定個鬧鐘3:00a.m起身睇波, 但係見臨攤落床個時都已經成1:30a.m, 如果真係3:00a.m起身, 咁我咪訓得o個個半鐘, 我第二朝返工咪死硬。所以最後都係決定聽天由命, 自己起到就睇, 起唔到就睇"精華"啦~~~~


訓左一陣之後, 自己突然彈左起身, 望一望個鐘四點幾, 應該未完場, 於是就走左出廳睇下踢成點, 原來已經踢到下半場83分鐘, 仲係0 : 0, 就係咁就睇埋落去啦!!! 雖然冇睇上半場, 不過, 成場波加時部份都非常之好睇, 兩隊都互有攻守, 最重要係兩隊都冇諗住割禾青, dum波鐘, 真係一有機會就攻, 不過, 意大利係最後加時下半場2分鐘連入兩粒, 真係一句講晒『冇仇報』, 原先都一心諗住會互射十二碼, 家陣十二碼都慳返!!!! 不過, 真係覺得德國好慘, 臨尾先輸, 主辦國都係咁話完全冇仇報。 其實入埋第2球, 應該仲有少少時間(1-2分鐘左右啦!!), d人都冇再去開波(可能係無線cut左冇播掛), 鬼咩, 佢地都知冇可能追得返, 你估佢地係戴志衛or小志強個d"猛虎射球, 中場一開波就勁band埋去就入咩, 所以德國隊d人都已經坐左係地下喊......

我係帶菌者

呢幅就係諾沃克病毒

今日睇新聞, 見到有個標題話『變種諾沃克病毒於夏季肆虐本港』, 就係佢啦!!! 唔怪得之, 前排我痾左獲"甘"啦!!! 不過, 除左我之外, 前排身邊都有不同朋友都有痾嘔情況出現, 家陣都應該都好返晒, 雖然, 我同d朋友都冇去醫院做個測試, 不過, 直覺話我知一定係"賴"左呢隻病毒先會咁痾&嘔得咁癲~~~

仲有報紙話:"本港過去兩個月已有50宗安老院及 22 宗醫院爆發諾沃克病毒導致的腸道感染個案 ，單在醫院 已有165人染病，包括28名醫護人員，連同學校及1至4月份數據，上半年共99宗涉及1,301 人 ，較去年的42宗、643人染病上升逾倍 。" 不過照我所睇, 好似我呢d成日以為痾完就冇事, 死都唔去睇醫生的人仕, 大有人在。 所以, 我覺得個實際感染人數應該唔止咁少, 正如"六四", "七一"個d大遊行一樣, 政府永遠都係報細數, 人地明明計過有成4,5萬人, 佢地就話得2,3萬人, 足足少人地一半, 所以呢個數字擴大返幾倍就岩數, 話唔定, 你身邊都有一兩個係帶菌者。

如果, 你未出現痾嘔情況的朋友, 你地要小心, 大家可以留意有關特徵

日上三竿

連續由前晚(星期五)開始, 食完兩個Farewell dinner, 再去睇波, 琴日去完游水, 再打邊爐, 一連去左5個活動, 終於可以返屋企休息下。

今日屋企冇晒人, 家姐帶左兩隻魔怪返屋企, 媽又入左阿姨屋企, 加上琴晚係屋企訓到睇左一陣巴西vs法國, 今日訓到成下午點幾先起身, 我都好耐未試過咁晏起身羅!!! 天氣好好, 原本都想出去曬下太陽, 但係發覺琴日去沙灘個陣時見太陽唔係咁猛, 所以就廢事搽太陽油, 點知就係咁就"賴"野, 有d地方紅左(即係曬傷左!!!!), 所以, 今日都係留係屋企, 休養下。

偷得浮生半日閒, 真係好.....

陽光與海灘之家庭同樂日

琴晚阿牛同阿達一早約定左, 話今日一起身眼見如果冇落雨就去半月灣游水, 仲約定12:30p.m係西貢碼頭等。

琴晚睇完意大利入左3粒之後, 岩岩好上半場完結, 就頂唔順走左去訓覺。係個廳度訓, 訓到今朝8:00a.m左右, 聽到"bb"聲, 開頭以為自己發夢, 冇理到, 過多一陣, 又聽到"bb"聲, 好啦, 今次真係好清楚聽到, 就彈起身四圍望啦, 以為係d fax機 or 電話聲, 於是起身行去前面拎起部fax機聽下, 就唔係喎, 咁即係電話啦, 哎呀, 又唔係喎!!! 冇理有日光日白都撞到污穢野, 咁就去個廁所小個解兼洗一洗塊面清醒下先。 出到黎, 再訓過, 過多兩分鐘, 又聽到"bb"聲, 妖!!! 真係火都黎, 於是, 伸個頭出黎聽清楚d聲係邊"樹"發出黎啦!!! 原來係阿牛部手提電話每日的morning call的電話聲, 我就拿拿臨熄鬼左佢再繼續訓過。

到左11:00a.m阿牛就踢我起身, 話今日天氣好好去游水。 咁大家就快快手, 洗過面就落樓下食早餐(午餐先岩!!!!), 就係等緊早餐概時候, 阿牛就同我講:『你今朝做咩唔熄左左我部電話, 仲等我聽左咁耐, 心諗Gary做埋仲唔熄左我部電話去架...!!!』, 你明知係你部電話, 你都唔行出黎熄左佢, 仲等我成朝以為係d咩聲添!!!


食完早餐就搭小巴入去西貢, 入到去就去『麥記』join埋阿達。由於, 係臨時臨急先話去游水, 我當然冇帶"架生"啦!!! 於是就係西貢d舖頭是但買左條滑浪褲。出發去半月灣去也.......對上兩次黎都係有好多美少女, 今日, 可能係紅字, 仲有係71大遊行, 比較熱血青年都去左遊行示威, 成個沙灘我只係感受到d家庭溫暖, 唔講以為今日係國際Family Day(今日應該係國慶回歸日先岩!!!), 大大小小的小朋友四圍走。

今日就係係一個完全被家庭溫暖包圍住的沙灘, 曬到4點鐘就走人, 出到去西貢碼頭, 我就去運動場沖一沖身, 佢地3個就去食野先。

接住落

我地食完野之後就各自歸家, 而我就要趕返屋企換衫啦!!! 因為今晚約左Denise佢地打邊爐, 其實, 事緣應該係成個星期前Denise話Ernest今個星期會去旅行唔係香港, 再加上今晚係世界杯頭場係英格蘭vs葡萄牙, 佢就話不如約出黎睇波, 但係約極d人都係冇咩興趣, 咁到最後決定齋打邊爐。

我係西貢搭車出旺角, 再轉巴士返到屋企, 都已經成6:15p.m左右。今晚約左佢地7:30p.m去『方榮記』食, 於是我就極速沖涼兼換衫, 只需20min就可以出得門口, 6:35p.m出左去就拿拿臨走去搭巴士落旺角, 諗住係旺角轉小巴入九龍城, 岩岩醒起Denise話佢之前應該會係旺角買野, 於是落到旺角就打俾佢, 睇下佢係邊樹, 果然不出所料, 佢就係先達同Heavy仲行緊街, 頂!!! 約7:30p.m係『方榮記』等, 7:15p.m仲行緊街, 咁即係擺明想遲到姐。



就立即join埋佢地一齊行(哈!!! 加入遲到行列), 行多一陣就走去搭小巴入九龍城, 去到就接到小菲個電話, 等埋佢地就岩岩好齊人, 游完一日水, 打邊爐岩晒!!! 由於得5丁友, 所以就唔係叫左好多野食, 不過, 係今次聚會, 我地有重大既突破, 呢個就係我地暫定左係7月尾決定一齊返大陸搥骨玩一晚, 唔好睇少呢個決定, 因為我地成日出黎都係就咁食下飯, 冇咩其他活動, 難得有一次可以玩下其他野, 幾好呀~~~, 其實, 仲有就係Denise成日話要一齊去旅行, 呢次活動就當係一個好既開始先呀!!!

Denise知道今晚我地都唔睇波, 於是佢就約左佢堂姐一齊睇波, 食到10:00p.m就埋單走人, 散水。